لعلمك

لعلمك

إقرأ لي

دخلوا بكليك شمال :D

Blog Archive

السبت، أكتوبر 31، 2009

postheadericon فجأة كده ؟!!!


(1)







كانت قطة صغيرة .. من يوم ما اتولدت مامتها بالنسبة لها الحصن والأمان

كل يوم بتنام في حضنها وبتلعب معاها ولو نسمة هوا حاولت تيجي جنبها كانت مامتها تقف لها

اتعودت انها لما تجوع تجري على مامتها


ولو خافت تستخبى في حضنها

فجأة .. راحت تترمي في حضنها ضربتها وطردتها


كانت مستغربة والحيرة في عينيها تقتل


امبارح كنت نايمة في حضنك .. النهاردة هنام فين ؟؟


و ازاي انتي اللي تضربيني وانتي اللي كنتي بتحميني ؟؟


شوفت المشهد دا كتير أوي بحكم اني بربي قطط من صغري

ودايماً بتعذب من اللحظة دي

اللحظة اللي القطة الأم قررت خلاص ان بنتها كبرت ومالهاش مكان جنبها


اللحظة اللي القطة الصغيرة بتبقى الحيرة هتقتلها

ومش عارفة هي عملت ايه غلط تستاهل عليه ان مامتها تعمل فيها كده

فجأة كده .. بتلاقي نفسها كبيرة وهي من جواها لسة صغيرة


 


 (2)



وهي صغيرة .. أبوها هرب وساب الحمل كله على مامتها




راح شاف حياته وسابهم في وش التيار 

وكانت دنيتها كلها هي امها .. فجأة .. مامتها ماتت ولقت نفسها لوحدها

واتنقلت من بيت خالها لخالتها لخالها وهكذا .. كل شوية حد يبهدلها

كانت حاسة بخوف وانها دايماً مهددة

لحد ما اتقدملها انسان كويس .. طلع طيب أوي وبقى جوزها

بقى دنيتها كلها .. عوضها عن الأب اللي هرب

وعن الأم اللي ماتت

وحست بالأمان

وكانت الدنيا بالنسبة لها متجسدة في انسان واحد

جوزها ..

كان هو الأمل والأمان والحياة

وكمان .. أبو ابنها اللي بقى عنده سبع شهور في بطنها

....

زي كل شهر .. رجع في اجازة .. وسافر تاني علشان لقمة عيشه

فجأة .. تليفونها رن

وقالوا لها انه مات !!


فجأة كده !!


ايوة وهو بيركب القطر وقع تحته

فجأة كده بقت لوحدها

كان لسة حالاً بين ايديها وكانت بتودعه

كان لسة حالاً بيضحك لها وبيسألها مش عايزة مني حاجة ؟

فجأة كده !! فجأة كده بقت لوحدها ؟؟

من غير أمان ولا أمل .. مالهاش فعلاً أي حد في الدنيا

حتى ابنها اللي ما شافش ابوه لسة قدامه كتييييييير أوي عقبال ما يبقى سندها في الدنيا

........


احساس صعب اوي .. كأن حد شال من عليك كل هدومك وسابك في المطرة من غير غطا


_______________________


هتفهم قصدي أوي كمان لما تسمع دي



الثلاثاء، أكتوبر 27، 2009

postheadericon مجرد فضفضة



يقولون .. أن الحياة لا توجه أقوى ضرباتها إلا إلى اولئك الذين تثق تماماً أنهم قادرون على تحملها.. 

لذا .. حاولت أن أتظاهر بالضعف ، وأقنع نفسي به ..

لعليّ أخدعها فتكف عن توجيه ضرباتها القاصمة  لي ..

لكن هيهات .. يبدو أنها ليست بالسذاجة التي تصورتها !

*****

"
حبيبتى كنا فى ليل على طول ..
وكل مدى طريقنا يطول
قدرنا نخرج برة السور
خلاص حببتى بقينا فى نور

"

أغنية لمنير .. قديمة بس اكتشفتها مؤخراً



وحشني أوي  أشوف الدنيا برة السور


وبحاول مليون مرة اخرج برة السور بس الاقي حاجة تزقني تاني

حاسة زي ما يكون السور مكهرب .. كل ما اقرب منه يصعقني وارجع ورا تاني

و إن عرفت اخرج ..  كل ما اخرج برة سور الاقي  سور أكبر منه

خايفة أوي يوم ما اخرج برة السور

الاقي نفسي تهت :(

___________________________


* ملحوظة : انا شيلت الشاوت بوكس علشان في ناس اساءت استخدامه 
:(
الأحد، أكتوبر 11، 2009

postheadericon ارحمونا بقى





كل ما اقعد اقرا واتابع الخناقات في البرامج بين  الصحفيين


والمفكرين والكتاب الكبار على حاجة معينة مثلاً ..

زي مثلاً السادات .. هل هو بطل ولا عميل وخاين 


وانا بقول " خناقة " مش " مناقشة " لأنها فعلاً بتبقى خناقة 


وبعيدة تماماً عن الحوار 


المهم


تيجي تسمع الطرف الأول .. تحس انه صح

ومعاه أدلة وإثباتات 


ويقعد يحكي ويحلف ويستشهد بحاجات حصلت 


وتيجي تسمع الطرف التاني .. تلاقيه هو كمان صح 


وبالأدلة والاثباتات والمواقف والاستشهادات


بحس بجد اني تايهة وضايعة وسط الكلام دا


مش عارفة اصدق مين ؟؟


لو قريت بلاقي كل كتاب بيكتب التاريخ على مزاجه


لو سمعت الناس كل واحد بردو بيحكي على مزاجه


ولو حاولت أنا أدور على الحقيقة هلاقي مليون بني آدم كل واحدة معاه حقيقة مختلفة


وكلهم معاهم أدلة


وكلهم معاهم إثباتات


طب بعديييييييين ؟؟


هنعرف الحقيقة ازاي ؟؟


اتقوا الله فينا يا جماعة .. اتقوا الله في عقلنا يا حضرات السادة الكبار


يا حاملي أمانة الكلمة والتاريخ



احنا كده بقينا ضايعين وتايهين مش عارفين الحق مع مين 


ولا ايه اللي حصل بالظبط علشان نحكم 


وبالتالي .. ممكن نعيش حياتنا كلها مؤمنين بمبادئ باطلة 


أو بندافع عن باطل 


لأن كل واحد من السادة الكبار


 بيستغل انه هو الوحيد اللي لسة عايش ويحكي على مزاجه


علشان يصفي حسابات شخصية من قديم الآزل 


ومش حاسس هو بيعمل ايه في جيل كامل وأجيال هتيجي بعده


يعني بسم الله ماشاء الله كده 


احنا مافيش قدامنا حل غير آلة الزمن


هي اللي ترجعنا زمان تاني نشوف بنفسنا وبعدين نحكم بالحق ونرتاح بقى 



السبت، أكتوبر 10، 2009

postheadericon حوار مع .. سارة درويش

سارة .. لما جيت ابدأ الحوار بتقديمك ماعرفتش اقدمك كــ مين ؟؟

يعني انتي صحفية ولا مدونة ولا مذيعة ولا طالبة ؟؟

  اقولك على حاجة .. برغم اني بقالي 3 سنين بشتغل في الصحافة وبشتغل مذيعة إلا اني لحد دلوقتي مش قادرة اعتبر نفسي مذيعة أو صحفية ..
ومش بحب كلمة طالبة دي علشان بتفكرني بإني لسة بعاني في الكلية ..
فالأحسن نقول .. مدونة

- طيب ليه مش معتبرة نفسك صحفية او مذيعة ؟؟ 
هل دا ليه علاقة بانك شغالة في صحيفة الكترونية وفي اذاعة الكترونية ؟؟

 لأ مش لأني بشتغل في صحافة الكترونية ولا لأني بشتغل في اذاعة الكترونية ..
لأني حتى لما اشتغلت فترة في جريدة ورقية ما كنتش بقدر اقول على نفسي صحفية ..
بس يمكن لأني شايفة ان صحفية دي حاجة كبيييييييييرة اوي
وانا حاسة اني لسة ما وصلتش لكده .. ويمكن لأني لسة ما خلصتش دراسة


- بمناسبة الدراسة .. انتي مش شايفة ان حياتك كده زحمة اوي .. 
دراسة واكتر من مكان بتشتغلي فيه ؟؟ مش مؤمنة بإن صاحب بالين كذاب ؟؟

 لأ خالص .. عايزة اقولك ان الدراسة دي آخر حاجة بحطها في حساباتي .. 
ممكن يكون دا غلط
لكن انا مابعرفش اذاكر غير في آخر لحظة . دا غير طبعاً حضور المحاضرات
اما بقى بالنسبة للشغل ، ففعلاً حياتي زحمة اوي .. بس انا بحب الزحمة
لو ماكنتش اروح انام وانا مهدودة وميتة من التعب بعاني بجد
من كمية افكار سوداوية بتخليني اكتئب
فالشغل احسن اكيد من الاكتئاب ..خاصة وانا بحب الشغل


 وصاحب بالين مش كداب ؟؟

ههههههههه لأ مش كداب .. لأني مش ماشية في اتجاهين مختلفين


هي رسالة واحدة وبحققها عن طريق اكتر من وسيلة يبقى مافيش بالين


رسالة ايه يا سارة اللي بتحاولي توصليها ؟؟

احم .. كبيرة اوي كلمة رسالة دي ههههههههههه
بس عديها .. الرسالة هي اني عايزة اغير كل حاجة شايفة انها غلط
الرسول عليه الصلاة والسلام قال حديث شريف فيما معناه
من رأى منكم منكراً فليغيره بيده ، وان لم يكن فبلسانه
وانا شايفة اوضاع كتير غلط .. وشايفة اني الحمد لله عندي قدرة كويسة على الاقناع
فبحاول اقنع الناس بوجهة نظري ... واكيد ممكن تكون وجهة نظري غلط
علشان كده لما حد بيناقشني فيها اكيد بقبل النقاش

في ناس ممكن تعتبر دا غرور او ثقة في النفس زيادة عن اللزوم 
يعني .. لأنك لسة صغيرة عن انك تصلحي او تكون عندك الخبرة الكفاية الي تخليكي تقولي دا صح او غلط ..  ايه رأيك في الكلام دا ؟؟

 دي مشكلتنا الأزلية في مصر ،  او يمكن في الشرق كله .. اننا بنحكم على الكفاءة
والمعرفة والخبرة بالسن .. مش بالعقل والامكانيات .. في ناس كتير عندها ستين وسبعين سنة
وبتفكر غلط او تفكيرها يودي في داهية .. مش شرط أبداً ان كل حد صغير يبقى معدوم الخبرة
ومش كل حد كبير يبقى حكيم
دي بتكون نعمة من ربنا .. ومش ثقة بالنفس او غرور ،
لأني مش بقول ان كلامي صح ومافيهوش ولا غلطة
انا بس يمكن بركز مع حاجات بسيطة اوي وصغيرة في حياتنا بس ممكن تبوظ حاجات كتير


 طيب ليه اخترتي مجال الاعلام علشان تحققي  من خلاله الرسالة دي .. ليه مثلاً ما اختارتيش مجال الفلسفة .. او مجال الخدمة الاجتماعية ؟؟

 انا اخترت الاعلام وانا لسة صغيرة جداً .. ما كنتش فكرت في رسالة ولا يحزنون
اخترته من وانا لسة في اعدادي تقريباً وبحبه من قبل كده
من وانا لسة طفلة وبتلعب وكده .. لكن لما كبرت شوية
وخلاص بقى هدخل الكلية فكرت .. هو انا اللي هدرسه دا وهضيع اربع سنين من عمري فيه
هيفيد الناس بإيه ؟؟
لما ربنا يسألني عن الوقت اللي ضيعته في دراستي وفي شغلي بعدها هيكون ردي ايه ؟؟
ففكرت وحسيت اني ممكن جداً افيد الناس من خلال شغلي دا


 ايه الفرق في رأيك بين انسان عنده قضية معينة وانسان عنده رسالة معينة ؟؟

انا هقولك وجهة نظري .. مش عارفة هي صح ولا غلط
بس انا شايفة ان انسان عنده قضية يعني حد قرر يتبنى مشكلة معينة
يعني مثلاً زي قضية اطفال الشوارع
يفضل وراها ويحاول يعالجها ويكشف كل جوانبها ويكرسلها عمره كله لحد ما تتحل
ممكن ما تتحلش ولحد ما يموت هتفضل قضيته
لكن حد عنده رسالة مثلاً زي الرسالة اللي اخترتها واللي هي مثلاً تصحيح اوضاع غلط
في المجتمع .. فأطول واشمل .. الرسالة جواها اكتر من قضية
يعني الرسالة دي تشمل  قضية اطفال الشوارع وقضية العنف الأسري وقضية وقضية وقضية .. كده يعني

وجهة نظر .. طيب ياترى ايه القضية اللي تحبي تعالجيها وتديها اهتمام ووقت كبير ؟؟

 نفسي بجد اعالج بيوتنا .. بيوتنا فيها كمية اوضاع غلط لا يمكن حد يتخيلها 
من اول ما الزوج بيختار زوجته لحد الأحفاد .. مروراً بقى بتربية اولادهم و معاملتهم
وادارة البيت واختيار ازواج وزوجات اولادهم
والاوضاع الغلط دي بتفرز كمية عقد نفسية رهيبة ومشاكل في المجتمع اكتر واخطر
رغم ان الاسباب كانت بسيطة جداً وممكن بكل سهولة نتجنبها


 بمناسبة البيت واختيار الازواج  .. انتي اول لما بدأتي تشتغلي كمذيعة كنتي بتعدي وتقدمي برنامج اسمه " عايز الحق ؟؟ " وكان برنامج ليه طابع سياسي شوية .. وبعدين وقفتي البرنامج فجأة وبدأتي واحد جديد اسمه " جننيه تكسبيه " اجتماعي بحت .. ياترى ايه السبب ؟؟ هل دا سببه عدم نجاح الأول ؟؟


 لأ بالعكس .. الحمد لله عايز الحق ما فشلش .. بدليل اني اخدت لقب افضل مذيعة في اذاعة ميوزيكانا اللي بشتغل فيها بناء على استفتاء الجمهور .. وبدليل ان الناس لحد دلوقتي بتسأل عن عايز الحق .. بس كل الحكاية اني انا حسيت ان الكلام في السياسة لا بيقدم ولا بيأخر
خاصة واني ماكنتش بكشف اسرار ولا حاجات خطيرة
وحسيت اني ممكن اغير حاجة بــ " جننيه تكسبيه " وانا بميل اكتر لأني اغير

امتى هتبطلي كتابة يا سارة ؟؟

لما احس اني مش لاقية حاجة اكتبها


مش هتبطلي لما تلاقي الناس بطلت تقرا ؟؟

 لأ .. لأني مش دايماً بكتب علشان الناس تقرا


او بكتب حاجات وما استناش عليها تعليق لأنها بتبقى فضفضة مثلاً او كده
ساعات كتير بكتب حاجات وبخبيها ..


 في ناس بتقول ان تدوين المواقف  الشخصية اللي تحصل لك أو الـ " فضفضة " زي ما سميتيها مش حاجة مفيدة .. ايه رأيك ؟؟

 كنت فاكرة كده لفترة من الوقت .. بعدين بدأت احسها مفيدة لما الاقي حد يقول لي 
ربنا يكرمك انتي قولتي اللي جوايا ومش عارف اعبر عنه .. فكرة انك تريحي انسان وتعبري عن اللي جواه دي حاجة مرضية جداً .. ع الأقل بالنسبة لي


سارة .. نسيبنا بقى من حياتك العملية ونتكلم عن حياتك الشخصية شوية

ليه بتخافي من الناس يا سارة ؟؟ وليه بتهربي منهم ؟


انا والله بحب الناس جداً ، وبحب اللمة اوي ..
لكن مش بحب اكون مع ناس ممكن يحسبوا عليا الكلمة والحرف اللي بقوله ..
مش بحب كده بحب اكون وسط ناس على راحتي وعلى طبيعتي ..
لو مش كده ، بقعد ساكتة واتفرج على اللي بيحصل


  
سارة كتبتي قبل كده عن مواصفات فتى أحلامك .. الكلام دا كان بجد ولا ايه ؟؟

ههههههههههه مش للدرجة يعني .. هو اه في حاجات كتير بتمناها كتبتها
بس انا عارفة ان موضوع فتى احلامي دا أكذوبة كبيرة ..
أولاً لأني صعب الاقي البني آدم الــ " تفصيل " دا ..
وثانياً لأني ممكن الاقيه وما يعجبش هو بيا
ثالثاً .. لأني كبنت شرقية ، مستحيل اروح أقوله انت عاجبني تعالى اتجوزني :D





كتبتي قبل كده ... " كفاية بقى يا دنيا .. أنا صغيرة أوي على اللي بشوفه منك " ..
شوفتي ايه من الدنيا يخليكي تقولي كده ؟؟




والله مش عارفة .. انا ساعات بحس اني محظوظة وحياتي ماشية تمام


وباخد فرص كتيرة بسرعة ولو أي حد تاني مكاني ممكن ما كانش أخدها


بس للأسف .. حاجات كتير اخدتها من الدنيا .. وما كنتش عايزاها


واللي كنت عايزاه ما اخدتوش


في حاجات مصيرية قدرية .. بقول الحمد لله اللي ربنا اختارهولي احسن أكيد


لكن في حاجات انسانية كتيرة كنت محتاجاها وما لقيتهاش


وما ينفعش تتعوض ..


بس بشكل عام بقول الحمد لله


اما اللي شوفته من الدنيا فهو فعلاً كتير ع حد في سني


بحس اني شايلة هم كبير أوي بدري .. وحاجات كتير عرفتها في حياتي


و عيشتها محسساني اني 80 سنة وأكتر ...


فحسيت اني اكتفيت بقى مش قادرة اتحمل تاني


***********


احم احم .. ملحوظة صغننة .. الحوار دا انا اللي عملته مع نفسي


علشان كنت عايزة اوضح كام نقطة واجاوب على كام سؤال اتسألتهم كتير


وكمان علشان كنت محتاجة بجد اقعد مع نفسي وافكر في حياتي


انا بعمل ايه وليه




بث خلاص :)



 


  

 

 
الثلاثاء، أكتوبر 06، 2009

postheadericon صخب أنثى .. لكم مني تحية

تستحقون التحية وما هو أكثر منها 


على ما تبذلونه من جهد للمحافظة على حق كل كاتب في كل حرف كتبه


شكراً لكم .. 


واؤكد لكم أني بالفعل اريد الانضمام الى جمعكم الراقي 


ولم ينتحل أي شخص شخصيتي أو يستغل اسمي 



المتابعون

اعتبرها بيتك ♥

وِش القفص

خليك ورايا

دليفري..