لعلمك

لعلمك

إقرأ لي

دخلوا بكليك شمال :D

Blog Archive

الأحد، نوفمبر 29، 2009

postheadericon احميهم بكلامك !! إيه الحلاوة دي ؟




احميهم بكلامك !! إيه الحلاوة دي ؟

لما شوفت الاعلان دا حسيت ان فعلاً هو دا اللي بيحصل وهو دا اللي احنا عايزينه

مش عايزين نتكلف حاجة .. لا مجهود ولا وقت ولا فلوس ولا أي حاجة

احنا كل اللي علينا نتكلم والدنيا بقى تبقى تتظبط

عايزين الدنيا تمشي بحاجتين .. الكلام والنيات

ليه احمي ولادي بإني اعمل  خطوات الوقاية السليمة  مدام ممكن احميهم بالرغي ؟؟

ليه اتعب واشتغل علشان احقق كل احلامي مدام ممكن استنى قدام الزيرو تسعمية واعمل كل الحاجات دي ؟؟

ليه اكون ايجابي واكون مسلم على حق وارفع من شأن المسلمين


وبكدة ابقى بدافع عن الاسلام وعن الرسول الكريم


مدام ممكن انزل كول تون لأغنية ربنا يا ربنا واكون بكده ساعدت على نصرة النبي زي ما الاعلان بيقول ؟؟

وليه افكر في الطرق اللي احافظ بيها على جوزي واملى عينه وعقله وقلبه


مدام ممكن اشتري كاميه وهو هيترزع جنبي على الكنبة وما يسبنيش خالص ؟؟

ايييييييييه دا ؟؟ ايه اللي احنا فيه دا ؟

ايه السلبية والتواكل دول ؟؟


ليه عايزين كل حاجة تيجي بالطريق السهل اللي من غير تعب ؟

ليه عايزين كل حاجة في الدنيا تتقدم لنا على طبق من دهب

هتقولوا لي دي اعلانات وشغل دعاية .. لأ دي الحقيقة

هم عارفين اننا بنحب الرحرحة علشان كده بيشتغلوا على النقطة دي في كل اعلاناتهم

هم عارفين اننا عايزين بس البرستيج والمنظر فبيقدموا لنا كل اللي يساعد على اننا " نظهر " ايجابين ومتعاطفين و و و



كل حاجة عندنا في مصر بقت بالكلام ..

المسؤولين بيحسوا انهم عملوا اللي عليهم لما يتكلموا ويقولوا انهم قالوا لفلان وفلان يشتغلوا

والبني آدم مننا بيبقى راضي عن نفسه طول ماهو بيقول كلام صح

او بمعنى أدق الكلام اللي الناس عايزة تسمعه

بيقينا بنقول  " إننا عارفين ربنا " وبنقول " اننا ما بنحبش الظلم " وبنقول " اننا احسن شعب في الدنيا "

وبنقول ونقول ونقول .. وما بنعملش أي حاجة


الجمعة، نوفمبر 27، 2009

postheadericon عيد ؟ امممممم انا سمعت الكلمة دي فين قبل كده ؟!

ااااااااااااااااه صحيح دا النهاردة عييييييييييييييد


مش عارفة ليه عمري ما حسيت ان عيد الأضحى عيد ؟


يمكن لأننا غالباً مش بنسافر فيه ويمكن لأنه بيجي قريب من عيد الفطر فبنكون لسة ما اشتقناش للعيد


عامة .. انا حاسة اني في اجازة مش  في عيد


حتى كمان ما لحقتش صلاة العيد ولا سمعت التكبيرات فشكيت ان العيد لسة ماجاش :(


ماعلينااااااااااااااااااااا


كل سنة وانتم طيبين يارب


ويارب يكون العيد دا فرصة لبداية صفحة جديدة لكل حد متضايق من اسلوب حياته


ويارب تشوفوا احبابكم وما تنحرموا من اللمة والهيصة بتاعة العيلة أبداً





الأربعاء، نوفمبر 25، 2009

postheadericon مش قادرة أفهم ليه !






المعروف ان الانسان اللي ماشي غلط دا يا إما هو مش عارف انه ماشي غلط


يا إما عارف بس مش مقتنع بالصح أو مش حابب الصح


اللي مش قادرة افهمه بقى .. الإنسان اللي ماشي غلط ،

وعارف انه غلط ، وبيتظاهر بإنه بيعمل عكس الغلط دا 


يعني مثلاً في واحدة كنت اعرفها من كام سنة


البنت دي كانت مش عاتقة نفسها .. نميمة ع الناس تنم


توقيع وفتنة تعمل ؟، وبترسم على شباب وتحاول تشاغلهم


وبتكذب و وبتنافق و..... و.... إلخ 


وتلاقيها بتدرس في الأزهر ، و تدخل على المنتديات بأسامي دينية


وتلاقيها مافيش مانع انها تنزل مواضيع بتقول فيها مدى حرمانية النميمة والفتة والاختلاط و و و و


!!!!





وغيرها كتيييييييييييييييييييييييير


شوفت ولد زيها نفس الوضع كده .. بيتكلم على البنات 


وبيحاول يشاغلهم ويعلقهم بيه وبيدخل مواقع مش ولابد 


وتيجي تكلمه يحسسك انه راهب ما بيفارقش المصحف ولا سجادة الصلاة 


!!!!!








و النهاردة كنت بتفرج على بروفايل واحدة ع الفيس بوك وبشد في شعري


لأني عارفة كويس هي ايه وبتعمل ايه


والاقيها حاطة أدعية وأذكار وصور اسلامية !!


ليه كده ؟؟


وواحد اتجوز واحدة سيرتها تقرف وراح ملبسها نقاب علشان الناس ما تعرفش انها هي


الله ؟؟ لما انت عارف انها وحشة ومكسوف منها اتجوزتها ليه ؟؟


وواحدة تانية لبست نقاب من كتر ما هي سيرتها بقت هباب من اللي بتعمله مع الشباب


والمشكلة انها عارفة انه غلط ولسة مستمرة بعد ما لبست النقاب في اللي هي بتعمله


طب لييييييييييييه ؟؟



ليه لما انت شايف ان كلامك مع البنات غلط و المفروض انك مؤمن بكدة بتكلمهم ؟؟


لو قوولت لي مش مقتنع بكدة طيب ايه يخليك تقول كده للناس ؟؟!!


ليه لما انتي انسانة مش طاهرة وعفيفة بتلبسي حجاب وأحياناً نقاب 


وتعيبي كمان على اللي مش لابسة مثلاً نقاب وتتهميها بالتقصير والسفه !!


ليه  بيتظاهروا انهم حملان بريئة وهم مش كده 


لما هم مش مقتنعين بإنهم يكونوا كده بيقولوا احنا كده ليه ؟؟


ولو هم مقتنعين ان الصح هو اللي بيتظاهروا بيه ما بيعملوهوش ليه ؟؟



ليه تبقى عارف الطريق الصح فين وما تمشيش فيه


ليه بتعمل نفسك ماشي فيه واول ما الناس يدوك ضهرهم او يغمضوا عينهم 

تجري جررررررررررررررررري على الطريق الغلط


مش قادرة افهم بصراحة





______________________________________


تحديث مهم


التعليق دا جالي من " مجرد مدونة " عن الموضوع دا وبجد عرفت منه حاجات كتير كانت غايبة عني


علشان كده حبيت انكم تشاركوني قرأته 


بسم الله الرحمن الرحيم

بالنسبة للموضوع..
هو احنا ممكن نبص له من كذا اعتبار..
أول حاجة فى أشخاص مخطئين وبيعملوا ذنوب رهيبة، لكن بيقولوا فى نفسهم انا ممكن مش قادر ابطل الذنوب دى لكن موضوع انى احط مثلا خلفية اسلامية او دروس دينية، دى حاجة سهلة وبتجيب لى حسنات مش هخسر حاجة يمكن ربنا يغفر لى ويتوب عليا!!

ناس تانيين ممكن يكونوا فعلا مش عارفين انهم بيعملوا خطأ بس دول أكيد مش هينكروا على الناس الخطأ اللى هما بيقعوا فيه ..

لكن فى ملحوظة مهمة، انا ممكن اكون بعمل ذنب معين -ومحدش خالى من الذنوب- لكن مش قادر اتوب او بحاول اتوب، فلو شفت واحد بيعمل نفس الذنب هل أنكر عليه وأوعظه بالحسنى طبعا!! ولا لأ؟؟

العلماء بيقولوا انى لازم اوعظه حتى لو انا كنت بعمل نفس الذنب تصورى!!

وعشان كده فى جملة شهيرة بتقول "وجب على أصحاب الكؤوس أن يتناصحوا" يعنى ايه؟؟
يعنى لو اتنين بيشربوا خمر يجب عليهم انهم يقولوا كده "على فكرة يا جماعة احنا المفروض نبطل واللى احنا بنعمله حرام" طب ده مش يبقى تناقض؟؟

لأ مش تناقض لأنهم اذا ما عملوش كده هيبقى الذنب ذنبين:
1-المعصية
2-ترك الأمر بالمعروف والنهى عن المنكر
ولا شك ان ترك الأمر بالمعروف والنهى عن المنكر ذنب والرسول صلى الله عليه وسلم بقول:"من رأى منكم منكرًا فليغيره بيده فإن لم يستطع فبلسانه فإن لم يستطع فبقلبه وذلك أضعف الإيمان" أو كما قال


وده ممكن يخليه هو بالتدريج يبطل المعصية دى مادام كل ما ييجى يعملها يستحضر انه بيعمل حاجة حرام، واحدة واحدة هيكره المعصية إن شاء الله..

فى ناس بقى زى ما حضرتك قلتى كده بيعملوا المحرمات وفى نفس الوقت بيوعظوا الناس لمجرد انهم يتكبروا عليهم مثلا أو يحسسوهم انهم أتقى منهم وده خطأ شنيع وإثم كبير والعياذ بالله، لكن احنا ما نقدرش نحكم على اللى فى قلوب الناس!

احنا لينا بالظاهر والله يتولى السرائر..

لكن على كل حال لازم اللى بتوعظ أختها أو صديقتها دى ما تبصلهاش أبدا نظرة احتقار أو استهانة {كذلك كنتم من قبل فمن الله عليكم} ، ولازم توعظها بالحسنى دون شدة.. كما كان هدى النبى صلى الله عليه وسلم {ولو كنت فظًّا غليظ القلب لانفضوا من حولك}

لكن رأيى الشخصى، ان التناقض هو سمة بشرية تختلف نسبتها فى كل إنسان ..
وأخيرا
تقبل الله منا ومنكم صالح الأعمال
كل سنة وانتم طيبين
الأحد، نوفمبر 22، 2009

postheadericon Surrealism

Surrealism ..


The Imagination Is the Artist :)
















For More pics Press Here
السبت، نوفمبر 21، 2009

postheadericon لأ




لأ ..  حياتي مش ملك إيدك ، ومش من حقك تخططهالي .. حياتي دي بتاعتي أنا 

ربنا إدهاني أنا وهيحاسبني أنا عليها ..

لأ .. انت ماتعرفش مصلحتي اكتر مني ، لأني عارفة نفسي أكتر من أي حد

لأ .. مش هسكت بعد كده على حقي ، ماحدش مستاهل أتنازل علشانه عن سعادتي والحاجة اللي تبسطني 

لأ .. مش هخاف من مواجهتك .. سكتت سنين وبردو مافيش حاجة بتتغير واعتبرت سكوتي حق مكتسب

لأ .. مش همشي جنب الحيط لأني هبقى أول واحدة تموت لما الحيطة تقع

لأ .. مافيش حاجة اسمها مستحيل ، لو عايزة حاجة بجد هقدر أعملها ..  ولو فشلت مرة واتنين وتلاتة أكيد في يوم هنجح

لأ .. مافيش حاجة اسمها مافيش أمل .. طول ما ربنا موجود يبقى في أمل

لأ .. دا مش اسمه رضا بالنصيب .. دا اسمه استسلام وضعف وجبن

لأ .. أنا مش بنفخ في قربة مخرومة ، حتى لو نتيجة شغلي مش ملموسة كفاية اني حاسة اني بعمل حاجة .. والثواب عند ربنا مش هيروح 

لأ .. كله مش محصل بعضه ربنا سبحانه وتعالى قال

بسم الله الرحمن الرحيم

‏﴿ قُلْ هَلْ يَسْتَوِي الَّذِينَ يَعْلَمُونَ وَالَّذِينَ لا يَعْلَمُونَ ﴾ ‏[‏الزمر‏:‏9‏]‏‏ 

صدق الله العظيم

لأ .. أنا مش هعمل حاجة طول ما انا مش مقتنعة بيها .. وطظ في أي حد عايزني أرضيه على حساب نفسي 

لأ .. مش هسمع أي كلام وحش عن أي حد ، لأني ما احبش اكره حد وما احبش اني اسمع كلام زيه عني

لأ .. مش عايزة أقرب من حد ، انا كده مرتاحة وحياتي فيها ناس عندي بالدنيا بحالها

لأ .. مش هتغير علشان انت عايزني اتغير .. أنا هتغير لو حسيت إني محتاجة أتغير 

لأ .. مش هنافقك علشان احسسك اني بحبك .. أنا هقولك الحقيقة لأني بحبك

لأ .. مش هخبي واداري وجهة نظري أو رأيي في أي حاجة لأن " كل الناس " رأيها غير كده 

لأ .. مش معنى ان كل الناس مقتنعة بحاجة تبقى الحاجة دي صح ، 

على أيام سيدنا ابراهيم كان كل الناس مقتنعة إن الاصنام هي آلهتهم ماعدا سيدنا إبراهيم .. 

وكانوا كلهم غلط وهو لوحده اللي صح 

لأ .. مش هسمح لأي حد إنه يعاملني بطريقة ما تناسبنيش .. اللي عايز يدخل عالمي لازم يلتزم بقوانينه 

لأ .. مش هنفذ أوامرك من غير تفكير ، لأن الحيوانات  الأسيرة بس هي اللي بتعمل كده .. وأنا ربنا خلق لي عقل علشان افكر بيه



postheadericon هتشتري الكتاب .. تبقى حبيبي وكفاءة



أغلب الدكاترة في الكلية بنشتري كتابها علشان ورقة البحث وترمي الكتاب لأنه ما ينفعش ببصلة


وفي دكاترة - نادرة - بتستفيد من كتابها حتى بعد ما السنة تخلص


المهم ان كلنا عارفين اننا بنشتري الكتاب علشان البحث .. وبنعمل البحث علشان الدكتور يتأكد اننا اشترينا الكتاب


عارفين .. وساكتين .. وراضيين


والموضوع ماشي من تحت لتحت فلة جداً


لكن بقى التهديد يبقى عيني عينك كده ؟!!
حاجة مستفزة أوووووووووووي


الدكتور وهو بيشرح - او بيعمل ما يسميه شرح يعني - بيدينا مثال على الخبر


وعلى الخبر المفسر والمجرد


يقولك الخبر المجرد لما نقول



" د / عبد السلام سقط دفعة صحافة طنطا كلها "


أما الخبر المفسر بقى لما يقول :



" د / عبد السلام سقط دفعة صحافة طنطا كلها علشان ما اشتروش الكتاب !!! "


حاجة قمة في الـــــ ........
مش عارفة الاقي وصف مهذب بصراحة




يعني احنا متحملين انه بيخلينا نطلع من بيتنا الساعة 6.5 الصبح علشان نلحق محاضرته


متحملين انه بياخد غياب والمحاضرة مالهاش أي لازمة


بنروح المحاضرة علشان يقعد يحكي لنا قصة حياته


بيحكي لنا كل محاضرة قصة كفاحه واتخرج امتى واخد الدكتوراه امتى


وبيحكي لنا على بيته الــلي - عقبال عندكم 3 ادوار - وانه لازم يصحى بدري علشان يرش السقف


وبعدين يدي العمال المفتاح ويجيب الطي اللي ناقص و .......... إلخ الخ كل محاضرة كده


كأن المادة اسمها " محاضرات في السيرة الذاتية لدكتور عبد السلام " مش محاضرة تحرير صحفي


كل دا مستحملينه ومكتومين .. كمان يجي يقول اللي مش هيشتري الكتاب هيسقط ؟؟


ويقول لنا بصريح العبارة كده


" ادفعوا ادفعوا فلوس الكتب اشمعنى بتدفعوا فلوس في الشيبسي والحاجة الساقعة "


وانت مااااااااااااااااااااااااااااااااااالك ؟؟؟

انت مالك يا اخي


محسسني  اننا في ابتدائي



بندفع فلوسنا في الشيبسي والحاجة الساقعة




وختمها بقى بإيه ..


مسك كشف الاسامي ونادى اسم اسم .. واللي حجز الكتاب .. يبقى " موفق يا بني .. ناجح ان شاء الله " واللي ما حجزش


ما حجزتش ليه ؟؟


ويوقفه يستجوبه


طب انت ايش عرفك ما يمكن ظروفه ما تسمحش يا أخي انت مالك ؟؟ مالوش دعوة


وفي الآخر .. الكتاب ولا ليه أي لازمة


نص الصفحة كلام ممسوح وخط صغير


ولا بتفهم منه اي حاجة في اي حاجة


انا قولتها حكمة من زمااااااااااااان


" الدكتور اللي ياخد غياب في محاضرته يبقى واثق ان كلامه مالوش أي لازمة وإن الطلبة اكتشفوا ان كلامه مالوش أي لازمة "






الخميس، نوفمبر 12، 2009

postheadericon عايش صح ولا عايش الدور ؟




في ناس كتير بتحاول تعيش صح .. بتحاول تعيش حياة ايجابية وبتحاول تتجنب الأخطاء اللي شايفاها في المجتمع


فيكون رد الناس عليهم - بدل التشجيع - هو .. ايه ياعم دا البني آدم دا عايش في الدور أوي .. دا خنيق


احياناً بتتقال من وراهم ، واحياناً بتتقال في وشهم


رغم انه هو بيعمل الصح ..


يعني مثلاً ما يرضاش يرمي حاجة في الشارع ولو حد من اصحابه حاول يرمي بيقول له ما ينفعش ترمي حاجة في الشارع


وكده ما يصحش واحتفظ باللي عايز ترميه لحد ما تروح البيت او تروح مكان فيه باسكت وارمي فيه اللي انت عايزه


أو مثلاً لما حد يدخن في الميكروباص يقول له بعد اذنك ما تدخنش في مكان مقفول وضيق كده علشان ما تضرناش


أو مثلاً يكون بيحب القراءة ولما يكون في مواصلات مثلاً يقرأ حاجة بدل ما هو بيضيع وقت


وغيرها وغيرها من المواقف ..


دا بيكون انسان فعلاً حابب يكون ايجابي ، ومش بيخاف من الناس ومن رد فعلهم على تصرفه اللي هو صحيح لكن للأسف عكس الشائع في المجتمع


فبالتالي بيكون تصرفه غريب وأحياناً مثار سخرية من الناس ..


في ناس قوية وبتتحمل نظرات وتعليقات الناس لحد ما الناس تقتنع أو تتعود على سلوكهم دا أو تزهأ من التريأة فتسكت عنهم


وفي ناس ما بتبقاش بالقوة دي وبتضعف وتستلم وتقول " يعني هي جات عليا أنا " " هو انا يعني اللي هصلح الكون " ودا غالباً بيكون انسان مش واثق في نفسه أوي


أو انسان مش مقتنع أوي باللي هو بيعمله


وكمان في ناس بقى عايشة الدور فعلاً .. يعني بتحب تعيش دور الايجابي ، والانسان الصح .. وبيعمل كل الحاجات اللي اتكلمنا عنها فوق دي من باب حب الظهور وبس


مش عن اقتناع بإن دا الصح أو بأهمية انهم يكونوا ايجابيين


ازاي بقى تعرف البني آدم العايش في الدور ؟؟


تعرفه لما تشوف تصرفاته في مكان ماحدش يعرفه فيه .. هتلاقيه عادي بيرمي أي حاجة على الأرض وهتلاقيه بيسكت عادي على السجاير ومش بعيد يكون هو نفسه بيدخن


وتلاقيه ما يفتحش كتاب ويقعد يقرا الا لما يلاحظ ان في حد واخد باله منه ...


الانسان العايش في الدور مش بيعيش بجد لأ دا بيمثل انه عايش


ياترى بقى انت مين ؟؟


انت عايش صح ؟ ولا عايش الدور ؟؟ ولا عايش وخلاص ؟؟


صحيح هي كلها عيشة .. بس الفرق كبير



- نُشر في مجلة شخبطة بتاريخ 5 نوفمبر 2005 - 
الأربعاء، نوفمبر 11، 2009

postheadericon معلش




مابحبش أشتكي للناس .. كل ما يسألوني عن حالي بلاقي لساني يقول لهم



"زي الفل " أو " الحمد لله تمام "


رغم ان جوايا موجوع .. ورغم اني كنت عايزة أقول لهم تعبانة أوي

يمكن يبطلوا يحسدوني على ضحكتي اللي ما بتفارقش وشي


لكن انت .. بحب أوي أقولك كل اللي جوايا  .. كل اللي مخوفني وتاعبني .. 

علشان بحب أوي تقول لي معلش 


معلش بتاعتك غير بتاعة كل الناس


معلش بتاعتك بتخليني أسامح كل الدنيا .. 

بتخليني أحس ان كل حاجة في الدنيا دي تهون مدام انت قولت لي معلش


معلش بتاعتك بحس كأن ليها ألف إيد بتطبطب عليا بحنية


وكل ما تطبطب عليا مرة كل ما تشيل من على ضهري هم جديد








الأحد، نوفمبر 08، 2009

postheadericon كتاب " زوجتي رفيقة عمري " حاااااااجة تنقط :(

اسم الكتاب : زوجتي رفيقة عمري

رواية مع عشرون قصة وحكاية (د اللي مكتوب على الغلاف )

للكاتب : عوض أبو جعفر ( حد سمع عنه قبل كده دا ؟؟ )

للأسف .. الكتاب كان صدمة بالنسبة لي .. لأني استعرته من دار الكتب وكنت متخيلة أنه ممتع

أو على الأقل مسلي .. لكن للأسف الكتاب لو هقيمه هديله بالسالب كمان مش حتى صفر

اولاً بيقولوا ان الكتاب فيه عشرين قصة ورواية وانا مش شايفة ان فيه أي رواية

ثانياً : الصور اللي في الكتاب اللي بتسبق كل قصة خاصة بالكاتب وأسرته .. وكأنه كاتب قصة حياته وقصة اسرته

لكن القصص بتقول غير كده خالص

ثالثاً : اسلوب الكتابة فيه أخطاء شنيعة ..



زي مثلاً الفقرة دي:

" - اليوم الجمعة يا حاج .. كالعادة تحب تشرب الشاي في المكتب ، والا في الفراندة ؟؟
- في المكتب إن شاء الله .. لأن اليوم .. موعدي مع المذكرات أريد ان اكتب كل مذكراتي منذ طفولتي وحتى وقتنا هذا .. بدءاً من اليوم .
- طبعاً ا حاج .. المذكرات شيء ضروري في حياة الانسان وهي من أجمل أنواع الكتابة الأدبية التي يمارسها الإنسان في حياته  وخاصة عندما يتوفر لديه الوقت بعد سن التقاعد "

طبعاً الحوار لو كان بالعامية كان بقى أجمل ، لأنه كده عامل زي الرقص على السلم

وكمان مابيخليش القارئ يندمج في الحوار ويحس بحميمية مع الكلام

تاني نقطة حشر المعلومات في الكلام حول الكتاب لكتاب مدرسي

وبعدين عايزة اعرف من امتى المذكرات شيء ضروري في حياة الانسان ؟؟ على اساس اننا كلنا سعد زغلول مثلاً ؟؟

محسسني ان كل مواطن بيمشي بمذكرات تحت ايديه .. حاجة تنقط

وكل الكتاب بالطريقة دي بيحشر أخلاقيات ومثاليات في الحوار .. عنده كلام عايز يقوله مش عارف يقوله ازاي عمله حوار

مثلاً زي

"- قولي لي يا ست ماما ايه اخبار بابا وهو على المعاش واخبار الشغل عند حضرتك ايه ؟

- تمام كل شيء تمام بابا زي الفل كل جهده ووقته في الحديقة والأرض المزروعة وقراءة القرآن والصلاة في الجامع ، وفي بعض الأوقات يقلب في اوراقه ويكتب مذكراته وإنت عارف الراديو قاسم مشترك معاه دائماً .. والتليفزيون ساعة المسلسل . لما يكون محترم وهادف والأحاديث والموضوعات الهامة أيضاً تأخذ اهتمامه

- لكن برامج الراديو اليومين دول زي الفل والإذاعات المصرية بقياداتها الواعية شدت معظم المثقفين إلى برامجها المتنوعة والمدروسة والمعدة بعناية وهم جميعاً في سباق نحو الرقي

تحس انه خطاب للحزب الوطني :(  "

ومن دا كتير لو كتبت كل حاجة تنقط في الكتاب هكتب الــ245 صفحة

انا كنت بكتب بالاسلوب دا .. أيون وانا في رابعة ابتدائي والله

ولما دخلت اعدادي كنت بتكسف من اللي أنا كاتباه دا

الأسلوب ولا أسلوب برامج الأطفال بتاعة القناة السادسة مش حتى الأولى  

والأفكار في القصص مش مبتكرة ولا جديدة

وما بيحاولش يعمل أي حبكة

بجد الكتاب دا اهانة لذكاء أي قارئ :((

الجمعة، نوفمبر 06، 2009

postheadericon عن " علي أمين " و " ليلى عباس " و أشياء أخرى


أقرأ حالياً كتاب عن علي أمين انساناً وصحفياً .. 
بغض النظر عن الحماس الذي اشتعل بداخلي بعدما قرأت عنه

وعن نشاطه وكيف كان بمثابة شعلة من الحماس والحيوية
وحب الصحافة إلى حد العشق ... وعن مدى الأسى الذي أصابني لأني لم أقابله أبداً 
بغض النظر عن كل هذا .. هناك قصة واحدة في الكتاب أدمت قلبي
القصة عن فتاة تدعى " ليلى  عباس " أصيبت بالسرطان في ريعان شبابها
وعرف الأطباء أن وقتها في هذه الحياة لا يتعدى عشرة شهور إن لم يكن أقل ...
وعرفت الفتاة .. وعرف " علي أمين " بطريقة ما  ،

ولم تكن تربطه بها أي صلة ولا سابق معرفة .. لكن القصة أثرت فيه فكتب عنها وناشد الناس  أن يساندوها في محنتها .. 

وانهالت الخطابات المتعاطفة مع ليلى والتي حاول بها الناس التخفيف عنها بأي طريقة

ومن بينهم .. خطاب من شاب يطلب الزواج بليلى متمنياً أن يسعدها في آخر أيامها

وكان يطلب من علي أمين التوسط لدى الفتاة كي تقبل به زوجاً

وتحمس علي أمين للفكرة بشدة ..


حتى أنه اشترى - من ماله الخاص - فستان الزفاف للفتاة من أجمل بيوت الأزياء وأكبرها في القاهرة

واشترى وأسس لهما بيت الزوجية  وحشد لها أكبر عدد من أشهر مطربي مصر
حتى إن عبد الوهاب بنفسه غنى لها في زفافها
ونجح في أن يرسم هذه الابتسامة على وجهها ...


وعاشت الفتاة أجمل أيام حياتها .. ثم انتصر المرض اللعين ورحلت عن الحياة
لكنها رحلت  وقد استمتعت بحق بكل دقيقة فيما تبقى من عمرها
....
ما أبكاني في هذه القصة هو ما حدث بعد 16 عاماً من وفاة ليلى
وهو إصابة " علي أمين " بنفس المرض  !!

السرطان 

لكن علي أمين .. لم يجد من يسانده ويناشد الناس لأجله

أو الحقيقة أنه لم يترك لأحد الفرصة كي يفعل ذلك
لم يهمد علي أمين لحظة حتى بعد معرفته بمرضه
كان يعمل بنفس الحيوية والتفاني والاصرار .. 

وعلى شفتيه نفس الابتسامة المتفائلة
وحين يشتد عليه المرض يصرخ قائلاً "  ياااااااارب " ويعتصر بيديه مكان الألم كأنه يريد ان ينتزعه بيديه من جسده
كانوا يقولون له : استرح قليلاً لا تجهد نفسك في العمل
وكان يقول لهم : " مافيش وقت .. انتوا ليه مش مصدقين ان مافيش وقت "

ما أبكاني هو أني اعرف احساسه وأعانيه .. 
نفس إحساس أمل دنقل حين قال " العمر أقصر من طموحي والأسى قتل الغدا
وما أبكاني أيضاً هو أني حين انطلقت في حملة " السرطان لا يعني الموت

وظللت لفترة التهم كل معلومة تصادفني عن هذا المرض اللعين
راودني هاجس مرير بأني سأواجهه يوماً ما وكان هذا يزيد من إصراري في مواصلة الحملة 

*****
مما أعجبني كثيراً في قصتي " ليلى عباس " و " علي أمين " أن كلاهما واصل حياته وكأن شيئاً لم يكن رغم معرفته بمرضه
على عكس الكثيرين ممن ينهارون وتنهار حياتهم وحياة المحيطين بهم فور علمهم  بإصابتهم بالمرض
الموت آتٍ في ميعاد محدد ... لن يفيدنا البكاء ولا الحسرة 
لن يفيدنا أن نظل أسرى فراشنا .. يجب أن نتحرك ، أن نعمل أن نستمتع بالحياة 
ألا نترك فرصة للمرض كي يفسد علينا ما تبقى من حياتنا
علي أمين ظل يتحدث عن المستقبل حتى اللحظة الأخيرة 
كان متفائلاً رغم انه يعلم أن أجله قد اقترب
كان يتحدث عن الغد رغم أنه لم يكن متأكداً من وجوده غداً
ونحن نتحدث بحسرة وعجز عن الأمس رغم أننا أصحاء !!!


الاثنين، نوفمبر 02، 2009

postheadericon Zooooooooooooooom






" بطل بقى تتفرج على حياتك كأنها فيلم مالكش دور فيه "


- مشهد من فيلم لعبة الحب -

الأحد، نوفمبر 01، 2009

postheadericon النعامة والطاووس

النعامة والطاووس .. وجهان لعملة واحدة ..



فالنعامة تدفن رأسها في الرمل بدلاً من مواجهة مشكلاتها ....

والطاووس يتعمد إظهار فقط أجمل ما فيه ..

رغم أنه فارغ من الداخل ولحمه عديم المذاق ..


ونحن ايضاً .. نحن الوجه الثالث لهذه العملة ،

لو أن هناك عملة بثلاث اوجه- -

فنحن كثيراً ما نتهرب من مواجهة مشكلاتنا .. 

نسكن الألم طويلا بدلاً من استئصال المرض ،

خوفاً من الألم ...

ونغمض عيوننا عن الحقائق القاطعة خوفاً من  الصدمة .. 

ونقنع انفسنا بأن هذا هو أفضل العوالم الممكنة ..

وعندما تواجهنا كارثة ، من المفترض أن تجعلنا نفيق  ...

فإننا تأخذنا العزة بالإثم ونقول لا ..

هذه حظوظ ، هذه مصادفة ، نحن لم نخطئ أبداً ..

كيف نخطئ ونحن بناة الاهرامات ، وصناع أعرق الحضارات ..

تماماً مثلما يفعل الطاووس حين يخفي عيوبه وضعفه 


تحت جمال ريشه وجاذبية ألوانه ...





 يجب علينا ان نتوقف لحظة ، ان نعيد حساباتنا ...

يجب أن نتخلص من جبن النعامة ، وان ننزع عنا ريش الطاووس ...


يجب ان نتعلم كيف نضع انفسنا في الاطار الصحيح ،

نتجرد من ذاتنا وننظر الى انفسنا من الخارج ...


نرى عيوبنا قبل مميزاتنا .. فقد رحم الله امرء عرف قدر نفسه ..


وكذلك يجب علينا ان نقدر خصمنا بقدره الحقيقي ، 

بلا تهوين ولا تهويل ...

المتابعون

اعتبرها بيتك ♥

وِش القفص

خليك ورايا

دليفري..