2010-01-29

الناس دي بتهزر بالانجليزي يا جدع :D


من يومين روحت اسكندرية _ في سابقة هي الأولى من نوعها :D _ لأ وايه كمان كنت في مكتبة الإسكندرية :)

كنت رايحة تبع الكلية في ندوة وورشة عمل عن الأمن الانساني .. وهى أول ندوة وورشة من النوع دا في مصر 

أو في دولة غير الأردن وكندا عامة  :)

الموضوع كان لذيذ جداً وشيق أوي ، وأول مرة كنت اعرف عن الأمن الانساني كانت لما عرفت اني رايحة المؤتمر 

المهم اللي عايزة اكلمكم عنه مش الورشة  لأن الورشة هرغي عنها تفصيلاً في مجلة بحلقة :)

اللي عايزة اتكلم عنه هو الناس اللي كانت في الورشة

بجد شخصيات ما كنتش احلم اني اشوف حد بالمراكز دي قبل عشر سنين - دا في حالة اني اكون متفاءلة -

الأهم من كده .. ان الشخصيات دي كلها - او ع الأقل معظمها - متحمسين للفكرة أوي 

متحمسين بجد مش شغل منظرة ولا بروبوجاندا ولا أي حاجة

لأنه اولاً لا كان في تليفزيون بيصور ولا حد يعرف عن المؤتمر الا قلة قليلة جداً

ولأنهم بيتكلموا بحرارة حد بجد مهتم بالقضية 

الجميل في كل دا ، انهم مش مثلاً ناس محرومين من الأمن الانساني علشان يبقوا متحمسين اوي كده

لأ اغلبهم مادياً ماشاء الله حلوين ، ومراكزهم ع الأقل أو مكانتهم مأمناهم

فجميل اوي انهم يكونوا متحمسين لحاجة لو اتحققت المستفيد الأكبر منها هم الناس المعدمة اللي تحت الصفر 

والجميل كمان انهم بجد متواضعين جداً ، فعلاً كل ما البني آدم كان أعظم كل ما كان أكثر تواضعاً

والجميل بردو اني اتعرفت على شخصية عراقية جميلة جداً :)
انسان في قمة التواضع كان وزير سابق بالعراق هو الأستاذ بختيار أمين  

انسان جميل اوووووووووووي فوق الوصف

وبغض النظر عن اني بموت ف العراقيين أساساً إلا إنه هو شخصية جميلة بجد :)



آخر حاجة بقى .. انا بجد اتعقدت من مستوايا ف الانجليزي :((

الناس دي بتهزر بالانجليزي يانااااااااااس .. دا غير الكلام والمناقشة طبعاً :D

في حاجات كنت بفهمها وحاجات ما كنتش بلحق

بس قررت جدياً اني لازم احسن مستوى اللغة بتاعي شوية علشان ما احسش اللي حسيته دا تاني

ومنه لله التعليم الحكومي اللي مخلي الانجليزي بتاعنا ف الأرض :((((


دا تقرير مبسط عن الورشة والندوة على مجلة بحلقة

إدخل هنا

هناك 12 تعليقًا:

  1. بصراحة هو أنا أول مرة أسمع عن الأمن الإنساني ده، أنا أعرف الأمن الغذائي الأمن المركزي أمن الدولة بس معرفش الأمن الإنساني ده :D
    عموماً جميل جداًإن فيه حدث زي ده في مصر أصلاً، ويا بختك إنك رحتِ مكتبة اسكندرية يا سارة-سان :)

    بالمناسبة العراقيين فعلاً ناس كويسين جداً، كنت قابلت من كام يوم في اتحاد كتاب طنطا أديب عراقي جميل جداً اسمه خضير ميري، ده من أحسن الأدباء العراقيين اللي كتبوا عن الطغيان اللي حصل في فترة حكم صدام حسين وما بعدها في بداية الاحتلال الأمريكي..

    شكراً سارة-سان على التدوينة :)

    ردحذف
  2. بجد حلوة أوي يا سموك
    ^ـ^
    و أنا نفسي أروح المكتبة
    و نفسي أعرف أوي إيه حدوتة الأمن الإنساني دي
    سؤال بقى
    دي كانت تبع إيه ؟
    و للا ده في المجلة برضه
    ^ـ^

    ردحذف
  3. يعم يعم
    ناس ترووح تتفسح في الاسكندرية ... وناس ليها ترتر

    عموما انا هقري عن الامن الانساني اكتر... لأن دي اول مرة اسمع عنه بصراحة..

    وبالنسبة للانجليزي ال درسناه في المدارس مفيش غير تعليق واحد عليه( اي ويل بريبير ماي هووم ورك.. تو بي زا بيست ان زس وورلد)

    واوول انجليش اووول زا تايم

    ردحذف
  4. سيبك انتى
    احسن حاجه حصلت فى المؤتمر ده انى شفتك طبعا

    ولو على الانجليزى ياستى
    ياااااااااااريتك جيتى فى جمل
    احنا عونينا الاتنين ليك ياجميل
    نبدا اولى كورساتك التعليميه اول ما تخلصى امتحانات

    :D

    ردحذف
  5. جميل اوي يا ريتني كنت معاكي
    بحب اوي الحاجات دي
    بصي طول ما نتي بتتكلمي عن الورشة و الامن الانساني كان تمام اول ما جبتي موضوع الانجليزي بقى عقدتيني
    اقول ايه يا ربي
    بصي بقى احمد ربك انك فهمتي كلمة كلمتين في ناس متخاصمة خالص مع حاجة اسمها انجليزي
    بكره كره شديد اصل في ثار بينا من زمان هههه
    المهم ربنا يوفقك في امتحاناتك
    و بستنى تنوريني يا جميل

    تحياتي

    ردحذف
  6. ههههههههههههههههه
    والله وحشتنى اوى المدونه دى

    ردحذف
  7. يا ستي ربنا يوفقك للخير دايما
    و بكرة تتعلمي الانجليزي و تبقي لبلبه فيه
    ربنا معاكي

    ردحذف
  8. وعهد الله انا مش شايف اي مشاكل في الانجليزي بتاع التعليم الحكومي، ما انا طالع منه زي الفل اهوه، و انتي عارفة الانجليزي بتاعي. اما بالنسبة للامن الانساني ده ف انا معرفش عنه حاجة، بس هو اكيد حاجة مهمة مادام عملوله مؤتمر.

    ردحذف
  9. معقول كنتى فى اسكندرية!!!
    ياريتنى كنت اعرف قبلها ...كنت عملت لك حفلة يا سمو الاميرة!
    بس متعوضة باذن الله ..واكيد اسكندرية نورت بوجودك
    والحمد لله انك حسيتى باستفادة حقيقية..ومكتبة اسكندرية فيها نشاطات متميزة كتير ...بس ماحدش بيدور كويس للاسف!
    ويارب نشوفك قريب يا قمر

    ردحذف
  10. بجد الموضوع شيق قوي وجديد وانا باحب الحاجات الانسانية جدااا..لانه مش اي حد بيحسها زي ما انت قولتي..الناس اللي كانوا فيها رغم انهم مش ها يستفيدوا الا انهم متحمسين وهو ده الشعور الانساني الراقي الهادف

    ردحذف
  11. بالنسبة لللغة..فا دي نتائج التعليم الحكومي فعلا عاااااااااااااااااا

    ردحذف
  12. السلام عليكم
    والله ممتازة هذه الخطوة منك
    سأقرأ عما طرحتيه وإن كنت أراه ليس بشيء جديد ولكن أظنه مسمى جديد فقط لكن الأيدولوجيات هي واحدة لما هو متبع في أروقة الأمن القومي الكبير والذي يتسع ليشمل كل مناحي الحياة بالنسبة للمواطن

    دمتِ بكل ود

    ردحذف

Say something...