لعلمك

لعلمك

إقرأ لي

دخلوا بكليك شمال :D

Blog Archive

السبت، فبراير 13، 2010

postheadericon يوم في مملكة الكتاب :)

روحت أنا ومنونة معرض الكتاب يوم السبت اللي فات ، وانا بتمشى فيه تخيلت كده اني في مملكة الكتب

مدينة أو دولة كل البيوت فيها مكتبات .. وكل الناس اللي فيها بتحب تقرا

وماحدش بيبص لك ع إنك مكلكع أو كائن فضائي لأنك بتحب الكتب 

بجد الدنيا تبقى حلوة أوي لو في مملكة بالشكل دا .. 

اليوم كان حاااااافل جداً وحصلت فيه حاجات كتير

لكن أهم وأروع حاجة حصلت يوميها .. ويمكن اروع حاجة حصلت لي من كام شهر أساساً

هي إني قابلت الانسانة اللي بقالي 3 سنين بحلم برقم تليفونها حتى 

(( أ/ عبلة الرويني ))

أول واحدة خليتني أحب أمل دنقل ..

أول واحدة تخليني أبكي وانا بقرأ قصة حياة شاعر أو شخصية معروفة

أول واحدة أقرأ كتابها من اوله لآخره يمكن مرة كل أسبوع 

قابلتها صدفة وقلبي عرفها :) وبجد طلعت إنسانة رائعة جداً زي ما هي كاتبة رائعة

وكمان يوميها قابلت بلدياااااااااتي .. معظم رواد الصالون الأدبي الطنطاوي :)

بصراحة لولاهم بقيادة أحمد جلال كان زماني لحد دلوقتي لسة تايهة في معرض الكتاب  هههههههه

الواحد لما بيقابل ناس من اهل بلده ف الغربة بيستطمن بردو :) خاصة لو كان مسطول زيي 

وقابلت الجميلة أسماء رمضان صاحبة صفحة المدونخانة :) بجد بنوتة زي السكر المتحلي بالعسل  :)

وقابلت الخااااااااال احمد الصباغ في حفل توقيع كتابه :) الف مليوووووووووووون مبروووووووووووك يا خال :)

وقابلت كمان سو عجوز وعنده تلاتين سنة :) وكماااااان بطوط حبوب 

كل الناس اللي فوق دي اكبر مني مقاماً وسناً لكن  بشيل الألقاب لأني ما بعرف انادي حد بعزة بلقب فسامحوني بقى :)

نيجي بقى للجولة ف الكتب

طبعاً كالعااااااااااااادة زي كل سنة الأسعار نااااااااااااار يا حبيبي ناااااااااار

وبصراحة حسيتها افتراااااااا اووووووووي .. وعلشان كده انا اتفرجت ع السريع ع الكتب ف صالات دور النشر

وروحت واخدة ديلي ف سناني وجررررررررررريت ع قسم سور الأزبكية

اشتريت من هناك ما خف ثمنه وعلا قدره بصراحة :)

كتب جميلة جداً لكتاب كبار ومحترمين وبأسعار تنفع واحدة زي حالتي لسة طالبة 

طالبة معونة طبعاً هههههههههههه 

اشتريت من هناك شوية كتب ماوراء الطبيعة .. رغم اني ما كنتش ناوية بس ما قدرتش اقاوم اغراءها

رفعت اسماعيل فتى أحلامي ذو البدلة الكحلية التي تجعله فاتنا اغراني بصراحة :D 

واشتريت روايتين لأجاثا كريستي

ورواية لأرسين لوبين 

وكتاب حكيت عنه قبل كده ، كنت قريته من خلال دار الكتب بس اصريت اشتريه لأنه بجد جميل جداً

كتاب " علي أمين الصحفي والإنسان

وكمان جبت لمحمود السعدني كتابين .. مذكرات الولد الشقي وملاعيب الولد الشقي 

وجبت كتاب لمحمد التابعي اسمه " ممن عرفت " رغم انه كل اللي ممن عرفهم حريم بس الكتاب حلو :)

وأول مرة اقرأ لمحمد التابعي

واشتريت كمان كتاب زيارة لمكتبة فلان 

فيه حوارات مع كتاب كبار زي انيس منصور  وتوفيق الحكيم 

ومصطفى محمود وصلاح عبد الصبور وغيرهم .. 

بيتكلموا عن مكتباتهم وكتبهم واللي اتعلموه منها

بجد كتاب قيم جداً

واشتريت كتاب اسمه التكوين .. عن حياة مفكرين وأدباء وفنانين 

وبث خلاص  :)

عندي زي ما انتوا شايفين أجازة حافلة بالكتب دا غير سلفة احمد منتصر :)

مستعيرة منه حبة كتب جامدين جداً جداً

14 بوينتس أوف فيو:

محمد الوكيل يقول...

سوجوي! شوية كتب حلوين يعني! أنا كنت قرب سور الأزبكية بس كان الوقت مغرب وكان اتوبيس الرحلة هيطلع وكنت تعبان حتى الموت يعني، كان نفسي أجيب شوية حاجات كويسة من هناك بس يالا مش مهم بقا T.T
بس الواحد برضه جاب حاجات كفاءة من هناك، ومبروك عليكِ الكتب اللي جبتيها سارة-سان ولقاءك بالأستاذة عبلة الرويني ^^

شكراً

محمد الوكيل

мαησηα يقول...

سارة نسيتى تقولى الدنيا كااااااااااانت برررد ههههههه

بجد مبسوطة اوى انى كنت معاكى يوم بحاله من اوله لاخره واتقابلنا ف يوم عشت وشفت اليوم ده يا ولاد هههههههههه

كمان انبسطت انى شفت ابطال الصالون الادبى وبجد زى ماسارة قالت كنا مطمنين اوى وانتوا معانا ميرسى ليكوا شباب

يارب يا اوختى اشوفلك المعرض الجاى كتابك مغرق المعرض وتكون النسخة الخامسة او السادسة

قولى امييييييييييييييين يا بنت ههههه

مهيج الجماهير يقول...

يا بختك

ياريتنى كنت قاعد فى القاهرة عشان اشوف الناس الجميلة دى و اشترى كتب و ارجع بقى زى زمان أقرا الكتب اللى بحبها

انا عامة بحب ققوى الروايات الأجنبية المترجمة و خصوصاً جول فييرن

ما علينا

بالنسبة للقالب فهو جامد جداً شكلى هنزل البرنامج و أحاول أتعلم عليه

و لو وقفت معايا حاجة هسألك بقى عليها

تحياتى

أحمد شريف يقول...

السلام عليكم
الفاضلة : سارة
سعيد بهمتك ونشاطك وأتمنى لك حياة مدادها العطاء والخير والتواصل مع الغير للخير
دمتِ بود

star in the sky يقول...

حلو اووى
الكتب جميلة

ربنا يوفقك

سمو الأميرة سارة يقول...

محمد الوكيل احنا خللنا اصلي ف معرض الكتاب لدرجة اننا جينا ع الساعة سبعة ومابقيناش لاقيين حاجة نعملها كمان منى كانت تعبت من اللف :)

سمو الأميرة سارة يقول...

منونة شككتيني ف نفسي هههههههههههههههههه انا اللي عارفة اننا اخوات قعدت شوية استوعب ههههههههههه

نايس تو ميت يو منونة وبجد فرصة سعيدة اوي وطلعتي زي ما كنت راسمة صورتك ف دماغي من خلال مدونتك :P

سمو الأميرة سارة يقول...

خااااااااالد مهيج الجماهير انا مش من القاهرة انا من طنطا ع فكرة :)

بالنسبة للبرنامج فبجد تحفة وهيعجبك وسهل جداً مش هتحتاج تسألني ف حاجة

سمو الأميرة سارة يقول...

وانا اكيد تحت امرك لو عايز تسألني طبعاً :)

سمو الأميرة سارة يقول...

أ / أحمد الشريف ربنا يخليك تسلم يارب ولك مثله ان شاء الله :)

سمو الأميرة سارة يقول...

ستار ان زا سكاي مرورك احلى يا بنوتة :)

دودّا هانم لماضة يقول...

الجميلة سارة
رحلة حلوة اوى والكتب جميلة
اهنيكى عليها
للأسف ماعرفتش اروح المعرض السنة دى
لذا
اسمحيلى ( احقد عليكى ) :P

البلوج حلوة اوى ياقمر

مهيج الجماهير يقول...

أجدع ناس طنطا
شارع البحر و الشيخة صباح و سبرباي
و السيد البدوى و محمد عطية
D:

بنـوتــــة يقول...

ماي بوينت أوف فيو هو انك جامدة
و جولتك في المملكة دي جامدة
و لو اتلميت عليكي و على كام واحدة من نفس الفصيلة
الكتب في المكتبات هتنقرض و تتحول إلى مكتباتنا - هو بس اللي ناقصنا حد يمولنا عملية الشراء المهولة دي
D:
و بجد تسلم إيديكي على عناوين الكتب دي
و كتاب جولة لمكتبة فلان ده لمين ؟؟؟
عاجبني أوي العنوان و انتي كمان شوقتيني ليه أكتر
و ان شاء الله أدور عليه حتى لو في السور نفسه الفترة اللي جاية
- قصدي الشهر الجاي بعد ما نشحت مصروفنا طبعاً -
- أصل حالي حالك يا بنتي -
D:
^ـ^

تحياتي
يا سمو الأميرة
اللاسعة
^ـ^

المتابعون

اعتبرها بيتك ♥

وِش القفص

خليك ورايا

دليفري..