لعلمك

لعلمك

إقرأ لي

دخلوا بكليك شمال :D

Blog Archive

الأحد، فبراير 14، 2010

postheadericon أن تكون وحيداً في القطار



مؤخراً .. بقيت اعشق السفر لوحدي 

علشان بقدر اتفرج على الطريق وأسرح فيه من غير ما حد يقاطعني

وعلشان بيكون فرصة افكر فيها في حالي ومحتالي 

لكن في يوم ما .. الظروف خليتني أروح لوحدي مسافة طويلة نوعاً ما بالقطر

وكنت فاكرة نفسي كالعادة هستمتع بالتجربة دي ..

لكن لقيتني متضايقة .. ما كنتش خايفة بس كنت قلقانة

كنت لوحدي .. ورغم تعبي مش قادرة انام لأن مافيش حد أثق فيه هيصحيني ف الوقت المناسب

وكنت بردو خايفة لو نمت حد يسرق شنطتي 

ولما غلبني النوم دقيقة قمت مفزوعة وخايفة 

هي دي مشكلة إنك تكون لوحدك .. في قطر الحياة

مش هتلاقي أبداً كتف تنام عليه .. لا حنين بقى ولا مش حنين

هتبقى عايش عينك في وسط راسك ..

تنام بنص عين .. ونص قلب .. ونص راحة

خايف تطمن .. خايف لأنك لوحدك .. مهما كنت قريب من الناس بردو هتحس إنك غريب

المشكلة الأكبر بقى من إنك تكون لوحدك .. هي إنك يكون معاك إنسان انت مش واثق فيه

بدل ما هتنام بنص عين مش هتنام خالص

لأنه قريب منك وانت خايف منه .. أو ع الأقل مش واثق فيه

الظروف ممكن تفرض عليك شريكك في قطار الحياة زي ما بتفرضه عليك كتير في القطار العادي

بس صدقني .. لو اخترت شريكك من قبل ما تروح المحطة أصلاً ..

مافيش حاجة هتقدر تفرض عليك حد غيره

بس المهم .. تختاره صح

8 بوينتس أوف فيو:

الباحث عن الصفر يقول...

اجمل حاجه فى البوست انك شبهتى قطر الحياه بالقطر العادى تشبيه جميل
وجميل اوى ياسارة حتة ان فى حد ممكن يكون جنبك مستنى هفوتك عشان يسرقك مع ان ف نفس الوقت ممكن يكون فيه حد جنبك نفسه يشاركك فرحتك بس المهم الاختيار ماهو الصديق قبل الطريق
بجد احسنتى

سمو الأميرة سارة يقول...

عارف يا محمد .. انا جربت بجد يعني ايه تكون عايش مع ناس بيحسبوا عليك كل هفوة وغلطة وبجد متعبة اوووووي الحياة دي
شكراً ليك نورتني جداً

فؤاد العبيدي يقول...

اه هنا تسكب العبرات انتي شبهتي القطار بالحياة الي لازملها شريك تتثقي بيه علشان تمشي ونسيتي انو في ناس وعت على الدنيا لقت نفسها في القطر لوحدهم دول حيعملو ايه وكم خسارة حيخسرو لحد ميقدرو يميزو بين الطيب والوحش ويا عالم حيعيشو لحد ما يوصلو سن ممكن يختارو رفيق ليهم في القطر ده ولا لاه ... تحياتي

kafrawy يقول...

الحياه كالقطار هناك من يصعد و هناك من يهبط

ولله فى خلقه شئون


وحدوووووووووووة

انسان عادي يقول...

اولا بقولك وحشتنا مواضيعك بقالك كتير مكتبتيش
اما بالنسبة للسفر بالقطر فانا برضو من الناس اللي بينها وبين القطر علاقة كبيرة
وبرضو اتعودت اني اسافر لوحدي
فعلا بلاقي متعة في السفر لوحدي يمكن زي مانتي قولتي عشان بفكر في حياتي اكتر وممكن برضو عشان انا بفضل الوحدة اكتر
بس اعتقد اللي اتعود انه يسافر لوحده في القطر العادي بتاعنا ده بيبقي اسهل عليه شويه انه يسافر في قطر الحياه برضو لوحده
شكرا يا سارة والبوست بتاعك جميل

سمع هوص (Abo 3li) يقول...

الرفيق قبل الطريق...
كانو بيدرسوهلنا في ابتدائي..
متفق معاكي في كل كلمة...

(حبة هزار)
ماعادا.... لما تخدي علي السفر الكتير.. لمسافات... هتنامي حتي لو جنبك ابولهب نفسه..
تخيلي ان انا بقيت بنام في الموصلات العادية دي.. لما الدنيا بتبقي زحمة... تخيلي كمان اني بنام وانا واقف فيها؟؟

هههههههههههههههه

تحياتي ياسمو الاميرة

اسلام يقول...

بحب الامثله البسيطه اللى بيبقى معناها شامل حاجات كتير .. القطار .. اتعودت اسافر بيه مده طويله و لحد دلوقت بعتبرها احلى فتره في حياتي قضتها مع نفسي .. تأمل داخلي وخارجي .. تقييم .. صعب ان الانسان يكون وحيد في القطر .. بس الوحده تكون داء عندما تبرر لك تصرفاتك .. وتكون دواء عندما تقسو على ذاتك .. طالما النفع الاكبر ليا انى اكون وحيد .. فممكن الواحد يتحمل القلق والتوتر دا ويحاول يتحكم فيهم افضل .. انا

غير معرف يقول...

وممكن تكون شخص معروف وحوليك ناس كتييير متل القطار العادي بس قلبك وحيد في قطار الحياة كل واحد حياخد حاجته منك وينزل من القطار
الاصدقاء نادرون
ب . س

المتابعون

اعتبرها بيتك ♥

وِش القفص

خليك ورايا

دليفري..