لعلمك

لعلمك

إقرأ لي

دخلوا بكليك شمال :D

Blog Archive

الاثنين، فبراير 15، 2010

postheadericon العيد القومي الثاني للملكة اللاسعة :)


النهاردة 15/2 / 2010 

العيد القومي التاني لمملكتي اللاسعة :)


أول بوست ف المدونة كان بالتاريخ دا .. ومن وقتها

بدأت حياتي تتغير كتير .. واهتماماتي 

ماعرفش انا اتغيرت علشان كبرت ولا علشان دخلت عالم التدوين

لكن اللي متأكدة منه ان مدونتي دي كانت باب لحاجات حلوة كتير

وشافت لحظات حلوة كتيييييييير اوي في حياتي

مش عايزة أكرر كلام قولته قبل كده  في العيد القومي الأول

لكن اللي مصرة أكرره

هو إني بجد بحبها وهو إنها بقت جزء كبير من حياتي وشخصيتي

اللي عايزة اقوله السنة دي ان فرحتي بتبقى كبيررررررررررة اوي

كل ما احس اني بجد سيبت علامة في ناس كتير

وأفكاري خليتهم يعيدوا تفكيرهم في حاجات كتير

وهو دا اللسعان اللي بتمناه

السنة دي حاولت اعمل حاجة مختلفة في الاحتفال

وهي إني آخد آراء بلوجرز وناس بحترمهم وبثق في رأيهم جداً في المدونة

واحطه في البوست

وبدأت فعلاً واخدت آراء كام بنوتة بحبهم وبحترمهم جداً

زي إمبراطورتنا الجميلة آبي :)

اللي قالت " كتير جدا فى الاول لما قريت كلمه بنوته لاسعه قولت اكيد حاجه بتزيط فى اى كلام بس قولت هقرا بجد وبدون مجامله لما بتكتبر مواضيع جد بتبقى حلوه اوي يعنى بعقل جدا جدا ارائك معقوله وطرحك للمشكله حلو جدا وبيوصل الهدف منها
السلبيات هو الاسم اللى ادانى انطباع بس انها هتبقى شخصيه بحته وفى اى كلام
وكل سنه وانتى وهى طيبين يا قمر وبخير "

و الجميلة الأفكار والقلب ، آية الملاوني : " اكتر حاجة شدتني
بساطتك و تلقائيتك ..
بحس انه بتحققي معادلة السهل الممتنع

و زي ما انتي عارفة .. من قبل ما اعرفك و انا عاجبني سمو الأميرة ساره

السلبية .. مش شفت حاجة ضايقتني منها

:)"

وأمولة بانسي :)
" اولا المدونة اللاسعة اول ما عرفت عنها والله مش فاكرة بس فاكرة انى عجبتنى اوى الروح الشابة فيها جدا
وانها شبهى وشبه ناس كتير موجودين واعرفهم وحتة السخرية الموجودة فى حبة من موضوعاتها مش كلها جذبتنى عشان حستها بشقاوة بنات وكمان حسيتها عشان الاحسن ولقدام فى كل حاجة
والمدونة كانت باب ليا انى اعرف باقية مدوناتك وكمان انى اعرفك وده من احسن الحاجات اللى استفدت منها بصراحة بس المدونة ساعات بتغيب اوى زيها زى باقية مدوناتك لدرجة انى بحس انك نسيتيها
شكرا على ثقتك فى رايى وربنا يكرمك يا احلى ((تضادات)) فى الدنيا كلها وكل سنة وانتى وكل مدوناتك بخير "

وسألت الجميلة اسماء رمضان صاحبة المدونخانة : فقالت "

انا اول ما عرفت عرفتك من نوت كنت كاتباها عن اغنية يونس
لقيتك مشردة الغنوة يعني
:)
وعملتلك كومنت عليها ساعتها وبعد كده بقينا فريندز ع الفيس
وشفت لينك مدونتك ساعتها
والاول حسيت من الاسم انها مدونة خفيفة جدا وهتكون كوميدية
دخلت وانا ع استعداد لاستقبال فاصل من الضحك من اول كلكة
بس اتلقيت انك بتركزي ع حاجات كتير حواليك وبتنقديها بدم خفيف
اللسعان بيظهر ف تركيزك ع نقاط كده محدش بياخد باله منها
ولسه فاكرة البوست اللى كتبتيه بتاع انا انفسبل
وازاي انتقدت الموضوع ببساطة وعمق
من الموضوعات اللى عجبتني كمان موضوع ان تكون وحيدا ف القطار
وبتاع جدو
دول اجدد حاجة قريتها عندك
:)

نيجي بقا لجانب تاني وهو اللسعان ف تصميم المدونة
وانا زي ما قلتلك انت عليك اختيار فظيع ف الصور سواء للبروفايل او للمدونة
والالوان والصور دي من شأنها تدخل البسمة ع وش اللى داخل المدونة

فيه مشكله عندي اني ماتابعتش كل المواضيع بس اللى كنت بقراه كان بيستوقفني واركز فيه
انت من خلال المدونة قدرتي تنمي عندك عين الناقد اللى ما بيشوفش كل شيء عادي يمكن انت بتحوليه لتدوينة لاسعة دلوقت بس بعد كده يتحول لتحقيق صحفي والا ملف والا مقال
يعني ان شاء الله يكون للمدونة تأثير ايجابي علي شغلك

السلبيات يمكن من عندي انا عشان مش بتابع بشكل جيد للموضوعات

>>>>ملحوظة ع جنب
برغم اني حابة التصميم جدا الا انه طلع عيني في التحميل
عاااااااااااااااااااااا

وكل عيد قومي وانت طيبه ومدونتك تفضل في لسعان 

"
وكنت هكمل الاستفتاء وبعدين قولت لأ ..

أنا هستنى آراءكم من كل حد يدخل يهنيني

على فكرة  .. المدون الجميل ، اخويا وعشرة البلوجر :) كفرواي 

اللي كان من اول الناس اللي تابعت المدونة بيقول لي ان المدونة مواضيعها ف النازل

وما بقتش زي زمان ...

عايزة رأيكم بجد هل المدونة اوحش دلوقتي ولا احسن من زمان ؟؟ وليه ؟؟

مش عايزة مجاملات .. هاتوا بدل المجاملات هدايا هههههههههههههه

وانا  زي ما انتوا عارفين ديموقراطية ديموقراطية يعني
وعايزة هدايا قيمتها لا تقل عن خمسين زحزبون ولا تزيد عن خمسمية زحزبون

ومايعادلها بالجنيه المصري طبعاً :) شفتوا الحنية ؟؟ مظبطة محدودي الدخل اهو ههههههههه

والزحزبون لمن لا يعلم هو أي حاجة احتاس في اسمها :D


آخر حاجة بقى .. شكراً بجد لكل حد اهتم بكلامي وقراه

شكراً لكل حد شجعني ولو بكلمة .. شكراً لكل حد حمسني أشتغل أكتر

وشكراً لكل حد قال لي انتِ غيرتي فيا حاجة .. وهو ما يعرفنيش ومش مستني مني اي حاجة

شكراً بجد قبل كل حاجة .. لربنا اللي انعم عليا بإني في مرات كتير قولت اللي في قلوب بعض الناس 


هسيبكم بقى مع شوية حاجات كده من الماضي :)
دا كان أول هيدر للمدونة :)




 ودي شوية شعارات من كشاكيل المدونة :)
 
ودي صورة للمقال اللي قال فيه احمد فؤاد نجم اسم مدونتي 

من ضمن اسامي المدونات اللي لفتت نظره وعجبته


دا  كشكول من كشاكيل المدونة الخمسة او الستة اللي عندي :)



دا كلام دكتور احمد خالد توفيق :) الأسطورة اللي لحد دلوقتي مش متخيلة اني قابلته بجد

وانه بشر من لحم ودم :)

عرفت مؤخراً انه بيفتح مدونتي .. يمكن مش دايماً بس بجد يكفيني شرف انه زارني ولو حتى مرة واحدة :)


22 بوينتس أوف فيو:

شاب فقرى يقول...

نقول بسم الله

المدونة جميلة

وكل سنة وانتى طيبة وبالف خير

انا لاحظت ان ايميلك اسمه صاحبة الجلالة
انا جالى ايميل منك
عن (( دعوة وصلة‏ ))

لو الميل منك هستنى تعليق فى مدونتى ورد افهم منه

لو الميل اسبام ومحاولة من البعض للرخامة على عباد الله اعتبرى انى مقلتش حاجة :)

كل سنة وانتى طيبة

ويارب دايما مدونة منورة عالساحة

شاب فقرى

أحمد فـــارس يقول...

سلام من الله عليكم ورحمة منه وبركاته،
أولاً ألف مبروووووووووووك عالعيد التاني لصاحبة الجلاله الاميرة ساره علي مملكتها اللاسعه.
ثانياً أنتي تغييبي تغييبي وترجعلنا بتدوينات جميلة كده كلها ورا بعضها
كل يوم ادخل الاقي تدوينه جديده جميله وملحقتش ارد على اللي فاتوا.
أنا من أول ما شفت مدونتك قلت اهي واحده لاسعه من ضمن اللاسعين وخلاص لكن تدويناتك واسلوبك اجبرني على متابعتك دايماً والدخول في مملكتك.
وعالم التدوين فعلا عالم جميل ورهيب وزي ما بنتعلم بنعلم ومزاياه ومكاسبه كتيره.
ولازم تفرحي باي نقد لتدويناتك أو المدونة بشكل عام عشان ده معناه انه على الطريق الصح من نشر افكارك ومشاركة اللي في دماغك على عالم النت الافتراضي ده مع ناس زينا كده معجبين بكتباتك ولازم تستفيدي من النقد.
وكل سنه وانتي طيبه
وفي الختام سلام الاسلام
سلام الله عليكم ورحمته وبركاته،

سبايدرمان spiderman يقول...

عيد سعيد على المدونه و على صاحبتها كمان ؟؟

فيه بعض المدونات انا بحبها جدا
و ضايفها عندي في المفضله بتاعتي ^_^
مش بضيف مدونات كتير على فكره
اثنين ثلاثه كده و بس
و الباقي بقي بجيبه من حته تانيه ^_^
هو انا بيعجبني فيها اللاسعان ^_^

هو انا يمكن مبقيش كتير قوي في التدوين يعني كام شهر كده بس قريت ندك حاجات كتير

و مبرووك على الاستايل الجديد مع ان الى قبل ده ان عاجبني و خصوصا البنت الصغيره الى كانت بتقع تحت خالص ههههههههههههههه

سبايدرمان spiderman يقول...

اه صحيح انا اول موضوع قريته عندك تقريبا تقريبا كان (( خدلك دوش )) ^_^

الباحث عن الصفر يقول...

بصى ياستى خلى بالك من الكلام الكبير اللى هاقولة ده

أنا كنت قاعد ع النت وزهقت من كتر الشغل الجد قولت ادور على اى حاجه خفيفة
لقيت المدونة بتاعتك اسمها بنوتة لاسعة فقولت فى نفسى هاتلاقى صاحبة المدونة دى مجنونة (ثورى) وداالمطلوب فى الوقت الحالى
بس بجد لقيت حاجات جميلة جدا وبوستات رائعة وخفة دم وطبعا خدت افكار لبوستات جاية كتير عندى (اه جايين نغش)

ويارب ديما الى الامام وبوستات افضل وصحفية مشهورة كمان

كل سنة وانتى طيبة

سمع هوص (Abo 3li) يقول...

اولا كل سنة وانتي ومدونتك طيبين...
ثانيا.. طبعا مش هقول رأيي الايجابي .. لأنك عارفاه كويس.. كفاية ان اول بوست عندي في البلوج.. عن هنا...
ثالثا بالنسبة للسلبيات: الثيم... كل يومين تغيريه.. ده غير انك بتختاري ثيمثات تقيلة في التحميل..
حاجة كمان اهتمامك بالبلوج بتاعك قل اليومين الفاتووو دووول كتيييييييييييييييييييييييير... وبقيتي تكتبي علي الفيس بس.. ممكن ببساطة التكتبيه هناك تحطيه هنا كمان...
ده بس ال كنت عاوز اقوله يا سمو الاميرة....
وكل سنة وانتي طيبة كمان مرة... ويارب عيدميلاد البلوج الجاي.. تبقي المدونة احسن واجمل بيكي...

تحياتي ياملهمتي

أحمد شريف يقول...

السلام عليكم
بصراحة أكثر ما يُضايقني في مدونتك هو اسمها
فالإنسان يجب أن يختار الاسم المُلائم له وينتقي افضل الأسماء المعبرة
لا أجزم أن تابعت كل ما طرحته هنا لكن قرأت بعضاً منه وأرى أن طرح جاد وإيجابي ويستحق أن تغيري اسم المدونة لأجله لاسم جاد وإيجابي بدلاً من هذا الاسم الحالي لأن اسمك هو عنوانك والإنسان الجاد هو الذي ينتقي عنواناً جاداً به جزء من المضمون
تذكري دائماً : المظهر جزء من المضمون
وعلى كل حال .. أتمنى لك كل التوفيق وكل السعادة ورأيي هو وجهة نظر لها ما لها وعليها ما عليها

دمتِ بكل ود

SuperNova يقول...

و الله بالنسبة للاسلوب ف انا معرفش، بس بشكل المدونة احسن بكتير. و بعدين كفاية يا ستي انك احد الاسباب اللي خلتني اكتب عربي بدل الانجليزي.

دعاء العطار يقول...

ساروررررررتى حبيبتى

كللللللللللل سنه وانتى طيبه ياقمرررررر ومدونتك طيبه

دايما عيد ميلاد مدونتك بيرجعنى لذكريات جميييييييييله

مدونتك وطبعا انتى عارفه ان اكتر حاجه بتعجبنى فيكى لاسعانك

بصراحه مش حاسه ان مدونتك موضوعاتها فى النازل ولا حاجه

بالعكس انتى كل مدى لسعانك بيزيد ودايما افكارك بتتجدد

هابى بيرس داى لاسعه هانم

عندما تكون ميمى وحاجات كتير مع بعضها كده يقول...

اولا مبرووووك على عامك التانى فى مدونتك العسل دى وعقبال كده الاحتفال المئوى وعايزة اقولك ان مدونتك دى كانت سبب رئيسى ان يبقى عندى مدونه اصلا هههه انطلاقكك وطريقك تفكيرك الى كنت بحساها شبهى صحيح مدونتى ماينفعش يبقى فيه وجه مقارنة بمدونتك
بس انا بعقشق مملكت حضرتك ياسمو الاميرة ساره وفعلا محتاجين تزوديلنا الجرعة شوية هههههههه

سمو الأميرة سارة يقول...

شاب فقري وانت طيب وبخير يارب نووووورتني
طبعاً كله تماموز دلوقتي وفهمنا كل حاجة
بس مش عارفة ليه ماحدش وافق غيري ؟!

سمو الأميرة سارة يقول...

احمد فارس الله يبارك فيك يارب تسلم يا احمد

بالنسبة للغياب فكان بسبب الاكتئاب والانفلونزا والسفر والاستايل هههههههه

بجد مش عارفة اشكرك ازاي على رأيك يا احمد

بالنسبة للنقد فانا فعلاً بفرح بيه لأني لو ما اهمش الناس ما كانوش اهتموا بنقدي
وعلشان كده حبيت اعرف ايه وجهة نظر الناس السلبية قبل الايجابية والله

منورني جداً يا احمد ميرسي اوي ليك

سمو الأميرة سارة يقول...

:( مهمة منزلية رخمة فاصل وهكمل الردود ع التعليقات

سمو الأميرة سارة يقول...

سبايدر مان :

الله يخليك يا سبايدر يارب ميرسي جداً ليك واتمنى اكون عند حسن ظنك دايماً

ميرسي ليك اوي بالنسبة للبنت اللي بتقع والاستايل وكده فكان عاجبني والله انا كمان بس ما عجبش الناس فقولت حسب رأي الأغلبية بقى

سمو الأميرة سارة يقول...

الباحث عن الصفر :)
ربنا يخليك يا محمد ع فكرة مش بزعل لو حد قال عليا مجنونة :D

نورتني يامحمد ويارب يسمع منك

سمو الأميرة سارة يقول...

أبو علي :

وانت طيب وبخير يارب

تاني حاجة رأيك في المدونة والبوست اللي عملته بجد من اكتر الحاجات اللي فرحتني ف الدنيا شكراً يا ابو علي

بالنسبة للثيم فمش عارفة والله بجد ايه المشكلة
ليه بيبقى تقيل رغم اني مش مكترة الأكواد ولا الصور شكل المدونة كبرت وخرفت بقى هههههههههه

بالنسبة للغياب عن البلوج فالناس قالت لي ان الحاجات الخفيفة اكتبها ع الفيس والحاجات المهمة اكتبها ع المدونة علشان تبقى المدونة ليها وزنها وكده
وانا بصراحة اوقات كتيرة اوي ببقى مكتئبة من المدونة فمش بكتب فيها حاجة :(

سمو الأميرة سارة يقول...

احمد الشريف انا متفهمة جداً وجهة نظرك لكن متهيألي لو قريت الموضوع دا هتفهمني اكتر وهتعرف سر التسمية

http://bntlas3a.blogspot.com/2008/02/blog-post.html

منورني جداً يا احمد وشكراً ع النصيحة وبجد انا فاهمة قصدك جداً وعندي دكتور ف الجامعة قال لي نفس الفكرة اللي قولتهالي دي بس انا وضحت وجهة نظري

سمو الأميرة سارة يقول...

احمد سوبر نوفا :)

منورني جداً وبجد شرف ليا اوي اني ءأثر في حياتك شكراً ليك يا احمد منووووووووورني

سمو الأميرة سارة يقول...

بسكووووووووووووووتة

وحشتيييييييييييييييييييييييييييييييييييييييييييييييييييييني اووووووووووووووي

وانتي طيبة يا حبيبة قلبي يارب

فاكرة يابسكوتة لما كنا قاعدين سوا نعمل مدوناتنا :)

كانت ايام جميلة بجد فعلاً

وحشتيني يابنتي بقى امتى هشووووووفك ؟؟

سمو الأميرة سارة يقول...

ميمي والحاجات الكتير
الله يبارك فيكي يا حبيبة قلبي
وبجد انا بحبك اوي وبحب مدونتك اووووي يا ميمي وبتوحشيني لما مش بتنزلي الا كل فين وفين
وانا بحس اني شبهك اوي بجد وشرف ليا مقارنة مدونتي بمدونتك يابنتي

أحمد شريف يقول...

السلام عليكم يا سارة
أشكرك على الرد
ومتفهم وجهة نظرك وله الإحترام والتقدير

princess haya يقول...

السلام عليكم ورحمة الله وبركاته
احب اقولك يا استاذة سارة انتى بجد غيرتى فيا حاجات خلتينى ابص للدنيا بنظرة تانيه انتى فعلا اسطورة وكل سنه وانتى طيبة يا جميلة

المتابعون

اعتبرها بيتك ♥

وِش القفص

خليك ورايا

دليفري..