لعلمك

لعلمك

إقرأ لي

دخلوا بكليك شمال :D

Blog Archive

الأربعاء، فبراير 17، 2010

postheadericon مش هتموتي من غيره


كذا مرة واحدة تشتكي لي من الاهانة اللي بتتهانها من جوزها او خطيبها او حبيبها 

ولما اذبهل من المعاملة الوحشة اللي بيعاملها بيها واقولها يابنتي طب ومستحملة ليه ؟؟

دي مش تصرفات انسان بيحب مكملة ليه ؟؟

تقول لي مش قادرة اسيبه .. انا اتعلقت جداً بيه وهموت لو بعدنا

علشان كل بنت متخيلة كده .. انا بكتب البوست دا

وبقولها صدقيني .. مش هتموتي من غيره 


(1) لن تموتي حباً ..

مش هتموتي من كتر حبك ليه .. إلا إذا كنتي انتي عايزة تموتي

لو فكرتي بعقلك لمجرد دقيقتين هتفهمي انه مش بيحبك

ولو فكرتي بعقلك هتعرفي انك مش المفروض تحبيه ولا تضحي براحتك عشانه

لأن الانسان المفروض يستحمل ويضحي ويحب انسان لما يكون بيحافظ على كرامته
وبيحافظ على مشاعره .. ومستعد يضحي ويتحمل عشانه بردو 

لو فكرتي هتلاقي نفسك حقيقي من غيره أحسن 

ولو حطيتي في دماغك انك تقدري تبعدي هتقدري وهتبعدي

كل المشكلة .. إنك مش عايزة تقدري . .أو مش عارفة انك تقدري 


(2) لن تموتي جوعاً ..

دي بقولها لكل زوجة وأم .. عايشة مع انسان لا بيحترمها ولا بيصونها ولا بيحبها 

ومتحملة الذل و البهدلة علشان متخيلة انها مش هتلاقي تاكل لو سابته

او ان ولادها هيتشردوا في الشارع من غيره

لأ .. ربنا ما بينساش حد 

ربنا هو اللي بيرزقه رزقكم .. وفي أي مكان هتكونوا فيه هيرزقكم

مافيش اي حاجة في الدنيا تجبرك تعيشي مع زوج مافيش بينك وبينه - على الأقل - مودة ورحمة 

تقدري تشتغلي حتى لو شهادتك مش كويسة او لو مش معاكي شهادة أصلاً

وهتقدر تجيبي لولادك أكل " حلال " لأن ربنا مش هيسيبكم تموتوا م الجوع

مش هتكوني عبء على حد .. انتي انسانة ليكي عقل وربنا مديكي صحة وتقدري تتحملي مسؤولية نفسك

مافيش حاجة اسمها استحمل علشان ولادي يعيشوا في خير ابوهم

لأن مافيش معنى للحياة في وجود الخناقات والبهدلة وبعزقة الكرامة

(3) لن تموتي خوفاً ..

مافيش حاجة اسمها ضل راجل ولا ضل حيطة 

ومافيش حاجة اسمها خايفة من كلام الناس 

مين قالك ان الناس ما بتتكلمش وهو بيهينك كل يوم ؟؟

مين قال لك ان البني آدم اللي يبهدل مراته ويهينها دا راجل اساساً ؟؟

انتِ تقدري تحمي نفسك من أي حد وماحدش هياكلك .. انتِ أقوى مما تتخيلي والله

وانتِ كمان تقدري تجبري الناس تحترمك بتصرفاتك ، واللي يتكلم عليكي بعد كده ربنا ينتقم منه 

اوعي تخلي كلام الناس يجبرك على عمل حاجة انتي مش قابلاها

او على الاستمرار في حياة انتي مش مرتاحة فيها

.\/.\/.\/.\

وكلامي دا مش تحريض على هدم البيوت

لأ كلامي دا تحريض للأنثى على المحافظة على كرامتها

تحريض ليها علشان تنسى كل الخوف اللي رضعته مع لبن أمها

واعتمادها على الراجل بشكل مستفز

لدرجة انها متخيلة ان حياتها هتقف لو ماكانش في راجل هي مسؤولة منه


آخر حاجة بقى دا لينك لكتاب أحلام مستغانمي 

نسيان . كوم .. بنصح كل بنت انها تقراه لأنه فعلاً مفيد جداً

30 بوينتس أوف فيو:

دعاء العطار يقول...

الله عليييييييييييييكى ياساره

بجد قلتى كل الكلام اللى نفسى اقوله

بجد حاجه مستفزززززه جدااااا ان الواحد يهين كرامته عشان اى حاجه حتى ولو كانت الحب

وده طبعا تندرج تحته الجمله الشهيره

" الحب مفيهوش كرامه "

حب ايه اساسا اللى يبقى من غير كرامه ده مش حب ولا ينفع نطلق عليه كده

بجد برافو عليكى ياساره ويارب كللل بنت تفهم كده

"نحن أقدر على أن نتحمل أكثر مما نتخيل "

دى جملة انيس منصور

:::::::::::::::::::::::

وحششششششششششششششتينى اد الدنيا كلللها

سبايدرمان spiderman يقول...

اممممممم

السلام عليكم اولا

بس انا معترض على كلام كتيييييييييير قوي
انا معاكي ان لازم يكون فيه شويه محافظه على كرامه البنت او الزوجه بمعني اصح

بس لازم هي تعرف انها لازم متكننش اقوي من جوزها ، حتي لو هي كده فعلا ، لازم متبينش ده ابدا ولا تظهره ابدا

ضيفي على كده كمان العكس

لازم تظهر هي الضعيفه قدام جوزها ، و صديقني ، صدقيني كل طلباتها بتبقي اوامر

يعني الى اقصده انها متنفعش تعمل راسها براس جوزها ابدا ، ولا انت دوست على كرامتي و تقعد تتخانق معاه

لا طبعا كل حاجه بالراحه ، لازم تسمع كلامه و تستحمله و بعدين تاخد حقها بالراحه

Timo.. يقول...

كده برضه يا سوو..؟؟
كللل ده شايلاه في قلبك ومخبياه..؟
الموضوع عل فكر مش حكاية حد ها يموت من غير حد..
الموضوع عشرة ومشاعر وحب وعيلة تحتاج مننا نفك الف مرة فيها قبل ما نفكر في نفسنا
نفكر نصلح ونسامح وندافع عن حقوقنا قبل ما نفكر نهاجم :)

Aиgel يقول...

مساء الخير .. صباح الخير
سارة ..

حقيقي بسم الله ما شاء الله
حسمتي تعبنا وتعب ناس كتير
وزي ما بيقولوا بلهجة الشباب دلوقتي
جيبتي من الأخر
فعلاً مش هنموت هتتعب شوية بس مش هتموت ولو ماتت يبقى هي اللي موتت نفسها ..
وبالنسبة للمتزوجات اللي بتبقى بتستحمل علشان خايفة تتشرد هي وأولادها والله رأيي دايما كان من رأيك
وأنا شايفة أن ربنا مش بينسى حد وعلى الأقل أهون من العذاب اللي بيبقوا عايشين فيه
ربنا يجازيكي كل خير وسعيدة جداً بوجودي عندك أوووووي
وخصوصاً أن منونة هي اللي عرفتني على مدونتك الجميلة

دمتِ بكل ود وحب واحترام

Angel love

kafrawy يقول...

هههههههههههههههههههه

كلام مجرد حلاوة روح لا اكتر و لااقل
للاسف احنا مجتمع شرقى ومن قبلها مجتمع ذكورى ......

تقدرى تقوليلى انتى عايزاه ايه بعد الكلام دة تعمله اى واحده ف الموقف دة ؟

انسان عادي يقول...

ايه يا سارة انتي بتهدي النفوس ولا ايه
عموما واضح ان كل واحد بيتكلم من خلال وجهة نظره
يعني الولد شايف انك غلطانة او بمعني اصح جاية شويه عليهم
والبنت بتأيدك وبتقول ان انتي عندك حق
بس انا هحاول اكون واقعي شويه واقولك ان فعلا فيه رجالة بيتعاملو مع زوجاتهم او الانسانة المتربيطين بيها بطريقة مش كويسة بس ده مش بيبقي عشان هما مشبيحبوهم ده ممكن يكون عشان هما طريقتهم كده في معاملة الناس يعني بيكون طبع وانتي عليكي يا تقبليه يا ترفضيه من الاول
انما البنت اللي قبلت انها ترتبط بالانسان ده وهي عارفه ان دي طريقته في المعاملة تبقي غلطانة لو جت تشتكي بعد كده
لان مش هيبقي معاها الحق
من الناحية التانية برضو مش عايزين نقول ان كل البنات ملايكة والرجالة هما اللي دايما غلطانين
فيه بنات كتير مستفزين بطريقة كبيرة وهما بيكونو السبب الاول في طريقة المعاملة معاهم

ده رأيي واسف ع التطويل

شكرا يا سارة

حصان المرجيحة يقول...

بصي مافيش حد هايموت من غير حد
بس الموضوع مختلف في حالة انه يبقي جوزها
لان دي علاقة تانية خالص
يعني لو خطيبها عادي تسيبه لو حبيبها ( اصلا مافيش حاجة اسمها حبيب قبل الجواز )
اما الزوج فلااااا ههههههه
الموضوع كبير و شكلي هارغي كتير و هاعملكو صداع
ههههههههه
شكرا ليكي

star in the sky يقول...

صح اووووى الكلام ده

فى ستات كتيييير اوووى تقولك طلاااااق ليه وعشان ايه وده مبدا مرفوض ومعندناش حد يطلق واهه انا ستحملة وعشان عيالك و متخربيش بيتك

بجد ليه مش عارفة اذا الحياة مش تمام خلاص يبقى الطلاق وزى ما دخلوا بالمعروف يخرجوا برده بالمعروف وهى ترتاح وولادها يرتاحوا والله ولادها لو فهتوهم ان كده احسن وهما نفسهم عاشوا من غير خناقات هيكبروا احسن على الاقل من غير ما يكون فى مشاكل نفسيه عندهم من اللى كانوا بيشوفوا وهتعلم ولادها معنى انهم يحترموا الست لانها مخلوق يستحق كده والكرامه فوقكل شىء وهتعلم بناتها ازاى يدافعوا عن حقهم فى الحياة بكرامه ويعرفوا ان من حقهم يعيشوا مع راجل بمعنى الكلمة مع زوج بيحبها وبيقدرها ومحترم ذاتها وفكرةا الطلاق فى الغالب بتترفض لانها ثقافة اتربينا عليها وفكرة انها مش هتلاقى تاكل او مش هتلاقى حد يحميها دى كلها زى نتيجة اترتبت على الثقافة اللى اتربينا عليها

اما البنات اللى مش قادرة تسيب اللى متجوزيهم عشان بيحبوهم والكلام ده كله مش عارفة بصراحة بيتهيالى معنى الحب عندهم فاهمينه غلط بس اكيد لو الحال استمر كده اكيد هيكون الطلاق هو النهاية بس يمكن بعد فترة طويلة

بوست حلو وطريقة عرضه حلوة

شفـقــة و إحســــان يقول...

يا سيدى على اللسعان هو ده الكلام التمام والا فلا
والله مكدبتيش يا سارة ومعاكى حق فى كل كلمة
الكرامة اهم شىء وبدونها نبقى ولا شىء ونستحق كل حاجة تحصلنا
تحياتى
شفقة

موناليزا يقول...

كلامك صح جدا
أحييكِ عليه
وشكر خاص على الكتاب:)

Sonnet يقول...

معك حق لو إن كل الستات تعرف الكلام ده
الرجال هتعمل لهم الف حساب
تسلم ايدك على التدوينة الرائعة

blue-wave يقول...

ايه خراب البيوووووت دا؟
هاتروحى من ربنا فيييييين؟
ههههههههههههههههههه
بس بينى وبينك بقى
انتى صح

blue-wave يقول...

ايه خراب البيوووووت دا؟
هاتروحى من ربنا فيييييين؟
ههههههههههههههههههه
بس بينى وبينك بقى
انتى صح

sony2000 يقول...

جيتي علي النقصه الاساسيه ذي مابيقولو
للاسف ان معظم البيوت المصريه بتربي علي كدا
بيكون جوذها اسوا حد وبيكون مثلا بيعرف ستات او من الصنف دا بيعملو حجات تانيه
وتيجي الام تنصحها تقولها كدا هتخربي بيتك بدال ماهو بيرجعلك بليل استحملي
وتقعد تستحمل تستحمل
لغايه مايحصل حاجتيت
يابينفصلو وتلاقي الرادوي اشتغلت ياتفضل مستحمله علشان ولادها وحياتها
تقبلي مروري وتحياتي

الباحث عن الصفر يقول...

ايه الكلام اللى يزعل ده بقى ياسارة انا هاعمل نفسى مش واخد بالى

انا هاقولك على قصه
فى واحده عمرها ما سمعت من جوزها كلمه حلوه مش كلمة بحبك لالالالا كلمة حلوه
ممكن بهدله ممكن شتيمة ممكن اهانة ممكن كل حاجه كنت بقولها زيك كده انتى ساكته عليه ليه انتى سايباه يهينك ليه
وبعد عشرات السنين

ربنا اراد ان عمره ينتهى وهو فى سكرات الموت ونايم كده على رجلها قالها حاجه بسيطة جدا سامحينى انا ما كنتش هالاقى حد فى الدنيا غيرك يستحملنى

تفتكرى بأه وجع السنين راح ولا لسه موجود بعد الكلمتين دول

اللى عايز اقولهولك انه ممكن بيعمل كده لكنه مقتنع تماما ان مفيش حد فى الدنيا غيرها تستحمله ولو اتجوز واحده تانيه ممكن ما يعملش كده عشان هو عارف ان دى الحاجه الحنينه الجميلة اللى بيرمى نفسه عليها

شكرا ياسارة

سمو الأميرة سارة يقول...

بسكووووووووووووووتة وحشااااااااااااااااااااااااااااااااااااني اوووووووووووووووووووووووووووووي

تيجي نعمل حزب " مش هتموتي من غيره " ايه رأيك ؟؟ :)

فعلاً مقولة آخر عك بتاعة الحب ما فيهوش كرامة

انا عن نفسي ما ااعتقدتش اني ممكن احب حد ما عندوش كرامة

سمو الأميرة سارة يقول...

سبايدر مان :

انا ما اقصدش اي زوجة ع العموم يا سبايدر
انا قصدي الزوجة اللي زوجها بيهينها
اللي مش محافظ عليها وعلى كرامتها
وانا معاك لازم تظهر ضعيفة بدلع
بس لازم بردو يحس انها بــ 100 راجل وانها واحدة قادرة تتحمل مسؤولية البيت لو لا قدر الله حصل حاجة وحشة
بالنسبة لأنهم يتعاملوا بالراحة وتاخد حقها بالراحة
فصدقني بجد في ناس ما بينفعش معاها الاسلوب دا
بيفتكروا ان الهدوء ضعف وسذاجة
واللي يبقى جوزها كده لازم يشوف العين الحمرا :D

سمو الأميرة سارة يقول...

يا تيمو صدقني والله عارفة ان العشرة ما تهونش و و و و الخ الخ
بس طعم الاهانة والمرارة ما بيخليش اي طعم للعشرة والحب
اللي بيعامل مراته بالاسلوب دا ما افتكرش هتقدر تكون باقية ع العشرة :)

سمو الأميرة سارة يقول...

انجل : تسلمي لي يا قمر ربنا يخليكي

نورتيني جداً والله

وفعلاً ربنا مش بينسى حد لو آمننا بكده بجد هنرتاح من حاجات كتير

سمو الأميرة سارة يقول...

كفرواي .. تعمل اللي كرامتها تقولها عليه

تعمل اللي تحافظ بيه على امانها واحترامها كبني آدمة
وعلى فكرة دا مش مجرد كلام بجد في ناس بتعمل كده وربنا بيقف معاها
ولا مجتمع ذكوري ولا حاجة بتقدر يقف قدامها

سمو الأميرة سارة يقول...

انسان عادي : صدقني انا مش قصدي على العلاقة الطبيعية
انا قصدي على اللي يكون خارج عن حدود الاحترام والأدب .. والانسانية كمان
وانا وضحت فوق وقولت ان الكلام دا لكل واحدة بتشتكي من المعاملة اللا - آدمية من جوزها
واللي ما فيش بينهم مودة ولا رحمة اللي ربنا قال عليهم

ما انكرش ان في زوجات بتعامل ازواجهم وحش وبجد بيبقوا بشعين
بس ما كلمتش الرجالة دي ببساطة ولا شجعتهم لأن خوف الراجل من الطلاق اقل بكتير من خوف الستات منه
لأنه طبيعي انه مش هيبقى خايف ما يلاقيش ياكل
ولا هيبقى خايف من نظرة الناس

نورتني يا انسان وما طولتش ولا حاجة :)

سمو الأميرة سارة يقول...

حصان المرجيحة طب يا حصان المرجحية هي تراعي ليه انها علاقة تانية وتعمل حساب كده وهو ما يراعيش ؟؟

مدام مش بيعاملها كزوجة ولا بيحترمها ولا بيحافظ عليها يبقى لازم هي تحافظ على نفسها وما تسمحش لأي حد حتى هو انه يهينها

نورررررررررررررررررتني يا حصان :)

سمو الأميرة سارة يقول...

ستار ان زا اسكاي : بجد معاكي حق جداً
فعلاً انهم يسيبوا بعض وولادهم يتربوا من غير مشاكل نفسية احسن بكتيييييييير من أي وضع تاني

وفعلاً يا ستار البنات دي فاهمة الحب غلط :(

سمو الأميرة سارة يقول...

شفشوقتي حبيبتي نوووووووووووووووووريني يا قمر

ووحشتيييييييييييني اوي

سمو الأميرة سارة يقول...

شفشوقتي حبيبتي نوووووووووووووووووريني يا قمر

ووحشتيييييييييييني اوي

سمو الأميرة سارة يقول...

موناليزا نورتيني يا جميلة وبالنسبة للكتاب فبجد شكراً شكراً شكراً للرائعة أحلام مستغانمي :)

سمو الأميرة سارة يقول...

Sonnet :
نورتني جداً وسعيدة انك رجل ومتفق معانا :)

شكراً جداً

سمو الأميرة سارة يقول...

دكتور عمرووووو منوووووووووووورني :))

هروح مكان ما الناس بتروح هههههه :)

نورتني يا دوك

سمو الأميرة سارة يقول...

سوني اعرف واحدة فضلت تستحمل تستحمل لحد ما جالها كانسر من كتر الزعل والكتمةو ماتت في الآخر :(

نورتيني يا سوني وكلامك صح فعلاً

سمو الأميرة سارة يقول...

محمد حجاز : طب تفتكر كام راجل بيعمل كده يا محمد وبيعترف بغلطه ؟؟

ما ينفعش يا محمد اعيش تعبانة واخسر نفسي وكرامتي علشان كلمتين ف آخر العمر ويا اتقالوا يا ما اتقالوش ؟

كمان المشكلة مش في الزوجة بس لأ دا في كمية العقد النفسية اللي بتحصل لأولادهم بسبب المشاكل دي

يعني لو هي مستعدة تفرط ف كرامتها ومستعدة تضحي ياريت تفكر في اولادها اللي مستقبلهم كله بيتدمر بسبب كده

المتابعون

اعتبرها بيتك ♥

وِش القفص

خليك ورايا

دليفري..