2010-02-28

إلى كاميلا .. مش أول مرة اعملها :)

 ملحوظة : البوست دا فضفضة بحتة .. ما اظنش حد هيستفاد منه حاجة

بس انا ارتحت لما كتبته .. 

عندي صندوق صغير كده مسمياه صندوق الدنيا

فيه الكروت اللي اصحابي كانوا بيدوهاني من اعدادي لحد دلوقتي

فيه كمان هدايا عيد ميلادي الصغيرة 

وفيها بقى صندوق تاني صغير كده فيه جواباتي اللي كنت بكتبها وانا صغيرة للقطط بتاعتي اللي ماتت

نسمة وكاميلا وبيشو وسيمبا

عمري ما كنت بكتب لهم وهم عايشين .. لأني كنت دايماً بتكلم معاهم


كنت تقريباً في الفترة دي ما بتكلمش وافضفض غير معاهم

كنت أربعة وعشرين ساعة مع القطط

وانا صاحية معاهم ووانا نايمة بحلم بيهم :)

المهم بقى اني كل ما اتخنق كنت بكتب لهم

لحد ما كبرت ودخلت كلية تقريباً .. بطلت اكتب لهم

بس كنت كل ما اتخنق اقرا اللي كنت كاتباه ليهم

وأعيط لما  اقرأ جواباتي ليهم فارتاح نفسياً بقى

ونظراً لإني مخنوقة اليومين دول ومش طايقاني 

فتحت امبارح صندوق الدنيا

أول ورقة لقيتها كان مكتوب فيها



" كاميلا ولدت وجابت أربع قطط شبهها

3 اولاد : 1 بنت

يوم السبت 15/5/2004

ساعة ما قريت الورقة افتكرت كل حاجة عن كاميلا

افتكرت لعبنا سوا 

وافتكرت لما كنت اقعد ع الكمبيوتر واطنشها وتروح ناطة وتضرب الشاشة

افتكرت لما كانت تقعد تتفرج معانا ع التليفزيون وتتابع المسلسل بانفعال :)

افتكرتها لما كانت حامل وكنت حاسة كأن بنتي حامل 

وكل يوم الصبح ابوس ولادها ف بطنها وهم بيلعبوا كده وشكلهم حلو اوي

وافتكرت يوم ما ولدت ويوم ما عملت لولادها سبوع اول ما فتحوا ورشيت عليهم ريحان 

افتكرت ابنها ابو حسنة " سيمبا " اللي كان بيحبني اكتر من مامته

ويسيبها ويجي لي من قبل ما يفتح عينه

وكنت بقول لماما اكيد دا اللي كنت ببوسه وهم ف   بطنها علشان كده بيحبني

افتكرت بردو انها للأسف اختفت فجأة وولادها لسة بيرضعوا :(

وانها جات لي ف الحلم ودعتني ووصتني أأكل ولادها

وكنت برضعهم بإزازة قطرة :) 

افتكرت حاجات كتيييييييييييييييييير حلوة اوي عشتها معاهم

وافتكرت قد ايه قلبي كان ابيض اوي وانا معاهم

وكنت حنينة اوي 

ساعات بحس اني بقيت قاسية ومش زي زمان :(


 ***

.. مش عارفة علشان كبرت ولا علشان ما بقوش في حياتي

كاميلا .. وحشتيييييييني أوي بجد ومحتاجاكي اوووووي اليومين دول اكتر من اي حاجة

بيشو وسيمبا .. مفتقدة شقاوتكم اووووي .. نفسي ارجع العب معاكم

لعبكم لسة موجودة عندي :) 

نسمة .. من يوم ما موتتي والخير مشي من بيتنا وحاجات كتير حلوة :(

اكتشفت اني كنت بحبك اوي وانا مش عارفة :( 

***

من بعدكم ما قدرتش احب اي قطة تانية

حسيت اني هخونكم لو حبيت قطة زي ما حبيتكم 


****

وانا صغيرة كنت بكتب لكم وانا متأكدة انكم حاسين بيا

بس دلوقتي مش عارفة :( يارب لو حاسين بيا تدعوا لي 

زي ما زمان كنتوا بتدعوا لي وانا رايحة الإمتحان 

بحبكم بجد .. وحشتوني اوي 

هناك 22 تعليقًا:

  1. حرام عليكي يا سارة
    ده انا هعيط
    اصلي للاسف من النوع اللي بيتأثر بسرعة
    بس بجد كلامك حلو قوي
    وواضح فعلا انه طالع من القلب
    وانا مع اني مليش في القطط قوي يعني
    بس حبيتهم عشان خاطرك
    ربنا يوفقك
    شكراااااااا

    ردحذف
  2. هو مع اني مش بحب القطط
    و ض تربيه القطط و خصوصا للبنات عشان الحمل و الخلفه و المشاكل الي بتعملها تربيه القطط
    بس صعبوا عليا :(
    بتتكلمي عنهم كانهم ولادك :)

    ردحذف
  3. i never thought you are the cat type of person. i hate pets, all of'em. but you almost made me cry with that post

    memories suck, and thats why i dont want anyon to remember me after i die, because it is painful to remember. you need to move on with your life and let them go

    ردحذف
  4. علي فكرة ده من احسن المواضيع اللي انا قرتها
    و مش زي ما انتي فاكرة اننا لازم نكتب عن المجتمع و الاخلاق و الجواز
    لا بيبقي مهم اوي اننا نفضفض من غير ما نجرح حد
    بجد تسلم ايدك

    ردحذف
  5. حلو اووووى ان الواحد يلاقى حد يفضفض له ويحكى له اللى مضايقه ويرتاح معاه

    تكون قطط تكون الكتابة المهم الواحد يرتاح

    جربى تجيبى عصافير مثلا

    ردحذف
  6. ربنا يرزقك بزوج صالح واولاد بجد تحني عليهم وتربيهم كويس

    ردحذف
  7. مش عارفة اقول ايه بجد
    احساسك وصلني
    كلامك بيدل على رقة مشاعرك
    تعرفي انحنا كان عندنا قطط و مكنتش بهتم بيهم اوي و لما راحوا وقتها حاسيت قد ايه هم مخلوقات جميلة
    تحياتي

    ردحذف
  8. فكرتيني بصديقة كانت هتموت نفسها من الحزن علي القطة بتاعتها لما ماتت... وفضلت مكتئبة بسبب القطة لمدة سنة كاملة...



    يلا شدي حيلك وهاتي قط جديد... بس يكون شيرازي وتسميه "فخري".... ههههه... فرفشي بلاش حزن...

    تحياتي ياسارة

    ردحذف
  9. طيب ليه كده حرام عليكى

    كان عندى قطه زمان وكنت لسه بفكر فيها اوى امبارح واد ايه كنت مشتاقه جدا امبارح انى اخدها فى حضنى

    يااااااااه رجعتينى تانى

    ردحذف
  10. انسان عادي بما انك من الناس اللي بتتأثر بسرعة يبقى اكيد لو ربيت قطة هتتعلق بيها جامد اوي خاصة وهم ماحدش يقدر يقاوم حبهم :)

    نورتني جداً والله

    ردحذف
  11. سبايدر مان يااااه ف البيت لأ ف البيت ايه ف العيلة كلها سمعوني المحاضرة بتاعة القطط والبنات والحمل والكلام دا مليون مرة

    اللي مكتوب ع الجبين لازم تشوفه العين
    ايش ضمنني اني اعيش لحد ما اتجوز يعني ؟ :)

    سيبك انت حبهم ودفاهم بالدنيا يا سبايدر والله

    وبجد انا كنت معتبراهم ولادي وكان سيمبا دا اسمه الحركي ف البيت " ابن سارة " وهو كان بيطمن معايا كأني مامته بالظبط

    يلا الله يرحمه :(

    ردحذف
  12. هراء لا داعي له
    كائنات غريبة بس بجد كائنات رائعة
    فيهم قسوة وحنية غدر ووفاء طيبة ومكر فيهم كل حاجة بجد اكتر حيوان بحبه ف الدنيا دي كلها

    ردحذف
  13. احمد عبد الرحيم انا بحس اني بقيت زي القطط اساساً من كتر عشرتي وحبي ليهم :)

    انا متفهمة وجهة نظرك يا احمد
    بس بردو شايفة ان الذكريات حياة
    يعني ع قد ما عيطت وزعلت علشان افتكرت الايام الحلوة اللي مش راجعة ابتسمت وانا شايفة بعين الخيال اللعب اللي كنت بلعبه معاهم وتصرفاتهم وحركاتهم وكل حاجة فيهم :)

    كاميلا لما افتكرتها واتكلمت عنها كأنها عاشت تاني ... علشان كده عايزة ما اتنسيش لما اموت .. علشان اعيش تاني

    ردحذف
  14. حصان المرجيحة لأ انا مش فكرتي كده

    انا فكرتي اني لما احكي خبرة شخصية علشان يبقى في مبرر لاني احكيها لازم حد يتعلم منها حاجة او يستفيد حاجة تفهمه الدنيا

    مجرد كلامي عن ذكريات ممكن ناس كتير بعد ما تقراه تقول وانا مالي ايه علاقتي بالموضوع دا

    زي ما بيقول دكتور احمد خالد توفيق كده
    الذكريات بضاعة لا قيمة لها إلا في خزانة أصحابها :)

    نوووووووورتني يا حصان المرجحية

    ردحذف
  15. ستار ان زا سكاي عارفة كمان خاصة امتى ؟ لما تكوني واثقة انه عمره ما هيخون ثقتك وعمر سرك ما هيطلع برة

    انا مش هجرب عصافير بصراحة انا بحب حاجة العب معاها وتكون شقية كده تجري ف الشقة وتبهدل الدنيا :)

    نتمرجح سوا الصبحية :)

    حاجات كتير القطط بتدي لها طعم

    ردحذف
  16. محمد اسامة ياااااااااارب اللهم اميييييين يا محمد

    ردحذف
  17. عارفة يا زوزو انا بجد كنت بحب ارجع البيت بسرعة علشان القطط فيه
    اول ما ضاعوا كلهم وماتوا ما بقتش متخيلة البيت بجد من غيرهم ميت :(

    ردحذف
  18. ابو علي

    انا فضلت اكتر من سنة زعلانة على بيشو

    وكل يوم عياط بالليل قبل ما انام لما افتكره

    ولما قطة عندي تموت بلبس اسود عليها


    ما بحبش الشيرازي بس شكلي هقتني قطة شيرازي قريب :) بس مش فخري
    هتبقى اسمها هنادي ان شاء الله :)

    ردحذف
  19. سكرة توراد نكد قططي :)

    فعلاً يا سكرة وحشني حضنهم اووووووووووي :(

    نورتيني يا بنوتة

    ردحذف
  20. انتى بقى فكرتنى بالسلاحف بتاعتى وحشووونى اوى

    ردحذف
  21. ميمي انتي اللي وحشتييييييييييييني اوي
    بمناسبة السلاحف اخويا كان نفسه اوي يربي سلحفة بس انا ممكن اموت بالشلل لو ربيت سلحفة انا عايزة حاجة شقية :)

    ردحذف

Say something...