2010-02-14

نِفسي في جدو

ماحدش يفهمني غلط ، مش قصدي جدو بتاع الكورة أنا قصدي جدو اللي هو جراند فازر :D

المهم .. ندخل ف الموضوع ..

أي انسان طبيعي المفروض بيكون ليه 2 جدو ..

جدو من ناحية بابا وجدو من ناحية ماما
أنا للاسف ماليش ولا جدو .. 

جدو والد ماما اتوفى قبل ما اتولد 

وجدو والد بابا اتوفى وانا صغيرة اوي 

فمفتقدة بجد إحساسي بــ " الجد " ..

مفتقدة حكايات الأجداد الغريبة والجميلة

مفتقدة التجاعيد الهادية والوش المتطمن 

مفتقدة اني ادلعه واتدلع عليه :)

مفتقدة العيد اللي يجي بزيارته لينا

لأ زيارة إيه .. أكيد كان هيقعد معانا على طول 

كان نفسي يكون لي جدو اروح اترمي في حضنه لو بابا زعلني ..

كان نفسي نقعد سوا نحل كلمات متقاطعة ونتسابق في حلها

كان نفسي ياخدني معاه نتمشى ويقعد يحكي لي حكايات عن مصر زمان

وعن الناس زمان ..

كان نفسي في جدو :(

حاجة أخيرة ..
جدو عبدو .. انتَ جدو الوحيد اللي عرفته وانا كبيرة

رغم اني ما شوفتكش لكن بحبك اوي .. ونفسي بجد أشوفك

واتكلم معاك وأزأز معاك لب :)  

يارب أشوفك .. نفسي اوي اشوفك 

هناك 16 تعليقًا:

  1. بجد فكرتيني بجدي الله يرحمه برضو هو الوحيد اللي انا لحقته انما جدي ابو والدتي اتوفي برضو قبل ما اتولد بكتير قوي
    بس بجد جدي ده حاجة حلوة قوي
    كنت دايما لما حد يسألني عن اسمي اقوله اسمي كله عشان اسمع رد الفعل السريع عنه واللي دايما بيكون " ياه ده جدك ده راجل طيب جدا " كلمة طيب دي انا شفتها فيه قبل ما افهم معناها كان متسامح قوي
    وكان معتز بنفسه قوي
    انا عايز اقوله بحبك قوي يا جدو
    الله يرحمك

    سوري يا سارة علي الرغي
    بس انتي اللي فتحتي الموضوع

    ردحذف
  2. ولايهمك اقعدى مع تيته وقولى لها تحكى لك عن جدو
    وربنا يخلي لك العيلة كلها

    ردحذف
  3. انا جدى والد امى توفى من سنه تقريبا
    ربنا يرحمه
    فكرتينى بيه كانت قعداته كلها لزيزه ومتخلاش من الضحك

    اما والد ابويا
    ابويا اصلا مشافهوش
    :)))
    تحياتى

    ردحذف
  4. حلو البوست ده قوي ياسارة ..... فكرتيني بجدي وجدتي اللي ما شفتهمش .ههههههههه . بس الحمد لله ربنا لسه محافظلي علي جدتي من ماماتي وهي عايشة معانا بس ست بركة خالص واحنا عايشين ببركتها .. ربنا يبارك فيها .. ايه كمية البركات اللي انا قلتها . ههههههههههه ... شكرا لك ..... dr/shiko صاحب مدونة الرحالة

    ردحذف
  5. ياه ياساره قلبتي المواجع انا كمان كان نفسي في جدو زيك بالظيط بس الاتنين ماتو قبل ماتولد ربنا يرحمهم ويطول في عمر بابا وماما وولادي يبقي ليهم جدو وتيته يارب

    ردحذف
  6. اه و انا و الله زيك برضه
    جدو بابا اتوفي قبل ما اتولد
    و جدو ماما توفي و انا عندي سنه و نص
    و طبعا مش فاكر اي خالص
    ...
    تصدقي فعلا الواحد نفسه في جدو :(
    ربنا يخليلنا بابا و ماما و يبقوا لينا ابائنا و اجدادنا كمان

    ردحذف
  7. انا اول مره اعلق هنا وموش اخر مره بأذن الله
    بجد الجدود نعمه لاني عاصرت جدتي الله يرحمها
    كنت بحس انها بتحبني حتي اكتر من امي وبجد اخدت حنانها اكتر من اي حفيد
    اللهم يارب تقبلها قبولا حسنا واياها
    تقبلي مروري وتحياتي

    ردحذف
  8. انسان عادي :)) يا بختك بجد
    عارف انا كمان اتحرمت من فكرة اني اما اقول اسمي كامل حد يعرفه لأننا عايشين في بلد غير البلد اللي احنا منها :(

    ربنا يرحمه ويسكنه فسيح جناته
    ادعيله يا انسان ع قد محبتك ليه :)

    ردحذف
  9. نجمة ف السما :)

    فيكي مين يكتم السر ؟؟ جدتي مش من النوع دا من الجدات
    روحي بتطلع علشان تحكي لي حاجة
    وبصراحة مافيش عمار بيننا :D :D

    ردحذف
  10. عايش ولكن .. تعرف وانا بكتب البوست
    وبقول انا مفتقدة ايه
    افتكرت ان ربنا انعم عليا بردو بنعمة
    هي اني ما فقدتهمش بعد ما اتعلقت بيهم
    بجد كان ممكن يجرالي حاجة :(
    الحمد لله ع كل حال ماحدش بياخد كل حاجة
    ربنا يرحمهم جميعاً يارب

    ردحذف
  11. د/شيكو :)) ربنا يزيدكم بركااااااااات يا دكتور هههههههههههه

    منورني جداً وربنا يطول في عمرها ويبارك فيها

    ردحذف
  12. فتاة من زمن آخر : ( معلش حبيبتي ربنا يرحمهم
    تعالي نفكر في الجانب الايجابي وهو اننا كده مش متعذبين بفراقهم اوي زي ما كنا هنتعذب لو كنا عاشرناهم
    وربنا يخلي لك كل احبابك ياقمر

    ردحذف
  13. سبايدر مان

    في ازمة جدود ع فكرة اكتشفتها من ساعة ما كتبت البوست دا
    كلهم راحوا بدري بدري ههههههههه
    ربنا يرحمهم جميعاً ويبارك لنا في أهالينا :))

    ردحذف
  14. سوني منوراني يا بنوتة :))

    ياااااااااااارب اللهم اميييييييين ويارب يرحمها

    بس عايزة اقول حاجة

    احم .. مش دايماً هم نعمة :D

    الجدود الحنينين الطيبين اللي بجد عندهم اعز الولد ولد الولد هم دول اللي فعلاً نعمة :)

    ردحذف
  15. انا نفس موقفك تماما الله يرحمكم يا جدوز

    ردحذف
  16. انتي عايزة جدو
    و أنا كان نفسي في تيتة
    الحمد لله على كل حال
    أنا عندي ناس بقولهم تيتة
    بس خالات ماما و بابا
    لإن الاتني انتقلوا لجوار الله من زمااااااان
    بس إلى حد ما فاكراهم
    حكاوي الناس عنهم
    كان نفسي فعلاً أترمي في حضنهم لما حاجة تضايقني في الدنيا و مش قادرة أحكيها لماما
    لما بابا يزعلني أترمي في حضنها و أحكيلها تراضيني حتى بكلمتين
    بس الحمد لله
    إحساس الشوق ده اللي بيعليهم عندنا أكتر و أكتر

    تحياتي يا سمو الأميرة
    ^ـ^

    ردحذف

Say something...