2010-03-18

راحوا مثل الحلم راحوا :(

د/ علي طبوشة مات !!

مافيش حد بعيد عن الموت ولا كبير عليه ، وانا مش معترضة على امر ربنا ابداً

بس كل ما اغمض  عيني بشوف صورته وهو في المحاضرة .. وكلامه لينا اول ما دخلنا الكلية

بشوفه وهو بيعلمنا ازاي نمسك الميكروفون صح ، وازاي نتكلم كإعلاميين ..

بشوف شياكته في الكلام والحركة وانه بيحسب كل تصرف قبل ما يعمله

رغم اني عارفة من سنة أولى انه تعبان وفي العناية المركزة بس كان بيطلع تاني

ويرجع يكمل شغله تاني .. 

كان بيدينا المحاضرة ويقعد في الكلية لحد الساعة خمسة بعد الضهر رغم انه من القاهرة

يعني لسة قدامه مشوار طويل وبالقطر كمان ما عندوش عربية

وحتى في رمضان كان ممكن يفطر في القطر لأنه ادانا المحاضرة كاملة

كان فعلاً بيحب شغله وبيعمله صح وكان عايزنا نكون ناس فاهمة شغلها صح 

وانا لسة عيلة في سنة اولى كنت ساعات بتضايق من تشدده وصرامته 

وكمان علشان ما ادانيش درجة حلوة رغم اني كنت بذاكر مادته .. 

بس لما كبرت سنة واتنين تانيين فهمته فاحترمته وحبيته


****


كان نفسي جداً اقول له قد ايه بحترمه واننا بنحبه وفخورين انه درس لنا

وكنت ناوية أول ما اخلص دراسة نعمل له شهادة تقدير حاجة كده رمزية 

نعبر له بيها عن حبنا بيه ، وما رضيتش اعملها غير لما اخلص علشان ما يفتكرش انه نفاق

واننا عايزين نحرجه فيدينا درجات ... 

ولما عرفنا انه تعبان اتفقنا نبعت له هدية معاها ورقة نقول له فيها اننا بنحبه اوي وربنا يقومك بالسلامة 

وترجع لنا تاني وكنا هنبعتها له النهاردة مع دكتور قريبه في الكلية مش بيجي غير الخميس :(

امبارح عرفنا انه مات .. قبل ما يعرف احنا بنحبه قد ايه وبنحترمه قد ايه

اللي ضايقني انه بجد كان بيخاف على مصلحتنا وفي ناس ولا فرق معاها

بعد ما عرفت الخبر بتضحك وناس بتقول احسن !

للأسف دا تقريباً جزاء اللي يشتغل بضمير في بلدنا :(


****

لو بتحب انسان بجد او عايز تشكره على أي حاجة اوعى تأجل دا

ممكن جداً ما تلحقش .. ممكن انت تموت او هو تموت وما يعرفش قد ايه بتحبه

والله العظيم كلمة الحب والتقدير لما بتكون من القلب طالعة بتفرق اوي مع ناس كتير


---------------------------------------------

بخصوص التعليقات انا اسفة والله بجد معنوياتي تحت الصفر 

ومش قادرة ارد كويس .. شكراً لكل حد علق ع البوستات اللي فاتت

إن شاء الله هرد بإذن الله بس لما ابقى تمام

هناك 11 تعليقًا:

  1. البقاء لله يا سارة، كلنا لها ومحدش كبير ولا بعيد عن الموت..
    وشعوركم بالعرفان له أكيد هيوصل له حتى بعد موته.. وعشان بجد تكونوا شكرتوه اتعلموا أكتر واعملوا بالعلم اللي اتعلمتوه منه.. هي دي مكافأة العالِم الحقيقية..

    شدي حيلك وربنا يصبرك ويصبر الجميع

    محمد الوكيل

    ردحذف
  2. البقاء لله ...
    راح عند للي بيحبه اكتر من الناس كلها
    الله عز وجل

    ردحذف
  3. أه نسيت اقولك
    أدعيلوا ... لو بنحب حد راح عند ربه ندعيله دي احلى حاجه نهديهاله

    ردحذف
  4. البقاء لله ,, ربنا يرحمه
    بس للاسف مش بتقف على حد يا حبيبتي
    هنكمل حياتنا ونفضل فاكرين ناس كتير كانوا غاليين علينا بالخير
    بس اهي الحياه بتمشي ,, هنعمل ايه !!!

    واطمني هو اكيد عرف دلوقتي انتوا قد ايه بتحبوه وبتحترموه
    لان الميت بيحس بكل حاجه :)

    ردحذف
  5. الله يرحمه ويحسن اليه

    ما حدش ينكر ولا يقدر يقول انه ما كنش بيحرص على مصلحتنا ولا يقدر ينكر اهتمامه بينا ف المقام الاول والاخير
    بجد الله يرحمه ويغفرله

    ردحذف
  6. البقاء لله ربنا يرحمه ويحسن مثواه الى الفردوس الاعلى

    ومدام انتي وغيرك بتحبوه وبتحترموه بالشكل دا اكيد حيوصله حبكم واحسن حاجة الدعاء انتو زي اولاده

    ردحذف
  7. البقاء لله وربنا يسكنه فسيح جناته بأذن الله
    تقبلي مروري وتحياتي

    ردحذف
  8. ونعم بالله
    ربنا يارب يستجيب لدعاءنا ويرحمه ويغفر له

    شكراً ليكم كلكم نورتوني

    ردحذف

Say something...