لعلمك

لعلمك

إقرأ لي

دخلوا بكليك شمال :D

Blog Archive

الاثنين، مارس 29، 2010

postheadericon علشان خاطري قلب كوووووويس

كتير اوى مش بقلب الشاى كويس ، واجى اشربه الاقيه مش مسكر ومش مظبوط ، وبكسل اجيب سكر تانى

فبضطر اشربه كده .. اللى بيضايقنى بقى انى بعد ما اخلص شرب الشاى بلاقى السكر مركون تحت

يعنى لو كنت قلبت شوية كان زمانى شربت شاى مظبوط ..

تعالى كده نفصص المشكلة دى

اول حاجة المشكلة ايه :

( انى ما عرفتش اشرب شاى مظبوط )

طيب وايه السبب ؟!

( 1 ) انى ما قلبتش الشاى كويس وانا بعمله ..

(( يعنى استهترت وانا بعمل الحاجة ))

(2) انى كسلت اجيب سكر تانى

(( يعنى اتكاسلت عن حل المشكلة رغم انها فى ايدى ))

طيب والنتيجة ايه (( نتيجة المشكلة والاسباب اللى ادت ليها ))

- النتيجة انى ما استمتعتش بالشاى ..

- وانى ضيعت مجهودى وما وصلتش للنتيجة اللى عايزاها

_____________________________

عارفين ان كلنا بنعمل الحركة دى بطرق مختلفة ؟؟

كتيييييييييييييييييير اوى بنستهتر واحنا بنعمل شغلنا ..

وكتيييييييييييييييييير اوى بنكسل نحل المشاكل رغم ان حلها فى ايدينا

وبعد دا كله نندم وندور على حلول صعبة ومتعبة رغم ان الحل اصلا فى ايدينا وجوا الكوباية

علشان كده علشان خااااااااااااااااااطرى اضغط على نفسك وابقى قلب كويس

قلب كويس واعمل كل حاجة كويس

حتى لو تعبت فى الاول بس صدقنى النتيجة هتفرق كتير
 
 
ملحوظة : البوست دا نشرته زمان ع المدونة هنا بس ماكانش في ناس كتير بتدخلها
فقولت اعيد نشره تاني

20 بوينتس أوف فيو:

A32L MaGNoNa يقول...

هيه .. انا اول تعليق

عندك حق يا لاسعة

حاجات كتيرة بتكون ف ايدينا لكن من كسلنا مش بنعملها <_<

جزاكي الله كل خير ياقمر

بنت _مصريه يقول...

السلام عليكم
البوست جميل اوووى
ولو كلنا فكرنا كده مش هبقى فى مشكله مش لها حل
لو كلنا عاملنا كل حاجه كويس من الاول هتفرق معنا اوووى
قال:_ رسول لله عليه وسلم، قَالَ : " إِنَّ اللَّهَ . يُحِبُّ إِذَا عَمِلَ أَحَدُكُمْ عَمَلا أَنْ يُتْقِنَهُ "
وده اسلوب حياه يارب كلنا نبعمل بيه
اسفه للاطاله
ورجاء تقبلى مرورى

بنت _مصريه يقول...

السلام عليكم
عندك حق فى كلامك
يارب نعمل كلنا كل حاجه كويس علشان نبقى احسن
قال رسول لله عليه وسلم، قَالَ : " إِنَّ اللَّهَ . يُحِبُّ إِذَا عَمِلَ أَحَدُكُمْ عَمَلا أَنْ يُتْقِنَهُ "
جزاكى الله خير
تقبلى مرورى

محمد منصور صقر يقول...

حلو قوي التشبيه ده يا سارة
تسلم رؤيتك

قبلاوى يقول...

انا لسه حالا قبل ما اقرا البوست ده مخلص كوباية شاى بنفس المواصفات دى

وبرضه كسلت احط سكر تانى :)

بس بعد ما قريته بصيت ف الكوبايه ملقيتش سكر تحت .. يعنى كنت حاطط قليل م الاول


عند حق على فكره..

بس انا كنت فاكر الكسل ده سمه شخصيه يعنى .. طلع عند الكل اهه

мαησηα يقول...

اممممممم طيب ينفع اقلب بالمشقلب

ههههههه

عارفة بيعجبنى اوى تخيلك

للحاجة بالمنظر ده

تقنعى اى حد بمنتهى البساطة

دمتى رائعة والسع

سمع هوص (Abo 3li) يقول...

سارة.. انتي نشرتي البوست ده قبل كده بس مش فاكر فين, صح ؟؟


كلام جميل ومعقوول كاالعادة

تحياتي ياسمو الاميرة

بنـوتــــة يقول...

سارة أجوان
كلامك بجد من الكلام اللي بقراه في وقتها
جامده يا سمو الأميرة
تحياتي
^ـ^

انسان عادي يقول...

يمكن انا رديت علي الفيس
بس هنا عايز اقول حاجة تانية
ان احنا ساعات بنقلب كويس
وبرضو مش بيطلع مظبوط
فده بيأدي ان احنا متفرقش معانا بقي
ونقلب اي كلام
تأدية واجب يعني لحد ما نتعود علي الطعم اللي مش مظبوط ده
وبيبقي بالنسبة لنا مظبوط جدا

نايس بوست يا سارة

P A S H A يقول...

انحناءة
وابتسامة
وتصفيق

:))

مبدعة يا ساره

ربنا يكرمك ويوفقك دايماً

خالص تقديري

star in the sky يقول...

طيب ينفع اقلب النسكافيه

اصل مبشربش شاى ولا نسكافيه
هع هع هع هع هع هع هع


الكسل ده سبب لحاجات كتيرة اووى فى حياتنا لو نتخلى عنه شوية قليلة بس حاجات كتيرررة اوى هتتضبط فى حياتنا

سمو الامير يقول...

انا باقلب لما الشاي نفسه يقرب يدوب :D

بس باكسل اعمل شاي :D

حَـبآيـۃْ.بـטּـدۉڷ يقول...

فعلا يا لآسعه معاااكي حق ..

الكسل و الخمـول و الإستهتار .. حاجات كتييير بقت منتشره دلوقت .. وخصوصا الكسل ده .. الواحد بقى يكسل يقوم يجيب كوباية المايه >_< ..

وكل شاي وانتي طيبه ..^_^

Do Julitte يقول...

انا مش بحب الشاي :D

ودا من حسن حظي

بس عاوزه اقولك دا اللي بعمله وبيعمله كتير ف المذاكره بالذات

وخصوصا لو صيدله طنطا :D :D

موناليزا يقول...

عندك حق جدا

*الطالبة عفو الله *زوزو يقول...

تححححححححفة بجد

معك حق حاجات كثثثثثثثثثثير اوي بستهتر بها و لسبب تافه اوي و كسل منا بس العاقبة بتكون اكبر من كسلنا و تهاونا

على فكرة المثل لانتي ضربتيه في الاول تحفة و طرحتي الموضوع بطريقة جميلة

تسلم ايدك يا ست سارة

محمد التركى يقول...

السلام عليكم ورحمه الله وبركاته
سمو الأميره أعزكى الله ودام عليكى التواضع
جميل جدآ الكلام ده
بس أنتى غلطانه فى مثل بيقولك أدى العيش لخبازه ولو ياخد نصه
صح
هههههههههههه

بجد والله كلامك صح بس هقولك حاجه مش كل حاجه صح تنفع
أنا مثلآ فى الشغل بشتغل بكل تركيز وزمه واتقان
بس الغلطه بفوره ولو معدتهاش هتكون مشكله كبيره جدا ولو حولت أصلحها هتكون مشكله أكبر وأكبر

بس المشكله الكبيره ليا أنى أشرب شاى مش متظبط
بس الحمد لله أنا عارف مدونه بيقدمو واحد شاى بس أيه عجب
ياريت تروحى هناك مش صاحبتها أختك ولا ايه
صح

بجد البوست جميل والرساله وصلت
وفعلآ لو كلنا نتقى الله فى شغلنا ولقمه عشنا ربنا هيكرمنا جدا
ربنا يوفقك دايمآ سمو الأميره

تقبلى مرورى السريع وسامحينى أى معلقتش على البوست اللى فات أصلى كنت مشغول ومسافر فى الشغل
بس مش هفوتلك حاجه تانى بأذن الله

تحياتى وحبى لسموك

sa3ed يقول...

بسيطه وقويه

Timo.. يقول...

اعترف لك وبصوت عالي اني بحب بوستاتك قوي..
بس اعذريني لاني باجي كل فترة ومش ديما باكون هنا..بس لما باجي باحس انه فيه حاجات كتير اتعملت ولازم احاول الحقها..
حاسس اني بقيت عجوز قوي :)

انا مبسووووووط قوي من البوست ده لاني حسيت ان انا اللي باتكلم ودي ديما طريقتي..خاصة في المحاضرات..
اقعد اقول لهم مثال بعييييد والففهم وبعدين اسيبهم يفكروا شوية واللي مش يقدر يوصل للمعنى المقصود..يستاهل انه مش ها يشرب الشاي مظبوط..!! (';')

أخـت فـى الله يقول...

أحب انا التأمل فى احوالنا دة والاسقاط اللى بنعمله على حياتنا
.
.
والله يحب اذا عمل احدنا عملا ..ان يتقنه :)

المتابعون

اعتبرها بيتك ♥

وِش القفص

خليك ورايا

دليفري..