2010-06-26

Cat's spirit



انا بعشق القطط .. بعشقهم بجد

مش بس القطة الأمورة بنت الناس النضيفة .. لأ 

بعشق القطط حتى لو كانت متشردة ومتبهدلة في الشارع من قبل ما تتولد 

بعشقها حتى لو كانت متوسخة وحتى لو كان لونها اسود زي الفحم

ودا اللي أكد لي بجد اني بعشقهم لأنهم قطط مش لأنهم كائنات لطيفة أو لأن كل البنات الرقيقات بيحبوا القطط والشيكولاتة 

- بالمناسبة .. أنا ما بحبش الشيكولاتة -

*****

في مقولة لــ د / أحمد خالد توفيق بتقول
تحبين الأطفال ؟.. برافو .. لكنھم طبعًا ھؤلاء الأطفال الذين يظھرون على علب الألبان الصناعية .. لو استطعت أن تحبي طفلاً قذرًا فقيرًا مبلل الثياب يتزاحم الذباب والمخاط حول وجھه فأنا أقر لك بأنك أنثى كاملة..”
 هو دا بالظبط وضعي مع القطط ..

وحاسة ان الموضوع أكبر من الحب ، انا  بمجرد ما اشوف قطة بحس ان في روح قطة بتتحرك جوايا

ببقى هتجنن ومش على بعضي عايزة العب معاها ، عايزاها تخربشني ، تعضني تجري ورايا

وممكن اتدحرج معاها ع الأرض عادي ، ممكن احضنها والف بيها :)

وكنت متعودة العب مع قططي استغماية :)

بعشق فيهم كل حاجة .. كل صفاتهم وحاسة ان فيا كتير منهم

شقاوتهم وفي نفس الوقت عقلهم ، حنيتهم وفي نفس الوقت قسوتهم

وفائهم وغدرهم اللي في لحظة .. أيون انا  غدارة لو حد غدر بيا ما بسميش عليه ، وللأسف بنسى له كل حاجة حلوة مدام غدر بيا

وغيرتهم اللي زيادة عن اللزوم ، قطتي كان بتغير عليا من ولادها ، وانا حاسة اني ممكن اغير على جوزي من بناتي !

وعاملة زيهم كسولة بس نشيطة .. بمزاج كده

وبكون بهزر وبضحك وآخر فرفشة وفجأة الاقي نفسي  قفلت كده وقلبت آخر نكد

****

زيادة على كل دا مافيش حاجة في الدنيا بتخليني اضحك وانسى نفسي مهما كان فيا زي القطط

انا مش من النوع اللي بيحب الأطفال اوي ويتهبل عليهم واقعد اجمع صورهم وكده .. بس ممكن دا يحصل لي مع القطط

كنت من كام يوم تعبانة واغمن عليا قبل الامتحان وبموت خالص

وانا نازلة شوفت قطط صغيرين كده محتلين البيت بتاعنا من تحت 

بمجرد ما شوفت منظرهم وهم كل واحد بيبص لي بفضول كده وشوفت عينيهم نسيت نفسي وبقيت زي الفل 

وكان هاين عليا اسيب الامتحان واقعد جنبهم :)

بجد كائنات مش معقولة :)

بيدوني طاقة تفاؤل  رهيبة 

وبيحسسوني اني حنينة اوي ، وانا كنت بدأت احس اني قاسية ومتبلدة المشاعر 

****

كل اللي بيحبوا القطط بقى ومهوسين بيهم يدخلوا هنا ، صفحة عاملاها رشا صديقتي الصدوقة :)

بس جميلة اوي .. كل ما اتزهقن واكتئب بدخل هناك الاقي نفسي :)

بالمناسبة الصورة اللي فوق دي صورة قطة من القطط اللي محتلين البيت :)

بالزمة حد يشوف العسل دا ويقدر ما يحبوش ؟

هناك 6 تعليقات:

  1. (:

    ربنا يديكى قطط كتييييير

    انتى عارفة ليا واحد صحبى بيموت

    فى القطط بطريقة ممكن زيك كدة

    بس هو ممكن لو احنا ماشين فى الشارع وشاف حد بيضرب قطة بينزل خناق معاه

    بس ربنا يحبب فيكى قططه (:(:

    ألف سلامة ليكى

    ردحذف
  2. ههههههههههههه

    شغل قطط بصحيح

    فعلا انا بشوف ان القطط بتشعرني بنوع من البراءه رغم ان عارف انها بردو ملهاش امان


    بس دا من ناحية التركيبه النفسيه بتاعتها

    اما التركيبه الشكليه والتصرفات العاديه بتكون القطط زي الاطفال في حاجات كتير

    احييكي على البوست ياساره
    بالتوفيق دايما

    ردحذف
  3. ههههههههههههه

    شغل قطط بصحيح

    فعلا انا بشوف ان القطط بتشعرني بنوع من البراءه رغم ان عارف انها بردو ملهاش امان


    بس دا من ناحية التركيبه النفسيه بتاعتها

    اما التركيبه الشكليه والتصرفات العاديه بتكون القطط زي الاطفال في حاجات كتير

    احييكي على البوست ياساره
    بالتوفيق دايما

    ردحذف
  4. ربنا يوفقك يا حجة
    انا كنت نفسي اربي قطة أو كلب
    بس عارف انهم هيتعذبوا معيا
    فقلت أربي ثعبان بس مستحملوش معايا 3 ايام هما كمان
    فربيت معيز ومطلع عين اهلهم ربنا يسمحني لان لو كنت ليا الصرفا فيهم كنت خلصت منهم وبعتهم أصل هما بتوع ابويا وانا المسئول عنهم ..
    تحياتي .

    ردحذف
  5. انت مش بنوتة لاسعة...
    نووو..انت بنوتة شقية...وجدا كمان :)
    انا كمان باحب القدد جدااا وباحترم ذكاءها لانها كائن (انثوي) جدا..
    بابا بيقول ديما (القطة والمرأة تقضي نصف وقتها للحفاظ على مظهرها )
    وعلى فكرة القطط من اكثر الكائنات اللي عندها كبرياء..ورهيب كمان :)

    ردحذف
  6. القطط حلوة
    جدا
    وانا بحبهم قوى
    مدونتك جميله جدا
    بارك الله لكى

    ردحذف

Say something...