2010-10-07

هو دا تعليم ولا سلق بيض ؟؟؟

اول امبارح بسأل ولاد عمي عن نظام المدرسة وكده قولت اشوف بركات السيد الوزير عاملة ايه 
فوجئت ان بنت عمي اللي في " رابعة ابتدائي " بتقول لي انهم بياخدوا تسع حصص !!!
اه والله تسع حصص !! وبيخلصوا الساعة اتناشر الضهر !! ومافيش فسحة !!

انتوا متخيلين ؟؟ يعني العيل يروح المدرسة من سبعة لـ 12 عمال يسمع شرح - أو اللي بيقولوا عليه شرح 

بياخد 9 حصص يعني 9 مواد في 5 ساعات ! من غير أكل ولا شرب في النص 
من غير حتى فترة تمهيدية علشان العقل يهضم الكلام اللي سمعه ويستوعبه
ودول أطفال كمان !!

انا فاكرة اني كنت في ثانوي وماكنش بيبقى عندي أي استعداد افهم او استقبل أي شرح بعد الحصة الرابعة !

والسبب ايه ؟ 

المدرسة العدد فيها كبير اوي فـ قاسمينهم فترتين وعايزين طبعاً ينجزوا الفترتين بدري  !

فين حضرة السيد وزير الداخلية والتعليم بقى من اللي بيحصل دا ؟؟؟؟؟؟؟

هل ممكن ان طالب بيعتمد على المدرسة بس في ظروف زي دي يفهم اي حاجة ؟ ولا ينجح من غير دروس ؟؟

دا مش تعليم دا بجد سلق بيض :(

إمعاناً في فقع المرارة هسيبكم مع الفيديو دا






هناك 5 تعليقات:

  1. وأنا من هذا المزنق أحب أهدئ السيد وسير التعبئه والتعليم أغنيه " يا صبر صبصب قلوب الصبايا المتصبصبين وصوب صبابك علي الطلبه المزنوقين يا صااااااااابر الصبر صبرنا بصبر المساجين "

    D007a

    ردحذف
  2. ياريته حتى سلق بيض :((

    ردحذف
  3. الحمد لله علي نعمة الخروج من المدرسة
    الحمد لله علي نعمة عدم المرض النفسي اثناء المدرسة

    الشكل لله علي ان جعلني مدرسا وساصبر وسأحستب بسبب بكالوريوسي

    ردحذف
  4. هى الحصه اد ايه
    تسع حصص فى خمس ساعات
    انا فاكر على ايامنا كانوا 6 او 7 حصص بس حتى الحصص غليت سبحانه
    انما وزير التعبئه والتهليب هيعمل ايه بردوا اهوا بيخربها واحده واحده
    اصبروا عليه

    ردحذف
  5. انا اعرف التسع حصص اللى الخروج بعدهم بيبقى 2 و نص 3
    معرفش كتير عن المدارس الفترتين
    بس اللى متأكده منه إن التسع حصص دول منهم حوالى 3 حصص مالهومش لازمة
    ألعاب و موسيقى و احتياطى و ما شابه
    و طبعاً الـ3 بيعاملوا معاملة الاحتياطى
    لا فى لعب ولا موسيقى أكيد
    ياريت التسع حصص كانت أكبر مشاكل التعليم
    و ياريته فعلاً كان سلق بيض
    ده المطيخ كله اتحرق يا ساره :)

    ردحذف

Say something...