2010-12-25

يعني إيه مدَوِّن ؟



بقالي فترة كبيرة نفسي أكتب الموضوع دا بس بَكَسِل :D

كذا مرة الاقي حد بيحكم ع المدونين كلهم حكم واحد ، كأنه نوع مثلاً .. يعني زي ما يكون في ذكر ، أنثى ، مدون :D

بيفترضوا ان كل المدونين أخلاق واحدة ، طباع واحدة ، تصرفات واحدة 

واللي ما يعملش كده ما يبقاش مدون ، واللي ما يكتبش بمعدل معين يبقى مش مدون

اختي مثلاً .. كانت بتفترض جوا نفسها ان كل المدونين محترمين ، وعشان كده اتصدمت كتير في ناس عندهم مدونات ومش محترمين !

وتقول لي ازااااااااي ؟ دا عنده مدونة وبيكتب حلو كمان ازاي يطلع كده ؟ 

كنت بضحك جداً .. لأن مش شرط كلنا نكون اخلاق واحدة .. مش شرط كلنا نكون زي بعض

دا صوابعك مش زي بعضيها زي ما بيقولوا !

اللي بيفترض ان المدونين كلهم زي بعض لازم يفترض ان كل اللي عندهم كشاكيل زي بعض :D

 ماهو أصل المدونة دي زي الكشكول .. كل واحد حر يكتب في كشكوله ايه وازاي وامتى ؟

كل واحد بيطلع اللي جواه في كشكوله .. وكل واحد بيطلع اللي يحب ان الناس تشوفه في مدونته

وناس بتطلع اللي ما بتقدرش تطلعه قدام الناس وجهاً لوجه على مدوناتها 

يعني اللي بيدون دا  في الحقيقة كإنسان اما بيكون زي ما هو في مدونته

واما بيكون عكس مدونته بالظبط لأنه ما قدرش يكون كده في الحقيقة فبيعيش دا على المدونة

دي نقطة ..

تاني نقطة .. مش كل اللي بيكتب حلو هو حلو .. مش كل اللي بينصح الناس بالأخلاق عنده أخلاق

في ناس كتييييييييييييير أوي مش شبه كلامهم :(

آخر نقطة بقى .. أفشل حاجة في الدنيا هي فكرة ان الناس تعمل مجتمع :D

والمشاكل كلها بتحصل من الحكاية دي

كل ما الناس تقرب من بعضها أوي وتعرف بعضها أوي تكتر المشاكل 

والنفوس تتغير 

عرفت - غصب عني - حاجات كتير عن ناس مدونين ، خليتني كارهة الناس كلها لأني اكتشفت انه مش فارقة

سينا زي سونيا ، كله محصل بعضه والدنيا أوحش كتير ما أنا كنت متخيلة

عمري ما عرفت مجتمع ومالقيتش فيه الناس بتحقد ع بعض وبتفتري على بعض وبتخدع بعض

حاجة مقرفة أوي 

علشان كده .. اتأكدت اني كنت صح لما قررت اكون بعيدة وأكون مع نفسي وما اقربش من حد

انا كده مرتااااااااااحة بجد :)

ومش بقول على نفسي أحسن من حد .. بس ع الأقل الواحد وهو لوحده ما بيعملش حاجة وحشة في حد




هناك 7 تعليقات:

  1. قال رسول الله –صلى الله عليه وسلم- "الذي يخالط الناس ويصبر على أذاهم خير من الذي لا يخالط الناس ولا يتحمل أذاهم" رواه الترمذي وابن ماجة .

    وأنا معاكي
    مفيش حد يفضح نفسه
    وكلنا ملنين عيوب .
    ومفيش حد هيجاهر بقلة القيمة والأدب .
    بس
    وأهدافنا بتختلف من مكان لتاني
    في ناس عاملة المدونة فك عن نفسها
    وناس عملاها . تغليس .

    أنا كنت عاملها عند .. وبعد شوية حبيت التدوين .
    وقعدت 3 سنين لا بقرا لحد ولا حد بيقرالي الا كام واحد

    بس عرفت إن عشان يتقرالي لازم أقرا .. وكدا يعني ..

    ربنا يحفظنا من شياطين الإنس وشيطان الجن .

    ردحذف
  2. اولا ازيك ياسارة

    ثانيا انا بهنيكى ع النوت الجميلة دى لان فعلا دى وجهة نظرى بالظبط مش معنى انى بكتب حلو يبقى انا شخص كويس
    وانا موافقك جد على موضوع ان فى اشخاص ماقدروش يظهروا بشكل معين فى الحقيقة فظهروا بيها فى كتاباتهم
    انا شخصيا كده بهزر كتير وبضحك كتير فى تدويناتى وانا فى الحقيقة نادرا ما بضحك
    وانا بردك موافقك جدا على موقفك من موضوع مجتمع ده مفيش احسن من اللى يبقى بعيد انا مش عايز صورتى تتغير عن الناس وتفضل حلوه زى ما رسموها ليا من البداية

    بجد تسلم ايديكى ياسارة بهنيكى

    ردحذف
  3. الكلام جميل يا سارة
    أنا مع رأي فخامة الرئيس MR.PRESIDENT
    لازم ده يقرا لده و دي تقرا لدول و هكذا و هنعرف و نتعلم
    لكن مش عارفة ليه حاسة ان انتي مش قصدك كده !!؟
    و أنا ساعات كتييييير بعمل كده
    حد عاجبني أوي " كلامه و تدويناته "
    باخدها و أقراها و أتعلم منها
    ميهمنيش بقى أعرف كويس وحش عنده أكتر عنده أقل
    أنا اتعلمت و ليه الشكر
    و خلصنا على كده
    ممكن كام حد يعلق معايا
    كام حد أحب أتعرف عليهم لإني عرفت شخصيتهم بأي شكل أياً كان
    - و الكلام ده في التدوين حصل مع 2 بس -
    حد قابلته مرة و حد أعرفه على الفيس
    و بس
    ده لا يعني إني رافضة لأي علاقة أو كلام
    بالعكس أهلاً وسهلاً
    لكن مش سداح مداح و كلنا " صنف " واحد فهيصا بقى يالا

    ملحوظة : حاسة إن ده مش تعليق أد ما هو فضفضة ، بجد يا سارة ربنا يكرمك كلامك بيجيلي في الجون خصوصاً إن شغلي خلى دماغي وقفت لفترة و جاري إعادة سمكرتها
    ^ـ^

    ردحذف
  4. كلامك صحيح فى مجمله ...لكن المشكله إننا شعب طيب بيصدق المظهر فى الغالب ..يعنى لو شفتى واحد بدقن حتقولى عليه طيب وملتزم...وده مش ضرورى وكمان لما تلاقى حد بيكتب حلو وكلام كويس فى مدونته حتتصورى إنه بيعبر عن نفسه وبالتالى لازم يكون كويس.. لكن الواقع إن كل مكان وكل مجال فيه الكويس وفيه الوحش .. عنى ما ينفعش نحكم على كل الدكاتره إنهم كويسييين لمجرد إنهم خريجى كلية قمه .. أو على كل السباكين إنهم غير كده لمجرد إنهم مش كملوا تعليمهم .. وبرضه ما ينفعش نحكم على كل اللى بيكتبوا فى مدونات حكم واحد لأن كل واحد بصمه خاصه بيه..لوحده مفيش حد يشبه التانى.. ثانيا عالم الانترنت عموما عالم إفتراضى مش حقيقى 100% وبالتالى مش ينفع نحكم من خلاله...

    ردحذف
  5. هو الكلام صح بالتعميم
    مدون مش مدون كل واحد عنده اخلاق خاصة بيه زي ما عنده اسمه خاص بيه

    من بره حلوين جدا
    من جوه الله اعلم

    فلما نحب نتعارف
    نتعارف من بره ومش نتعرف على اللي جوه

    العلاقاات الطفيفة ناجحة لحد ما من غيرها


    تسلمي يا قمر

    ردحذف
  6. كلامك صحيح اختي ، مش كل المدونيين محترمين ومش كلهم مش محترمين ،، لازم تكون علاقتنا فيهم مجرد علاقة زمالة مش اكثر ، لو عجبنا اللي بيكتبوه نقرأه ونعلق عليه ، ما عجبناش نمر مرور الكرام وبصمت وبوقع أقدام خفية علشان مايحسوش انه عدينا عندهم ..
    انا كتبت موضوع حول التدوين ، يسعدني مرورك عليه .. ( مع انه عبارة عن نصائح للمدونين

    http://emtiazalnahhal.blogspot.com/2010/11/blog-post_13.html

    تقبلي مروري ..

    ردحذف

Say something...