2010-02-28

إلى كاميلا .. مش أول مرة اعملها :)

 ملحوظة : البوست دا فضفضة بحتة .. ما اظنش حد هيستفاد منه حاجة

بس انا ارتحت لما كتبته .. 

عندي صندوق صغير كده مسمياه صندوق الدنيا

فيه الكروت اللي اصحابي كانوا بيدوهاني من اعدادي لحد دلوقتي

فيه كمان هدايا عيد ميلادي الصغيرة 

وفيها بقى صندوق تاني صغير كده فيه جواباتي اللي كنت بكتبها وانا صغيرة للقطط بتاعتي اللي ماتت

نسمة وكاميلا وبيشو وسيمبا

عمري ما كنت بكتب لهم وهم عايشين .. لأني كنت دايماً بتكلم معاهم


كنت تقريباً في الفترة دي ما بتكلمش وافضفض غير معاهم

كنت أربعة وعشرين ساعة مع القطط

وانا صاحية معاهم ووانا نايمة بحلم بيهم :)

المهم بقى اني كل ما اتخنق كنت بكتب لهم

لحد ما كبرت ودخلت كلية تقريباً .. بطلت اكتب لهم

بس كنت كل ما اتخنق اقرا اللي كنت كاتباه ليهم

وأعيط لما  اقرأ جواباتي ليهم فارتاح نفسياً بقى

ونظراً لإني مخنوقة اليومين دول ومش طايقاني 

فتحت امبارح صندوق الدنيا

أول ورقة لقيتها كان مكتوب فيها



" كاميلا ولدت وجابت أربع قطط شبهها

3 اولاد : 1 بنت

يوم السبت 15/5/2004

ساعة ما قريت الورقة افتكرت كل حاجة عن كاميلا

افتكرت لعبنا سوا 

وافتكرت لما كنت اقعد ع الكمبيوتر واطنشها وتروح ناطة وتضرب الشاشة

افتكرت لما كانت تقعد تتفرج معانا ع التليفزيون وتتابع المسلسل بانفعال :)

افتكرتها لما كانت حامل وكنت حاسة كأن بنتي حامل 

وكل يوم الصبح ابوس ولادها ف بطنها وهم بيلعبوا كده وشكلهم حلو اوي

وافتكرت يوم ما ولدت ويوم ما عملت لولادها سبوع اول ما فتحوا ورشيت عليهم ريحان 

افتكرت ابنها ابو حسنة " سيمبا " اللي كان بيحبني اكتر من مامته

ويسيبها ويجي لي من قبل ما يفتح عينه

وكنت بقول لماما اكيد دا اللي كنت ببوسه وهم ف   بطنها علشان كده بيحبني

افتكرت بردو انها للأسف اختفت فجأة وولادها لسة بيرضعوا :(

وانها جات لي ف الحلم ودعتني ووصتني أأكل ولادها

وكنت برضعهم بإزازة قطرة :) 

افتكرت حاجات كتيييييييييييييييييير حلوة اوي عشتها معاهم

وافتكرت قد ايه قلبي كان ابيض اوي وانا معاهم

وكنت حنينة اوي 

ساعات بحس اني بقيت قاسية ومش زي زمان :(


 ***

.. مش عارفة علشان كبرت ولا علشان ما بقوش في حياتي

كاميلا .. وحشتيييييييني أوي بجد ومحتاجاكي اوووووي اليومين دول اكتر من اي حاجة

بيشو وسيمبا .. مفتقدة شقاوتكم اووووي .. نفسي ارجع العب معاكم

لعبكم لسة موجودة عندي :) 

نسمة .. من يوم ما موتتي والخير مشي من بيتنا وحاجات كتير حلوة :(

اكتشفت اني كنت بحبك اوي وانا مش عارفة :( 

***

من بعدكم ما قدرتش احب اي قطة تانية

حسيت اني هخونكم لو حبيت قطة زي ما حبيتكم 


****

وانا صغيرة كنت بكتب لكم وانا متأكدة انكم حاسين بيا

بس دلوقتي مش عارفة :( يارب لو حاسين بيا تدعوا لي 

زي ما زمان كنتوا بتدعوا لي وانا رايحة الإمتحان 

بحبكم بجد .. وحشتوني اوي 

2010-02-22

مشاعر مُرهَقة .. منتظرة رايكم




دا لينك لكتابي الإليكتروني الأول


بعض او اغلب اللي فيه اتنشر قبل كده بس في مدونات تانية بتاعتي

منتظرة رأيكم بصراحة
و دا هيكون بداية لحاجة كده في دماغي بدرسها ويارب تنفع 

:) هقول عليها اكيد بس في وقتها

2010-02-17

مش هتموتي من غيره


كذا مرة واحدة تشتكي لي من الاهانة اللي بتتهانها من جوزها او خطيبها او حبيبها 

ولما اذبهل من المعاملة الوحشة اللي بيعاملها بيها واقولها يابنتي طب ومستحملة ليه ؟؟

دي مش تصرفات انسان بيحب مكملة ليه ؟؟

تقول لي مش قادرة اسيبه .. انا اتعلقت جداً بيه وهموت لو بعدنا

علشان كل بنت متخيلة كده .. انا بكتب البوست دا

وبقولها صدقيني .. مش هتموتي من غيره 


(1) لن تموتي حباً ..

مش هتموتي من كتر حبك ليه .. إلا إذا كنتي انتي عايزة تموتي

لو فكرتي بعقلك لمجرد دقيقتين هتفهمي انه مش بيحبك

ولو فكرتي بعقلك هتعرفي انك مش المفروض تحبيه ولا تضحي براحتك عشانه

لأن الانسان المفروض يستحمل ويضحي ويحب انسان لما يكون بيحافظ على كرامته
وبيحافظ على مشاعره .. ومستعد يضحي ويتحمل عشانه بردو 

لو فكرتي هتلاقي نفسك حقيقي من غيره أحسن 

ولو حطيتي في دماغك انك تقدري تبعدي هتقدري وهتبعدي

كل المشكلة .. إنك مش عايزة تقدري . .أو مش عارفة انك تقدري 


(2) لن تموتي جوعاً ..

دي بقولها لكل زوجة وأم .. عايشة مع انسان لا بيحترمها ولا بيصونها ولا بيحبها 

ومتحملة الذل و البهدلة علشان متخيلة انها مش هتلاقي تاكل لو سابته

او ان ولادها هيتشردوا في الشارع من غيره

لأ .. ربنا ما بينساش حد 

ربنا هو اللي بيرزقه رزقكم .. وفي أي مكان هتكونوا فيه هيرزقكم

مافيش اي حاجة في الدنيا تجبرك تعيشي مع زوج مافيش بينك وبينه - على الأقل - مودة ورحمة 

تقدري تشتغلي حتى لو شهادتك مش كويسة او لو مش معاكي شهادة أصلاً

وهتقدر تجيبي لولادك أكل " حلال " لأن ربنا مش هيسيبكم تموتوا م الجوع

مش هتكوني عبء على حد .. انتي انسانة ليكي عقل وربنا مديكي صحة وتقدري تتحملي مسؤولية نفسك

مافيش حاجة اسمها استحمل علشان ولادي يعيشوا في خير ابوهم

لأن مافيش معنى للحياة في وجود الخناقات والبهدلة وبعزقة الكرامة

(3) لن تموتي خوفاً ..

مافيش حاجة اسمها ضل راجل ولا ضل حيطة 

ومافيش حاجة اسمها خايفة من كلام الناس 

مين قالك ان الناس ما بتتكلمش وهو بيهينك كل يوم ؟؟

مين قال لك ان البني آدم اللي يبهدل مراته ويهينها دا راجل اساساً ؟؟

انتِ تقدري تحمي نفسك من أي حد وماحدش هياكلك .. انتِ أقوى مما تتخيلي والله

وانتِ كمان تقدري تجبري الناس تحترمك بتصرفاتك ، واللي يتكلم عليكي بعد كده ربنا ينتقم منه 

اوعي تخلي كلام الناس يجبرك على عمل حاجة انتي مش قابلاها

او على الاستمرار في حياة انتي مش مرتاحة فيها

.\/.\/.\/.\

وكلامي دا مش تحريض على هدم البيوت

لأ كلامي دا تحريض للأنثى على المحافظة على كرامتها

تحريض ليها علشان تنسى كل الخوف اللي رضعته مع لبن أمها

واعتمادها على الراجل بشكل مستفز

لدرجة انها متخيلة ان حياتها هتقف لو ماكانش في راجل هي مسؤولة منه


آخر حاجة بقى دا لينك لكتاب أحلام مستغانمي 

نسيان . كوم .. بنصح كل بنت انها تقراه لأنه فعلاً مفيد جداً

2010-02-14

نِفسي في جدو

ماحدش يفهمني غلط ، مش قصدي جدو بتاع الكورة أنا قصدي جدو اللي هو جراند فازر :D

المهم .. ندخل ف الموضوع ..

أي انسان طبيعي المفروض بيكون ليه 2 جدو ..

جدو من ناحية بابا وجدو من ناحية ماما
أنا للاسف ماليش ولا جدو .. 

جدو والد ماما اتوفى قبل ما اتولد 

وجدو والد بابا اتوفى وانا صغيرة اوي 

فمفتقدة بجد إحساسي بــ " الجد " ..

مفتقدة حكايات الأجداد الغريبة والجميلة

مفتقدة التجاعيد الهادية والوش المتطمن 

مفتقدة اني ادلعه واتدلع عليه :)

مفتقدة العيد اللي يجي بزيارته لينا

لأ زيارة إيه .. أكيد كان هيقعد معانا على طول 

كان نفسي يكون لي جدو اروح اترمي في حضنه لو بابا زعلني ..

كان نفسي نقعد سوا نحل كلمات متقاطعة ونتسابق في حلها

كان نفسي ياخدني معاه نتمشى ويقعد يحكي لي حكايات عن مصر زمان

وعن الناس زمان ..

كان نفسي في جدو :(

حاجة أخيرة ..
جدو عبدو .. انتَ جدو الوحيد اللي عرفته وانا كبيرة

رغم اني ما شوفتكش لكن بحبك اوي .. ونفسي بجد أشوفك

واتكلم معاك وأزأز معاك لب :)  

يارب أشوفك .. نفسي اوي اشوفك 

أن تكون وحيداً في القطار



مؤخراً .. بقيت اعشق السفر لوحدي 

علشان بقدر اتفرج على الطريق وأسرح فيه من غير ما حد يقاطعني

وعلشان بيكون فرصة افكر فيها في حالي ومحتالي 

لكن في يوم ما .. الظروف خليتني أروح لوحدي مسافة طويلة نوعاً ما بالقطر

وكنت فاكرة نفسي كالعادة هستمتع بالتجربة دي ..

لكن لقيتني متضايقة .. ما كنتش خايفة بس كنت قلقانة

كنت لوحدي .. ورغم تعبي مش قادرة انام لأن مافيش حد أثق فيه هيصحيني ف الوقت المناسب

وكنت بردو خايفة لو نمت حد يسرق شنطتي 

ولما غلبني النوم دقيقة قمت مفزوعة وخايفة 

هي دي مشكلة إنك تكون لوحدك .. في قطر الحياة

مش هتلاقي أبداً كتف تنام عليه .. لا حنين بقى ولا مش حنين

هتبقى عايش عينك في وسط راسك ..

تنام بنص عين .. ونص قلب .. ونص راحة

خايف تطمن .. خايف لأنك لوحدك .. مهما كنت قريب من الناس بردو هتحس إنك غريب

المشكلة الأكبر بقى من إنك تكون لوحدك .. هي إنك يكون معاك إنسان انت مش واثق فيه

بدل ما هتنام بنص عين مش هتنام خالص

لأنه قريب منك وانت خايف منه .. أو ع الأقل مش واثق فيه

الظروف ممكن تفرض عليك شريكك في قطار الحياة زي ما بتفرضه عليك كتير في القطار العادي

بس صدقني .. لو اخترت شريكك من قبل ما تروح المحطة أصلاً ..

مافيش حاجة هتقدر تفرض عليك حد غيره

بس المهم .. تختاره صح

2010-02-13

يوم في مملكة الكتاب :)

روحت أنا ومنونة معرض الكتاب يوم السبت اللي فات ، وانا بتمشى فيه تخيلت كده اني في مملكة الكتب

مدينة أو دولة كل البيوت فيها مكتبات .. وكل الناس اللي فيها بتحب تقرا

وماحدش بيبص لك ع إنك مكلكع أو كائن فضائي لأنك بتحب الكتب 

بجد الدنيا تبقى حلوة أوي لو في مملكة بالشكل دا .. 

اليوم كان حاااااافل جداً وحصلت فيه حاجات كتير

لكن أهم وأروع حاجة حصلت يوميها .. ويمكن اروع حاجة حصلت لي من كام شهر أساساً

هي إني قابلت الانسانة اللي بقالي 3 سنين بحلم برقم تليفونها حتى 

(( أ/ عبلة الرويني ))

أول واحدة خليتني أحب أمل دنقل ..

أول واحدة تخليني أبكي وانا بقرأ قصة حياة شاعر أو شخصية معروفة

أول واحدة أقرأ كتابها من اوله لآخره يمكن مرة كل أسبوع 

قابلتها صدفة وقلبي عرفها :) وبجد طلعت إنسانة رائعة جداً زي ما هي كاتبة رائعة

وكمان يوميها قابلت بلدياااااااااتي .. معظم رواد الصالون الأدبي الطنطاوي :)

بصراحة لولاهم بقيادة أحمد جلال كان زماني لحد دلوقتي لسة تايهة في معرض الكتاب  هههههههه

الواحد لما بيقابل ناس من اهل بلده ف الغربة بيستطمن بردو :) خاصة لو كان مسطول زيي 

وقابلت الجميلة أسماء رمضان صاحبة صفحة المدونخانة :) بجد بنوتة زي السكر المتحلي بالعسل  :)

وقابلت الخااااااااال احمد الصباغ في حفل توقيع كتابه :) الف مليوووووووووووون مبروووووووووووك يا خال :)

وقابلت كمان سو عجوز وعنده تلاتين سنة :) وكماااااان بطوط حبوب 

كل الناس اللي فوق دي اكبر مني مقاماً وسناً لكن  بشيل الألقاب لأني ما بعرف انادي حد بعزة بلقب فسامحوني بقى :)

نيجي بقى للجولة ف الكتب

طبعاً كالعااااااااااااادة زي كل سنة الأسعار نااااااااااااار يا حبيبي ناااااااااار

وبصراحة حسيتها افتراااااااا اووووووووي .. وعلشان كده انا اتفرجت ع السريع ع الكتب ف صالات دور النشر

وروحت واخدة ديلي ف سناني وجررررررررررريت ع قسم سور الأزبكية

اشتريت من هناك ما خف ثمنه وعلا قدره بصراحة :)

كتب جميلة جداً لكتاب كبار ومحترمين وبأسعار تنفع واحدة زي حالتي لسة طالبة 

طالبة معونة طبعاً هههههههههههه 

اشتريت من هناك شوية كتب ماوراء الطبيعة .. رغم اني ما كنتش ناوية بس ما قدرتش اقاوم اغراءها

رفعت اسماعيل فتى أحلامي ذو البدلة الكحلية التي تجعله فاتنا اغراني بصراحة :D 

واشتريت روايتين لأجاثا كريستي

ورواية لأرسين لوبين 

وكتاب حكيت عنه قبل كده ، كنت قريته من خلال دار الكتب بس اصريت اشتريه لأنه بجد جميل جداً

كتاب " علي أمين الصحفي والإنسان

وكمان جبت لمحمود السعدني كتابين .. مذكرات الولد الشقي وملاعيب الولد الشقي 

وجبت كتاب لمحمد التابعي اسمه " ممن عرفت " رغم انه كل اللي ممن عرفهم حريم بس الكتاب حلو :)

وأول مرة اقرأ لمحمد التابعي

واشتريت كمان كتاب زيارة لمكتبة فلان 

فيه حوارات مع كتاب كبار زي انيس منصور  وتوفيق الحكيم 

ومصطفى محمود وصلاح عبد الصبور وغيرهم .. 

بيتكلموا عن مكتباتهم وكتبهم واللي اتعلموه منها

بجد كتاب قيم جداً

واشتريت كتاب اسمه التكوين .. عن حياة مفكرين وأدباء وفنانين 

وبث خلاص  :)

عندي زي ما انتوا شايفين أجازة حافلة بالكتب دا غير سلفة احمد منتصر :)

مستعيرة منه حبة كتب جامدين جداً جداً