2010-03-29

علشان خاطري قلب كوووووويس

كتير اوى مش بقلب الشاى كويس ، واجى اشربه الاقيه مش مسكر ومش مظبوط ، وبكسل اجيب سكر تانى

فبضطر اشربه كده .. اللى بيضايقنى بقى انى بعد ما اخلص شرب الشاى بلاقى السكر مركون تحت

يعنى لو كنت قلبت شوية كان زمانى شربت شاى مظبوط ..

تعالى كده نفصص المشكلة دى

اول حاجة المشكلة ايه :

( انى ما عرفتش اشرب شاى مظبوط )

طيب وايه السبب ؟!

( 1 ) انى ما قلبتش الشاى كويس وانا بعمله ..

(( يعنى استهترت وانا بعمل الحاجة ))

(2) انى كسلت اجيب سكر تانى

(( يعنى اتكاسلت عن حل المشكلة رغم انها فى ايدى ))

طيب والنتيجة ايه (( نتيجة المشكلة والاسباب اللى ادت ليها ))

- النتيجة انى ما استمتعتش بالشاى ..

- وانى ضيعت مجهودى وما وصلتش للنتيجة اللى عايزاها

_____________________________

عارفين ان كلنا بنعمل الحركة دى بطرق مختلفة ؟؟

كتيييييييييييييييييير اوى بنستهتر واحنا بنعمل شغلنا ..

وكتيييييييييييييييييير اوى بنكسل نحل المشاكل رغم ان حلها فى ايدينا

وبعد دا كله نندم وندور على حلول صعبة ومتعبة رغم ان الحل اصلا فى ايدينا وجوا الكوباية

علشان كده علشان خااااااااااااااااااطرى اضغط على نفسك وابقى قلب كويس

قلب كويس واعمل كل حاجة كويس

حتى لو تعبت فى الاول بس صدقنى النتيجة هتفرق كتير
 
 
ملحوظة : البوست دا نشرته زمان ع المدونة هنا بس ماكانش في ناس كتير بتدخلها
فقولت اعيد نشره تاني

2010-03-27

نِفسي أحبك !



كل الدنيا بتحسدني عليك .. كل الناس بتقول لي يا بختك

دا بيحبك أوي .. دا بيخاف عليكي بجد .. دا هدية من السما

ماحدش عارف انك انت مشكلتي الوحيدة في الدنيا :(

نفسي بجد أحبك .. حبك ليا بيعذبني

نفسي أحس جوايا اللي انتَ حاسه ناحيتي

نفسي توحشني .. أخاف عليك .. أغير عليك

أحس بيك قبل ما تيجي .. أحس بيك لما تبقى تعبان أو متضايق

حاولت كتير بس مش قادرة بجد :(

اوقات بتمنى حقيقي تبطل تحبني علشان ابطل احس بالذنب

*******

اهتمامك قل بيا .. رغم اني كنت بتمنى ان دا يحصل من زمان بس ماعرفش ليه اتجننت

حاسة ان في حاجة مهمة ناقصة في حياتي

عايزة اسأل عليك .. عايزة اكلمك بس مش عارفة !

ما اتعودتش على كده

*******

قلبي حاسس ان في حد تاني في حياتك ..

الغريبة ان دي أول مرة أحس فيها بيك .. والغريبة ان احساسي طلع صح

شوفتها معاك .. حسيت انك بتحبها ..

حسيت في عينك وانت بتبص لها نظرة زي اللي كنت بتبص لي بيها زمان

بس الفرق ... ان هي كمان في عينها نفس النظرة ليك

يا بختها بيك .. بتحبك بجد .. وانت كمان بتحبها

بحسدها بجد .. لأني عارفة يعني ايه تكون بتحب واحدة

انت لما تحب واحدة بتخليها ملكة بجد ..

أول مرة أحس اني بغير عليك

وامبارح كانت اول مرة اعيط من كتر ما وحشتني

اكتشفت اني للأسف .. حبيتك :(


قصة قصيرة
25 يناير 2010

2010-03-24

البعض الأسود من القلب



للأسف .. لا تنسف الكراهية الأشياء

كثيراً ما أتمنى أن تنسف كراهيتي كل ما أكره ..

وكل من أكره..

لكنها للأسف تنسفني وحدي



ترى هل سيتألمون لرحيلي ؟؟


أحياناً أتمنى أن أموت فقط لأختبر ألمهم


ربما لأن قلبي لا يطاوعني على إيلامهم وأنا حية !






أعطني مبرر واحد - غير السذاجة - كي أحب انساناً كرهني دون حتى أن يراني


واساء لي بالباطل وأخيراً دمر ما تبقى من أحلى أحلامي !







لمَ تتوقع مني أن أتفهم احتياجك لأن أسمعك وأنت لم تفعلها مرة حين كان من واجبك أن تسمعني ؟؟






 ما بقاش عشاني أشيل انا همه ليه ؟؟ 



- جزئي المفضل من أغنية لا أذكرها -




قد يُتبع .. !


2010-03-22

إحساس بالعجز :(




صعب أوي لما تقدر ترفع معنويات ناس كتير وتأثر في حياتهم 

وتقنعهم ما يستسلموش لليأس وما تقدرش تعمل كل دا 

مع الانسان الوحيد اللي يهمك بجد إنه ما يستسلمش :(



صعب أوي لما يكون وجودك في حياة ناس كتير بيفرق معاهم أو وممكن يكون غير مجرى حياتهم

وتحس إن وجودك زي عدمه في حياة البني آدم الوحيد اللي بتتمنى تكون موجود في حياته :(

احساس يارب ربنا ما يكتبه على حد لأنه بجد .. بيوجع اوي

2010-03-18

راحوا مثل الحلم راحوا :(

د/ علي طبوشة مات !!

مافيش حد بعيد عن الموت ولا كبير عليه ، وانا مش معترضة على امر ربنا ابداً

بس كل ما اغمض  عيني بشوف صورته وهو في المحاضرة .. وكلامه لينا اول ما دخلنا الكلية

بشوفه وهو بيعلمنا ازاي نمسك الميكروفون صح ، وازاي نتكلم كإعلاميين ..

بشوف شياكته في الكلام والحركة وانه بيحسب كل تصرف قبل ما يعمله

رغم اني عارفة من سنة أولى انه تعبان وفي العناية المركزة بس كان بيطلع تاني

ويرجع يكمل شغله تاني .. 

كان بيدينا المحاضرة ويقعد في الكلية لحد الساعة خمسة بعد الضهر رغم انه من القاهرة

يعني لسة قدامه مشوار طويل وبالقطر كمان ما عندوش عربية

وحتى في رمضان كان ممكن يفطر في القطر لأنه ادانا المحاضرة كاملة

كان فعلاً بيحب شغله وبيعمله صح وكان عايزنا نكون ناس فاهمة شغلها صح 

وانا لسة عيلة في سنة اولى كنت ساعات بتضايق من تشدده وصرامته 

وكمان علشان ما ادانيش درجة حلوة رغم اني كنت بذاكر مادته .. 

بس لما كبرت سنة واتنين تانيين فهمته فاحترمته وحبيته


****


كان نفسي جداً اقول له قد ايه بحترمه واننا بنحبه وفخورين انه درس لنا

وكنت ناوية أول ما اخلص دراسة نعمل له شهادة تقدير حاجة كده رمزية 

نعبر له بيها عن حبنا بيه ، وما رضيتش اعملها غير لما اخلص علشان ما يفتكرش انه نفاق

واننا عايزين نحرجه فيدينا درجات ... 

ولما عرفنا انه تعبان اتفقنا نبعت له هدية معاها ورقة نقول له فيها اننا بنحبه اوي وربنا يقومك بالسلامة 

وترجع لنا تاني وكنا هنبعتها له النهاردة مع دكتور قريبه في الكلية مش بيجي غير الخميس :(

امبارح عرفنا انه مات .. قبل ما يعرف احنا بنحبه قد ايه وبنحترمه قد ايه

اللي ضايقني انه بجد كان بيخاف على مصلحتنا وفي ناس ولا فرق معاها

بعد ما عرفت الخبر بتضحك وناس بتقول احسن !

للأسف دا تقريباً جزاء اللي يشتغل بضمير في بلدنا :(


****

لو بتحب انسان بجد او عايز تشكره على أي حاجة اوعى تأجل دا

ممكن جداً ما تلحقش .. ممكن انت تموت او هو تموت وما يعرفش قد ايه بتحبه

والله العظيم كلمة الحب والتقدير لما بتكون من القلب طالعة بتفرق اوي مع ناس كتير


---------------------------------------------

بخصوص التعليقات انا اسفة والله بجد معنوياتي تحت الصفر 

ومش قادرة ارد كويس .. شكراً لكل حد علق ع البوستات اللي فاتت

إن شاء الله هرد بإذن الله بس لما ابقى تمام

2010-03-16

إحذروا .. هذا الشخص غبي !

كل ما اخرج اروح مشوار او اروح الكلية بشوف في الشارع البدع

الناس بقت بتتعامل بغباوة منقطعة النظير

فجأة كده تلاقي عربية معدية فوق رجلك 

عجلة داخلة في ضهرك ولا في وشك

 توك توك بيتفسح وسط البني آدمين 

حد يخبطك بكوعه في وشك ولا في جنبك علشان يركب قبلك 

بلاوووووووووووى

كل ما اخرج ضغطي يعلى :(

والنهاردة بعد حركة غبية عبقرية من كائن راكب عربية
جاتلي فكرة جامدة اوي .. 

نفسي أمسك استيكر مكتوب عليه ( احذر هذا الشخص غبي ) وكل ما حد يعمل لي حركة غبية

الزق له الاستيكر .. عربية بقى ، او واحد ماشي ع رجليه او سواق :) 


وياااااااااااه بقى لو كان الاستيكر من النوع اللي ما بيتشالش خالص يااااااااه تحفة :)

وكل الناس بقى تعمل كده وكل ما نشوف واحد باستيكر من بعيد يخلي باله ويحضر نفسه علشان ما يتنرفزش 
بما إن دا مستحيل ومش في ايديا .. فنفسي بجد ربنا يعاقب كل واحد يتغابى على خلق الله 

ويطلع له في وشه علامة تقول انه غبي او حمار 

2010-03-08

أحلى يوم في عمري :)


عارف لما تكون متوقع  ان حاجة  بتعملها تطلع حلوة
وتطلع حلوة فعلاً .. متخيل فرحتك ساعتها عاملة ازاي ؟؟

طب تخيل بقى لما تطلع  أحلى بمراااااااااااااحل مما كنت تتخيل ؟
يوم عيد ميلاد بحلقة كان كده بالظبط
اجمل بكتيييييييييييير مما كنت متخيلة ومما كنت بتمنى
وبجد حلاوته كانت في الناس اللي جات علشان تفرح معانا ببحلقة
كل الناس زي العسل .. كل الناس فرحانة من قلبها .. كل الناس بتحب كل الناس الموجودة :)

بجد احساس جميل أوي لما تكون موجود في مكان كده
ومتهيألي اليوم الشبابي حقق الهدف منه بزيادة كمان
كان هدف اليوم بتاع الاحتفال هو ان الشباب يتعرفوا على بعضهم
ويستمتعوا ويستفيدوا  وفعلاً دا اللي حصل

الأجمل .. إن مافيش حد دعيناه للحفلة وخذلنا
بجد الكل نورونا وكنا فرحانين جداً جداً بيهم

انا فعلاً مش عارفة اعبر عن فرحتي باليوم .. بس كفاية اني لسة لحد النهاردة بغمض عيني واقعد مع نفسي افتكر اليوم وابتسم :)

أول مرة يكمل يوم في حياتي على  خير وكله يبقى تمام :)
*****

د/ أشرف وجدي  : بجد بجد حضورك كان فرحة كبييييييييييرة جداً ليا ، وفعلاً ما صدقتش نفسي إني قابلت حضرتك .. وكلامك تاج على راسي .. شكراً بجد :)

د/ إيمان الجوهري : كان حلم من احلامي اني اقابلك ، وكنت متخيلاكي انسانة جميلة
لكن طلعتي أجمل واجمل واجمل .. ومش عارفة اشكرك إزاي انك نورتينا :)

مامي ميمي : مش هعرف اعبر عن اللي في قلبي ناحيتك .. بس أكيد انتي حاسة
بحبك اووووووووووووي ومبسوطة جداً اني اتكلمت معاكي ونفسي اتكلم معاكي تاني وتالت ورابع وكتيييييييييير جداً .. ربنا يحميكي يارب وتفضلي دايماً بالنشاط والروح الجميلة أوي دي .

أ / أشرف توفيق : أخف دم فيكي يا دنيا :) .. بجد انا بعد ما سمعت الشعر لايف مش هقدر أكتفي بقرايته :) شكراً جداً على تشريفك لينا ويارب دايماً منورنا :)

أجمل مذيعة في الدنيا " هبة سعد الدين " : بجد حبيتك اوووووووووي لما شوفتك ، وانا اساساً كنت بموت فيكي ..  زي ما توقعت انسانة حبوبة أووووووووي ومتميزة جداً وعندك طموح جداً ومش عايزة تتنازلي عن مبادءك .. وان شاء الله مش هتتنازلي وهتوصلي لأحلى أحلامك بإذن الله
يارب تكون جنى انبسطت بالنيل :)

محمد ناصر الدين : بجد انت انسان جمييييييييل أوي ومحترم أوووووووي ومش طويل أوي يعني :p
بجد وجودك أسعدني وشرفني وفرحني جداً خاصة وانا عارفة انك وراك مشاغل كتيرة اوي :)

ربنا يوفقك يارب وتبقى أشهر وأحسن جيم ديزاينر في العالم كله
ساعتها بردو هاخد منك خمسين في المية حقوق ملكية فكرية للعبة بنوتة لاسعة ههههههههه

شريف حسن : ( مدونة هجايص ) : بجد نورتنا جدااااااااً وكان نفسي والله اقعد اتكلم معاك كتير لأن مدونتك جميلة بجد وواضح انك انسان جميل .. بس متعوضة ان شاء الله :)



بوسي .. أجمل وأرق بنوتة في الدنيا :) كان نفسي اوي اعرف أقعد معاكي كتيييييييير
لأنك ما يتشبعش منك بس إن شاء الله متعوضة يا حبيبتي بس بجد فرحانة اووووووووي اني شوفتك :*

هبة : انتي عثوووووووووولة أوي  ماشاء الله وزي القمر وفيكي شقاوة القطط اللي بتحبيهم :) بجد حبيتك اووووووووووووووووووي يا زُمل :) ربنا يوفقك واشوفك من احسن الإعلاميين في مصر :)

سارة ابراهيم أبوسنة : ما تتخيليش فرحتي قد ايه بالمفاجأة الجميلة دي :) انتي ماشاء الله عليكي زي السكرررررررررررررر ربنا يحميكي يا بنوتة .. منتظرة حفلة توقيع " أول فرحتك ;) " وان شاء الله اشوفك تاني واقدر أقعد معاكي كتير اوووووي
بوسيلي أميرة بقى :*

أحمد عبد الرحيم & محمد الوكيل & محمد أبو سنة : شباب الصالون الطنطاوي :)
نورتووووووونا وكنتوا عاملين روح جميلة في المكان .. شكراً يا شباب
شكر خاص جداً على الكشري :D

ريهام : انتي عسووووووووولة أوي يا بنوتة ماشاء الله عليكي وروحك حلوة أوي ياقمر
ما لحقتش اقعد معاكي خالص بس بجد حبيتك واللهجة الاسكندراني زي العسل :*
 


نيجي بقى لتيم بحلقة :)

بصوا إنتوا ناس زي العسل أساساً وبحبكم جداً
وأحلى حاجة إني عمري ما حسيت اني غريبة وسطكم
رغم إني مش بقالي كتير معاكم

كريم : كنت عريس ياكريم :) كنت فرحانة اوي علشان شايفاك فرحان
حاسس كأن المجلة بنتك ودا عيد ميلادها :) ربنا يفرحك دايماً وحقيقي برافو بجد مجهودك لا يعلى عليه

أحمد عرفة : بغض النظر عن اضافاااااااااااتك للمجلة ;)  إلا إنك كنت زي العادة مميز:)

ناهد سمير : انا بموت فيكي أساساً :) كنت فرحانة أوي وانا شايفاكي مندمجة مع الرقصات النوبية الجميلة ، زي الطفلة في يوم عيد :) ربنا يحميكي يا بنوتة ويفرحك دايماً
وتفضلي دايماً مميزة :)

منى زين : أول مرة أقابلك بس حبيتك جداً .. وانتي بجد انسانة جميلة اوي وحبيت أوي فيكي  حبك لشغلك وخوفك عليه :)
وبجد برافو عليكي شغلك الجميل جداً وتنسي
يارب يوفقك دايماً وتبقي إعلامية جميلة جداً ومتميزة جداً .

نيهاد عليوة : كنتي منورة الدنيا بحالها يا بنوتة
مالحقتش أقعد معاكي كتير بس متعوضة ان شاء الله واشوفك تاني وتالت ورابع :)


محمد شومان : ماشاء الله عليك يا محمد عسووووول وكتلة نشاط :)
ربنا يوفقك دايماً يارب وتبقى صحفي ناجح جداً

أحمد شعبان : ماشاء الله عليك يا أحمد هادي جداً ومثقف أوي :)
شكراً جداً على كل المعلومات اللي عرفتها منك وشكراً على الهدية الجميلة :)

أحمد السعاتي : عملت شغل بجد جمييييييييييييل أوي وعملت روح حلوة أوي وطعم للحفلة :) بجد برافو عليك

شريف شقارية : كان يوم لطيف :D
شكراً على التورتة :) كده بقوا 20 :D
لأ لأ لأ صحيح بالكشري يبقوا 19 :)

لو عايزين تشوفوا صور الحفلة والتغطية  عنها ادخلوا هنا

2010-03-05

مستنينكم هنااااااااك :)


يوم 6 مارس هنستناكم 

في حديقة متحف محمود مختار 

اللي قدام الأوبرا بالظبط

في يوم شبابي جامد جداً واحتفال كبييييييييير جداً

بمناسبة عيد ميلاد " مجلة بحلقة "

اليوم هيكون جامد جداً وهيكون فيه حاجات كتير

هيكون فيه :

الفقرة المفتوحة من 2 ظهرا - 4 عصرا

إفتتاح اليوم بفقرة دي جي وهيكون معانا فيها الدي جير مودي .
كمان هيتم بدء عمل معارض وورش فنية .
هيشاركنا اليوم

مركز التكعيبة " إستبدل كتابك " يعني لو اي حد منكوا عنده كتاب مش محتاجه وحابب يبدله بكتاب تاني من غير اي مقابل "

المركز النوبي ونوبة الخير بالاعمال النوبية اليدوية " كتير مننا كشباب منعرفش حاجة عن جزء اصيل من مصر وهما اهل النوبة .. احنا اصرينا نشرك معانا شباب النوبة علشان نتعرف عليهم وعلى عاداتهم وكمان علشان نشتري اعمالهم اليدوية "

محمد منيصير .. لو عندك تي شيرت وحابب ترسم عليه ليه سواء بنفسك او مع محمد يللا تعالى وشارك محمد في بوابته .

شركة سمارت لايف .. ولأننا طبعا مجلة الكترونية فمينفعش نعمل ايفينت زي ده وميشاركناش فيه جزء للتكنولوجيا .. لو انت حابب تاخد دورة في اي حاجة سواء تنمية بشرية او كمبيوتر او انجليزي المركز ده المفروض انه بيقدمها بمبلغ وقدره وعلشان انت هتيجي حفلة بحلقة هيعملك خصم 60% على الاشتراك .. تخيل :)

مش بس كده .. طول ما الحفلة شغالة هنعمل مسابقات في الاسئلة العامة وكل اللي هيجاوب هيكسب جوايز كتير ..


فقرة إلقاء شعر الأولى من 4 عصرا - 5 مساء
.. يقدمها الشاعر /سالم الشهباني وعدد من الشعراء الشباب


فقرة غنائية (فرقة النوبة ) من 5:15 مساء - 6 مساء
وزي ما قلنا لكوا احنا عاوزين نتعرف على اهل النوبة من قريب علشان كده جيبنا لك فرقة نوبية .. هنرقص كلنا ونغني معاهم .


فقرة إلقاء شعر تانية من 6:00 مساء - 6:30 مساء
.. يقدمها الشاعر/ فتحي سليمان وعدد من الشعراء الاجلاء



فقرة غنائية .. 6:30 مساء - 7 مساء

دي بقى الفقرة الجهينمية .. لأنه مش هيغنيها حد عادي خالص .. هتكون معانا طنط زوزا أكبر مغنية في مصر مغنية إتحدت كل العوائق وأصرت إنها تقف قدام الجمهور وتقول رغم إنه سنها 84 سنة .. مش بس كده هيعزف معاها على العود المايسترو الكبير / الفنان حسام سمير .



فقرة كوميدية من 7:15 مساء - 7:45 مساء

سمعت عن ستاند أب كوميدي اللي بتتذاع على موجة كوميدي .. هيكون معانا واحد من نجومها الفنان / علي قنديل



إحتفالية المجلة من 8 مساء - 9 مساء

يللا بقى يا جماعة هنطفي الشمعة ونحتفل بالمجلة في حضور عدد كبير جدااااااا من الكتاب المشاهير والفنانين .. زي شاهندة مقلد زعيمة ثورة الفلاحين - نشوى الحوفي كاتبة صحفية بالمصري اليوم - عمرو سليم رئيس قسم الكاريكاتير بالمصري اليوم - فتحي سليمان الكاتب الساخر المتألق - الفنان علاء عزت - بحر نجم فريق بلاك تيما - الأستاذ إبراهيم البطوط الكاتب الكبير - الكاتب أشرف توفيق - الكاتب الشاب محمد صلاح العزب - الشاعر والكاتب ياسر الزيات - الصحفية اللامعة سماح عبد العزيز - الكاتبة سالي عبد العزيز .. وغيرهم كتير من القنانين والكتاب الشباب .

مش بس كده

ده في عدد من الكتاب اللي ليهم كتاب في الاسواق حاليا وهيشاركونا الحفل .. هيشاركونا المسابقة .. هيسألوا سؤال واللي هيجاوب عليه هياخد نسخة مجانية وموقعه من قبل الكاتب


ختام الحفل

فقرة دينية من 9 مساء - 10 مساء
فعلى لفات التنورة هتكون معانا فرقة المولوية بقيادة الفنان عامر التوني
وبجد لا يمكن ان نصف لك مدى انبهارك عندما تسمع الكلمات الصوفية التي تدخل قلبك بمجرد سماعها

2010-03-02

مش عايزة ابقى ورقة خريف

في مقولة بتقول 
معظم الناس يتخيلون أن الانسان حين يتقدم في السن
يجب أن يتخلى عن أشياء كثيرة ..
لكن الحقيقة هي انه يشيخ لأنه تخلى عن هذه الأشياء
شاغلني أوي الموضوع دا .. نفسي ما ابقاش زي معظم كبار السن اللي شوفتهم

في مصر وفي الشرق عامة .. الانسان بمجرد ما يجَوّز أولاده بيعتبر ان رسالته في الحياة انتهت

وبيقعد في بيته يستنى الموت 

ما بيفكرش يعمل حاجة جديدة في حياته 
ما بيفكرش حتى يمارس هواياته اللي كان بيحبها 

ولا يفكر يشتري لنفسه لبس جديد مثلاً ولا يعمل في حياته حاجة مختلفة

وان كلمته يقولك

إيييييييييييه مسك الختام بقى يا بني 

بستغرب لهم اوي ، ليه بيموتوا نفسهم قبل ما يموتوا ؟؟

نفسي ما ابقاش كده بجد .. نفسي ما ابقاش ورقة خريف الكل متوقع انها هتقع في أي لحظة

و إن وجدوها في الشجرة زي عدمه

نفسي أفضل بتحرك وبشتغل وبعمل انشطة واشارك ف المجتمع لحد ما اموت

نفسي افضل اروش نفسي وأدلعها لحد ما اموت 

- دا بفرض اني بروش نفسي وادلعها حالياً يعني - ما علينا عدووووووها :D

نفسي ما ابقاش عبء على حد ولا الناس تبقى مستنياني اموت من كتر إملالي
على فكرة الموضوع مش مستحيل ومالوش علاقة بالصحة والمرض

قد ما هو ليه علاقة برسالة البني آدم اللي راسمها لنفسه

 يعني لو البني آدم متخيل ان كل مهمته في الحياة -بس- انه يربي عياله ويكبرهم

لحد ما يتجوزوا وخلاص كده هيحقق الهدف دا وبعد كده يحس ان حياته مالهاش لازمة بقى

لكن لو البني آدم حط لنفسه هدف متجدد .. ما بينتهيش أبداً زي انه مثلاً يتعلم حاجات جديدة

أو انه يخدم الناس ويشارك في حل مشاكلهم ويساعدهم

عمره ما هيحس ان حياته مالهاش قيمة 

****
في انسان بجد نفسي احكي لكم عليه بمناسبة الموضوع دا 


عامل بسيط بيشتغل حمّال .. اسمه " عم كمال "  بيشيل الطوب والأسمنت والرمل وكده يطلعهم للمباني 

لما يكون في حد بيبني مثلاً في الدور التاني او التالت

وعايز يطَّلع الطوب والأسمنت والرمل علشان البنايين هو بيطلعهم مقابل فلوس طبعاً

هي دي مهنته .. 

الراجل دا عجوز وشكله عنده تمانين سنة من أيام ما انا كنت طفلة

من قبل ما ادخل ابتدائي وهو اللي طلع الطوب والأسمنت لبيتنا كله

من أول دور لآخر دور

الراجل دا ماشاء الله عليه .. بيشيل احمال رهيبة 

وبيطلع كتير اوي .. ورغم إنه سنه كبير إلا انه بيشتغل بكل حيوية ونشاط

الجميل بقى ..

إنه دلوقتي عنده احفاد .. ويمكن أحفاده خلفوا كمان

ومعاه فلوس الحمد لله حلوة يعني تعيشه مبسوط

وولاده كلهم بيشتغلوا .. وعنده بيت كبير 

ورغم كل دا .. مش راضي يبطل شغل

ولاده يقولوا له ارتاح يقول لأ .. لو بطلت شغل هموت !

فعلاً هو كده .. لو بطل شغل هيعيا وهيموت

لو ما ماتش علشان عمره لسة فيه بقية .. هيموت معنوياً ونفسياً 

انا كان زمان بيصعب عليّا وكنت بحسبه غلبان علشان كده بيشتغل

لكن لما عرفت الحقيقية دي .. احترمته اوي وكبر في نظري أوي

رغم انه انسان بسيط جداً بس بيدي مليون درس لينا كلنا

مش لازم نبطل شغل وتفاعل وحيوية إلا لما نموت

طالما ربنا لسة مدينا عمر يبقى احنا لسة في حاجة ممكن نعملها

لأن لو مالناش لازمة ولا فايدة ومهمتنا في الحياة انتهت ربنا هياخدنا 

لأنه - سبحانه وتعالى -  " لم يخلق شيئاً عبثاً ولم يترك خلقه سدى



- الصورة من موقع الفنانة سوزان عليوان  -