2011-01-09

عن فنون الاستسهال .. في تربية العيال


بابا .. هو انا جيت الدنيا ازاي ؟؟
- جبناك من السوبر ماركت هع هع هع

هو انتوا ليه بتعملوا معايا كده؟ اشمعنى انا اللي بعمل كل حاجة واخويا الصغير ما بيعملش حاجة  ؟
- اصلنا لقيناك على باب الجامع


ماما المكرونة دي حلوة أوي هي المكرونة بتيجي منين ؟
- م السوبر ماركت يا حبيبي
ايوة يعني قبل السوبر ماركت بتبقى عاملة ازاي
- وانا فايقة لك انت راخر ؟ كُل وانت ساكت 



عن " الاستسهال في تربية العيال أتحدث " ..  عن إن ناس فاكرة إن الطفل دا ما يفرقش كتير عن قطة بتربيها أو فرخة 
دورهم الوحيد في حياته انهم يأكلوه ويشربوه وفي اوبشنات زيادة عن الفرخة للأسف هو انهم بيدخلوه مدارس وبيلبسوه
وينقصه أوبشن إنهم ما ينفعش يدبحوه ويعملوا عليه تسقية - يعني العيل واقف عليهم بخسارة  -  في ناس بتعوض دا بأوبشن الشحاتة بالعيل بس دا مش دايماً لأن في ناس بريستيجها ما بيسمحش
الأم فكرتها عن الأطفال انهم " دوشة ووجع قلب "  لكن هتعمل ايه هم الحل الوحيد علشان " يربطوا الراجل " !!
والأب خلف لأن " كل الناس بتخلف " بما إن " الجواز شر لابد منه " !
طبعاً فكرتهم المثلى عن التربية هي إن العيل ياكل كويس ويشرب كويس ويروح اغلى مدارس علشان هو " ابن فلان "
مش علشان هو المفروض يطلع بني آدم كويس
الأمثلة اللي ضربتها فوق دي أمثلة على الاستسهال في تربية العيال
في أمثلة كتيرة في حياتنا على الاستسهال والاستهبال أحيانا
في ناس بتستمتع بإنها تجاوب على اسئلة ولادها اجابات عبيطة وغلط وهي بتضحك وتهزر ومش متخيلة هي بتعمل ايه في عيالها
وناس بتجاوب اجابات تريحهم هم علشان يستغلوا الولد في حاجة على مزاجهم
( زي فكرة اغسل بقك لحسن الشمامة تشمك وانت نايم )
وغالباً بتحصل أي حاجة صدفة أو عمداً والولد يكتشف ان كلام امه وابوه كدب وتتهز ثقته فيهم تدريجياً ويبدأ ما يصدقش كلامهم اللي بجد كمان
يا إما لما بيكتشف ان أغلب كلامهم غلط بيحس انهم مش بيفهموا في الدنيا وبالتالي ما بيسألهمش على حاجة بعد كده
وناس بتجاوب غلط أي اجابة هبلة لأنها مكسوفة تقول مش عارفة لابنها
ودول مشكلتهم مشكلة تخيلوا انكم مكسوفين من جهلكم قدامه وهو طفل هتعملوا ايه لما يكتشف انكم جهلة وهو كبير !!! 
ناس كتير بتستهل التربية رغم انها مهمة جداً
ومافيش حاجة اسمها انا هربي ابني النهاردة
لأ التربية مواقف .. كل موقف بتعمله مع أو قدام ابنك المفروض يكون فيه تربية ليه
ومش شرط يكون بكلام وشرح ومحاضرات .. ولا يكون بضرب وشخط وزعيق
مهم جداً انك  تعمل حاجات تربي بيها ابنك وانت عامل نفسك مش واخد بالك
علشان يحس بيها عفوية وحقيقية وبالتالي يعملها
أنا مش خبيرة في الموضوع دا .. لكن قرأت فيه حبة 
وناوية ان شاء الله إني أقرأ أكتر في المواضيع دي علشان لما اخلف اربي إبني صح 
علشان يبقى ابني مصدر لفخري مش لكسفتي 
انا جمعت شوية لينكات لكتب حلوة ومفيدة في تربية الأطفال حبيت اشارك فيها كل حد يحب يستفيد ويربي ابنه صح 

واللي عنده كتب أو لينكات تانية ياريت يكتبها في التعليقات وانا هحدث بيها الموضوع


 

 

ممكن كمان قبل الجواز نحضر كورسات في تربية الأطفال وقبل كل حاجة ننوي واحنا بنعمل كل دا اننا بنعمله علشان ربنا يكرمنا ونعرف نربي ابننا كويس ويبقى فخر لينا مش عار علينا

هناك 6 تعليقات:

  1. حلوة يا سارة
    موضوع يستحق الطرح فعلا
    و انتي طرحتيه باسلوب جديد و خفيف

    ردحذف
  2. على فكرة

    انتى جيتى على جرح غائر فى مُجتمعنا

    بس مهم جداً ندوس ع الجروح دى علشان نعرف نعالجها

    شكراً يا اميرة سارة (:

    ردحذف
  3. بجد يا سارة كلامك جامد
    و ده حاجة بسيطة
    أنا اشتغلت في مدرسة المفروض كويسة و محترمة و جديدة و بمصاريف محترمة و إلخ إلخ إلخ
    بجد بجد
    اللي شوفته مهاااااااااااااازل
    عشان كده كنت ميتة في دباديب ولادي لإنهم بجد صعبانين عليا
    اللي عندها وسواس إبنها معرفش هيجرالوا إيه و الولد تحسيه فعلاً ما صدق خلص من البيت و عايز ينطلللللللللق
    و التاني اللي مبيسألوشع ليه و عايزين يخلصوا و خلاص
    جو حلو جو قالب جو يعيي مش فارقة
    يا ستي ابعتي و ريحي دماغك
    بس برضه ناس بتهتم بولادها أوي و حريصة على التواصل مع المدرسن و المدرسات و بتسأل على الولد و تيجي تشوفه كل فترة أو ناس تكتفي بالاكتابة بس في يعني
    ده طبعاً غييييييييير البلاااااوي اللي في إدارة المدرسة نفسها
    بصي من الآخر كده
    البلد دي عايزة تتنفض زي السجادة و الحشرات تتشال و نبدأ على نضافة
    و ربنا يهدينا كلنا يا رب

    ردحذف
  4. مدونتك رائعة بجد
    تصميم هايل البالونات دي مبهجة جدا
    تنظيم ممتاز
    و مواضيع في الصميم
    و اسلوب سلس و افكار هادفة
    اسمحيلي احيكي
    و فرصة سعيدة جدا
    اوروفوار

    ردحذف
  5. موضوع حلو ومهم جدا فعلا
    تحياتي

    ردحذف
  6. رائعة أنت يا سارة، رقيقة الكلمات، بسيطة التعبير، أعتذر لأنني لأني تأخرت في معرفتك، مدونتك من أجمل المدونات التي مررت عليها، انتظر مرورك، فربما راقك ذوقي في الكتابة ، واتمنى أن نصبح أصدقاء
    رشا - صحفية من غزة

    ردحذف

Say something...