لعلمك

لعلمك

إقرأ لي

دخلوا بكليك شمال :D

Blog Archive

الجمعة، يناير 14، 2011

postheadericon المزيد من الكلام الفارغ


إحم .. ماحدش يضحك :D

اكتشفت امبارح إن " الكرش " بيدني احساس بالاستقرار

لما بشوف انسان بكرش بحس انه قاعد مستقر كده ومسترخي ومتطمن

معنى انه بكرش إنه مش بيحرق أعصابه كل شوية ، وإنه مش بيتحرك كتير

وإنه ضارب للدنيا طناش

دا مش صح دايماً .. لكن دا الاحساس اللي بحسه لما اشوف انسان قاعد بكرش




دايماً لما بحب أدخل على أكونت تاني .. إيميل أو فيس بوك أو أي حاجة بدل ما بعمل تسجيل خروج

بعمل برايفت براوسنج ( Private Browsing ) في الفاير فوكس .. بالتالي ، بيكون ناسي كل الباسوردات

وكل إعداداتي وكأنه لسة جديد ..

حاسة إني عايزة أعمل برايفت براوسنج في دماغي ، وابص عليا من بعيد ..

أقرا كلامي وأحس إحساس الناس اللي بتقراه لأول مرة ..

هل هو فعلاً بيعجبهم ولا بيبالغوا .. ايه الانطباع اللي بياخدوه من الكلام

إيه حالتهم وهم بيقروه

ونفسي أعمل برايفت براوسنج لنفسي وأقابلني وأقعد معايا وأشوف هحبني ولا لأ ..

هصدقني ولا لأ .. هفقسني ولا لأ !



لا أنسى الإساءة أبداً مهما مر عليها الزمن ..

ليس لأن قلبي " أسود " ..

ولكن ربما لأن النقاط السوداء  على " الأبيض " تكون أوضح وأصعب في المحو   !




تفتكروا في برفان بريحة قشر اليوسفي ( الأوستافندي ) ؟؟

بتنعشني الريحة دي جداً .. لو حد عارف برفان بالريحة دي ياريت يقول لي اسمه :)



كلما ازددت نُضجاً .. كلما ازدادت قدرتك على تقبُل الآخرين

- كل ما تنضُج أكتر كل ما هتحس إنك قادر تتحمل تصرفات بتضايقك من ناس حواليك

لأنك بتلاقي نفسك مُتفَهِم أسبابهم ودوافعهم اللي بتخليهم يعملوا التصرفات دي

بتلاقي نفسك بتفكر أكتر وبتتضايق أقل -



لاحظت مؤخراً إن الناس ممكن تغفر لك أي تصرف .. إلا إنك تخليهم ما يعرفوش عنك حاجة !!!




الانتقام مُتعة حقيقية - رأي شخصي -

... لكن الأمتع منها إنك تشوف ربنا بينتقم لك انتقام أجمل بكتير من إنك تقدر تعمله بنفسك

وأنا قررت إني ما احرمش نفسي المتعة دي ;)


اللي حصل مؤخراً في تونس والكويت خلاني أفكر كتييييير أوي
ليه رغم إن عندنا معارضة قوية ، وبنعمل اضرابات وبنعمل مظاهرات وإلخ إلخ إلخ
ما اتغيرش حاجة .. لقيت إن السبب هو إن المعارضة عندنا مش مؤمنة بجد بالقضية
وبعضهم واخد المعارضة برستيج وموضة .. والبعض الآخر المعارضة بالنسبة له " مود "
يعني ممكن يصحى يوم معارض ويوم مالوش نِفس يعارض فيه !!!
المشكلة بقى .. إن النظام عارف دا كويس علشان كده ... مش عاملهم حساب


الفاصل اللي انا حاطاه دا بيزغلل وبينرفز :P

6 بوينتس أوف فيو:

محمد الوكيل يقول...

1- خديها من واحد صاحب كرش: أبداً.. بيعمل للواحد توتر وبيحسسه بعدم الثقة لأنه بيعمل له شكل وحش :D

2- معاكِ حق.. كلنا بحاجة لحاجة زي كده، بس قليلين أوي اللي بيعملوا للأسف..

3- البياض يستطيع أن يمحوها :) ثقي في الطيبة واغفري كل شئ :)

4- فعلاً فعلاً، لسه واكل يوسفندياية حالاً أهه :D

5- أوافقك تماماً ^^

6- مش كلهم برضه ^^ ومش كل التصرفات بيغفروها على فكرة :D

7- يا ساتر يا رب! كده نبدأ نخاف منك سارة-سان :D

8- ممكن والله.. مشكلة تانية إنهم حاسين إنهم لوحدهم.. قليلين أوي أوي من طبقات الشعب اللي بجد -مش النشطاء بس- هما اللي مستعدين يخشوا مظاهرات ويتعرضوا للضرب والإهانة وربما القتل عشان يحرروا البلد دي.. إنما في تونس الناس كلها ثارت مش النشطاء السياسيين وأصحاب المصالح.. مشكلة تالتة إننا دايماً بندور على "قيادة" للثورة دي، بينما في تونس الثورة اندلعت تلقائياً ومن قلب الشعب بدون حاجة لقائد! ^^

بس ^^

محمد الوكيل

بنـوتــــة يقول...

كلام فارغ جامد
أنا بقى الكرش بينرفزني
بيديني إحساس بحاجات من اللي قولتيها بالذات الهدوء و عدم الحركة
و دول بيستفزوووووووووووووووووووووووووووووووووووووووووني
مجرد اتخيل خلاني هارمي الجهاز ع الأرض

نقط الإساءة السودا دي
أنا برضه عندي نفس الحالة
أعدي و مجيبش سيرة
لكن مبنساش
ساعات بتبقى ميزة - و الساعات دي كتيرة بصراحة
بس أحياناً قليلة بنخنقني
بحس إني عايزة أرجع مش عاملة حساب حاجة من اللي اتعلمتها من النقط دي و أبقى برييييييييييئة- بس بيتهيألي ساعتها هيبقى اسمه هبل
فكده أحسن برضه
:D

بالنسبة بقى لليوستفندي
أوريفليم منزلة كريم إيدين بريحة البرتقال - المفروض
بس هي يوستفندي
مالهاش دعوة بالبرتقال
يووووستفندي
و ماشية أنا طول اليوم في الشقة عاملة زي الشمامين :D
إيدي على وشي بشممممممم
:D

موضوع الناس ده برضه حقيقي
و مستفز كمان

أنا معاكي برضه في نقطة متعة الانتقام
- جدااااااااااااا -
طيبة أوي أنا أنا عارفة
من يووووووووووومي
:D

Ramy يقول...

كلما ازددت نُضجاً .. كلما ازدادت قدرتك على تقبُل الآخرين
- كل ما تنضُج أكتر كل ما هتحس إنك قادر تتحمل تصرفات بتضايقك من ناس حواليك
لأنك بتلاقي نفسك مُتفَهِم أسبابهم ودوافعهم اللي بتخليهم يعملوا التصرفات دي
بتلاقي نفسك بتفكر أكتر وبتتضايق أقل

دة حقيقى و اللى انا حاسه حالياً (:

My Hope$ يقول...

ايةيابت وجع العنين دة الواحد اول ما يفكر يرجع يقرا بوستات يحصلة كدا يعني

همشي هههههههههه



ثانيا اكيد انت ياضاربة مين هياخد كلامك ويسلم بية


وبما انك ناوية تخرجي من دماغك وتدخلي تاني ياريت تاخديني معاكي ههههههه




بصي الكلام الفارغ عجبني فيه حاجات


من ضمنها موضوع الانتقام خديها مني نصيحة حسبي الله ونعم الوكيل بتعمل شغل جامدددددد



اما عن تونس فا حققو احلام شعوب كتير

بيتكلمو ولكن الفعل يسبق كل شئ وكان نفسي نبقي احنا قدوة العالم مش احنا كمان اللي بنفكر نقلد تونس ولا لا يا وكستي علي مصر

هبقي اجي ازورك تاني متقلقيش مقدرش مقدرش استغني عن طرقعتك يا بسبوسو

Antika يقول...

بغض النظر عن كل حاجة..
الفاصل مستفز فعلا :D

خليتينى عايزة اعملـ لى Private Browsing انا كمان :)

أسرار النــدى ,,, يقول...

ده كلام فارغ من أي مواضيع إنشاء وتعابير وجمل كلها أفكار لكن بابها مسدود ومش واصل......
.
عشان أكيد معندهمش إحساس بسيط أووووووووي وبيمر بالقلب بسرعة اوي كده زيك يا سرورة....

بين كل زغللة الفواصل في كذا حكاية وحكاية لو قعدت رغيت فيهم مش هخلص رغي....(*_^)

بس عايزة أقلك......
إتبسطت اوي بزغللة عنيااااااا(^_^)

المتابعون

اعتبرها بيتك ♥

وِش القفص

خليك ورايا

دليفري..