2011-01-27

وبعدين ؟

وبعدين يعني بعد ما الناس نزلت الشارع إيه اللي هيتغير ؟؟

- هتتغير أوضاعنا ، هتتغير الحكومة لو نجحنا ولو ما نجحناش أوي هتتغير اوضاعنا إلى حد ما 
أو على الأقل هنحس بكرامتنا واننا قولنا لأ ، وبدل ما كل واحد من الذل اللي شايفه في مجايب لقمة العيش بيروح يسود عيشة أهل بيته
اهو طلع غضبه في اللي كانوا السبب في كده 
وعلى الأقل الحكومة حست اننا مش نايمين في العسل ، وفاض بينا وهتحاول تلم نفسها شوية . 

طب حتى لو الحكومة اتغيرت انتي شايفة يعني ان في حد عِدل ينفع يمسك البلد ؟

- انا مش خبيرة في السياسة ولا معظم الناس البسيطة دي خبيرة في السياسة وعارفة هي عايزة مين 
بس على الأقل أي حد هيجي بعد كده هيكون عارف كويس ان الشعب مش هيسكت له لو عمل زي اللي قبله 
والشعب بعد ما داق طعم الثورة مش هيسلاها ووقت ما يحس بالظلم تاني هيعمل ثورة تانية وتالتة ورابعة لحد ما الحال ينعدل 

طب ولو حتى الحكومة كويسة ، فكرك يعني الشعب هينعدل حاله ؟
دا شعب اتعود  على الفساد والأنتخة والرشوة والفهلوة مش هيتغير ابداً ولا هتحوق فيه حكومة جديدة ولا يحزنون !

- لأ ، لو الحكومة كويسة فعلاً هتكون صارمة في تنفيذ القوانين ، ولو حتى الشعب استمر في فساده لكن لقى عقاب تدريجياً هينصلح حاله
دا غير إن المفروض دور الطبقة المثقفة بقى يشتغل ويوعي الناس بسلبياتهم ويخليهم يغيروها
ولما هيلاقوا ان التغيير مُجدي هيتغيروا بجد
لأن ربنا خلقنا كلنا على فطرة كويسة ولأنه هيلاقي بجد إن " الجريمة لا تفيد " 
والسبب أصلاً في فساد الشعب هو فساد حكومته وضياع حقه ، والذل والفقر اللي شايفه اللي بيقتل بقايا الضمير عنده 

طب والخسائر اللي حصلت في الممتلكات والأرواح دي .. مش حرام وخراب للبلد ؟

- الحدوتة زي الحرب ، هل ينفع ما نحاربش ونسترد كرامتنا وأرضنا علشان خايفين من الخراب ؟؟ 
كل حاجة ليها ضريبة ، والبلد كانت بتخرب كده كده
الناس اللي محلاتها اتكسرت تستعوض ربنا وتعتبر البلدية افترت عليها
والناس اللي انصابت وانضربت واللي ولادها ماتت تفتكر خالد سعيد وسيد بلال

" مين مآمن يمشي آمن " ؟

انت كنت ولازلت ممكن تكون ماشي في أمانة الله ويقابلك أمين شرطة مش عاجبه شكلك يمرمطك ومش هتعرف تجيب حقك 


كل حاجة ممكن تحصل لنا قدر 

كل حاجة مكتوب تحصل لنا هتحصل 

يبقى لازم نتحرك علشان نحس بكرامتنا

ونتوكل على الله 

وان شاء الله ربنا مش هيخذلنا


انتي ما نزلتيش ليه بدل ما انتي عمالة تتكلمي وبس ؟

- انا هموت وانزل بجد بس أهلي مش موافقين ، وربنا العالم انا لو في ايدي انزل كنت نزلت
نفسي أنول شرف اني اغير حاجة ، واكون وسط الناس دي واقول بعلو صوتي 
قوم يا مصري مصر دايماً بتناديك

- طب أنا كمان أهلي مش راضيين يخلوني انزل ومش عارف اشارك اعمل ايه ؟؟
/ انا برة مصر ومش عارف اشارك ازاي ؟

- تقدر تنشر الأخبار في كل مكان وتحمس الناس 

تقدر تعلن عن الناس اللي مستعدة تعالج الناس 

تقدر توصل رسايل الاستنجاد اللي بيبعتها المتظاهرين على تويتر وفيس بوك علشان اللي يقدر يساعد يساعد

كل ما تعرف معلومة جديدة تفيدهم قولها في كل مكان علشان تساعدهم

تقدر تحمس الناس علشان يشاركوا 

وتقدر تدعي ربنا يوفقهم وينصرهم وينصرنا جميعاً ويكتب الخير والسلامة لمصر

تقدر مهما كانت ظروفك تعمل حاجة... أرجوك اعمل حاجة

وبلاش تحبط الناس وتقولهم مافيش فايدة

 ربنا قال فيما معناه " لا ييأس من روح الله إلا القوم الكافرين "


___________________________

دي معظم الأسئلة اللي بتدور في بال ناس كتير رافضة 25 يناير

أو مترددة او مش عارفة هو دا صح ولا غلط

دي وجهة نظري والله اعلم بردو صح ولا غلط بس انا مؤمنة جداً بيها

لو لقيت في الكلام فايدة انشره علشان تقطع حيرة الناس وترددها

هناك تعليقان (2):

  1. بحيكي على فكرتك في طرح الموضوع

    حاولي مع اهلك على قد ما تقدري
    انا كمان كانوا اهلي مش موافقين بس اتكلمت معاهم ورضيوا اني انزل يوم 25 ونزلت مع زميلي في الشركة الي بشتغل فيها حتى صاحب الشركة نزل معانا
    احساس رااااااااااااائع
    ويوم 26 اهلي نزلوا معايه

    كل ده علشان خاطر بلدنا
    وان شاء الله ربنا معانا

    ردحذف
  2. لما بيجي على بالي الخوف وأهلي اللي مانعني من أني أنزل زيك بردو يا سارة.......
    .
    .
    بفكر في المستقبل ...
    .مستقبلي ومستقبل ولادي.....
    .
    -بحس أني خايفة على ولادي دول من قبل ما حتى يجواوأشوفهم.....

    -وبحس أني هكون أذنبت في حقهم لما يجوا لدنيا مقفولة فيها كل سبل العيش بأمان وكرامة وحق في أني أحلم أحلام ويبقى عندي أمل في إنها تتحقق ومبقاش خايفة من ظلم وفساد ومحسوبيات.....

    -بخاف لا يجي يوم وأشوف فيه ولادي بيكبروا ويتخرجوا من كليتهم ويبقى عندهم هدف سليم ورسالة لازم يأدوها عشان يبقوا نافعين لبلدهم ....
    وميعرفوش يعملوا حاجة وأشوف إحباطهم ويأسهم بعيني....ودنيا طغى فيها الطالح على الصالح...(-_-)

    وسعتها هندم ندم العمر إني مشاركتش في بناء مستقبلهم على أساس سليم...
    .

    .
    عشان كده مش قادرة أسكت...........

    وعندك كل الحق......
    لو مش هنشارك في الشارع......
    بس على الأقل نكون إيجابين .......
    .
    .
    وأنا أتفقت أنا وصحباتي كلهم نيت الصيام النهاردة عشان ندعي لخيرة رجالة مصر إنهم يرجعوا سالمين غانمين لأهاليهم ....ويكتب الخير لبلدي أيان كان هو إيه........!!!

    ويااااااااااااااارب صبرنا وصبر رجالة مصر وقويهم ....

    ردحذف

Say something...