الدنيا - حواليا - مقلوبة علشان قفلت أكونت الفيس بوك
اعترف بإني اتفاجئت بكمية الناس اللي انا فارقة معاهم بجد !!
بس دا ما يمنعش إني حسيت من سؤال البعض انهم - فقط - عايزين جنازة ويشبعوا فيها لطم !!
قررت أعمل البوست دا كآخر كلام في موضوع الفيس بوك :
انا كنت غايبة كتير عن المدونة ودايماً بكتب على الفيس وبطرح أفكاري أول بأول عليه ومشاعري كمان
كنت شايفة - وفقاً لنصيحة من مُدَوِن آخر - إني المفروض بما ان المدونة ليها قُراء كتير
اطرح عليها الموضوعات المهمة بس والحاجات العفوية والفضفضة والتهييس كله يكون في شكل نوتس على الفيس بوك
اقتنعت بالفكرة وفيما يبدو إن الموضوعات المهمة الفترة اللي فاتت كانت قليلة جداً :D
وانشغلت كمان بالشغل وحاجات كتير .
المهم إني استفدت جداً من الفيس بوك ، لكن لاحظت إني بدور في فلك معين أنا ما حبتهوش
ولقيت اني بقيت بكتب أقل وبتفرج أكتر
- ودا مش وحش لو بتفرج ع حاجة مفيدة -
ولقيت نفسي غصب عني بيدخل في دايرة اهتماماتي مواضيع غاية في التفاهة
ولقيت اني بضيع وقت كتير جداً
- يكفي اني في الفترة اللي بطلت فيها ادخل فيس بوك وهي تقريباً اربع أيام قرأت فيها 6 كتب !! -
ولقيت نفسي بدخل في دايرة نفاق اجتماعي مقززة هربت بسببها قبل كده من عالم المنتديات
ولقيت نفسي مُجبَرة أتعامل مع ناس مش بحبهم ، وناس بيضايقني مُجرد إني أشوف اسمها !
راجعت نفسي لقيت ان الناس حبت المدونة بمواضيعها الهايفة واللي مش هايفة
ولقيت اني كنت نفسياً مرتاحة جداً وانا ما بتعاملش مع الفيس بوك أو بمعنى أدق ..
( مرتاحة وانا تعاملاتي من خلال الفيس بوك محدودة نوعاً ما)
ماعرفش اللي انا فيه دا مرض نفسي ولا ايه لكن انا اكتشفت فعلاً
إني بحب الناس أيوة .. لكن من مسافة معينة .. المسافة دي تكفل لي حريتي وما تقيدنيش بتصرفات أو كلام انا مش حابة اعمله
وبناءً عليه .. أنا قفلت اكونت الفيس بوك بتاعي بمعنى إني مش بفتحه خالص
مُحتفظة بيه بس علشان عليه ذكريات حلوة وناس حلوة
بتعامل مع الفيس بوك فقط من خلال صفحتي الرسمية
وبس .. دا كل الموضوع
أنا مش زعلانة - مش مصدومة
أنا بس قررت أبطل أكون اراجوز بالنسبة للبعض :D
بصي علي قد ماانا مرتاحه لانك هتكوني مرتاحه بس انا اضايقت اووووي بجد انك قفلتي الاكونت بتاعك
ردحذفGANGAHOBA
أنا اسف ممكن اكون معرفش موضوع قفلك لأكونت الفيس بوك
ردحذفبس بأمانة انا مبدخولش كتير اساساً
بس هقولك حاجة المدونة هى البيت مش الفيس
انا برتاح نفسياً لما بروح ازور الناس فى مدونتها
بحس انى بقابله لأن هو اللى كاتب ده
(:
اسف لو مكونتش عرفت
عارفة يا سارة..
ردحذفانا ديما باحس اني ةبلاقي نفسي هنا..
في التدوين..
ومش كل يوم لانها مش مذكرات..
عشان كده باجترم اللي بيقرا وبحاول انه مش يضيع وقته وخلاص في يوميات مش ها تفيد بحاجة..
الفيس بوك عامل زي الاكل التيك اواي
مفيش افكار ناضجة زي التدوين.. الى جانب انك فعلا مضطرة تردي على ناس كانوع من (المجاملات الاجتماعية العبيطة)
عشان كده لا عمري حبيت الطريقة السريعة دي..
ولا لقيت نفسي فيها..
عجبني قوي انك رجعت هنا.. لمكانك..
لمسرح انت فيه كل الفريق :)
مساءك ورد وسكر :)
وهيصه
ردحذفأنتم السابقون ونحن اللاحقون
أنا نفسي أقفله
بس تقدري تقولي أنا فاتحه عشان
المدونة
دي مربوطه بدي
وثاني حاجة
برضوا ان أكون متابع إيه اللي بيحصل
ويدور
هوا عامل زي الإدمان
بس لو الواحد خد من جرعات بروشته مدروسة ممكن ممكن يعني ممكن والله اعلم يستفاد منه .
تحياتي الرئاسية ليكي
وعبالنا يا رب
بجد يا سارة
ردحذفأحييكي جداااااااااا
و بجد قرارك ده جه في وقت بالنسبة حيوي أوي
- و مبروك عليكي العوجة لقوية للـ 6 كتب و عقبالي ياااااا رب في كل حاجاتي بتاعة زمان -
^ـ^
الفيس بجد ده متاهة و دوامة بجد مقرفة
مجرد بس هادخل أشوف حاجة
تخرجي تالت يوم
كارثة
بجد بجد
مبروك يا سارة على العودة
و عقبال العودة الأقوى للمدونة اللاسعة
عايزين نلسع تاني جامد
بالتوفيق يا سارة دايماً و ربنا يباركلك في كل وقتك و حياتك
:-*
انا حاسة اوى بالى انتى بتتكلمى عليه
ردحذفوسواء هنا او هناك هنفضل نتابعك
ربنا يكتبلك الخير
Mona Nashaat
انا حاسة اوى بالى انتى بتتكلمى عليه
ردحذفوسواء هنا او هناك هنفضل نتابعك
ربنا يكتبلك الخير
Mona Nashaat
متهيائلي مدام ديه قناعتك الشخصية يبقا مش مهم اي حد
ردحذفالمهم انتي تبقي مرتاحة انتي فتحتي الاكونت مافتحتهوش محدش هايبقا عاجبه اي حاجة ابدا
انتي شوفي سارة عايزة ايه ومحتاجة ايه واعملية
ولو اي حاجة هاتيجي علي مستقبلك ونفسيتك يبقا مالهاش اي داعي
ربنا يوفك ياسارة يارب وانا متبعاكي علي المدونة ان شاء الله
hOuDa mAz
ردحذف:'( miss u ana
قرار في منتهى الحكمة منك واحسن حاجة تعملي الحاجة اللي تخليكي مرتاحة نفسيا مش مضغوطة
ردحذفتحياتي وتقديري لكي
بيتهيئلى اللى بيحبك بجد و بيهتم بكلامك فعلاً ، هيدور على أى مصدر فيه حاجه ليكى .. مش هتفرق بقى صفحه رسمية أو بروفايل
ردحذفو أكيد أحسن حاجه ليكى و للكل انك تكونى مرتاحه و على طبيعتك
و مادام انتى كده هتستفيدى و مش بتضرى حد يبقى انتى كده صح :)
انا اكتشفت فعلاً
إني بحب الناس أيوة .. لكن من مسافة معينة .. المسافة دي تكفل لي حريتي وما تقيدنيش بتصرفات أو كلام انا مش حابة اعمله
أهلا بك مجددا حيث تنتمين
ردحذفمعلش انتى ايه اللى يجبرك انك تدخلى فى دايرة نفاق اجتماعى ؟؟
ردحذفسورى طظ فى اللى يزعل بس مفيش اى حاجه ولو جواز انك تنافقى حد اجتماعيا
=)
مع انى مش من هواةالتعليق في المدونات
ردحذف((بكســـــــــل D:))
بس دخلت هنا عشان لقيت ان هى دى الطريقة اللى هقدر اتواصل معاكى بيها بعد ما اعلنت العصيان على الفيس
بس انا رأيى الشخصى ان سارة درويش تقدر تفصل كويس اوى بين الجد والترفيه بين الشغل والراحة
وتعرف تميز المنافق من اللى مش كده وتقدر توقف كل واحد عند حده كويس اوى
yomna adel mahmoud
مش عارفة ليه ماستغربتش لما الاكونت اتقفل
ردحذفجايز عشان مطمنة انك لسة موجودة عالمُدونة وهاعرف الاقيكى برضو D:
كمان فكرة المجاملات الـ بتكونى مضطرة تقوليها والناس الـ مضطرة تتعاملى معاهم كافية لوحدها انك تاخدى القرار ..
ما علينا :) انتى كدة تمام على فكرة =)!..
خليكى بكل افكارك وعفويتك هنا .. مش عيب يعنى .. كل واحد ليه اوقاته الجد والـ مش جد
وانا بحب الحالتين !
بس بلاش واوعى بجد بجد بجد تفكرى تعملى deactivate .. انا قولتلك اهو xD !
:((
ردحذفبس و الله هتوحشي الناس اللي عرفتك من الفيس :((
أنا كنت مفكرها أجازة بس وهترجعي تاني ... عموماً إنتي أدري بما يسعدك ويارب يكون قرار موفق ... بس أحب أقول إن بجد الفيس بوك من غيرك هيختلف كتير ويارب يكون دا لصالحك ولصالح المدونة
ردحذفD007a
سااااااااااااارة :((
ردحذفسااارة بجد انا زعلانة جدا جدا جدااا انك خلاص قفلتى الاكونت بتاعك :(((
يعلم ربنا انا لما شفت ال
profile picture
كنت فاكراكى بتهزرى او مشغولة شوية وهترجعى
ودلوقتى كنت على تويتر واكتشفت انك خلاص قفلتى الاكونت بتاعك نهائيا زى ما قلتى
انا زعلانة اوى والله بجد
حاسة ان شمس الفيس بوك خلاص هتغيب عننا
وان سارة الجميلة اللى حبيتها جدا وحسيتها زى اختى خلاص قررت انها هتسيبنا :(((
وان احلى بنوتة لاسعة خلاص هتختفى..
والله ياسارة انتى من الناس اللى وجودهم على الفيس بوك خلى حياتى احلى ..
بس انا ان شاء الله هتابع المدونة
الحاجة الوحيدة اللى هتهون عليا ان ده قرارك و انا متأكدة انك فكرتى كويس قبل ما تاخدية
بحبك اوى و
هفتقدك اوووووووى وهفتقد لسعانك...
زينب الدسوقى
يا خبر....مكنتش اعرف اني نايمة للدرجة دي...
ردحذفمتأسفة جداااااااااااا جدااااااا يا سارة...
انا معرفتش حكاية قفلك للأكونت غير دلوقتي....
بس مش عارفة أقلك إيه....
طبعا ده شئ يريحك وخلاص مفيش كلام فيه...
بس طبعا مدام في تواصل بينا عن طريق مدونتك الجميلة وصفحة سارة درويش على الفيس...
فخلاص...كده هنقلل زعلنا شوية...لان اهم حاجة تكوني بأفكارك قريبة مننا...بغض النظر بقى على الطريقة....
وأتمنالك كل التوفيق يا سمو الأميرة (^_^)
اختاري اللي يريحك وأتمنى لك التوفيق يأرب. في حياتك.
ردحذفهو انا ممكن ادخل علي المدونه بتاعتك واتعرف عليكي اكتر ازاي
ردحذف