لعلمك

لعلمك

إقرأ لي

دخلوا بكليك شمال :D

Blog Archive

الأربعاء، فبراير 02، 2011

postheadericon نعم / لا لمبارك



دا آخر كلام عندي في موضوع مبارك علشان مرارتي : 

1 - مبارك قائد الضربة الجوية الأولى وليس قائد حرب أكتوبر كلها ، زيه زي أي جندي شارك في الحرب ، ودا مش مبرر إنه يبوظ البلد بعد كده علشان " أدى واجبه في الحرب " ! .

2 - النفاق وأسلوب بنحبك يا مبارك ، وانت البطل ، وانت اللي فيهم والكلام دا كله هو اللي خلاه يعمل فينا كل دا كل الفترة اللي فاتت دي

انا مع الاستقرار وان الدنيا تهدى ولكن مش مع النفاق والهبل والاستفزاز اللي بيحصل دا ! 

3 - اللي مبارك عمله في الكام يوم اللي فاتوا دول مش كرم اخلاق منه ولا تطوع ولا حسنة ولا صدقة ، اللي اخدناه اليومين اللي فاتوا دا حقنا واقل كمان من حقنا .

4 - مش المتظاهرين السبب في خراب البلد والولعة اللي فيها ، السبب في كده نظام فاسد سمح لحاجة زي دي انها تحصل والكل عارف ان اغلب اللي اتقبض عليهم كانوا شرطة ، وشرطة سرية ، ومسجلين خطر راحوا ينهبوا بأوامر من الشرطة . 

5 - لازم نبطل نفكر بعاطفتنا ونبص تحت رجلينا وبس ، اللي اتقال امبارح لازال في نطاق الوعود ماقالش خطوات واضحة ما قالش هيحاكم العادلي ولا هيحاسب أحمد عز وغيرهم وغيرهم !!!

مش علشان اتنحنح وقال انا هموت في بلدي نتعاطف معاه ونعيط علشانه !

6 - كل اللي بيقولوا قد انجازات ، اوك قدم حاجات للبلد بس دا  واجبه ودوره اصلاً اللي بياخد مرتب عليه ، واللي علشانه كنا بنحترمه ومسمينه رئيس الجمهورية ولو مش قد المسؤولية والدور دا كان يتنحى عن الرئاسة بكرامته واحترامه .

7 - كل اللي ناسي عمل فينا ايه يتكرم ويروح يزور مرضى السرطان ، اللي اتسرطنوا من الأكل ، ومرضى الفشل الكلوي اللي بيتمرمطوا في المستشفيات علشان يغسلوا كلى ويتبهدلوا وهم اصلاً جالهم فشل كلوي من تلوث الماية .

يشوفوا منظر الناس اللي في المشرحة اللي موتهم كلاب العادلي ، يشوفوا خالد سعيد ، ويبص لنفسه حاله عاجبه ولا لأ . 

8 - انا مش مع البرادعي ومش مع الاخوان ولا ايمن نور ولا السيد البدوي ولا في أي حزب داخل زمتي بـ 3 تعريفة ، بس دا مش مبرر إني أرضى بالسئ لأني خايفة اللي جاي يبقى اسوأ . 

9 - كل اللي بيقولوا لو مشي البلد هتخرب ، طب دا عنده 80 سنة لو كان مات كان حصل ايه ؟؟؟؟؟؟؟

10- انا مع جداً انه يسلم سلطاته سلمياً لعمر سليمان ، لفترة انتقالية ، وتتم التغييرات  اللازمة في الدستور وتحصل انتخابات رئاسية نزيهة بجد ، وقائمة على برامج انتخابية مش على أشخاص .

11- كل اللي بيقول اهانة الرئيس اهانة لمصر لأنه رمزها غلطان ، الرئيس رمز الدولة لما الشعب يكون مختاره لكن احنا لا اختارناه ولا بايعناه !

 12 - اللي بيقول هيبة مصر اتهزت ، هو احنا كان لينا هيبة ؟؟ لما في كل بلد نتهان وكل العرب بيقولوا علينا رئيسنا مجوعنا ومشردنا ؟؟ لما عائشة عبد الهادي وقعت صفقة مع السعودية انها تورد لها المصريات يشتغلوا هناك خادمات ؟؟ لما في لبنان قتلوا مصري شر قتلة علشان اغتصب بنت وفي الآخر طلع بريء بعد ما موتوه ؟؟ جاب حقه هو ولا عمل له كرامة ؟؟

المصري مؤخراً بقى مالوش سعر ولا احترام لأنه متهان في بلده اصلاً .

13 - أرجوكم لما تيجوا تختاروا رئيس مصر القادم تبعدوا تماما ً عن العاطفة ونفكر بعقلنا ، وما نختارش شخص لكن نختار  " برنامج انتخابي " .

14 - ارجوكم لما الريس الجديد يجي بلاش نقعد نبوس الأيادي ونتذلله علشان تكرم وبقى رئيسنا ، نحترمه طالما احترم نفسه والتزم بنهضة البلد دي .

15 - كل شعب يستحق حاكمه ، فأرجوكم عايزين نقرر من النهاردة نكون ناس كويسة تستحق حاكم كويس وبلد كويسة

الشباب اللي كان في عز ثورته بيلم الزبالة من ميدان التحرير علشان ما يوسخوش اعتقد انه هيقدر يحافظ على مصر ويخليها بلد محترمة .

9 بوينتس أوف فيو:

غير معرف يقول...

رغم كل كلامك الجميل ده بس برضه يجب عليكى احترام الرجل ده وبعدين يعنى مش قدرين تصبروا ال8 شهور الفضلين لعلمكم بقا هتخرب بجد لو مشى دلوقتى وانا شايفة ان من العقل والمنطق انه يرحل بعد 8 شهور حرام عليكم كفاية بقا تعبانة من التوتر اللى مسببينه ده لصالح لمين المصالح المتعطلة دى والغلابة اللى مش عارفة تقبض رواتبها انتم كده بتهدوا الثورة الجميلة والعظيمة اللى عملتوها

عندما تكون ميمى وحاجات كتير مع بعضها كده يقول...

بجد ياسارة قولتى الى انا عاوزة اقوله عارفة احنا ناقصناا ايه ياسارة ناقصنا قائد الناس كلها تتلف حوليه لازم الفترة الى جاية يبقى لينا قائد نثق فيه نثق فى كلامه فى احكامه واحد بجد عنده مصداقيه انا مش البرادعى الى قال فودونى علشان اعمل حكومة الوحدة ميين الى فوضك ولا ايمن نور الى مش معاه شعبية ومين الاحزاب اصلا الى احناعمرنا ما سمعنا عناها غير خناق على رئاسة الحزب بالضرب بجد بالجزم هيجو يحكمونا دووول ازاااااااى

MR.PRESIDENT يقول...

يااااااااارب انصر شباب التحرير علي الأمن والبلطجية
اللهم ثبت الجيش المصري في صف المتظاهرين ولا تجعله من المتخاذلين

" علي الحكام أن تخاف من شعوبها وليس علي الشعوب أن تخاف من حكامها "

mohamed hesham يقول...

قتل اخواتنا لازم يتحاكم ويطلع من الرئاسة حالا غير مأسوفا عليه ومين قال انها بلده .. بلده لو كان أقام العدل فيها ... لابد من محاكمة مبارك والعادلي وعز وسرور وشهاب والفقي وكل اللصوص والزبانية الفاسدين في هذا البلد ... أما ان يلعب بعواطف الناس كما حدث بالأمس، فليتذكر كل منا لو ان أخ له استشهد برصاصهم ما سيكون موقفه حينئذ ... أنا عن نفسي لن أسكت

شكرا على البوست الجميل يا سارة

والسـ ختام ــلام

boooba !! يقول...

قولتي كل اللى عايزة اقوله و الله
ربنا يكرمك يا بنتى :)

إبتسام مختار يقول...

معنديش أى اعتراض على كلامك
بل عندى كلام أكتر منه !

بس تقولى ايه للى بيقولك انتى بتثيرى الفتنة؟

semsema يقول...

كلامك صح ياسارة الناس كلها مع الاستقرار والامن والحياة الكريمة حتى لو اختلفت طرق تحقيق ده انا مش مع الريس ولا ضده انا ضد اللى يضحك عليا ويستخف بعقلى ليه نبهدل البلد اكتر من اللازم الناس اللى ف الشارع عاملين حالة شلل فى البلد محدش بيشتغل محدش بيروح شغل وحتى الاكل مش متوفر زى الاول كل الازمة دى مابتطول كل ما الاسباب اللى خلت الناس عايزة الثورة بتزيد يعنى هنعقد سنين طويلة نعوض خساير العشر ايام دول ده غير ان فى ناس بتصطاد ف الميه العكرة وبتحاول تقضى مصالح على حساب الشباب اللى طلع يوم 25 نفسى ان الحال ينصلح من غير ماحديموت ويكون فى عقل فى التصرف ويلرب اللى جاى يبقى احسن من اللى فات

غير معرف يقول...

كلام حلو بس انا بقول كفاية لحد كدا نرجع لبيوتنا ونمارس حياتنا الطبيعة وكفاية دم وخوف وقلق...اغلب مطالبنا اتحققت والجاي احسن باذن الله بس محتاجين شوية صبر,,,نستنى 6 شهور بلاش نبوظ اللي بدأنا احنا كدا كويسين قوي ,,, احنا باستمرارنا ده بنويد الناس الغريبة الاجانب اللي موجودة بينا ,,,مش معقول خايفين علينا ومضايقين لحالنا مفكرناش هما بيعملو كدا ليه !!!!
خلينا احنا بقا نشوف دورنا ايه لو بنحب البلد دي نحاول نصلح ونظف اللي عملناه ف المظاهرات
كفاية كدا قوي وبرافو عليكم يا شباب 25 بلاش نبوظ بقا اللي عمله محتاجين صبر ياجماعة (تفائلو بالخبر تجدوه)

غير معرف يقول...

كل كلامكوا كويس بس اللى يقول العيب فى الرئيس او الحكومة او الاحزاب بس يبقى غلطان العيب فى كل واحد مش بيراعى ضميرة واللى بيقول انا ومن بعدى الطوفان العيب على الشعب اللى كان ميت طول الفتره دى العيب على اللى مش بيرضى ربنا فى تصرفاته البلد هتتغير بينا مش بحد غيرنا اللى ماتوا ربنا يرحمهم وبالفعل دمهم مش راح بلاش ومتهيالى كفايه كده والحمد لله ان ده حصل علشان نعرف مين معانا ومين ضدنا يالا نبدا ونغير ونقول بكره احسن بينا

المتابعون

اعتبرها بيتك ♥

وِش القفص

خليك ورايا

دليفري..