لعلمك

لعلمك

إقرأ لي

دخلوا بكليك شمال :D

Blog Archive

الجمعة، فبراير 04، 2011

postheadericon انجازات زعيم الأمة مبارك

 فوجئت بالناس عمالة تشتغل كوبي وبيست لإنجازات الزعيم والرئيس يزهزه عصره يطول عمره هأ هي مبارك 

دي انجازاته اللي قالوها وتحتها ردي عليهم :



تحرير كل شبر من تراب الوطن مع استعادة السيادة الكاملة علي سيناء.

*  لم يقم وحده بالتحرير ولم يكن هو المخطط ولا المنفذ للحرب ، هو مجرد قائد للقوات الجوية وفقط ، والمفاوضات التالية واسترجاع سيناء وتحريرها تم بناءً على انتصارنا في السادس من أكتوبر وليس من أجل سواد عيون مبارك .

*******   

عودة العلاقات مع الدول الإسلامية والعربية، وعودة مقر الجامعة العربية للقاهرة.

 - علاقتنا مع الجزائر منهارة بسبب ماتش كورة ، وفي لبنان تم قتل مصري ظلماً ولم يتحرك أحد من اجل استرداد حقه ولا كرامته ولا دمه المهدور ، تم عقد صفقة مع السعودية لتصدير المصريات اليها كخادمات ، تم احتجاز وتعذيب أكثر من مصري في الكويت وليبيا ... وفي فلسطين اتهمونا بالخيانة واننا متأمرين عليهم مع اليهود لما قفل عليهم المعبر وسابهم يموتوا في الحصار ...  علاقات زي الفل فعلاً . 

*******   


إقامة علاقات دولية متميزة، مكنت من إسقاط نصف مديونية مصر الخارجية.


- بلغت ديون مصر عام 1981 لحظة استلام الرئيس مبارك الحكم : 15 مليار جنيه ( حوالي 21 مليار دولار في ذلك الوقت)

ديون مصر الآن بعد 30 سنة من حكم مبارك :

الديون الداخلية : 888 مليار جنيه

الديون الخارجية : 200 مليار جنيه

الإجمالي : 1088 مليار جنيه

- علما بأن هناك حوالي 20 مليار جنيه شطبت عام 1991

الكلام دا مش من عندي الكلام دا من هنا 

       *******    


إعادة إحياء القمم العربية بعد انقطاعها منذ الغزو العراقي للكويت بدعوة من مصر عام 1996 وتقنين دورية انعقاد القمة بمبادرة منها.

      - القمم العربية التي شهدت اشتباكات بالأيدي بين ممثلي الدول العربية المحترمة أم ماذا ؟       أم القمم العربية التي تركت شعب غزة يموت دون ان تتحرك وتلقى عليه القنابل ويحاصر غذائياً   ام القمم العربية التي تصدت لمبارك حين باع الغاز لإسرائيل ؟؟  
  
*******    

قيادة مصر في دعم القضية الفلسطينية عربيا ودوليا ومساندة الشعب الفلسطيني في مواجهة
       الاحتلال وتأمين حقوقه المشروعة وصولا إلي قيام دولتهم المستقلة، وعاصمتها القدس.
          
-         الوضع الحالي يشهد دوره المشرف جداً في هذا فعلاً

*******           

رعاية اتفاقات أوسلو التي أنشأت السلطة الفلسطينية ومكنت القيادة الفلسطينية برئاسة ياسر عرفات، من العودة إلي الضفة الغربية وغزة، ورسخت مبدأ قيام الدولة الفلسطينية كأساس للتسوية.

نو كومنت
 
*******   
      
التصدي بحسم وبقوة القانون وبتضامن الشعب لقوي الإرهاب لضمان استقرار الوطن وتقدمه.

        

      بأمارة انفجارات الأقصر والحسين وكنيسة القديسين وغيرها وغيرها 


*******    

  تدعيم العلاقات مع الاتحاد الأوروبي تحقيقا للتوازن في سياسات مصر الخارجية وإبرام اتفاقية الشراكة المصرية- الأوروبية.

     

-         علاقات قوية فعلاً دعت الاتحاد الأوربي إلى مطالبته بالتنحي 
 :D
*******   

تفعيل الإشراف القضائي علي الانتخابات.

    

-         نكتة ؟؟
*******   

إنشاء أول مجلس قومي لحقوق الإنسان.

        

-         وماذا يفعل ؟ يعتقل الحقوقيين ويترك العادلي وكلابه يقتلون خالد سعيد وغيره كثيرين و يطلقون الرصاص الحي والمطاطي على المتظاهرين ويدهسونهم بالسيارات و يجبرون البلطجية على ترويع الآمنين !!

         *******   

إلغاء القانون 105 الخاص بمحاكم أمن الدولة.

     

     كان مزاجه ؟؟؟؟؟؟؟ 

*******    

إلغاء عقوبة الأشغال الشاقة من التشريع المصري.

 
          
-         ودي حاجة حلوة للمواطن المصري الشريف مثلا ً ؟؟ 
 
*******  

 
إنشاء محاكم الأسرة.


        
 
-         اه اللي الناس بتطلع روح أهاليها فيها عقبال ما تاخد حكم بالطلاق أو الرؤية ؟ 

*******  
 

إلغاء معظم الأوامر العسكرية الصادرة طبقا لقانون الطوارئ.
-          
-         قانون الطوارئ الذي استمر 30 عاماً ولازال ؟؟ المفروض أساساً ان يتم إلغاء قانون الطوارئ

تدعيم تنشيط إطلاق حركة الجمعيات الأهلية.

ليتم النهب من ورائها ومعظمها جمعيات صورية فقط ، اما الجمعيات الحقيقية ذات النشاط الحقيقي تتم عرقلتها بكل الوسائل .

إقرار حق الخلع للمرأة المصرية.

الخلع من صميم حقوق المرأة المصرية وكفله لها الشرع ما اخترعهوش ولا جابه من جيبه
 ودا مش انجاز لمبارك شخصياً !!!!

ضمان تنفيذ أحكام النفقة، بإنشاء صندوق لتأمين الأسرة.

تفضل أرجوك بزيارة محاكم الأسرة وستجيب بنفسك على هذا الانجاز

المساواة بين الأب والأم المصرية في حق منح الجنسية للأبناء.

ولاد خالتي ابوهم فلسطيني مولود في مصر وهم مولودين في مصر وما طلعوش برة مصر يوم واحد وامهم مصرية ولم يتم منحهم الجنسية !


التوسع في المناصب القضائية للمرأة.

حصلت لنا البركة يا شيخ

تعيين أول قاضية بالمحكمة الدستورية.

كان بيروح يذاكرلها ويدافع عنها في الاحكام اللي اخدتها والنضال اللي عملته لحد ما وصلت للمنصب دا علشان كده بقى انجاز لمبارك


حرية التعبير والرأي من خلال 515 صحيفة تعمل في مصر، منها 48 صحيفة حزبية.

فعلاً واعتقال المدونين والتضييق عليهم ، اختطاف الناشطين السياسيين والحقوقيين كان فعلاً حرية !

تعديل المادة76 من الدستور؛ ليصبح اختيار رئيس الجمهورية عن طريق الانتخاب الحر المباشر، لأول مرة في تاريخ مصر.

عدلها علشان تتفصل على ابنه ودلوقتي استجاب لتعديلها تاني بما يدل على انه كان عكها جه يكحلها عماها .
  

إصدار القانون رقم 174 لسنة 2005 بتنظيم انتخابات الرئاسة، ليحدد القواعد لانتخابات حرة ونزيهة.

فعلاً بأمارة الــ 99.9 % والميتين اللي بينتخبوا

تعديل قانون تنظيم مباشرة الحقوق السياسية بما يضمن المزيد من نزاهة العملية الانتخابية.

فعلاً بأمارة الانتخابات بتاعة السنة دي

تعديل قانوني مجلسي الشعب والشوري، بما يحقق فاعلية أكبر في أداء البرلمان.

حقيقي والله مكسوفة ارد

تعديل قانون الأحزاب السياسية بما يعزز الحياة الحزبية.

اعملوا احزاب براحتكم وتفوا على تربتي لو نجحتكم في الانتخابات :D


زادت قيمة الصادرات الزراعية من نحو 0.5 مليار جنيه لتصل لنحو 7 مليارات جنيه.

وبقينا نستورد كل حاجة من برة القمح والقطن والأكل ، والزراعات بتاعتنا بترجع تاني من المينا علشان دون المستوى زي ما حصل مع البطاطس وفضيحة الكيماويات المسرطنة من ضمن انجازاته فعلاً

3 ملايين فدان مستصلحة لتصل بالرقعة الزراعية إلي8.3 مليون فدان.


ادخل هنا و رد على نفسك




حرية الفلاح المصري في زراعة وتسعير إنتاجه.

واللي أدى إلى مصايب لأن الفلاحين جريوا ورا المكاسب الأسرع وما بقوش يزرعوا قمح ولا الزراعات المطلوبة ، وزرعوا المحاصيل اللي بتجيب سعر اعلى

تحرير العلاقة بين المالك والمستأجر.

كتر ألف خيره

زيادة قيمة الإنتاج الزراعي بحوالي 16 مرة من نحو 5.8 مليار جنيه إلي ما يقرب من91 مليار جنيه.




زيادة دعم المعاشات بـ22 ضعفا من 554 مليون جنيه إلى 11 مليار جنيه.

لأن عدد اللي بياخدوا معاشات اصلاً زادوا لكن لسة في ناس بتاخد معاش خمسين جنيه في ظل ارتفاع جنوني في الأسعار .

وصل معاش الضمان الاجتماعي ومعاش الطفل إلي نحو مليار جنيه.

نفس الإجابة السابقة

زاد عدد المؤمن عليهم من نحو10.3 مليون مواطن إلي19 مليون مواطن.

مش فاهمة ايه وجه انجازه في دا :D

زيادة الإنفاق علي الدعم المباشر علي السلع والخدمات من2 مليار جنيه إلي35.4 مليار جنيه.

مع تدهور في مستوى الخدمات والسلع المدعومة زي رغيف العيش وسكر وزيت التموين

زيادة دعم السلع التموينية من مليار جنيه إلي10 مليارات جنيه.

لأن اصلاً الأسعار زادت

زيادة دعم المنتجات البترولية من100 مليون جنيه إلي أكثر من22 مليار جنيه.

اه بنبيع الغاز لإسرائيل مدعوم

40 مليون مواطن يستفيدون من البطاقات التموينية.

والأربعين مليون الباقيين بيلطموا لأن الأسعار نار والأجور قليلة جداً

تحول رصيد الميزان الجاري من عجز قدره2.3 مليار دولار إلي فائض بلغ 3.7 مليار دولار.

في خلال 30 سنة !!!!! انجاز 5 مليار تقريباً فقط ؟؟


زادت قيمة الصادرات الصناعية( بدون البترول ومنتجاته) من نحو 0.5 مليار دولار إلى نحو 6.6 مليار دولار.

في 30 سنة !!!!!

زادت إيرادات قناة السويس من نحو909 ملايين دولار إلى 3.4 مليار دولار.

على أساس ان مبارك هو اللي حفرها وهو اللي شغال فيها :D


تضاعفت قيمة الصادرات إلي دول الاتحاد الأوروبي في الست سنوات الأخيرة ووصلت إلى نحو2.7 مليار دولار.

ادخل هنا ورد على نفسك




تضاعف إنتاج الغاز الطبيعي منذ بداية التسعينات ليصل 23.6 مليون طن.
 
تضاعف احتياطي الغاز الطبيعي أكثر من أربع مرات منذ بداية التسعينات ليصل إلى 65 تريليون قدم مكعبة.

علشان كده احنا زي الشطاطير بنوديه لإسرائيل مدعوم

توقيع بروتوكول إنشاء المناطق الصناعية المؤهلة لتسهيل نفاذ كافة المنتجات المصنعة بهذه المناطق إلى السوق الأمريكية بدون تعريفة جمركية أو حصص كمية أو غير ذلك من قيود

اااه وعلشان كده بقينا نستورد حتى الفوانيس من الصين !

6 بوينتس أوف فيو:

غير معرف يقول...

شغل هايل
:)
محمود ناسا

اعقل مجنونه يقول...

هو الراجل دا مش عنده كرامه الله يحرقه

بنـوتــــة يقول...

سارة
عادة مبقلبش أم العربية
بس بجد المرة دي
" لا فُض فوكِ يا فتاة "
مش عارفة أقولك إيه
بس اسمحيلي أشير لينك البوست عندي ؟؟
أرفعلك ألف و مليون قبعة يا سارة
و مش عارفة أقولك إيه
بس بجد ربنا يباركلك و يوفق شباب الثورة و احنا جنبهم
- نفسي أوي أنزل التحرير يا سارة بس مش نااافع -
:((

إبتسام مختار يقول...

أصل بيقولك احنا شعب عاتشيفى !!

يعنى الرئيس يدقق النظر فى الأوراق أمامه ليقول أنه لم يكن يوماً طالباً لسلطه وأنه عاش فى مصر وضحى من أجلها وسيموت بأرضها , واحنا نسمع الخطاب فتترقرق فى عيوننا الدموع وفجأه يُصبح هو "أبانا"
بينما يُسحل إخوتنا بعد قتلهم ويُدهس شبابنا الطاهر تحت عجلات سيارات الشرطة والمطافىء والهيئات الدبلوماسية , ولا نذكر من كل الأحداث إلا خطاب السيد الرئيس (العاطفى) ..!

اللهم لا إله إلا أنت سبحانك إنى كنت من الظالمين ..
حسبنا الله ونعم الوكيل

ALLELIO-عليــــلـــيـــــــــــــــــو يقول...

اول شى احب اعلق علية هو علاقاتنا مع دول الجوار

بمنتىه البساطة العلاقة مع الجزائر اساسا مش سيئة واللى مبيعرفش يقول عدس

الجزائرين فى داخل بلادهم يعشقون مصر وكل ماهو مصرى اما علاقتنا بهم فى الكرة فهى اساسا تنافسية شديدة الحساسية منذ زمن مش من ايام حسنى لا قبلة كمان ومش بس الجزائر لكن تونس والمغرب وبالتالى فانا مستغرب من كلامك دة جبتية منين !!!

بالنسبة لفلسطين واننا خونة لا مش فلسطين بس دة كمان سوريا بتقول علينا خونة وقطر كمان بس العجيب والغريب والمسلى ان السعوديين مبيقولوش كدا علينا ولا حتى الكوايتة ولا اى دولة من الخليج ماعدا قطر تفتكرى ليه ؟؟


امبارح داخل الفيس بوك بقالى كام يوم مدخلتش لظروف عملى وداخل لسة لقيت واحد سورى باعتلى رسالة شتيمة وقلت ادب بالرغم من ان المصريين الان ثوار ونفس الناس دى قبل كدا كانت بتنعتنا بالخيانة مما يدل ان الموضوع احنا بنقيسة غلط مش حكاية موقف الشعب المصرى هو اللى خلانا خونة

بمنتهى البساطة السوريين دخلوا معانا حرب مشتركة احنا نجحنا فى تحرير ارضنا وبعتنا لهم ناس تساعدهم فى الجولان لكن لم يوفقوا فى تحرير ارضهم

والنفس البشرية دائما ماتلجا الى تبرير اشياء باسباب وهمية

نيجى لفلسطين

هما بيقولوا خونة طيب

حرب غزة لم يتم ايقافها الا بسبب حسنى مبارك


الراجل خرج وقال اسرئيل تخطت الحدود الحمراء واعطيها مهلة 24 ساعة لتتوقف

اسرائيل فى خلال 24 ساعة توقفت تماما عن ماتفعلة

طيل لما نحلل كلام اللى بيصفونا بالخونة من الفلسطينين نشوف

لية مثلا مقالوش على الجزائريين خونة او التوانسة او الييبين او الخليج

اشمعنا مصر ومصر بالذات

مصر احاطت غزة بجيشها وحمتة وادارتة تحت حكمها بحاكم عسكرى وبعد كدا سلمتها مصانة للفلسطينين

العكس حدث مع الاردن اللى حاولت تاخد غزة ومش بس كدا دى حاولت تضمها الى ارضها

اشمعنا مقالوش الاردنين خونة

اشمعنا السوريين مقالوش على الاردن خائنة لما حاكمها حسين راح قال لجولدا مائيير ان المصريين والسوريين ينوون شن هجوم عليكم !!!!!



الموضوع ان العرب والعرب كلهم منتظرين ان مصر تتحرك وتحارب وقتها هيدونا فلوس ويقولونا حاربوا لوحدكم عشان لما ننتصر وقتها تلاقيهم بيقفوا معانا فى الصفوف الاولى ياخدوا الصور التذكارية احتفالا بالنصر اللى فى الوقت دة هيكونوا هما مشاركين فية


ولو اتهزمنا ووقعنا وامريكا واسرائيل دخلوا القاهرة وقتها تلاقيهنم بيطلعوا بيان من عواصمهم ان اللى مصر عملتة مكانش موفق واننا موفقنهاش الخ الخ الخ

موقف العرب دلوقتى فرحانين طبعا منا لخراب اللى احنا بنعملة فى مصر ليس لشى الا لان حسنى هيمشى

وعلى فكرة

امريكا وبريطانيا وفرنسا واسبانيا وايطاليا والعرب فرحانين ان حسنى قرب يمشى لان حسنى كان تعلب ممكن يرفض توصيات لامريكا وهو بيضحك فى وشهم ومياخدوش منة لاحق ولا باطل

حسنى ممكن يهدد اسرائيل من تحت لتحت وبردة ميعرفوش يدينوا تهديدة

من الاخر هم يريدون مصر دولة بحاكم مسقط البنطلون وبياكل لبان

وشعبها شعب فانكى واى بوت وسبوجى

وبكرة يدخلوها ويقسموها زى السودان


وشوية الصيع اللى عاملين نفسهم وطنين دلوقتى اول ناس هتجرى بس بعد ماخربوها

سليمان يقول...

ايه ياعم تعلب اييييييييييه انت الظاهر معلوماتك عن التعالب انها بقت ( اسود على وفى الحروب نعامة ) يابا اسرائيل بتعيط من ساعة لما المحروس اللى حضرتك بتدافع عنه مشى تعلب مين يا بنى انت لو كان ليك اخ غرق فى عبارة ولا مات فى قطر الصعبد ولو ليك قريب عنده فشل كلوى او سرطان او كبد وبائى حتعرف مين الجاسوس اللى كان شغال لحساب اسرائيل وبيستورد منها تكنولوجيا الزراعة المسرطنه احنا يابنى بنعمر مصر بعد ما مبارك واللى شبهه خربها يا ابنى ده الكلب ده كان على اتصال باسرائيل لغاية لما الجيش المصرى قطع عنه الاتصال يا حبيبى ده فضل مشارك اسرائيل فى حصار غزة طول فترة ضربها ولا قالك حدود ولا 24 ساعه ولا الهوا عذرك ام الكلام ده كان قبل ما يغور بوز الاخص من الحكم وبس ومكنتش تعرف الكلام ده اكيد ساعتها

المتابعون

اعتبرها بيتك ♥

وِش القفص

خليك ورايا

دليفري..