2011-02-08

وجع



انتوا مستوعبين يعني ايه واحد مات ؟؟

يعني أمه مش هتعرف تفرح تاني إلا وهي بتبكي لأنه مش معاهم

دا غير انها عمرها ما هتقدر تفرح بجد 

يعني وجع قلب أبوه ، يعني ضهره وسنده اللي كان بيترجاه من الدنيا وبيتعكز عليه كل ما يكبر ويعجز راح

يعني وجع لإخواته .. كل ما يفتكروه ، كل ما يشوفوا اوضته ، لبسه ، الحاجات اللي بيحبها ، الحاجات اللي كان بيقولها

كل ما حد يقول نكتة هو قالها في يوم من الأيام ، كل ما حد يقول كلمة كان متعود يقولها

يعني حبيبته خطيبته زوجته عرفوا طعم الموت والفقد والوجع في عز شبابهم

احلامهم سوا ببيت يعيشوا فيه ، اسماء أولادهم ، هزارهم مع بعض

الحاجات الهايفة اللي كانوا بيتخانقوا عليها

الطقم اللي كان بيحب يشوفها لابساه 

الكلام اللي كان بيحب يسمعه منها

الأماكن اللي شافوها مع بعض .. 

كل دي حاجات هتوجعهم .. هتفكرهم مهما الزمن حاول ينسيهم

اصحابه اللي بيحبوه ، زمايله في الشغل لما يلاقوا شغل كان بدأ فيه ولسة ما كملوش

حاجة كان متميز فيها 

عارفين موت واحد بس بيوجع كام واحد ؟؟

عارفين بيغير حياة كام واحد ؟؟

عارفين بيضيع فرحة كام واحد ؟؟

عارفين بقى ان مبارك اتسبب في موت أكتر من 300 شهيد ؟؟

وكان عنده استعداد يموت اكتر منهم لو قدر علشان هو بس .. هو لوحده 

يفضل محتفظ بالكرسي ... يحتفظ بكرامته اللي بيقول عليها !!!

عارفين ان فيهم شهيد عنده 14 سنة ؟؟؟ يعني طفل يعني لو ارتكب جريمة ما يتحاسبش عليها لأنه .. طفل !

عارفين ان فيهم شهيد متجوز من 20 يوم بس ، وساب عروسته علشان مصر 

متخيلين وجع قلوب أهاليهم والناس بتتهمهم بإنهم خونة وعملاء ؟؟

الحاجة الوحيدة اللي مصبرة اهاليهم إنهم ماتوا علشان هدف نبيل .. 

يقوم يطلع واحد بكل بساطة يقول لــ 300 أم ملكومة .. ابنك مات خاين ! تخيلوا ؟؟؟؟؟؟؟؟؟؟؟

لحد دلوقتي كل ما ابص لصورهم اللي كلها حياة وتفاؤل بجد ببقى مش قادرة استوعب انهم فعلاً ماتوا 

مش اعتراض على امر ربنا والله .. لكن انا اصلاً بستوعب الموت ببطء 

حتى لو انسان كبير ومريض .. فتخيلوا لما اشوف شباب زيي وافكر في احلامي

وافكر قد ايه موتي هيوجع امي ، واهلي وكل اللي بيحبوني

وافكر فيهم وابدأ استوعب ببطء حقيقة انهم دلوقتي ... " تحت التراب "

هناك تعليق واحد:

  1. سلامو عليكو
    بجد كلامك وجعنى وتخيلت انه اخويا الصغير او الكبيراو جوزى يسبنى ومشفهوش تانى
    الله يصبر كل اللى يعرفهم
    ويصبرنا ولو اننا منعرفهمش لكن كان يشرفنى اعرفهم وهم عايشين
    لكن زى عادة مصر متعرفش قيمة الحاجة غير لما تروح
    بس للاسف دول مش حاجة دول من لحم ومن اطهر دم

    لك تحياتى

    ردحذف

Say something...