لعلمك

لعلمك

إقرأ لي

دخلوا بكليك شمال :D

Blog Archive

السبت، فبراير 12، 2011

postheadericon من وعن مصر الجديدة أحدثكم :)

لازلت متلخبطة ومش مركزة من الفرحة  بس الكلام دا لازم اقوله :)


مصر الجديدة ما اتولدتش امبارح .. مصر الجديدة اتولدت يوم 25 يناير

لما نزل ناس عايشة مستورة وكويسة ، مع الناس اللي  حاسة انها مقهورة ومظلومة في بلدها

علشان يجيبوا حقهم وحق ولادهم
اتولدت لما بطلنا نخاف وبطلنا نقول وأنا مالي 

اتولدت لما بطلنا نمشي جنب الحيط وناخد على قفانا ونقول كماااااااان

الثوار كانوا  بيقولوا على ميدان التحرير " المدينة الفاضلة "
هناك في ميدان التحرير والميادين الموازية ليه في كل محافظات مصر

كانت الناس .. " ناس " 

كانوا بيحبوا بعض ، بيخافوا على بعض 

بيحموا بعض وبيداووا جروح بعض

بياكلوا مع بعض وبيضحكوا مع بعض 

في ميدان التحرير كان اللي ماعاهوش بياكل مع اللي معاه

كان اللي متعود ياكل من كنتاكي بيقبل عزومة زميله على الفول والطعمية علشان ما يجرحهوش

كل اللي راحوا التحرير قالوا الناس هناك ناس 

رغم ان الناس اللي في التحرير هي نفسها اللي كانت يوم 24 بتزق بعضها علشان تركب الأتوبيس 

وبتفكر في مصلحتها هي وبس

الناس بقت ناس في ميدان التحرير 

ومصر رجعت مصر من قلب ميدان التحرير

واحد في برنامج قال كلمة حلوة أوي 

قال الناس بقت كده علشان " عندهم هدف قومي ، طول السنين اللي فاتت كان ناقصنا يكون عندنا هدف قومي "

فعلاً كل الدول المتقدمة اللي شعوبها بتشتغل بجد بيكون عندها هدف قومي علشان كده بتتغاضى عن صغائر الأمور والمصالح علشان تحققه

لازم نحس اننا بنشارك في نهضة البلد مش مجرد ناس عاييشين فيها وخلاص

اعتقد احساسنا بإنها مش بلدنا خلاص انتهى بعد الثورة

علشان كده ارجوكم ما نضيعش دم شهدائنا ومصابينا الثوار هدر ونحافظ على بلدنا

نفتح عنينا كويس أوي ونقطف كل بذور الفساد من البلد

الفكرة دي كانت عندي من اول ايام الثورة ولقيت ان ناس كتير عندهم نفس الفكرة

ناس كتير عملت ايفنتات حلوة اوي 

زي دا 

من النهاردة دي بلدك انت،
ماترميش زبالة،
ماتكسرش إشارة،
ماتدفعش رشوة،
ماتزوّرش ورقة،
أوعي تقصر في شغلك
اشتكي أي جهة تقصّر في شغلها..
متسمحش لظابط يعذب مصري زيك..
اوعى تصنع "مبارك" تاني..
استمتع بحياتك..
اقرا وثقف نفسك..
حب نفسك وحب الناس اللي حواليك..
اوعى تعاكس بنات في الشارع.
اوعى تهين حد..
اوعى تسخر من حد..
أوعى تنسى حريتك أبداً..
خلي بلدك اجمل بيك

  • وفي ناس تانية عايزة تشتغل في محافظاتها ، نصلح الحاجات اللي اتكسرت أيام الفوضى ونجمل البلد وننضفها


  • ناس تانية عايزة تزور أهالي الشهداء وتعزيهم


  • ناس تانية عايزة تزور الجرحي وتشكرهم وتواسيهم وتشجعهم لأن الحالة النفسية بتفرق جداً في الشفاء ولأنهم بجد أبطال




أرجوكم .. لو عندكم أي فكرة مهما تخيلتوا انها مش مهمة شاركوا بيها

الثورة دي كلها قامت بــ " فكرة " وحلم ودلوقتي احنا عايشين الحقيقة

أرجوكم حافظوا على مصر وابنوها من جديد

ربنا وقف معانا كتيير أوي الأيام اللي فاتت ودبرلنا حاجات كتير كويسة وصلتنا للنصر دا

خلوا شكركم لربنا هو إنكم تحفظوا نعمته 

حبوا مصر تاني علشان هي بلدكم مش علشان نيلها واهرامها

وانا قولت الكلام دا لنفسي ، وحسيت بمسئولية اتحطت على كتافي من يوم ما الثورة قامت

زي ما اثبتنا للعالم ولنفسنا إننا شعب متحضر بثورتنا تعالوا نثبت لهم اننا  نستحق مصر








5 بوينتس أوف فيو:

غير معرف يقول...

إحنا عاوزين نكتب كتالوج إستعمال الحرية

D007a

غير معرف يقول...

والله يا سارة انا زعلانة لانى ما شاركتش فى المظاهرات معاهم بجد بس اللى مفرحنى ان بجد دى بلدنا انا حاساها قوي حاسة انى لاول مرة فخورة ببلدى ولو حد سألنى لو سافرت حقولها من قلبي مصرية اللى حاساها انى ححافظ عليها قوي ومش حسيب حقى لحد مهما حصل ومش حخاف تانى ان شاء الله و لو حد من اهلى او اصحابي فرط فى حق مصر او حقه حوجهه وده مش احساسي لوحدى ده احساسنا كلنا
انا فكرت فى انهم يعملوا جزب الشباب اللى كانوا بيقولوا عليه واشترك فيه باذن الله
بس مفيش افكار حالية بادينا غير على المستوى الشخصى و اننا نغير سلوكياتنا وان كل واحد يتحمل مسؤلية كلمة مصري زى ما فرح بيها و غنالها

شريف صابر يقول...

ارفع راسك فوق انت مصري مبروك عليك و علينا كلنا اخوك شريف مدون جديد

*الطالبة عفو الله *زوزو يقول...

بداية الف الف الف مبروووك النصر
بجد انا عايزة اشكر كل شاب مصري طلع ميدان التحرير
اشكره من كل قلبي لانه علمني و علم العالم كله معنى العزيمة و الارادة
معنى ان الحق يؤخذ و لا يعطى
ربنا يبارك فيكم يا شباب مصر
و عايزة اقلهم كمان انكم مش كنتوا سبب في نصرة بلدكم بس دنتوا كنتوا سبب في تغيير بلاد تانية للاحسن طبعا
اشد على ايديكم و اقلكم يلا كملو الي بدتوه دي البداية و مش نهاية
و ربنا معاكم

iـــــــــــsــــــــــlــــــــــــaـــــــــm يقول...

كلام سليم جدااااااااا

ياريت كمان واحنا بنصلح فى بلدنا

نصلح كمان من نفسنا

مش كفايه هدف قومى ممكن نحققه ونبقى كده خلاص

الاهم احساسنا ببعض واحساسنا بالمسئوليه

نغير من نفسنا ومن افكارنا ونحاول نعمل حاجه

والثوره دى بدايه

وان شاء الله الجاى كله يكون خير

المتابعون

اعتبرها بيتك ♥

وِش القفص

خليك ورايا

دليفري..