2011-02-05

هذا البوست .. من أجلك أنت :P

* مبدأياً مافيش بيني وبين حسني مبارك تار شخصي علشان ابقى محموقة منه أوي
الحمد لله ربنا ساترها معايا ومش آذيني شخصياً دوناً عن الناس ..  أنا بالعكس في فترة قبل ما انزل الشارع واشوف الناس عايشين ازاي كنت مقتنعة ان مبارك أحسن الوحشين ، وإنه مش بالبشاعة اللي الناس اللي بتعارضه دي بتتكلم عليه 
لكن دلوقتي لما نزلت الشوارع وشوفت الناس عايشة / ميتة ازاي بقيت بتكلم بحرقة الناس اللي عيطت قدامي علشان مش لاقيين ياكلوا ومش لاقيين يعالجوا عيالهم والناس اللي مالهاش بيوت بسبب الحكومة والأطفال اللي جالهم سرطان بعد ما اتولدوا بشهور وغيرهم وغيرهم
تاري مع مبارك تار 88 مليون مصري .. حتى اللي بيقولوا له نعم يا مبارك احنا آسفين يا مبارك .

* الناس غِلبت فيا مش ملاحقين عليا تُهم .. مش عارفين يتهموني بإيه ولا بإيه .. أقرب حاجة على لسانهم إني عراقية عميلة .. العبيط اللي متخيل كده ، أنا واحدة حفظت الجميل لبلد اتولدت فيها وعاشت فيها سنة واحدة ، ولحد دلوقتي بتحبها وبتتوجع علشانها هبقى خاينة للبلد اللي عشت فيها أكتر من 20 سنة ؟ بأي منطق ؟؟ الله أعلم
أما احتاسوا خالص قالوا عليا مش مسلمة :D
وكأن الإسلام حكر على مؤيدي مبارك !!! 

* اللي بيقولوا يرضيكوا يمشي ويبقى بيسمح للدول الأوروبية انها تتدخل في شئوننا على حد ما انا فاكرة إذا كنتم ناسيين ، مش الدول الأوروبية هي اللي قالت له امشي فاحنا روحنا قولناله اه إمشي ... الشعب قال امشي فأوروبا خافت تخسر الشعب اللي أصبحت متأكدة إنه هينتصر فقالت له إمشي ، وفي أكتر من بيان قالوا له " إمشي زي ما الشعب بيطلب " 
وبعدين هم أصلاً متدخلين في كل حاجة واحنا عارفين وخلوا الطابق مستور من فضلكم .

" من لا يملك لقمته لا يملك كلمته " واحنا كلنا عارفين إحنا بناخد مساعدات منهم قد ايه 

* اللي بيقولوا الدول العربية شمتانة فينا علشان المظاهرات ضد رئيسنا هرد عليهم بسؤال :

انتوا شمتتوا في شعب تونس لما ثاروا على رئيسهم ؟؟

انا عن نفسي ما شمتش وقولت عليهم رجالة وجدعان بجد . 

*  اللي بيقولوا لي هي دي ثقافة الاختلاف انك تشتمي اللي مخالفينك في الرد ، هقولهم خيركم سابق الناس المتحضرة اللي بتلوموني علشان بشتمهم دلوقتي بمجرد ما قولت رأيي قالوا فيا حسبنا الله ونعم الوكيل انتي عايزة تولعيها انتي خاينة وعميلة انتي عراقية ومش مصرية ومش مسلمة !! 
دول اللي على الفيس بوك أما نظرائهم في الشارع فاتعاملوا مع المختلفين معاهم في الرأي بالسنج والمطاوي والجنازير
ونعم التحضر ! 

*  الإخوة الأفاضل اللي بيقولوا لي يطلع متكرم من البلد  وعايزينا نقول له آسفين وحقك علينا وإلخ إلخ 
بيستشهدوا بحديث سيدنا محمد اللي بيقول فيما معناه ليس منا من لم يوقر كبيرنا ولا يرحم صغيرنا 
هو ما رحمش الصغير دا أولاً ، ثانياً لما واحد كبير في البلد يسرق ما نعاقبهوش علشان نبقى بنحترمه ؟؟
بلاش اللعب بالدين من فضلكم 


* اللي متخيل إن مافيش مخرج قانوني ولا دستوري للأزمة اللي احنا فيها دي غلطان ، دا وهم وحاجز حطوه قدامنا علشان يكعبلونا ، الناس لما فكرت بهدوء لقت مليون مخرج .. وبعدين دستور إيه دا اللي يقف قدام إرادة شعب كامل !!! 
وماحدش يقول لي إن اللي خرجوا دول مش بيمثلوا الشعب المصري اللي فيه 88 مليون لأ .. كلنا عارفين أوي إنه الرأي دا كان رأينا بالإجماع قبل ما يعمل الفتنة اللي عملها بإعلامه وكلابه وخطابه الأهبل .

* لاحظت ان معظم اللي مؤيدين لمبارك حججهم واحدة وكلامهم واحد وبياخدوه من بعض كوبي وبيست ، ولاحظت كمان ان معظمهم من الناس اللي هي بتاعة أنشر هذه الرسالة وإلا هيجيلك آرتيكاريا في المنام 

ناس تفكيرهم نمطي جداً ، بيصدقوا أي حاجة ، مش مستعدين يفكروا خالص ، بيفضلوا الجبن عن التجربة !
دا انا امبارح بقولهم المخرج خالد يوسف من ضمن الموجودين في ميدان التحرير علشان ينفذ أجندة الإخوان صدقوا !!!! وقعدوا يقولوا لي شوفتي مش قولنالك للأسف فهمتي متأخر أوي هههههههههههه . 

*  الإخوة اللي بيقولوا البلد بتولع والناس بتموت في بعضيها بسببكم وبسبب كلامكم ، اوك .. انتوا عقلاء ، ماشي 
انتوا الصح .. تمام .. احنا اغبيا واللي بيصدقنا غبي ويستاهل اللي يجراله بقى .. زعلانين علينا لييييييييييه ؟؟ 
لو سكتت مش هتخسر لكن احنا لو سكتنا هنخسر


* ناس متخيلة إني موقفي دا موقف عناد وخلاص وإني ما فكرتش مليون مرة قبل ما أصر عليه ، أقسم بالله إني فكرت مليون مرة وحطيت كل المعطيات قدامي ، لقيت العقل بيقول نستمر ، وأفعال الحكومة بتقول إنها كدابة ، وقرارتهم متضاربة ، ولما استخرت ربنا ودعيته يبين لي الصح من الغلط لقيت ربنا بيفتح عيني على حاجات كتيرة زي الزفت مبارك عملها .. حسيت ربنا بيقول لي دي حقيقته 


* اللي بيقولوا عايزين الاستقرار دول هو كان فين الاستقرار ؟؟ دا كان ذل مش استقرار بأمارة قانون الطوارئ لو هو شايف ان البلد مستقرة كان ساب قانون الطوارئ ليه ؟ 
- قولوا لي بقى سايبه افترا ، يا اما قولوا مافيش استقرار هاااااا الاجابة  انهي فيهم ؟؟؟

* يوم ثورة تونس قولت احنا عندنا المعارضة رغم انها كتير بس مش بتنجح لأنها مش معارضة حقيقية وكنت متوقعة لو حصل ثورة في مصر بالمعارضة مش هتنجح ، وفعلاً .. اللي نجح الثورة دي انها كانت معتمدة على الشباب مش على المعارضة ولما بدأت تنجح المعارضة انضمت لها واتمسحت فيها . 


* من الغباء إننا نقبل بوضع سيء خوفاً من إن اللي جاي يكون اسوأ خاصة ان في احتمال انه يكون أحسن ، محتاجين شوية إيمان بنفسنا شوية .. بكرة لو حلو حلو بسببنا لو وحش وحش بسببنا ، يبقى نعمل اللي علينا ونتوكل على الله على الأقل علشان ما نحسش اننا قصرنا وكل حاجة نصيب وقدر . 

* الإخوة اللي بيقولوا دي كلها مؤامرات خارجية عايزة تضرب استقرار مصر 
على إيه يا حسرة ؟؟ علشان مصر بقت متقدمة جداً على إيد مبارك فخايفين منها ؟
ولا علشان مصر بقت قوية جداً إقتصادياً وسياسياً ومن كل النواحي في عهد مبارك فهم خايفين منها ؟؟
ولا علشان مصر عندها نووي وخايفين منه ؟ ولا إيه ؟؟
قول لي سبب واحد يخليهم يخافوا من مصر بالوضع اللي كانت عليه واللي كانت رايحة ليه ؟


* اللي خايفين من إن الإخوان يحكموا مصر لو حسني مبارك مشي اتطمنوا .. الإخوان مش هيحكموا مصر لأن مش الإخوان هم اللي عملوا الثورة . 

* ماحدش هيقدر يستعبدنا تاني ولا يستغفلنا أياً كان ، لو جابوا  يهودي مسك الحكم مش هيعرف يستعبدنا لأننا خلاص رافضين العبودية
في مقولة بتقول " لا يستطيع أحد أن يمتطي ظهرك إلا إذا كنت منحني " 

* مبارك مش عايز يقعد الــ 6 شهور دول علشان سواد عنينا .. أي بني آدم عادي مش واحد عمل عمايله دي كلها ولقى حد رفضه عمره ما هيعديهاله وعمره ما هيفكر في حاجة غير انه ينتقم من اللي فضحه ورفضه .. طبيعة بشرية يا جماعة ومبارك مش ملاك !
مبارك عايز يقعد الـــ 6 شهور دول علشان يطلع عيننا ويسيب لنا واحد مكانه أنيل منه . 

* اللي حصل دا غير نظرة العالم كله لجيل كامل بجد ، انا قبل 25 يناير كنت بقول ان بلدي مافيهاش رجالة 
وإننا لو دخلنا حرب  هننهزم ، هم اقنعونا بكده همشونا لدرجة اننا فقدنا الثقة في نفسنا وفي جيلنا 
قعدوا يقولوا لنا بطلوا تحلموا ، إنسوا ، مش انتوا اللي هتغيروا الكون ، لكن اللي حصل بجد
إننا غيرنا ، وحلمنا قرب يتحقق ، وثقتنا بنفسنا رجعت 

انا حسيت بأمان لما شوفت كل الناس دي في التحرير وفي كل مصر ، حسيت ان مافيش حد يقدر يهزمنا في الكون كله 
لأننا إيد واحدة ..
وهو كمان فهم دا علشان كده فرقنا وخلانا مش إيد واحدة 

*  ناس كتير زعلت مني بسبب موقفي ، وناس كتير حطيتني في البلاك ليست لكن أنا مش زعلانة ، أقسم بالله إني ما حسيت إني بعمل حاجة إلا لما الناس بدات تعاديني .. 
ربنا العالم انا قد إيه كان نفسي أشارك في المظاهرات وما قدرتش ،  بس لما خسرت ناس كتير حسيت اني شاركت ، إني ضحيت في سبيل فكرة مؤمنة بيها ..
مش مهم غلط ولا صح بس المهم النية إيه 

* ناس كتير بتقول لي ما تنفخيش في قربة مخرومة وما تحاوليش تقنعي حد برأيك لأنهم مش هيقتنعوا ، ومعاهم حق
انا مش بكتب الكلام دا علشانهم ، انا بكتب الكلام دا علشان هو جوايا ونفسي أقول وعلشان ما ابقاش في نظر نفسي جبانة خايفة أعلن رأيي لحسن حد يزعل .

* الــ 11 يوم اللي فاتوا علموني أكتر من الــ 20 سنة اللي فاتت حاجات كتير اوي هقولها بعدين لما الغمة تنزاح 

* أرجوك لو انت شايف ان حال البلد واقف والبلد بتخسر ادخل هنا وعلى فكرة مصر كانت بتخسر بالبطيء أضعاف أضعاف اللي بتخسره دلوقتي .

* اللي بيقول كفاية علشان البلد بتخسر دا زي بالظبط اللي يكون في جسمه ورم هيقتله ومش عايز يستأصله علشان العملية الجراحية بتوجع ! 


هناك 3 تعليقات:

  1. سارة درويش..
    أعظم تحية لك صديقتي..
    فعلاً، انتي قدرتي تقولي اللي في قلبي بالظبط بأسلوب بسيط، منظم، ومقنع..

    برافو عليكي، وتسلم إيديكي :)

    ردحذف
  2. و يمكرون و يمكر الله و الله خير الماكرين "...(-_-)
    أنا كنت بحاول أفهم الوضع المعقد اللي حطنا فيه مبارك بخطابه الملتوي..

    - و أفهم نظرية الناس اللي بتطالب برحيل مبارك فورااا واللي كنت معاهم ...
    (( فلقيت المادة 82 و84 بتعارض برحيله تنفيذ مطالبنا ))..
    قلت لأ ميرحلش دلوقتي.........................................
    "لإن كل اللي يهمني تنفيذ مطالب الثورة اللي شاركنا كلنا فيها...... "

    - ((لكن رجعت لقيت المادة 139 بتقتضي إنه يفوض كل صلاحياته لسليمان
    " وهو مش موافق لحد دلوقتي والواضح عدم موافقته"))..
    واللي نادى بيها بيان لجنة الحكماء ......وده هو البيان ........
    http://www.shabab-masr.com/

    - و تمت حملة إعتقالات لنشطاء ميدان التحرير إنهاردة..
    ومتمش الإفراج عن المعتقلين وفي ناس مختفية لحد دلوقت ...

    - والناس بتطالب بالرحيل وهو رايح يجمع الوزراء ....
    ومش سائل فينا ولا في المحتجين في الميدان...
    ولا حتى عايز يقلهم هلغي قانون الطوارئ عشان يطمنهم على حياتهم...
    يبقى كده أثبت نيته ... "وأثبت إنه ناوي على الشر"....

    - ولما قدم إستقالته ...
    من رئاسة "فيران الحزب الوطني اللي عمره ما هيبقى حاكم"..
    الفيران اللي هو مربيبهم على إيده.....
    يبقى هو أنا ومن بعدي الطوفان..وعايز ينجي بنفسه وخلاص..
    وبيقنعنا بتغيير فات وقته ..................................

    - ولما حطلي "حسام بدراوي " أمين للحزب الوطني "..
    يبقى كإن مفيش ثورة و بيحاول يخدر عقول كمان ..
    عشان نعترف بشرعية حزب من أوله لآخره فاسد ومرفوض...

    - وهو أصلا متمسك بكام يوم ليه؟؟... وعارف إن بقائه بيزيد في الدم..؟؟؟
    "... ده حتى الملك فاروق قال..."
    (((ان نقطة دم مصريه أثمن عندي من كل عروش الدنيا ، والرحيل فورا أهون على قلبي من سفك دماء مصريه حفاظا على منصبي...))))

    - ولما رايح يتكلم "لقناة أجنبية "ويقول أنا عايز أمشي..
    بس خايف من الفوضى وإن الأخوان يمسكوها...
    وكإنه بيبعت رسالة لأمريكا ولكل الخارج عشان يقفوا معاه.....
    ومهمشنا ولا بيرد علينا...............................

    - وأخــــــيـــرااا وليس آخـــــــراااا....
    لو في أي نية إنه ناوي على تصليحات مش إنتقامات ..
    وإني ظالمة ومفترية للسيد الرئيس حسني مبارك...
    طيب ما يوضح نيته السليمة بكل شفافية ومن غير مراوغات...(*_*)

    واضح إنه شغال بثقافة " نسيبك تهبهب ومحدش هيرد عليك".....

    عشان كده.. هقول لأ.. ولأ للأبد .. وده قراري.....
    وكل اللي أنا عايزاه.....إن مصر هيا اللي تكسب....

    مهما اختلفت طريقتنا وتفكيرنا....كلنا مصرين وعايزين الخير لمصر..
    وبردو لازلنا كلنا بندعي............................
    "اللهم أرنا الحق حقاً ..وأرزقنا إتباعه.. وأرنا الباطل باطلاً.. وأرزقنا إجتنابه "

    ردحذف
  3. ياجماعة مبارك لم يلتوى ولم يتلاعب على احد

    اول شى انجازاتة واضحة كالشمس فى مصر بصرف النظر عن الاخطاء والكوارث الفادحة وعدم وجود رقابة ولا مسؤلية للحاشية الظالمة

    ثانى شى مبارك مش عيل دة راجل كبير فى السن ومش بس كدا لكنة راجل عسكرى ومش بس عسكرى دة طيار حربى يعنى امهر عقول فى الجيش المصرى لان الغلطة معاهم بماتش

    الراجل سياسى محنك وفاهم هو بيقول اية طلع علية شوية ناس من بتوع الفيس بوك وقالوله انزل يامبارك قالهم طيب هنزل بس مينفعش دلوقتى لان دلوقتى معناها كارثة


    اعتقد ان مبارك كحاكم استجاب لمطالبنا كشعب واتى الوقت اللى احنا فية كشعب ننتظر ونعطية فرصة الى ان ينهى الموضوع بدبلوماسيتة


    بس اتمنى ان ميجيش فى المستقبل ناس تبكى على رحيلة

    قائد جديد ممكن يدخلنا حرب بمنتهى السهولة او ازمة مع الدول الكبرى او ازمات اقتصادية متوالية

    معنى دة ان فى اجيال هتضيع اما فى الحرب او الخوف من الحرب او الفقر وسوء الحال

    والله المعين

    ردحذف

Say something...