لعلمك

لعلمك

إقرأ لي

دخلوا بكليك شمال :D

Blog Archive

الجمعة، مارس 04، 2011

postheadericon مرارتي مجدداً :|

أولاً بعتذر عن الغياب دا كله بس كان غياب لدواعي صحفية وإن شاء الله أما الشغل اللي عملته في فترة الغياب دي ينزل يعجبكم

البوست دا عبارة عن كام نقطة كده هتشل لو ما قولتهمش ، بقالي كتيييييييير من ساعة ما مبارك تنحى عمالة اسمع وما اتكلمش اسمع وما اتكلمش بس امبارح اما اتفرجت على مصر النهاردة ماقدرتش امسك نفسي أكتر من كده .

- أول حاجة خطرت في بالي وانا بتفرج على مصر النهاردة هي إن " ديل الكلب عمره ما يتعدل " نفس الأصوات اللي كانت بتتكلم تشتم على المتظاهرين ، بنفس الأسماء ونفس التون لسة بتتكلم .. امبارح كل المكالمات كانت ضد شباب التحرير لحد ما تامر أمين قال إيه دا هو مافيش حد غير ضد راح بقدرة قااااااااااادر اتصلوا الناس اللي بتأيد التحرير !!! 

- رداً على اللي بيقولوا إن الثوار كانوا بيشتكوا من غياب الديموقراطية ومن ديكتاتورية مبارك ، ودلوقتي هم نفسهم ديكتاتوريين ومش بيسمعوا آراء أي حد مخالفهم في الرأي ، وأي حد يخالفهم بيخونوه  وإلخ إلخ إلخ ..

أولاً :  كل اللي شوفتهم بيختلفوا مع شباب التحرير واترد عليهم وحش او ماحدش اتقبل كلامهم كانوا بادئين كلامهم بقلة أدب 
إما " على الله تهمدوا بقى "  أو " انتوا عيال مش فاهمين حاجة " أو " خربتوها واستريحتوا "  
بالذمة دول يترد عليهم بأدب إزاي أو حتى نسمع باقي كلامهم ازاي ؟؟؟؟؟؟؟؟

ثانياً : هم أصلاً بيبدأوا اتهامهم بتخوين فمستنين إيه من اللي بيسمعهم ؟؟؟؟؟

ثالثاً : ماشوفتش حد بيختلف مع أي حد من شباب التحرير أو مؤيدي الثورة باحترام  و حد رد عليه وحش
إزاي يعني حد يبقى بيكلمك بأدب وتقوم انت تشتمه ! مش منطقية 

- ملحوظة انا قولت ما شوفتش ما قولتش ما حصلش ، انا بتكلم عن اللي حصل قدامي - 

- بيقولوا إن الشرطة غايبة بسبب اللي واقفين في التحرير ، ودا مش صحيح ، الشرطة غايبة بسبب عمايلهم السودا اللي خلت كل الناس مش متقبلاهم ولا عايزاهم ، الشرطة غايبة لأنهم خايفين لأنهم عارفين إن اللي غلط فيهم ما اتحاسبش ، وبالتالي بعض الناس عايزين ينتقموا من أي حد لابس شرطة علشان هم حاسين ان ماحدش بيجيب لهم حقهم .

- اللي بيقولوا احنا نفتح صفحة جديدة مع الشرطة علشان نشجعهم ينزلوا !!!!! ياحلاوة
يعني حد غلط وضربك ، ومستخبي منك علشان غلط وخايف لحسن انت تاخد حقك يقوم الناس بدل ما يجيبوا حقك يقولولك روح اعتذر له وكلمه كويس علشان ينزل ! أي منطق بيقول كده ؟؟؟؟؟؟
وبعدين حلوة دي ، يعني الشرطة ممكن تيجي يوم تقولك لأ انا مش هنزل أصل في حرامية في الشارع وممكن يضربونا !


- اللي بيقولوا اللي واقفين في التحرير معطلين مصالحنا ومش عارفين نروح شغلنا ممكن أفهم ليه ؟؟
هي مصر كلها بقى شغلها في مجمع التحرير مثلاً ؟؟ وبعدين التجمعات الكبيرة بتبقى يوم الجمعة كل مصر بقت تشتغل الجمعة ولا ايه ؟
وبعدين شغل إيه اللي معطلينهم عنه ، معطلينهم عن تقميع البامية في المكاتب ؟ ولا عن الفطار ؟ ولا عن النوم على المكتب ولا عن الرغي ؟
بلاش نضحك على بعض 3/4 موظفين الحكومة ما بيعملوش أكتر من كده خاصة اللي في وظائف إدارية .


- اللي بيقولوا المطالب سقفها بيعلى ومافيش حاجة عاجبة حد من اللي في التحرير ، الكلمة دي بشبه عليها من أيام ما كنا بنقول حسني يمشي :D
الفكرة ان الناس متخيلة إن الناس اللي في التحرير فاضية جداً لدرجة انهم " بيتسلوا " بالتظاهر !
يا جماعة من بعد ما الناس ماتت والمطالب واحدة انتوا اللي ما كنتوش بتركزوا ، كنتوا بتسمعوا كلمة حسني يمشي يغمى عليكوا تقريباً !

والمطالب مش تعجيزية ، المطالب منطقية جداً ماينفعش مثلاً نقول احنا هنعمل بلد ديموقراطي وهنطلق الحريات وجهاز أمن الدولة موجود بكم الناس السادية اللي فيه دي ! ما ينفعش 
لما هي هتبقى ديموقراطية سايبينه ليييييه ؟ علشان نخوف بيه الأطفال اللي ما تغسلش سنانها قبل ما تنام مثلاً ولا إيه ؟
ماينفعش نبقى بنتكلم في فساد مجلس الشعب ونقول هنمسك فتحي سرور مستشفى السرطان !!!!
دا اسمه تهريج 


- واحدة امبارح اتصلت تقول ماحدش بيسمع طلبات حد إلا طلبات بتوع التحرير وزعلانة أوي ، أقولك أنا ليه يا افندم
علشان اللي في التحرير دول ضحوا بأرواحهم وبعنيهم وبمستقبلهم علشان يقولوا رأيهم وعلشان يغيروا البلد في حين انتي كنت قاعدة في البيت متغطية ودفيانة وبتقولي يااااااااااي ازاي يقولوا كده على بابا حسني .

علشان اللي في التحرير دول معاهم حق في طلباتهم مش عايزين البلد تواصل نومها في العسل 


- أنا ذُهلت بجد من كم الناس اللي لسة عندها شك في إن شباب التحرير دول بوظوا البلد 
مش عارفة ازاي بعد كل ملفات الفساد دي ما انكشفت لسة ليهم عين يدافعوا عن مبارك ونظامه !!!!!
بجد حاجة آخر استفزاز
كل يوم بيثبت إن كل يوم كان حسني ونظامه فيه في السلطة كانوا بيطمسوا جرائم بالهبل عملوها وكانوا بيهربوا ناس وفلوس وكانوا بيزرعوا الفتنة والناس لسة بتقول ما استنوش عليه ليه 

- الناس اللي زعلانة على الفريق احمد شفيق وبيقولوا ما اديتوهوش فرصة 
ممكن أفهم عمل ايه في الـ 33 يوم اللي قعدهم ؟؟  جايب وزرا أجاااااااارك الله ومحتفظ بوزراء مستفزين جداً للرأي العام ومش كفء مثلاً علشان نقول في مبرر للمحافظة عليهم
واحد زي احمد ابو الغيط دا اللي كل تصريحاته مافيهاش أدنى قدر من السياسة ولا اللياقة ، و اهماله للمصريين اللي جايين من ليبيا وعالقين على الحدود 
دا كفاية انه لسة معلق صورة حسني مبارك في مكتبه زي ما يكون بيقول لنا بكل وضوح .. غيروا زي ما انتوا عايزين انا مش هتغير !

- الناس مقهورة أوي كأن اللي مسك رئاسة الوزراء واحد حرامي مثلاً !
الراجل شكله محترم جداً ومواقفه معروفة من قبل الثورة وفي عز جبروت مبارك كان بيقول للفساد لأ ، زعلانين ليه ؟
بيفكروني بالظبط بالناس اللي بتزعل لما حد يكنس شارعها وينضفه  !

بيقولوا احمد شفيق محترم بس ما اخدش فرصته ، خلاص ربنا يعوض عليه والأيام أكيد لو هو محترم هتثبت دا
لكن اللي جه مش وحش يعني الدنيا بتتطور للأحسن يبقى ما نزعلش ونكرر نفس الخطأ وهو الارتباط بأشخاص مش بأفعال وتصرفات ! 

- خيرت الشاطر طلع امبارح كنت فرحانة له جداً لحد ما عك في الكلام وقال إن الإخوان دورهم كان كبير في الثورة بس هم ما بيحبوش يتكلموا ويعملوا زي الشباب اللي مالهمش أي لازمة اللي طلعوا قالوا احنا مفجرين الثورة وهم كانوا في بيوتهم وقت ما مبارك تنحى 
بجد نزل من نظري جداً ساعتها  ، موضوع الاخوان دا هتكلم فيه بعدين بس عايزة اقوله يا خيرت بانت لبتك وخسرت كتير بالكلمتين دول
مش علشان وائل غنيم لكن علشان الأسلوب الرخيص دا في الكلام 
وياريت كمال علشان التذكير ندخل اللينك دا

وقال العريان في تصريحات خاصة للدستور الأصلي عدم المشاركة إلي أن الدعوة لتلك المظاهرة دعوة عامة خارجة من الفضاء الإلكتروني وبالتالي فهي مواجهة لكل مواطن في هذا المجتمع وقال أن أفراد الإخوان جزء من الشارع المصري ولهم حق المشاركة من عدمه وفق ما يترأ لهم  و لكن في الوقت ذاته لن تشارك الجماعة كقوي سياسية أو هيئة سياسية لأن المشاركة تحتاج إلي تخطيط واتفاق بين كافة القوي السياسية قبل النزول إلي الشارع.


6 بوينتس أوف فيو:

محمد محمود عمارة يقول...

و الله يا أخت سارة أنا زيك مكتفي بالقراءة و الاستماع ، لكن الفرق بيني و بينك انك كونت وجهة نظر أما أنا فما زلت محتار و لا زلت غير قادر على الاستيعاب و الفهم ، فحين أقرأ وجهة نظر الفرقاء أجد كل فريق على حق و كل فريق له وجهة نظر معتبرة خصوصاً إذا كانت مدعومة بالدليل العقلي و المنطقي .
الخلاف ظاهرة صحية و كذلك خوفنا كلنا على مصر مشروع ، لكن نحتاج إلى الصوت الهادي و العقل الواعي و الثقة المتبادلة فيما بيننا للوصول إلى نقطة لقاء نستطيع أن ننطلق منها للوصول بمصر إلى بر الأمان.
تقبلي تحياتي

أسرار النــدى ,,, يقول...

مقالك في حجات كتيييير كنت عايزة أقولها...
بس زي ما بتقولي كده....اليومين دول الواحد مشغول في إنه يركز ويسمع أكتر ما بيقول......

عن نفسي................
من كتر ما سمعت.....
بقى دلوقتي الكلام مش سهل يتقال...ولازمله خطط...

أنا مع إختلاف وجهات النظر لانه طبيعي...
بس مش مع تقفيل المخ بالضبةوالمفتاح ....

الناس بقيت أية وجهة نظر بتسمعها مخالفة لرأيها ..لازم تتهمها بالغباء السياسي وأنهم مش فاهمين ومبوظين البلد....

أنا منساش لما كنت في التحرير ....
ومروحة خلاص ...فعديت على محل في الطريق بشتري منه حاجة....
وكنت لسه معايا علم مصر وباين إني كنت في الميدان ...
فراح الراجل قعد يقلنا والله اللي زيكوا اللي موقفين حالنا وبسببكوا ببيع بالرخيص و..و....و.....

إستفزازي وصل بيا من طريقته لدرجة إني عملت نفسي مسمعتش ودفعت الفلوس ومشيت من غير ولا كلمة............

بس من اليوم ده وأنا أخدت قرار إني هقول رأيي السياسي في كل مكان من غير ما يهمني حد....

واللي هيبدأ كلامه بكلمة (اللي زيكم)....
.يبقى ميستحقش الرد يا سارة ولا يستحق إني أوضحله أي حاجة غير لما يفتح بمفتاحه القفل اللي مركبه على دماغه.......

اللي عنده رغبة يفهم ويشيل القفل..هو ده اللي يستحق نتعب عشانه ونحاول نفهمه وجهة نظرنا لاننا عارفين انه حتى لو مقتنعش....يبقى هيحترمنا في الآخر...

في ناس شايفة ان الأولى نعمر محافظتنا ونجملها ونشوف شغلنا ....ومعاهم حق...
وفي ناس شايفة انه لازم يحافظ على مطالب الثورة ويبقى في ميدان التحرير ...وبردو معاهم حق

مدام كلنا همنا بلدنا وبس...

ويشرفني إني من مشاركين شباب التحرير ومش مهم آراء حد....

والثورة مش التحريرو بس..........

كل واحد في محافظته لازم يبدأ يشتغل ....

والحمد لله أنا بدأت في محافظتي تنسيق حملة وعي سياسي للي عايز يكسر القفل ويفهم وبعد كده ياخد قراره......

وعي عام بكل مجريات الأحداث....

وعي بالانتخبات البرلمانية والرئاسية ومواد الدستور والتشكيل الحكومي....

وعي عشان نفهم الأول قبل ما ناخد القرار .............


واهم حاجة بعد ما ناخد القرار.....
نحترم بعض في إختلافتنا .....

ويارب يقدرك يا سارة في مهمتك ويقدرنا في مهمتنا...........

لإن مصر هتبقى أحسن بولادها اللي بيصنعوا مستقبلهم بإيدهم بتوفيق ربنا سبحانه....

ورقـة وقلم يقول...

انا مع حضرتك في كل الكلام اللي حضرتك قولتيه ماعدا النقطة الاخيرة بتاعت خيرت الشاطر
انا سمعته وشايف ان كلامه مظبوط جدا...قال احنا كان لينا دور وفعلا كان للاخوان دور كبير وفي شهداء من الاخوان كمان
وقال بس احنا مش بنتصدر المشهد يعني مش احنا اللي فجرنا الثورة ولا احنا اللي قودناها لكننا كنا مشاركين فيها كأي فرد في الشعب وده الكلام اللي قاله كل قيادات الاخوان للرد علي كلام الناس
يعني مينفعش اننا نقول انهم مشاركوش ولا ينفع اننا نقول انهم هم اللي صنعوا او قادوا الثورة

ورقـة وقلم يقول...

الكلام اللي في اللينك ده مش مظبوط ...والدكتور عصام العريان رد عليه..الدكتور عصام لم يقل لن نشارك...هو سمح لشباب الاخوان بانهم يشاركوا من اول يوم..والدكتور محمد البلتاجي لم يغادر ميدان التحرير من يوم25حتي انتهاء الثورة ...وفي اليوم الثاني كان قرار الجماعة بالمشاركة الرسمية لجميع افراد الجماعة
يعني يوم25 كانت مشاركة لكنها غير رسمية اما باقي الايام فهي مشاركة رسمية...بالرغم من ان قيادات الاخوان تم استدعائها قبل الثورة وتحذيرها من المشاركة فيها من قبل امن الدولة

وده كان من باب الانصاف للاخوان

أبو كريم يقول...

معاكى حق يا ساره فكل كلمه

بس الى فارسنى انا بجد ان الناس قامت بثوره ومات فيها اولادهم واخواتهم ومعنى كلمه ثوره نفسها تغيير الى قبلها مش هيبقى زى الى بعدها ... الوشوش معظمها هى هى فالتليفزيون وخصوصا مصطفى الفقى وتامر أمين.... وإلخ إلخ

وقياسا ع التليفزيون بقى حاجات كتير

حلم بيعافر يقول...

يعنى انت عايزة بتوع اشاعات الكنتاكى واليوروهات ربنا يهديهم فجاة كده؟!!!


احنا لسه يااااما هنسمنع ونعانى منهم

المتابعون

اعتبرها بيتك ♥

وِش القفص

خليك ورايا

دليفري..