2011-03-19

ما ينفعش


اللي حصل النهاردة  في الاستفتاء وقبله أثبت إنه فعلاً ماينفعش تحصل انتخابات برلمانية دلوقتي ولا رئاسية

التهريج والهبل اللي حصل وتزوير إرادة الشعب باسم الدين دا أثبت اننا محتاجين وقت قبل ما نعمل أي انتخابات لو احنا عايزنها فعلاً نزيهة .

ومش بقول ما ينفعش لأن الشعب مش مستعد للديموقراطية لأ ، الشعب النهاردة  كله لما لبى النداء وراح الاستفتاء اثبت انه جدير بالديموقراطية ، ولكن ماينفعش لأن لسة في فئات فاكرة إنها من حقها تفكر بالنيابة عن الناس وتفرض قرارها عليهم .

لازم نوعي الناس البسيطة ، أهل الريف والمناطق العشوائية ، وحتى أهالي المدن البسطاء 

نروح لهم شغلهم ، نروح لهم بيوتهم ، نروح لهم أي مكان بس لازم نوعيهم

لازم نعلمهم إن ما ينفعش حد ياخد القرار بدالك ، ما ينفعش حد   يخوفك وبعد ما يخوفك يقولك اختار 

لازم نوعيهم علشان لما  يكونوا رايحين اللجنة وبيسألوا ندخل نعمل إيه يقولولوهم في دايرة خضرا علموا عليها واخرجوا يبقوا فاهمين إن دا غلط ومش صح

ما ينفعش 

ماينفعش ندفن راسنا في الرمل ونقول ما حصلش حاجة ، لأ حصل ، النهاردة أثبتوا فعلاً إنه مش بالبلطجية بس بتتزور إرادة الشعب 

ماينفعش حد يقول إن علشان كل علماء ومشايخ الأمة اختاروا اختيار معين في قرار " سياسي " مش ديني يبقى كل اللي يخالف الاختيار دا مش مسلم وكافر

دا حتى في أمور الدين بيبقى في اختلاف وربنا قال إن في اختلافهم رحمة لكن هم عايزين يخلوا الاختلاف جحيم

النهاردة : عايزة أرفع القبعة لشعب مصر كله اللي أثبت إنه يستحق الحرية ، والديموقراطية ، للراجل العجوز اللي ما كانش قادر ينزل السلم ورغم كده راح يقول رأيه .

لكن في نفس الوقت عايزة ارفع إيدي في وش كل واحد فاكر نفسه  وَصي على عقولنا واختياراتنا واقوله ستوب .. احنا خلعنا مبارك علشان عمل كده ، مش هنسمح لحد تاني إنه يعمل كده

الكلام دا ماينفعش

هناك 4 تعليقات:

  1. عندك حق يا سارة

    بجد اللي حصل دة مهزلة
    لسة في ناس عايشة بعقلية ما قبل الثورة
    عايزة تملي الناس يقولوا ايه وما يقولوش ايه

    عندنا كان في عربيات بتنادي بميكروفونات في الشوارع

    "نقول نعم"

    بصرف النظر عن ان اللي قال نعم او لا وجهة نظرة منطقية ولها احترامها

    لكن كل واحد حر في اختياراته

    لو حد عايز يقول للناس حاجة

    فما يزودش عن انه يشرح لهم التعديلات والمترتب على كل راي

    بكل حيادية وموضوعية

    ولهم حرية الاختيار ما بينهم ومابين صناديق الادلاء بالصوت

    فعلا احنا محتاجين وقت عشان ننشر الوعي

    ونتعلم نتصرف تصرفات تليق بعهد الحرية الجديد

    ردحذف
  2. سارة العسولة
    شوفى يا كتكوتى
    الناس بقى عندها وعى غير عادى الناس عرفت دول ودول وفهمت واللى كان مضحوك عليه فهم وعرف ده مين وده مين وهدفه ايه
    والله العظيم ناس بسيطة جدا لا ليهم فى اخوان ولا غيره نزلت وقالت نعم وفى ناس لا ليهم فى برادعى ولا قابلينه اصلا نزلوا وقالوا لا
    الاعلام اهبل وعبيط فاكر ان ترويج الافكار العبيطة هتحقق لهم مصداقية نو نيفر الناس اذكى مما هما متخيلين


    المشاركة نفسها اللى حصلت دى غير عادية
    والدى شارك فى الاستفتاء انتى مش متخيله فرحتنا كلنا قد ايه
    بابا عنده 58سنة عمره فى حياته ابدا ماشارك فى انتخابات من اى نوع
    انتى مش متخيلة
    انا نفسى عندى 33سنة وعمرى ما اشتركت الا فى انتخابات امين الفصل لحد 3ثانوى انتخابات الجامعة عمرى ما اشتركت فيها رغم ان اعز زمايلى كانوا بيبقوا مرشحين فيها وكنت اقولهم انا هدعيلكم دى مشاركتى

    المشكلة حبيبتى انك متعرفيش ايه الجهة اللى ممكن الواحد يلجألها علشان التوعية دى وان الواحد يشارك مجانا فى الحملات دى بس بشرط متبقاش تحت لواء حزب معين احنا بالصلاة ع النبى كده كارهينهم كلهم التخبط اللى كانوا فيه اول ايام الثورة مخيف دول اللى هيبقوا مسئولين عن مصر اشك جدا
    ممكن اكتب لك 10صفحات بلا كلل او ملل لكن عارفة وقتك ضيق سامحينى طولت عليكى
    مع السلامة يا حبيبتى

    ردحذف
  3. بالفعل ديه مهزلة

    بس بينت لينا اننا قصرنا
    دورنا كفاهمين
    اننا نفهم الناس..
    كان لازم نتحرك اكتر
    ونفهم الناس باختصار ليه تقول ككده وليه تقول كده
    ونسبلهم حرية الاختيار
    الشعب لسه مش ناضج سياسيا وطيب بيتضحك عليه..وخاصة لو حاجة مرتبطة بالدين مبنتأخرش

    ردحذف
  4. مبروك على مصر الحرية ومستهل طريق الديموقراطية

    يجب أن تتوحد صفوفنا ونترك قدر الإمكان أي خلافات قد تفرق بيننا وتشق وحدتنا

    وألا ننساق وراء الإشاعات ، بل نتحقق من أي شيء قبل أن يكون لنا عليه ردة فعل إيجابية أو سلبية

    ويجب أن تكون وجهتنا جميعا كمصريين بمختلف عقائدنا وفكرنا إلى النهضة بمصر وبناء مصر والرقي بشعب مصر

    وأن نتعلم ممارسة الديموقراطية التي طالما طلبناها وحاربنا لأجلها ومتنا على أعتابها

    ولا مانع من أن يشرح كل وجهة نظره ويدعو إليها ،، لا تكمن المشكلة هنا .. بل تكمن المشكلة في أنه على كل فرد أن يحفظ عقله من الانسياق وراء أي شيء دون إعمال عقله

    والتصويت بـ(نعم) هو قرار الشعب المصري
    قمن المستحيل أن يصوت 14000000 بدون اقتناع

    أشكرك شكرا جزيلا
    أعجبت كثيرا بروايتيك
    - حكايا السمراء
    - ومشاعر مرهقة

    فهما من أروع ما قرأت ولكنهما يدميان القلب

    ردحذف

Say something...