2011-04-11

مِن حَقي


- خواطر على هامش كتاب المرأة في الفكرة العربي الحديث - 

- رأيي في الكتاب ، وعرض سريع للكتاب هنا :

* من حقي إني ما اعلقش كل أحلامي وطموحاتي وحياتي وسعادتي على " زوج " احتمال يجي واحتمال ما يجيش ، علشان ما انتحرش لما ما يجيش بما إن كل فايدتي في الحياة إني أكون " زوجة " 

* من حقي إني استخدم عقلي بما إن ربنا خلقهولي ، ما اعتمدتش على عقل الرجل وألغي عقلي ، لأن الله لا يخلق شيئاً عبثاً ، فلو ربنا ما كانش عايزني استخدم عقلي ماكانش خلقني بعقل .

* من حقي إنك تحترمني وما تقولش عليا " مخلوق درجة تانية " و" أقل من الرجل " لأن لو ربنا خلقني أقل منك ، وعايزك تعاملني كأني " أنثى " مش كـ " بشر " ماكانش سمانا كلنا " بشر "  .

* من حقي إني أشوف الدنيا وأجربها لأن ربنا ما خلقش الدنيا دي كلها لمجرد إني اشوف منها جدران بيتي ! 

* من حقي إني أحافظ بنفسي على نفسي ، وادافع بنفسي عن نفسي ، من حقي أتعلم زيي زيك ، من حقي أتربى زيي زيك  ، من حقي أعتمد على نفسي زيي زيك .


* من حقي إني اتصرف بناءً على إرادتي أنا بما إن ربنا هيحاسبني أنا على تصرفاتي مش إنتَ !

* من حقي أقرر لنفسي ، واختار لنفسي حياتي ، شغلي ، تعليمي ، زوجي .. بما إن أنا اللي هعيش كل الحاجات دي مش إنتَ . 


حاجات كتير من حقي وانتَ واخدها مني ، باسم الدين وباسم المجتمع وباسم الحب وباسم الخوف عليا 

لكن كل دا كذب ، انت بتعمل كل دا لمجرد إنك عايز تسيطر عليا وبس .. ومن النهاردة مش هسمح لك بدا ! 

انا عارفة حقوقي ، ومش هتنازل عنها 


                                                                                                                  

رسالة على لسان أنثى شرقية اكتشفت فجأة إن الأنثى أيضاً بشر ! 


هناك 6 تعليقات:

  1. أنا موافقك ..
    بس في إطار ديني .

    ردحذف
  2. ما هو دى حياتى وماينفعش ابقى كومبارس صامت فيها !!

    مش عارفة سمعتيها ولا لا .. بس هاتعجبك D:

    http://www.youtube.com/watch?v=So-T2KYwoA0

    ردحذف
  3. كنت بقول الكلام ده لواحدة زميلتى من فترة..أرفع لك القبعة :D

    ردحذف
  4. أول مرة أزور مدونتك القيمة .. تهنئتي لك على المجهود المبذول والرائع..

    ردحذف
  5. أتفق مع كلامك كله و احييكى عليه
    للأسف معظم رجالنا يتخذون الدين ذريعة لقهر المرأة
    إحنا مش مخلوقات ناقصة أو عاجزة
    و الوقت جه عشان المعاملة دى تنتهى

    أحييكى يا عزيزتى

    ردحذف
  6. وَأنـآ عَندِي حَقْ .. :D

    شَكلِي هقرأ الكِتاب دَه .. :):)

    ردحذف

Say something...