2011-06-21

لو دخلت السجن هيجي لي القلب !

" لو دخلت السجن هيجي لي القلب ! "
مش لأن المصائب لا تأتي فرادى ، ولا لأن قليل البخت يلاقي العضم في الكرشة خاااااااااالص .. لكن لأني  بعبقريتي الفذة اللي مالهاش مثيل وانا صغيرة كان ليا 3 أمنيات أغرب من بعض .. لدرجة إني بدعي ربنا بيهم  !
الأولانية : إني يحبني شاعر :D 
مالها دي ؟ حلوة شغالة زي الفل .. خش على التانية بقى .
إني يجي لي القلب :D
اللي بعده ...
إني أدخل السجن 

أنا عن نفسي مستغربة الأمنيات العجيبة دي ازاي طفلة تفكر فيها أساساً !!!!!
ولحد دلوقتي مرعوبة لحسن الأمنيات دي تتحقق بما إني كنت طفلة وبريئة بقى وقلبي أبيض فممكن ربنا يتقبل مني 
بس أنا كان ليا وجهة نظر على فكرة من الأمنيات الـ 3 دول :)

الأولى ، إنه نظراً لتواضعي المعهود :D .. كان نفسي يحبني شاعر علشان يقعد يكتب فيا شعر بقى وحركات 

التانية ، كنت دايماً أشوف في الأفلام أي حد عنده القلب أول ما يرفضوا له طلب أو يزعلوه يقول قلبي قلبي ويتشنج - وغالباً كان بيبقى يوسف وهبي - يقوموا يعملوا له كل اللي هو عاوزه .. فكان بالنسبة لي مرض القلب دا هو خاتم سليمان أو مصباح علاء الدين :D

التالتة بقى .. لحد دلوقتي مش قادرة افهم السبب اللي خلاني اتمناها !!! أنا أساساً انسانة ما بتكرهش حاجة قد احساس الحبسة أو القيد .. فاازاي كنت نفسي أدخل السجن مش عارفة !!!

لما كبرت بقى ، وافتكرت الـ 3 دعوات دول بقيت كل ما ادعي ربنا أدعيه انهم ما يتحققوش !

وكل ما ربنا يحقق لي أمنية من أمنيات الطفولة .. بطني تكركب  ، بقيت كل ما اجي أطلب من ربنا حاجة معينة أتردد ،  وافتكر المصايب الثلاثة :D

وادعي ربنا بدل أي حاجة إنه يعمل لي اللي فيه الخير ،   بقيت بشكر ربنا على الأمنيات اللي اتحققت .. وأشكره أكتر على اللي ما اتحققوش :D