2011-06-21

لو دخلت السجن هيجي لي القلب !

" لو دخلت السجن هيجي لي القلب ! "
مش لأن المصائب لا تأتي فرادى ، ولا لأن قليل البخت يلاقي العضم في الكرشة خاااااااااالص .. لكن لأني  بعبقريتي الفذة اللي مالهاش مثيل وانا صغيرة كان ليا 3 أمنيات أغرب من بعض .. لدرجة إني بدعي ربنا بيهم  !
الأولانية : إني يحبني شاعر :D 
مالها دي ؟ حلوة شغالة زي الفل .. خش على التانية بقى .
إني يجي لي القلب :D
اللي بعده ...
إني أدخل السجن 

أنا عن نفسي مستغربة الأمنيات العجيبة دي ازاي طفلة تفكر فيها أساساً !!!!!
ولحد دلوقتي مرعوبة لحسن الأمنيات دي تتحقق بما إني كنت طفلة وبريئة بقى وقلبي أبيض فممكن ربنا يتقبل مني 
بس أنا كان ليا وجهة نظر على فكرة من الأمنيات الـ 3 دول :)

الأولى ، إنه نظراً لتواضعي المعهود :D .. كان نفسي يحبني شاعر علشان يقعد يكتب فيا شعر بقى وحركات 

التانية ، كنت دايماً أشوف في الأفلام أي حد عنده القلب أول ما يرفضوا له طلب أو يزعلوه يقول قلبي قلبي ويتشنج - وغالباً كان بيبقى يوسف وهبي - يقوموا يعملوا له كل اللي هو عاوزه .. فكان بالنسبة لي مرض القلب دا هو خاتم سليمان أو مصباح علاء الدين :D

التالتة بقى .. لحد دلوقتي مش قادرة افهم السبب اللي خلاني اتمناها !!! أنا أساساً انسانة ما بتكرهش حاجة قد احساس الحبسة أو القيد .. فاازاي كنت نفسي أدخل السجن مش عارفة !!!

لما كبرت بقى ، وافتكرت الـ 3 دعوات دول بقيت كل ما ادعي ربنا أدعيه انهم ما يتحققوش !

وكل ما ربنا يحقق لي أمنية من أمنيات الطفولة .. بطني تكركب  ، بقيت كل ما اجي أطلب من ربنا حاجة معينة أتردد ،  وافتكر المصايب الثلاثة :D

وادعي ربنا بدل أي حاجة إنه يعمل لي اللي فيه الخير ،   بقيت بشكر ربنا على الأمنيات اللي اتحققت .. وأشكره أكتر على اللي ما اتحققوش :D

هناك 6 تعليقات:

  1. هههههههههههه
    من ناحية امنيه الفلب دي ... انا وانا صغير كنت بامثل على اهلى وفاكر انهم هيصدقوني باني هاموت لو ما حققلوش حاجه .. تقريباً كده التليفزيون حببنا فى مرض القلب
    لكن فعلا ليه السجن ربنا يبعد عنك كل شر يارب

    ردحذف
  2. احم احم
    سلامو عليكو

    ازيك يا سارة
    فينك من زمان نورتي البلوجر تاني

    علي فكرة انا كمان كان عندي امنيه من النوع ده وهي دخول السجن بس مش السجن بقي هي دخول المعتقل
    لاني كان عندي يقين تام وانا صغير ان اي حد وطني جدا وبيحب مصر جدا لازم يدخل المعتقل جدا

    عموما ربنا يوفقك ويحميكي من كل شر

    سلامو عليكو

    ردحذف
  3. هههههههههههه ...
    الثلاثة اغرب من بعض صراحة ..

    ردحذف
  4. كان عندي مشكلة مع بلوجر وكان مانعني اعلق عن الناس...!!
    تفتكري لو عملت تمثيلية (اه..اه..قلبي..) وكده يعني كان ها يسمح لي..؟؟


    صباحك مسك وعنبر يا سارورة (';')

    ردحذف
  5. شوفي ياستي دي تفسيرها بسيط...كان نفسك تبقى رئيسة جمهورية وبما ان ده مش ممكن لا للرجال ولا للبنات قلتي كده عشان الناس ما تتضحكشي عليكي....الشاعر هما رؤساء تحرير الاهرام والاخبار الاول شاعر الصور التعبيرية والتاني شاعر طشة الملوخية...اما السجن والقلب طبعا بعد عمر طويل يعني قولي تلاتين سنة ح نعمل ثورة عليكي وندخلك السجن واول ما تخشي السجن ح تستموتي وتقولى اه يا قلبي اه ياقلبي..اي خدمة عندك حاجة تاني نفسرها

    ردحذف
  6. أزيك يا سارة (:

    هههههههههه

    الأمنيات دى حدث بالفعل بجد (:

    الحمد لله على كل شيىء

    ................

    سلامنا لأختنا الغاليه منى درويش

    و كل سنةو هى طيبة

    و ياريت توصللها ان الغياب طول قوى

    http://www.youtube.com/watch?v=XIb5xO3BmUI

    ربنا يحقق كل ما تتمناه (:

    ردحذف

Say something...