2011-09-26

Back To School


  كنا قاعدين أنا واختي نسترجع ذكريات المدرسة ، فافتكرنا حصة " التعبير " اكتشفت إني كنت غبية جداً وضيعت طول سنين الدراسة فرصة ذهبية للتوفير ! بما إن كل سنة نفس المواضيع هي هي ، أول حصة تعبير عن 6 أكتوبر وبعدين أعياد الطفولة باين و عيد الفطر والأضحى والعيد القومي لمحافظة الغربية و يوم ما ما يكونش في مناسبة .. يبقى عن البطالة ! مثلاً ..
فكرت أنا ليه بقى ما كنتش بحتفظ بكراسات التعبير القديمة ، وأول ما يجي الدور على موضوع تعبير منهم أنقله من هنا لهنا ؟ :D 
بعد ما الفكرة اتألوظت في دماغي أنا وأختي قررنا نبقى نعملها مع عيالنا :D 

  افتكرت بردو حصة الرسم ! كانت حصة تعبير بس بالرسم بقى .. تقريباً نفس فكرة موضوعات التعبير بنرسمها حسب المناسبة ، ولو ما فيش مناسبة بيقولولنا ارسموا عن السياحة أو رحلة المدرسة إلى زُحَل :D  أنا عمري ما طلعت رحلة مع المدرسة أصلاً فكنت بحتاس حوسة منيلة في الموضوع دا ! 


الفنان حمزة نمرة ، كتب على حسابه الشخصي على تويتر : على فكرة أنا شايل جامد من التعليم المصري..ومش مسامح في كل كراسة سهرت أجلّدها بدون سبب واضح..ومش مسامح في كل حصة ألعاب ضيعها أستاذ مكسل ينزل
و مش مسامح في أوضة الكمبيوتر اللي متقفلة بالحديد ومحدش بيخشها...كمان مرة مش مسامح في أوضة الكمبيوتر اللي متقفلة بالحديد ومحدش بيخشها
و مش مسامح الدكتور اللي فرض علينا نشتري كتابه..ومش مسامح البني آدم اللي اخترع العلامة المائية على الورق..فيه معيد كان حاطط لنا رجل فرخة
ومش مسامح في مشرف الدور اللي لابس نضارة شمس ومربّي شنبه وماسك خرطوم وطايح في العيال..عامللي فيها أمن دولة
و مش مسامح في كل مدرس ضربني بالقلم على وشي أياً كان خطئي
و مش مسامح في أوضة الكمبيوتر اللي متقفلة بالحديد ومحدش بيخشها...كمان مرة مش مسامح في أوضة الكمبيوتر اللي متقفلة بالحديد ومحدش بيخشها .
 وانطلقت ابداااااعات المصريين على تويتر .. بتقول كل الجرائم اللي ارتكبها التعليم المصري في حقنا ممكن تقرأوها هنا 

ومن  هنا أنا حابة أقول كذا حاجة :

- مش مسامحة في كل حصة المدرسة أجبرتنا اننا نغمض عنينا وننام على الدرج علشان ما نسمعش الدرس اللي هي بتديه للعيال اللي بياخدوا عندها مجموعة ! في حصتنا !!

- مش مسامحة مدرس العربي - رغم انه مات - في المجلة اللي كنت عاملاها وانا في 4 ابتدائي واخدها مني ما رجعهاش !

- مش مسامحة نفس المدرس في تريقته عليا وتقليله من موهبتي لما عرف إني بحاول اكتب قصص رغم انه كان ممكن يشجعني ويخليني بني آدمة أحسن .

- مش مسامحة مدرس العربي التاني اللي ضربني وهزأني واتهمني إني سارقة موضوع التعبير من البنت اللي قالت نفس الموضوع في الإذاعة المدرسية ! وماكلفش خاطره ياخد باله إني أنا نفسي اللي كنت واقفة أقوله في الإذاعة !!

- مش مسامحة مدرس الرياضيات اللي هزأني علشان جبت درجة وحشة من غير ما يفكر إن دا حصل علشان نظري كان ضعيف وماشوفتش المسألة صح !

- مش مسامحة في كل اللي اتعمل فيا في سنين الدراسة السودا من اضطهاد مدرسين علشان ما باخدش عندهم درس ، ومن تعليمي حاجات غلط ، ومن السخرية مني لما اسألهم في حاجة أو اقترح اقتراح .


بالرغم من كل الحاجات الوحشة دي ، وَحشِتني المدرسة ! ووَحَشِتني الكلية ! و - تخيلوا - وَحشِتني المذاكرة !!!! رغم إني ما كنتش بذاكر غير قبل الامتحان ..

إنها لعنة  حنين سبتمبر من كل عام !

هناك 13 تعليقًا:

  1. ماشي ياستي
    عشان انا مدرس بقي فانا هدافع شوية عنهم
    طب وليه بنجيب سيرة الوحشين بس
    ليه بننسي اصلا اللي خلونا نقرا وغيرنا عايشين في الجهل
    اللي علمونا ازاي نفكر وازاي نتكلم وازاي نبقي بني ادمين
    انا لغايى النهاردة فاكرهم مدرس مدرس كل واحد باسمه وباللي عمله معايا
    كل فئة فيها الكويس والوحش ياساره
    بس احنا اليومين دول بقينا بنتصيد لبعض
    فرصة

    ردحذف
  2. طيب يا سارة انا مش مسامحة فى حاجات كتيييير قوى حصلتلى من اول اولى ابتدائى لحد الجامعة متعديهاش اصلا

    لكن اللى مش مسامحة فيه بجد كل الاخطاء والمشاكل والبلاوى اللى فى التعليم دلوقت
    علشان ولادى حبايبى
    وكل طفل معاهم فى المدرسة اللى هم مستقبلنا
    حسبنا الله ونعم الوكيل

    ردحذف
  3. بوستك حلو اوي يا بنوته يا هايله انتي
    وفكرتيني انا كمان بالمدرسة والمذكره والكليه كانت ايام حلوه اوي ينقصها فعلا ضمير المدرسين والدكاتره اللي كان احيانا غايب ودلوقتي الا ايه عاملين اضراب مش كفايه الدروس اللي بيدوها
    سبحان الله
    تقبلي مروري يا قمر

    ردحذف
  4. الله عليكِ رجعتيني لايام زمااااان
    على فكرة احلى ايام تعليم كانت في ابتدائي احلى مردسين
    وانا كنت شاطرة في كل المواد وخاصاً التعبير ما عدا الرياضة مشكلة حياتي للان

    اشكر ا/ صبحي على اول قلم واخر قلم اخدته في حياتي رغم اني الوحيدة اللي في الفصل اللي اتسألت واضربت بالقلم لما معرفتش لانه مكنش متوقع اني معرفش الاجابة .. وكل الفصل اضرب على ايديه .

    شكراً استاذ محمد هاشم انك زعلت لزميلتي اللي كانت بتتريق على تخني

    شكراً ميس ماري على حبك ليا وحنيتك عليا

    شكراً ميس ناريمان امي التانية

    ابلة صباح انا زعلانة منك كل مرة ومن اول حصة عقدتيني من الحساب وده خلاني لحد الان اجمع على ايديا ههههه انتي بجد عقدتيني كل حصة تقوميني وتقوليلي مكونات العدد اتين ايه وانا لسة طفلة
    صغنونة معرفش يعني ايه كلمة مكونات دي
    كل يوم كل يوم كل يوم لما زهقتيني في عيشتي يا شيخة (:

    بلوم ميس مريان لاني كنت عاااااشقة للكمياء ولله الحمد هي عقدتني منها واستغلت سرحي في الفصل لثانية وقامت حرجتني قدام البنات فخلتني اعتزل حصصها ومدخلش علمي بسببها رغم ان اجمل المواد اللي كنت بحبها في ابتدائي واعدادي العلوم وكنت بجيب فيها اعلى الدرجات

    بلوم مدرسة الاشغال كان نفسي اتعلم تريكو وكروشية واشغال يدوية لاني بحبها جداً بس سيادتك كنتي بتقعدي في الحصة تشغلي شغلك انتي وبس وكتر غيابك اثر فيا للأسف اسأتي للنقاب اللي كنتِ لابساه لانه مأمركيش بكدا
    فاكرة لما ميس ماري علمتنا مبادئ عمل التريكو وانتي جيتي زعقتلنا!!! بعد مزعقتلنا سيادتك عملتي ايه؟ علمتينا؟ ولا كالعادة اهملتينا

    شكراً ابلة ناريمان وانتِ عارفة ليه... كفاية في حصة التدبير المنزلي خلتينا نشتغل بأيدينا وللاسف الحصة انتهت وطلعنا فصلنا اثريتي اننا ننزل تاني بعد ما استأذنتي من مدرس حصتنا عشان ناكل اللي صنعته ايدينا كان ممكن تفرقيه على المدرسين لكن ضميرك هو اللي حركك... لسة فاكرة وشك المنور بعد لبسك للخمار ... قمرة في قلبي قبل عنيا (: بحبك.

    ابلة رجاء شكرااااااااا نميتي فيا الخيال وحب القصص والمغامرات ونميتي فيا حتة رومانسية لم ادركها الا حينما كبرت لسة فاكرة الشاطر حسن
    وسنو وايت وست الحسن والجمال ... ماما كانت في البيت بتكمل رسالتك معايا ورسمتولي احلى خيال (:

    لولا

    ردحذف
  5. على فكرة انا بموت في موزة الحبوبة من عالم قصص ماجد

    لولا

    ردحذف
  6. كل مره بدخل فيها مدونتك هقولك مدونتك رائعه فى كل حاجه ..
    والبوست رائع من هنا لحد فيييييين .لحد الدائرى ..
    انا مش مسامحه كل المدرسين من اول ماقولت يامدرسه لحد ماتخرجت ...
    وانا كمان المدرسه وحششششششتنى

    ردحذف
  7. المقال حلو طبعا :)
    بس عايزة أقولك على حاجة..اما بتحطى لينك نرجع له فى التدوينة، ببقى عايزة أفتحه فى نفس اللحظة اللى بقرا فيها الكلام..لكن انتى كل مرة بتطلعى لى لسانك و تقولى "هش من هنا يا حرامى "..:)
    ممكن تحاولى تعدلى الحكاية دى؟ :)

    ردحذف
  8. ياااااه احنا كلنا عندنا ذكريات حلوة وصعبة فى المدرسة واكيد عندنا كمان ناس كتير مش هانحب نسامحهم.. بس لو شوفنا كمان نفسينا بعد التخرج والعمل والدنيا اللى فوق دماغنا يجوز كمان مش نقدر نسامح نفسينا.. انا باتفق مع اول تعليق اننا نحاول نتمسك بالجزء الجميل من الصورة ونحاول نتسامح مع باقى الصورة.. موضوعك حلو اوى .. تقبلى مرورى

    ردحذف
  9. لو ع الكلية
    فأنا واحشاني مووووووووووووت من أول ما بدأت آخر 5 دقايق من آخر امتحان في آخر تيرم في آخر سنة
    ^ـ^
    لكن المدرسة
    آدينا خلصنا و دخلناها من تاني لكن برضه مش مسامحة ناس كتيره - حتى من زميلاتي نفسهن
    و أغنية نمرة بجد
    التعليم في مصر كله
    أجنبي بقى مصري أوروبي أمريكي
    كله في من الفصيلة المعقدة إياها
    و الأجانب بيتعدوا
    و سلامي للتعليم
    و بلغوه شوقي ليه بعد 10 سنين كده و للا حاجة
    ^ـ^

    ردحذف
  10. بوست تحفة جداً على فكرة...لكن برضه ممكن نقول إن مش كل المدرسين وحشين..بس ساعات بحس إنهم ممكن يكونوا بتوع كلام شوية بالرغم من إني للأسف ممكن أكون منهم ^^"
    بس مرة مدرس عربي علشان أعربت جملة صح قالي إنه هيديني درجة العربي كاملة واللي ماحدش بياخدها(بس في الآخر ما أخدتهاش برضه ^^!)
    وفي مدرس عربي برضه قال عليا مبهرة^_^ الحاجات دي كانت بتسعدني بالرغم برضه من إني كنت فاشلة في الرياضة ودايماً المدرسين كانوا بيدوني درجات وحشة..يلا بقى الله يسامحهم..بس برضه وحشوني كلهم جداً ونفسي أرجع لأيام المدرسة وفي نفس الوقت نفسي أيام الكلية تبقى أحلى وبدعي ربنا من قلبي إني أكتشف سها الحقيقية أكتر من كده وأكتشف ايه اللي بتحبه واللي مش بتحبه(شوية لسعان)
    بس أعتقد إن ممكن يبقى في في الكلية وقت إني أكتب حاجات زي دي وأتعرف على نفسي أكتر شوية :)

    ردحذف
  11. والله انتِ عندك حق في حاجات قلتيها حلوة جداً لكن برضة ما نقدرش نقول إن كل المدرسين وحشين..خلينا نفتكر لهم الحاجات الكويسة برضه...أنا مثلاً مدرس عربي في الإعدادي قالي إنه هيديني درجة العربي كاملة لمجرد إني أعربت جملة صح...بس للأسف نقصت درجة في الآخر^^"
    ومرة كمان مدرس عربي برضه بس في الثانوي قالي إني مبهرة علشان بجاوب بسرعة أو حاجة زي كده...
    وبرضه ممكن نقول إني ياما نقصت درجات بالهبل في الرياضة بس مش بسبب المدرس ده لأني كنت فاشلة فشل السنين في الرياضة وعمري ما حبيتها للأسف...ما علينا...
    عايزة أقول إني نفسي أرجع لأيام المدرسة تاني بالرغم من إن أدامي حياة جامعية بس يا رب أكون مبسوطة فيها وعلى فكرة بعمل مدونة بس لسه ما كتبتش فيها ولا كلمة^^.....بوست حلو جداً يا سارورة

    ردحذف
  12. شكلك بتدعبسي كتير
    أنا قلت أشكرك :)

    عشان خلتيني أكتب

    ردحذف
  13. شكلك بتدعبسي كتير
    أنا قلت أشكرك :)

    عشان خلتيني أكتب

    ردحذف

Say something...