2011-09-11

أنا ابني هيبقى عيل هفأ ؟


في جلسة صراحة مع النفس كده اكتشفت إن كل القطط الذكور اللي ربيتها في حياتي طِلعِت هفأ!
بتخاف من الحشرات ، والفيران ، وأي قطة ممكن تضربهم عادي من غير ما يقدروا يقولوا لهم تلت التلاتة كام .
رغم إني ما بقصرش معاهم والله ، بخليهم يخربشوني ويعضوني في مناورات يومية علشان يبقوا جامدين جداً وماحدش يقدر عليهم .
في لحظة صراحة أعمق في نفس الجلسة اكتشفت إن المشكلة هي إني دايماً موجودة جنبهم ! كل ما حاجة تيجي تقرب منهم علشان تؤذيهم بدافع عنهم بدالهم .. قل ما قطة تعمل تسلل وتيجي تضربهم أهشها أنا واحضنهم وادلعهم واطبطب عليهم ولا كأن حاجة حصلت .
دار قدام عيني زي شريط السينما كده نظرات كل القطط المعتدية وأنا بطردهم وهم بيبصوا لقططي في عنيهم بكل جبروت وسخرية وحقد طبقي وعينيهم بتقول " ماااااااشي يا ابن امك ! "
اكتشفت اني بدمرهم لأن مهما علمتهم يدافعوا عن نفسهم ويتدربوا فيا ويخربشوني هم من جواهم مش حاسين بالخطر بالتالي قلبهم مش بيجمد .. لكن ضرب الغريب وأذاه هو اللي بيعَلِم بجد وبيقوي فعلاً . الإحساس بإننا بنواجه الخطر لوحدنا فعلاً واحنا متأكدين إن مافيش حد قريب هيجي يحمينا بيخلينا نستميت في الدفاع عن نفسنا وبالتالي مرة ورا التانية بنبقى أجمد .
وبناء عليه قررت إني ما اتدخلش أبداً لو حسيت ان في قطة بتضرب قطتي ، وهجمد قلبي واسيبهم يعتمدوا على نفسهم و ....... ايه دا ؟ القط بيصوت ! في حد بيضربه  .... جاااااااااااااية لك يا ضنايا

هششششششششش يا متشرد يا مفتري ياااااااااا .....

مافوقتش غير على نظرة " مااااااااشي يا ابن امك "

:( مافيش فايدة .. أنا أم هفأ وعيالي هيبقوا هفأ :|

هناك 5 تعليقات:

  1. حاولى تتفرجى على مسلسل " لن اعيش ى جلباب ابى " عشان قلب القطط يجمد شوية ,
    :D

    ردحذف
  2. حلوة اوى فكرة الموضوع
    ونظرة منطقية

    ردحذف
  3. ههههههههههههههههههه
    والله إنك لمسخرة :D
    أقولك ايه يا شيخة
    حاسة انى همشى ف الشارع احس ان فى قط بيعاكسنى وساعتها هقول "قط مش متربى " :S

    عجبتنى الفكرة .. تسلم الدماغ النيرة ;)

    ردحذف
  4. هههههههههههه ...
    فكرتيني بمدحت ... ده القط الشيرازي بتاع اختي الصغيرة طالعه خايبه زيك
    على طول سايباه يخربشها ويمرمطها وتدافع عنه دايماً ضد قطط الشارع.
    بس فعلاً احلى حاجه لما نشوف حاجه في حياتنا ونفكر فيها بالنظرة دي

    ردحذف
  5. حلوه اوي الجو داااااا دي قطط عسولة اوي

    ردحذف

Say something...