2011-09-19

بَعدَك على بالي


بَعدَك على بالي ...

عارِف إني مش قادرة أنتمي لأي حاجة بعدك ؟ 
أو .. يمكن خايفة !
خايفة أنتمي لحاجة بعدك وأحس إنها مني ولما تروح أتوِجع نَفس الوجع تاني !
كل الحاجات بعدك بِتخونني .. لكن إنت لأ .. لأنك كنت مِني .. مني أنا .

********

بَعدِك على بالي .. 

مِش ناسية هَمي بيكِ .. صحيح مش زي زمان فاكراكي 24 ساعة بس بتيجي على بالي .
وبتمنى إن بكرة بتاعك يكون أحلى ، وتفرحي ، وتتطمني ، وما تتوجعيش أبداً تاني .


********

بَعدَك على بالي ...

مش ناسية فضلك عليا ، ونِفسي أدور عليك ، والاقيك .. وأفرحك بيا 
وأقولك إن تَعبَك في مساعدتي ما راحش هَدَر وإني نِفسي جداً أرد الجميل بأي طريقة .

********
بَعده على بالي ... 

وبفتكره كل ما أشوفك ! وعلشان كده .. حتى كلمة " صباح الخير " أتقل على قلبي من جدار ! 
مِش عارفة .. هقدر إمتى أنسى اللي عملته دا ! يمكن لما الاقيلك عُذر ؟ 
هو أصلاً ممكن حاجة في الدنيا تبرره ؟ 

********

بَعدها على بالي .. 

ومِش هنساها أبداً .. حتى لو ما قدرتش أحققها / أعيشها دلوقتي ، مش هنساها 
وواثقة إنه هيجي اليوم وتبقى حقيقة . حقيقة حِلوة أوي .
وعارفة إنها مش هتبقى حقيقة منها لنفسها كده ، وإني لازم أتعب لها .. علشان كده بتعب لها .

********

بَعدي .. على بالي !!



هناك 7 تعليقات:

  1. جميل يا سارة ... اتمنى لكي دوام التوفيق.

    ردحذف
  2. السلام عليكم
    ازيك يا سارة
    ماشاء الله المدونة جميلة جدا وتحفة بجد
    واسلوبك حلو اوي
    يمكن انا مرضتش اكمل البوست خوفا انه يلمس معايا لاني مينفعش اقرا اي حاجه زي كدا الايام دي خالص
    المهم لي عندك طلب صغير اوي ياريت بجد تطمنيني علي منونه بجد والله انا قلقان عليها جدا
    يارب تكون بخير
    وتحياتي ليكم

    ردحذف
  3. من اجمل ماغنت فيروز

    والبوست من اجمل ماقريت النهاردة

    ردحذف
  4. بوست جامد اوى .. حسيت معاه انى فصلت من الدنيا وعيشت احساسك فى كل كلمة وطبعا مش انكر الاحساس بفيروز وانا بقراه.. شكرا ليكى على جمال الروح وسمو المشاعر اللى وجدناه فى بوستك

    ردحذف
  5. مريحه الفضفضه جدا

    ربنا يريح بالك

    ردحذف
  6. كتبت كام تعليق ومسحتهم
    المهم صباحك فل باذن الله

    ردحذف
  7. يااااااااه

    سمو ا|لأميرة

    وحشااااااااااانى بجد كتير مدونتك

    وكلماتك الحلوة

    الا قوليلى بصحيح

    هو كل ده على الموبايل وبو الموبايل وام الموبايل اللى انتى حاطة صورته ده


    ــــــــــــــــــــ

    احيانا الذكريات تكون هى العلامات الفارقة فى حياتنا لأن حياتنا كلها بتتحول واحنا عايشينها لذكريات

    ردحذف

Say something...