لعلمك

لعلمك

إقرأ لي

دخلوا بكليك شمال :D

Blog Archive

الأحد، أكتوبر 02، 2011

postheadericon عن الحياة بمنطق الكعب العالي / الكوتش



بقالي فترة مشغولة بالفكرة دي ، فكرة إنه زي ما في ناس بتحب تلبس كعب عالي وناس بتحب تلبس كوتشيات ( احذية رياضية ) 
في ناس عايشة حياتها بمنطق مشابه . 
بمعنى : الناس اللي بتلبس كعب عالي رغم إنه متعب في المشي ، وبيوجع الضهر وبيسبب مشاكل صحية 
إلا إنها بتحبه لأنه بيدي مظهر شيك وحلو .. في ناس عايشة كده بردو  ، بأفكار تاعباها ، و حاجات مضايقاها إلا إنها متمسكة بيها لأنها مخلية " شكلهم حلو ، وشيك " .

أما الناس اللي بتلبس أحذية رياضية ، فهي بتدور على راحتها  ، ومش مهم مظهرها ، ولا رأي الناس فيها 
المهم إنها " مرتاحة كده " ، بردو في ناس عايشة بالمنطق دا 
بتتصرف بالطريقة اللي تريحها واللي شايفاها أنسب ليها ، ومش مهم دا شكله حلو ولا وحش المهم إنه مريحهم وهم مقتنعين بيه !

وفي ناس عايشة بمنطق وسطي ، في مناسبات تعيش بمنطق الكعب العالي ومناسبات تانية تعيش بمنطق الأحذية الرياضية !
ودول في رأيي - على الرغم من انهم كسبانين أكتر - بس مش متصالحين مع نفسهم .
لأنهم مشغولين بمظهرهم ورأي الناس فيهم وفي نفس الوقت مشغولين براحتهم فبالتالي مش قادرين يستريحوا !
لا هم قرروا يكونوا من ذوي الكعب العالي ، فيتعودوا على كده ويتأقلموا عليه ، ولا هم قرروا يبقوا من ذوي الأحذية الرياضية فيرتاحوا للأبد .

في ناس تانية بتمسك العصاية من النص بطريقة تانية ، بتختار حاجات مش بكعب عالي لكن في الوقت نفسه مش أحذية رياضية ، أي نعم مش مريحة زي الأحذية الرياضية بس مش متعبة زي الكعب العالي ، وبيتعايشوا بالمنطق دا في كل حياتهم ، بيضحوا بقدر قليل من راحتهم في مقابل إن شكلهم يبقى إلى حد ما مقبول وما عليهوش تعليقات ، وغالباً هم بيبقوا مش مميزين .. ماعندهمش استعداد لدفع ضريبة التميز ، لا في الشكل ولا في المضمون . 



13 بوينتس أوف فيو:

Timo.. يقول...

suuuper like
تقسيمة حلوة جدا يا سارورة..
:)

عمرو يسرى يقول...

تقسيمه حلوه بس الناس الاخرنين دول بقى يبقوا اللى بيلبسوا احذيه كلاسيك ولا ايه

sabry abo-omar يقول...

جميل اوى البوست دة ودمه خفيف فعلا.. كل واحد ليه وجهة نظره أكيد وظروفه فى شكله وشغله كمان.. المهم تقبلى مرورى وتحياتى

مدونة رحلة حياه يقول...

السلام عليكم
بوست مختلف وفيه شوية فكر
دومتى بخير

هِـبَـةُ الله يقول...

الله ينور عليك ِ

:)

هِـبَـةُ الله يقول...

الله ينور عليكِ :)

Hebдshí يقول...

حلو أوي ~ بس أنتي نسيتي أن في ناس مش بخيارها الخاص تختار بتلبس أيه ,
يعني مثلاً في اللي مُرغمـ أن يلبس كدا في رجلو - سواء مرغم لأن دا هو بس المتوفر قدامو
ولا مرغم من حد

beautiful mind يقول...

كلام جميل
ومنظق يحترم
انتي وصلتي الفكره بابسط طريقه
بس انتي لما شرحتي كل نوع
عرفت نفسي انهي نوع فيهم
تحياتي

Sara يقول...

جميلة التشبيهات :)

و إن كنت لا أوافق على أغلبها ^^

أحمد الصعيدي يقول...

حقيقة أنا لم اعتن بوجه الحذاء ولا حتي خصره

فقط أردت أن أسجل إعجابي يصفحتك الخاصة علي الفيس بوك

أسعدك الله

ريري كربكه يقول...

بصي يا قمر انا ليه راي
المفروض من وجه نظري اني كل خروجه وليها نوع معين من الجزم
يعني مثلا لو انتي راحه مناسبه فرح اكيد هتلبس كعب عالي
ولو راحه النادي اكيد هتلبسي كونشي
ومش ممكن يحصل العكس
عموما البوست حلو اوي وبيعرض وجهات نظر
دمتي بخير يا قمر

عرفة فاروق عبد لله يقول...

الظاهر كدة والله واعلم

ان مصر كلها كعب عالى

كل اللى يعجبك والبس اللى يعجب الناس


مثل مصرى

غير معرف يقول...

حلوة بجد ...بس النوع التالت بيكون غصب عنهم اكيد :(

المتابعون

اعتبرها بيتك ♥

وِش القفص

خليك ورايا

دليفري..