لعلمك

لعلمك

إقرأ لي

دخلوا بكليك شمال :D

Blog Archive

الأربعاء، نوفمبر 02، 2011

postheadericon عن علاء الذي لم أعرفه !

من كام يوم لقيت الناس بتتكلم عن " علاء وبهاء  " جالهم استدعاء من النيابة العسكرية للتحقيق ومتهمين في " احداث ماسبيرو " 
انا ما اعرفش بهاء ، ولا كنت اعرف علاء بس عرفت من خلال تويتر انه هو دا اليوزر اللي انا متابعاه من زمان اسمه علاء . 
عرفت انه مسافر ، قلت دا من حسن حظه ! لكن فوجئت إنه رجع مصر بسرعة علشان يروح يقدم نفسه للنيابة العسكرية .
مين علاء دا ؟ علاء عبد الفتاح . طيب ربنا معاه ، كل اللي اعرفه عنه من متابعتي لـ تويتر انه شخص محترم .
تاني يوم لقيت الناس بتقول " علاء سيف " وانه اخد 15 يوم حبس احتياطي لأنه رفض يجاوب على اسئلة التحقيق لأنه " شخص مدني " وحقه إنه يتحقق معاه من جهة مدنية مش عسكرية ، وقال كمان في التحقيق ما ينفعش الجيش يحقق معايا وهو أصلاً متهم في الأحداث دي وطرف فيها فازاي يحقق !
استغربت الموقف بس عجبني جداً ، ماكنتش فاهمة أبعاده .. ماكنتش عارفة انه عمل كده علشان يقول لكل مصري انت من حقك ترفض محاكمتك عسكرياً ! عرفت كمان انه كان ممكن جداً يطلع منها زي الشعرة من العجينة لو جاوب على الاستجواب لأن التهم واهية ! 
عرفت كمان إنه أخو  " منى سيف " البنت اللي عاجباني من وقت ما عرفت عن حملتها " لا للمحاكمات العسكرية " ، وعن وقوفها جنب أي حد تشوفه مظلوم من غير ما حتى يطلب مساعدتها ! واللي حكت سبب خوضها معركة " لا للمحاكمات العسكرية " وحسيت من خلال حكايتها قد ايه هي انسانة .
بعدين عرفت إن اسرته كلها اسرة بجد مشرفة ، عايشين عشان يخدموا الناس بجد ومش عايزين من حد مقابل ، لا بنشوفهم كل يوم في التليفزيون ولا في الجرايد ولا بيتكبروا على خلق الله ويمنوا عليهم انهم بيساعدوا الناس لوجه الله ! 
وبعد دا كله .. فوجئت بالتعليقات المكتوبة ضده على كل حاجة تتعمل لمساندته 
أقرب مثال الصورة دي : 

المقصود من الكلام إن علاء بيقول ما تفكروش فيا لوحدي أنا في زيي 15 ألف مصري بيتحاكموا عسكرياً 
بصوا الكومنت دا : " ده عبيط ده ولاايه ولاقصده انهم ميلشيات مسلحه حاتدافع عنه واعتقد ان ده قصده" 
!!!!!!!!!!!!!!

ايه العدائية الفظيعة دي ؟!! ايه سوء الظن دا ؟ لييييه ؟ دا اللي خرب البلد بجد وسرقها ونهبها وقتل ولادها بتقعدوا تلتمسوا له مليون عذر ! 

التعليقات بقى على مقال نوارة نجم عن علاء اللي هنا  كمية شماتة وغل لا يمكن حد يتخيلهم ! ليه ؟؟
 بيقولوا هو كل من هب ودب و " لا عمرنا سمعنا عنه " يطلع يقول لنا انا ناشط !!
يعني هو ذنبه إنه كان مخلص لمبادئه وبيشتغل في صمت من غير ما يمن علينا باللي بيعمله ؟ ذنبه انه كان بيشتغل ما بيتكلمش ؟؟ ذنبه إنه كان " محترم " رفض يشارك في مارثون الفضائيات اللي مش محترم ؟؟ !

قاعدين يقولوا كافر ، ملحد ، فاجر ، أخلاقه بايظة إلخ إلخ إلخ !! طيب هل هو قدام المحكمة العسكرية عشان كده ؟؟
كل واحد فينا عامل بلاوي متلتلة وربنا ساتر عليه ، و3 /4 الشباب اصلاً بيعملوا حاجات ربنا ما يرضاش عنهم هل نحبسهم كلهم بقى ونعدمهم عشان اخلاقهم بايظة ؟؟
اللي بيتكلموا دول اصلاً تلاقيهم حاطين صور بروفايلات سافلة ، وكل همهم يتعرفوا على بنات
واللي مش باين منهم بيعمل في الخفاء ما هو ألعن مليون مرة من اللي بيتهم علاء بيه
هل لأنك مثلاً بتسمع أغاني ، بتكلم بنات كلام سافل ، بتتفرج على افلام سافلة ، بتعاكس بنات في الشارع  يبقى حلال فيك إن حد يتهمك بجريمة قتل مثلاً !!!!!!
ياريت كل واحد عارف نفسه كويس ، يسأل نفسه السؤال دا
نقطة تانية .. ما تعيبش أوي كده وتفضح في الناس وتتهمهم بالباطل انت لسة العمر قدامك طويل ومش ضامن هتموت مسلم ولا هتموت كافر ! كلنا قلوبنا بين ايدين ربنا بيقلبها كيفما شاء والمفروض بدل ما نشتم في الناس ونرضى بظلمهم ونشمت فيهم باسم الدين .. ندعي لهم بالهداية وندعي ربنا يثبتنا .. ويسترنا ويهدينا ويجنبنا اننا نرتكب ذنوب .
حساب كل واحد عند ربنا ، واللي بيحاكموا علاء مش أشرف منه مثلاً ! - دا على فرض انه زي ما هم بيقولوا - 
بالمناسبة ياريت تقروا الكلام دا  نقلاً عن أميرة محمد محمد محمد
 صديقي الشامت في علاء سيف عبدالفتاح بحجة إنه شيوعي ملحد شرير يريد الإيقاع بيننا و بين جيشنا العظيم ، أريد أن أذكر لك بعض المعلومات لعلها تفيدك في تحليلك :
هل تعلم أن والد علاء اسمه أحمد سيف الإسلام ، ألا يذكرك الإسم بأحد ؟ ، نعم هو ما جاء في بالك ، اسمه علي اسم ابن حسن البنا ، لأن جد علاء كان متعاطفا مع الإخوان علي الرغم من اختلافه أيدلوجيا معهم ، فسمي ابنه علي اسم ابن مؤسس جماعتهم .
هل تعلم صديقي الكريم أن والد علاء الحقوقي في مركز هشام مبارك كان هو و ابنه من أكثر الناس التي دعمت الإخوان المحالين للمحاكم العسكرية أيام مبارك .
هل تعلم أن علاء لم يفوت موقفا تضامنيا واحدا مع الإخوان أيام المحاكم العسكرية .
هل تعلم أنه كان يبحث عن حق سيد بلال أكثر من الإسلاميين أنفسهم  .
هل تعلم أنه كان من الذين صوتوا بنعم في الاستفتاء قناعة منه بأنه سيقبل بأي تيار يختاره الشعب و أنه لا يعتبر الإسلاميين بعبعا يجب الخوف منه مع اختلافه الجذري معهم .
صديقي  الشامت هل تعلم أننا نئن منذ 60عاما تحت حكم عسكري صرف و ليس تحت حكم شيوعي .
هل تعلم يا صديقي أن الذي قتل سيد قطب الإسلامي ، هو نفسه الذي قتل شهدي عطية الشيوعي و سبحان الله كان حاكما عسكريا .
هل تعلم أن زنازين تعذيب الإخوان كان بجانبها زنازين تعذيب الشيوعيين .
صديقي  الشامت هل تظن أن علاء يخيف الأمريكان أو العسكر أكثر منك ؟ هل تظن أنه لن يأتي الدور عليك لتقدم الأضحية ؟ ألا تعلم أن اللواء الرويني عضو المجلس كان رئيس الجهة التي تمضي علي قرار الإحالة للمحاكم العسكرية أيام مبارك ؟ هل تظن أنه سيتركك الآن ؟
صديقي الشامت ألم تعرف أن الشيخ صفوت حجازي و حافظ سلامة و الخضيري سيتم استدعائهم للنيابة بتهمة التحريض علي قتل المخلوع ؟
صديقي  الشامت إن كنت تريد أن تكون متعصبا لا تنصر الحق كما أمرك دينك ، فعلي الأقل لا تكن غبيا لأن الدور جاي عليك


انا ما بدافعش عن علاء عشان هو " علاء " انا بدافع عنه علشان المبدأ الغريب اللي منتشر بقاله فترة ، اللي بردو الناس بناء عليه فرطت في دم خالد سعيد على اعتبار انه حشاش وبتاع بنات كأن دا يبرر قتله ! يتهموا الناس بالباطل وبعدين يدينيهوم على أساس الباطل اللي هم اتهموه بيه دا !

بدافع عن علاء رغم إني ما اعرفوش .. بس يمكن لأنه بردو قضى عمره - ولسة هيقضيه - وهو بيدافع عن ناس ما يعرفهاش عشان بيدافع عن مبدأ وعن " انسان " ضد الظلم .. مش مهم عنده هو مين دا ولا بيعمل ايه المهم انه مظلوم وبس !

افتكروا دايماً القول المأثور دا " إنَّ اللَّهَ يُقِيمُ الدَّوْلَةَ الْعَادِلَةَ وَإِنْ كَانَتْ كَافِرَةً ؛ وَلَا يُقِيمُ الظَّالِمَةَ وَإِنْ كَانَتْ مُسْلِمَةً ."

وكل واحد قبل ما يتهم علاء يبص لنفسه ويشوف اللي عمله في حياته يرضي ربنا ولا لأ . وبدل ما يشتم علاء لأنه شايفه على ضلالة .. يدعي له .. اعتقد ان ديننا بيقول كده .. ولا ايه ؟؟ 

4 بوينتس أوف فيو:

safa7_karmooz يقول...

علاء ومنال من اوائل الناس اللى استخدموا بلوجر من مصر :D

iـــــــــــsــــــــــlــــــــــــaـــــــــm يقول...

معرفش ليه بنخون بعضنا بالشكل المريب ده
وليه كلنا شايفين عيوب غيرنا ومبنشفش غلط فى نفسنا

انا معرفش علاء ومقدرش ادى رأى بخصوصه وعشان كده مش مسموحلى انى انتقده والسلام

ليه بنحب نغلط بعض وخلاص

اسئلة كتيره اوى مصيرها مجهول لأننا بنشوف اللى عايزين نشوفه بس

تحياتى
كل سنه وانتى طيبة

أحمد فـــارس يقول...

ما فيش كلام يتقال اكتر من اللي قولتيه
غير ان الجهل و عدم المسئولية والخوف من الحرية اتزرع ومد جذوره في كل مصري على مدار عقود
زائد ان كل واحد عايز كل حاجه حوليه كويسه لكن غيره يعمله وهو بيتفرج

وبالنسبة للعب بأسم الدين فما أكثر منه في بلدنا والشئ الألعن
فين أثر الدين في حياتنا بجد لو كنا فعلاً مؤنين بجد

وهناك فرق شاسع بين من تملك الإسلام قلبه ومن تملك الإسلام بقلبه وعقله كأنه شئ خصوصي عشان خطره هوه بس كأن مفيش غيره هيخش الجنة واللي مش زيه رايح النار.
على اساس انه مش من البشر

علاء راجل وقلت الرجالة في بلدنا
عشان كده اللي بيهاجمه لأما مش فاهم لأما مش عارف يبقى راجل

Tarkieb يقول...

ده واحد ابن ناس ومحترم والله زينه الشباب
كل سنة وانت طيبة

المتابعون

اعتبرها بيتك ♥

وِش القفص

خليك ورايا

دليفري..