2011-01-27

وبعدين ؟

وبعدين يعني بعد ما الناس نزلت الشارع إيه اللي هيتغير ؟؟

- هتتغير أوضاعنا ، هتتغير الحكومة لو نجحنا ولو ما نجحناش أوي هتتغير اوضاعنا إلى حد ما 
أو على الأقل هنحس بكرامتنا واننا قولنا لأ ، وبدل ما كل واحد من الذل اللي شايفه في مجايب لقمة العيش بيروح يسود عيشة أهل بيته
اهو طلع غضبه في اللي كانوا السبب في كده 
وعلى الأقل الحكومة حست اننا مش نايمين في العسل ، وفاض بينا وهتحاول تلم نفسها شوية . 

طب حتى لو الحكومة اتغيرت انتي شايفة يعني ان في حد عِدل ينفع يمسك البلد ؟

- انا مش خبيرة في السياسة ولا معظم الناس البسيطة دي خبيرة في السياسة وعارفة هي عايزة مين 
بس على الأقل أي حد هيجي بعد كده هيكون عارف كويس ان الشعب مش هيسكت له لو عمل زي اللي قبله 
والشعب بعد ما داق طعم الثورة مش هيسلاها ووقت ما يحس بالظلم تاني هيعمل ثورة تانية وتالتة ورابعة لحد ما الحال ينعدل 

طب ولو حتى الحكومة كويسة ، فكرك يعني الشعب هينعدل حاله ؟
دا شعب اتعود  على الفساد والأنتخة والرشوة والفهلوة مش هيتغير ابداً ولا هتحوق فيه حكومة جديدة ولا يحزنون !

- لأ ، لو الحكومة كويسة فعلاً هتكون صارمة في تنفيذ القوانين ، ولو حتى الشعب استمر في فساده لكن لقى عقاب تدريجياً هينصلح حاله
دا غير إن المفروض دور الطبقة المثقفة بقى يشتغل ويوعي الناس بسلبياتهم ويخليهم يغيروها
ولما هيلاقوا ان التغيير مُجدي هيتغيروا بجد
لأن ربنا خلقنا كلنا على فطرة كويسة ولأنه هيلاقي بجد إن " الجريمة لا تفيد " 
والسبب أصلاً في فساد الشعب هو فساد حكومته وضياع حقه ، والذل والفقر اللي شايفه اللي بيقتل بقايا الضمير عنده 

طب والخسائر اللي حصلت في الممتلكات والأرواح دي .. مش حرام وخراب للبلد ؟

- الحدوتة زي الحرب ، هل ينفع ما نحاربش ونسترد كرامتنا وأرضنا علشان خايفين من الخراب ؟؟ 
كل حاجة ليها ضريبة ، والبلد كانت بتخرب كده كده
الناس اللي محلاتها اتكسرت تستعوض ربنا وتعتبر البلدية افترت عليها
والناس اللي انصابت وانضربت واللي ولادها ماتت تفتكر خالد سعيد وسيد بلال

" مين مآمن يمشي آمن " ؟

انت كنت ولازلت ممكن تكون ماشي في أمانة الله ويقابلك أمين شرطة مش عاجبه شكلك يمرمطك ومش هتعرف تجيب حقك 


كل حاجة ممكن تحصل لنا قدر 

كل حاجة مكتوب تحصل لنا هتحصل 

يبقى لازم نتحرك علشان نحس بكرامتنا

ونتوكل على الله 

وان شاء الله ربنا مش هيخذلنا


انتي ما نزلتيش ليه بدل ما انتي عمالة تتكلمي وبس ؟

- انا هموت وانزل بجد بس أهلي مش موافقين ، وربنا العالم انا لو في ايدي انزل كنت نزلت
نفسي أنول شرف اني اغير حاجة ، واكون وسط الناس دي واقول بعلو صوتي 
قوم يا مصري مصر دايماً بتناديك

- طب أنا كمان أهلي مش راضيين يخلوني انزل ومش عارف اشارك اعمل ايه ؟؟
/ انا برة مصر ومش عارف اشارك ازاي ؟

- تقدر تنشر الأخبار في كل مكان وتحمس الناس 

تقدر تعلن عن الناس اللي مستعدة تعالج الناس 

تقدر توصل رسايل الاستنجاد اللي بيبعتها المتظاهرين على تويتر وفيس بوك علشان اللي يقدر يساعد يساعد

كل ما تعرف معلومة جديدة تفيدهم قولها في كل مكان علشان تساعدهم

تقدر تحمس الناس علشان يشاركوا 

وتقدر تدعي ربنا يوفقهم وينصرهم وينصرنا جميعاً ويكتب الخير والسلامة لمصر

تقدر مهما كانت ظروفك تعمل حاجة... أرجوك اعمل حاجة

وبلاش تحبط الناس وتقولهم مافيش فايدة

 ربنا قال فيما معناه " لا ييأس من روح الله إلا القوم الكافرين "


___________________________

دي معظم الأسئلة اللي بتدور في بال ناس كتير رافضة 25 يناير

أو مترددة او مش عارفة هو دا صح ولا غلط

دي وجهة نظري والله اعلم بردو صح ولا غلط بس انا مؤمنة جداً بيها

لو لقيت في الكلام فايدة انشره علشان تقطع حيرة الناس وترددها

2011-01-24

شوية أفكار


د/ مصطفى محمود قال في اكتر من 

كتاب وأكتر من مقال إن المفروض اما 

حد يحب  حد ما يعتذرلوش ولا يشكره 

ولا الحاجات دي والعلاقة بينهم تكون أوثق

من كده .. كل ما أقرا الفكرة دي 

احس اني مش مقتنعة .. 

يعني إيه لما احب حد وأكون مهتمة بيه 

وبحافظ على مشاعره واغلط ما اعتذرلوش !! 

دي عقوبة اني بحبه مثلاً ؟

لحد ما الفكرة وضحت في دماغي أوي

على سبيل المثال .. 

علاقتنا بربنا : احنا بنحب ربنا رغم كده ،

بنشكر ربنا وربنا بيزيد اللي بيشكره ، و  بنعتذر لربنا ونستغفره لما نغلط ونعصيه

يبقى ازاي بقى لما حد يحب حد مش المفروض يعتذر له ولا يشكره ؟؟؟

*******

" الحب الحقيقي "

أو

" الحب "

قيمة معنوية هي الأكثر ندرة ، والأكثر تعريفاً !

وانا بقول عنه قيمة معنوية اساساً وقفت شوية ..

هو الحب حاجة معنوية أوي كده ولا معنوية / مادية

يعني الحب دا احساس معنوي بس علشان يكون موجود

لازم يتوقف على أفعال محسوسة زي تصرفات ، تعاملات ، كلام 

ومش قصدي بمادية يعني مالية او براجماتية 

لكن قصدي ليها وجود مادي مجسد في الحياة يعني 

ما علينا ، الحب اكتر حاجة في الدنيا الناس قالت عنها تعريفات  ،

الكتاب ، الشعراء ، المفكرين ، الناس العادية ، المتشددين دينياً والوسطيين و إلخ إلخ

كل الناس قاعدة تحاول تعرف الحب ،

واللي بيحبوا نفسهم بيحاولوا يفهموا ايه هو التعريف المحدد للحب 

علشان يعرفوا هم بيحبوا ولا لأ

ودا كله كلام فاضي .. مش معقولة أما أجي احب امشي على كتالوج

لو حصل واحد اتنين تلاتة يبقى بيحبني لو حصل واحد بس يبقى ايه ؟؟ 

طب لو حصل اتنين وتلاتة وماحصلش واحد يبقى ايه ؟؟

كل الدنيا نسيت حاجة بسيطة أوي

هي جزء من آية قرآنية فجأة كده حسيت ان هو دا الحب

" فألف بين قلوبهم "

بس .. ربنا بيألف بين قلبين أو تلاتة او أربعة أيا كان شكل الحب

فبيحسوا انهم بيحبوا .. كل على طريقته وعلى حد فهمه للحب


********

إمبارح في مناقشة ما إكتشفت إن اكبر غلطة الست بتغلطها 

هي إنها بتهتم بشكلها - إن اهتمت - علشان ترضي زوجها

بالتالي لما ينشغل عنها شوية تهمل شكلها ، 

وإن زعلت منه او اتخانقت معاه بتهمل شكلها  و و و و حاجات كتير

اكتشفت اننا لازم نهتم بنفسنا علشان نبقى راضيين عن نفسنا 

مش علشان نرضي زوجنا

لازم نعمل أي حاجة في الدنيا علشان نبقى احنا كويسين

مش علشان هم يشوفونا كويسين

******

كنت بفكر مع نفسي واكتشفت اني بحب الدنيا أووووووووي ، 

خايفة جداً أموت بدري
واكتشفت كمان إن كل المؤشرات بتقول

اني عاملة زي الناس اللي بيموتوا بدري
بحب الدنيا ، حاسة اني مستعجلة دايماً كأن حد بيجري ورايا ،

مش عايشة سني ودماغي أكبر من سني
 حاجات كتير أوي محسساني اني هموت بدري
المشكلة بقى اني مش عايشة مبسوطة أو على الأقل مش عايشة زي ما بتمنى 

ورغم كده متمسكة جداً بالحياة !
مستغرباني أوي


*******

في ناس حواليا نفسي امسكها من كتفها كده وارجها جامد أوي

واقولهم فوقواااااااا العمر بيتسرسب منكم

وانتوا ساجنين نفسكم في حاجات معينة مش هتقدم ولا هتأخر

*******
إكتشفت إننا بنضيع وقت ومجهود كبير في التفكير في حاجات مالهاش لازمة
زي اننا نفكر في أسباب حاجة لو عرفنا أسبابها ممكن نتضايق 

وفي نفس الوقت مش هنغير من الواقع حاجة
في انسان قال لي مرة حاجة فيما معناها
ان احياناً الجهل بالحقيقة بيبقى ممتع جداً ،

كان كاتب قصة فيما معناها ان واحد اكتشف 

ان حبيبته مش بتحبه وواجها بالحقيقة دي فاضطر يبعد عنها
بعد كده ندم .. اكتشف انه كان مرتاح وهو مخدوع وجنبها
حاجة ما ترضيش كرامة بعض الناس بس في أوقات كتيرة

أوي بتكون هي الحل الوحيد

2011-01-19

الكتب العاتيشفية هناك يا أبلة



كل ما اجي اشتري كتب من الناس اللي بيبيعوا كتب مستعملة

الاقي البياع يقول لي "الكتب العاتيشفية هناك يا أبلة "

"روايات عبير ع الشمال "- "كتب نيزار آباني هناك آهي "

وكأن البنات مش ممكن أبداً تقرأ حاجة غير كده !!

ولما امسك أي كتاب تاني يبص لي كأني كائن فضائي !

هو ليه الفكرة دي عن البنات يعني ؟

ليه الناس بتستغرب أوي لما تلاقي بنت مهتمة بأي حاجة تانية غير اللبس الميك آب والدباديب ؟؟

عارفة ان السبب في كده بنات كتير هي دي فعلاً إهتماماهم

بس ماهو بردو في شباب تافهين مالهمش غير ف البنات واللبس والكورة 

ليه الناس ما بتحكمش على كل الشباب انهم زيهم !!

وليه رغم ان الناس - بتقول - انهم مش عاجبهم البنت السطحية
اللي كل اهتمامتها المظاهر وبس نظرتهم للبنت المثقفة مش حلوة بردو

وبيعتبروها معقدة ومكلكعة ؟؟

 الأسئلة دي بتنقح عليا كل ما اجي اشتري كتب علشان كده قولت اعمل البوست دا

يمكن حد يجاوب عليا ويريحني 

فهل من مُجيب ؟

بالمناسبة دا تحقيق حلو عن نفس الموضوع 

عامله أحمد الفقي 





2011-01-16

لو سمحت .. احترم نفسك


كلنا عارفين المقولة اللي بتقول

" عامل الناس كما تحب أن يعاملوك
 
ومعظمنا بننفذها

وبنستنى من الناس انهم يعاملونا زي ما احنا بنعاملهم 

لكن كتير أوي بنتصدم من طريقة معاملة الناس لينا

وبنشك ساعتها في صحة المقولة ..

وساعتها ناس بتتغير في معاملتها للناس ، وناس تانية بتقول الناس مش زي بعضها 

وتستمر في معاملتها الكويسة

لكن غالباً بنكون احنا السبب في دا 

لأننا كمان المفروض " نعامل أنفسنا كما نحب أن يعاملنا الآخرين "

يعني المفروض احنا نعامل نفسنا كويس علشان الناس تعاملنا كويس

نحترم نفسنا بالمعنى الحرفي للكلمة ،

وتكون فكرتنا عن نفسنا إيجابية علشان ننقل الانطباع دا للناس

لازم نكون واثقين في قدراتنا وإن ربنا أكيد ميزنا بحاجة

ويبقى أحسن كمان لو درسنا نفسنا واكتشفنا ربنا ميزنا بإيه وحافظنا عليه وطورناه

ساعتها الناس هتحترمنا ، وهيكونوا عننا فكرة إيجابية

تخيل إنت واحد عمال يقول على نفسه انه غبي مثلاً أو مهمل أو مستهتر

والناس شايفاه ليل ونهار بيقول كده .. أول حاجة الكلمتين دول هيرتبطوا في ذهنهم بالشخص دا

هيبدأوا يراقبوا تصرفاته وهيركزوا أوي على سلبياته دي ومش هياخدوا بالهم من إيجابياته 

وهو السبب

واحد ما بيحترمش نفسه اللي هو أكتر واحد عارفها يبقى الناس تحترمه ازاي ؟


أرجوك ..


حب نفسك ، دلعها ، قولها شكراً على حاجة حلوة عملتها 

كافئها بحاجة بتحبها ، ما تنامش في يوم وانتوا زعلانين من بعض 

أيوة .. إنت ونفسك 

إعمل كل حاجة شايف انها تستحقها 

وما تعملش الحاجات اللي ممكن تهينها 

بس خلي بالك ..

إوعى  تحب نفسك زيادة عن اللزوم

واحساسك بنفسك يبقى مُبالغ فيه وبالتالي تتحول لإنسان نرجسي أو مغرور

 علشان ما تقعش في المشكلة دي لازم تكون صريح مع نفسك

إبرز مميزاتك وحس بيها لكن بينك وبين نفسك واجه نفسك بنواقصك وعيوبك

واشتغل عليها وطورها

جربوا الحكاية دي وصدقوني هتعمل فرق

ممكن ما تعملش فرق سريع لكن هتعمل فرق طويل المدى

2011-01-15

ينــ 25 ـــاير يوم الثورة على التعذيب والفقر والفساد والبطالة

وحركة شباب 6 إبريل تحتفل بعيد الشرطة على طريقتها



كتبت - سارة درويش



فور إعلان انتصار الثورة الشعبية في تونس وانسحاب الرئيس بن علي من رئاسة الجمهورية التونسية قام معظم الشباب المصري على الموقع الاجتماعي الشهير الفيس بوك بتغيير صورهم الشخصية إلى علم مصر ممتزجاً بعلم تونس ، وتبادلوا التهاني والتبريكات للشعب التونسي متمنين أن ينال الشعب المصري ما ناله الشعب التونسي .

و دعا النشطاء القائمين على صفحة كلنا خالد سعيد المصريين للثورة يوم 25 يناير ، أسوة بالشعب التونسي وقالوا في دعوتهم

"احنا مش أقل من تونس .. نزل عشرات الآلاف جابوا حقوقهم كلها ووصلت لدرجة إقالة رئيس الجمهورية وهروبه من البلد .. احنا عايزين حقوقنا .. عايزين اللي قتل خالد سعيد يتعاقب واللي قتل السيد بلال يتعاقب ووزير الداخلية يستقيل .. عايزين أي شخص عذب مصري يتحاكم .. عايزين قانون الطوارئ يتلغي .. مش عايزين قمع في مصر .. عايزين نكون أحرار "

في الوقت نفسه دعت حركة شباب 6 إبريل إلى الإحتفال يوم 25 يناير بعيد الشرطة على الطريقة الإبريلية - كما قالوا على موقعهم - حيث دعوا كافة الشباب من مختلف التيارات السياسية وكافة أطياف الشعب المصري للتعبير عن رفضهم لأسلوب التعذيب والبلطجة الذي

تنتهجه وزارة الداخليه في تعاملها مع الشعب المصري دعوا الشعب المصري يوم 25 يناير إلى الثورة من أجل كرامته أما وزارة الداخلية والمطالبة بإقالة العادلي .

2011-01-14

المزيد من الكلام الفارغ


إحم .. ماحدش يضحك :D

اكتشفت امبارح إن " الكرش " بيدني احساس بالاستقرار

لما بشوف انسان بكرش بحس انه قاعد مستقر كده ومسترخي ومتطمن

معنى انه بكرش إنه مش بيحرق أعصابه كل شوية ، وإنه مش بيتحرك كتير

وإنه ضارب للدنيا طناش

دا مش صح دايماً .. لكن دا الاحساس اللي بحسه لما اشوف انسان قاعد بكرش




دايماً لما بحب أدخل على أكونت تاني .. إيميل أو فيس بوك أو أي حاجة بدل ما بعمل تسجيل خروج

بعمل برايفت براوسنج ( Private Browsing ) في الفاير فوكس .. بالتالي ، بيكون ناسي كل الباسوردات

وكل إعداداتي وكأنه لسة جديد ..

حاسة إني عايزة أعمل برايفت براوسنج في دماغي ، وابص عليا من بعيد ..

أقرا كلامي وأحس إحساس الناس اللي بتقراه لأول مرة ..

هل هو فعلاً بيعجبهم ولا بيبالغوا .. ايه الانطباع اللي بياخدوه من الكلام

إيه حالتهم وهم بيقروه

ونفسي أعمل برايفت براوسنج لنفسي وأقابلني وأقعد معايا وأشوف هحبني ولا لأ ..

هصدقني ولا لأ .. هفقسني ولا لأ !



لا أنسى الإساءة أبداً مهما مر عليها الزمن ..

ليس لأن قلبي " أسود " ..

ولكن ربما لأن النقاط السوداء  على " الأبيض " تكون أوضح وأصعب في المحو   !




تفتكروا في برفان بريحة قشر اليوسفي ( الأوستافندي ) ؟؟

بتنعشني الريحة دي جداً .. لو حد عارف برفان بالريحة دي ياريت يقول لي اسمه :)



كلما ازددت نُضجاً .. كلما ازدادت قدرتك على تقبُل الآخرين

- كل ما تنضُج أكتر كل ما هتحس إنك قادر تتحمل تصرفات بتضايقك من ناس حواليك

لأنك بتلاقي نفسك مُتفَهِم أسبابهم ودوافعهم اللي بتخليهم يعملوا التصرفات دي

بتلاقي نفسك بتفكر أكتر وبتتضايق أقل -



لاحظت مؤخراً إن الناس ممكن تغفر لك أي تصرف .. إلا إنك تخليهم ما يعرفوش عنك حاجة !!!




الانتقام مُتعة حقيقية - رأي شخصي -

... لكن الأمتع منها إنك تشوف ربنا بينتقم لك انتقام أجمل بكتير من إنك تقدر تعمله بنفسك

وأنا قررت إني ما احرمش نفسي المتعة دي ;)


اللي حصل مؤخراً في تونس والكويت خلاني أفكر كتييييير أوي
ليه رغم إن عندنا معارضة قوية ، وبنعمل اضرابات وبنعمل مظاهرات وإلخ إلخ إلخ
ما اتغيرش حاجة .. لقيت إن السبب هو إن المعارضة عندنا مش مؤمنة بجد بالقضية
وبعضهم واخد المعارضة برستيج وموضة .. والبعض الآخر المعارضة بالنسبة له " مود "
يعني ممكن يصحى يوم معارض ويوم مالوش نِفس يعارض فيه !!!
المشكلة بقى .. إن النظام عارف دا كويس علشان كده ... مش عاملهم حساب


الفاصل اللي انا حاطاه دا بيزغلل وبينرفز :P

2011-01-12

كلام فاضي


كنت لفترة كبيرة مهتمة جداً بإني أقول كلامي بطريقة كل الناس تفهمه بيها
كنت مهتمة اوي إني أكون واضحة ومفهومة
حتى ملامح وشي وصوتي غصب عني كل الناس بتفهمهم وبيكشفوا مشاعري أوي
مؤخراً بقيت باتلذذ بإني أقول كلام ماحدش يفهمه غيري
يمكن لأني كنت بقول كلام مفهوم ورغم كده كانوا بيفهموني غلط
وبيتفننوا في انهم يلبسوا كلامي أكتر من معنى
وغلبت أقول والله إني فعلاً بعني اللي بقوله حرفياً ومش بعرف أستعمل التورية
ما بقاش يفرق معايا يكون كلامي واضح ولا لأ لأنهم كده كده مش هيفهموا
العيب مش فيا .. العيب في انهم أصلاً مش عايزين يفهموا إلا اللي يأكد لهم فكرة في دماغهم



رد فعلي تجاه خبر وفاة حد بيكون غريب جداً وبارد جداً رغم إني بخاف من الموت أوي

ما بعيطش وبفضل متماسكة مهما كان الشخص اللي مات دا يهمني أو أعرفه

لحد ما أقرب من مكان وفاته .. أو مكان كان موجود فيه لما كان عايش أو يحصل موقف هو كان بيتصرف فيه بشكل معين

ناس كتير بتفهم دا مني غلط .. إنه عدم اهتمام أو تقدير للموقف أو للي مات

لكن الحقيقة انه عدم استيعاب .. باخد وقت طويل أوي عقبال ما استوعب ان الشخص دا فعلاً مات

واستوعب الحاجات المترتبة على موته .. زي إني مش هشوفه تاني ، إني مش هسمعه تاني

إني بدل ما اكلمه .. هتكلم عنه وأقول الله يرحمه

بستوعب الوجع ببطء لكن بتوجع أوي ..

لحد دلوقتي لسة بستوعب وجع فقدان حد اتوفى في شهر نوفمبر 2009




الأيام اللي فاتت أثبتت لي إن الصبر جميييييييييل أوي



برغم كراهيتي للروتين إلا إني اكتشفت إني بدخل نفسي كتييييير اوي في دايرة الروتين

واكتشفت ان في شعرة رفيعة جداً بين الروتين والنظام وانا كتييييييييير أوي ما بعرفش أحافظ على الشعرة دي


لسة الناس مش عارفة تفرق بين الانسان المغرور والإنسان اللي بيحب الوحدة والعزلة !


في ناس كتير جداً ما بيهمهش راحتك قد ما يهمهم إحساسهم بإنهم مرتاحين لأنهم شايفينك زي ما انت !

رغم إن كونك " زي ما انت " مش دايماً معناه انك مرتاح ، وكونك " متغير " مش دايماً معناه إنك تعبان أو في حاجة مضايقاك !




طول عمري خايفة اوي إني أفقد حد من اللي بحبهم بالموت ، علشان كده بتمنى دايماً إني أموت قبلهم

رغم إن دي أمنية أنانية جداً .. لأني متأكدة إن موتي هيوجعهم أوي !


أحياناً بناخد قرارات تبان شجاعة أوي .. لكن الحقيقة إننا أخدناها لأننا ضعفاء أوي قدام حاجة تانية

زي مثلاً إنك تكون بتجري على إزاز مكسر ومسامير لأنك بتهرب من حد هيقتلك

دي مش شجاعة .. دي غريزة البقاء !



نداء ..

إلى كل من نصبوا أنفسهم حكماء وفلاسفة وخرجوا بنظريات عبقرية عني ..

إتلهوا والنبي .. ماحدش فيكم عارف أي حاجة




2011-01-09

عن الــ فيس بؤ

 
الدنيا - حواليا - مقلوبة علشان قفلت أكونت الفيس بوك
اعترف بإني اتفاجئت بكمية الناس اللي انا فارقة معاهم بجد !!
بس دا ما يمنعش إني حسيت من  سؤال البعض انهم - فقط - عايزين جنازة ويشبعوا فيها لطم !!
قررت أعمل البوست دا كآخر كلام في موضوع الفيس بوك :

انا كنت غايبة كتير عن المدونة ودايماً بكتب على الفيس وبطرح أفكاري أول بأول عليه ومشاعري كمان
كنت شايفة - وفقاً لنصيحة من مُدَوِن آخر - إني المفروض بما ان المدونة ليها قُراء كتير 
اطرح عليها الموضوعات المهمة بس والحاجات العفوية والفضفضة والتهييس كله يكون في شكل نوتس على الفيس بوك 
اقتنعت بالفكرة وفيما يبدو إن الموضوعات المهمة الفترة اللي فاتت كانت قليلة جداً :D 
وانشغلت كمان بالشغل وحاجات كتير .

المهم إني استفدت جداً من الفيس بوك ، لكن لاحظت إني بدور في فلك معين أنا ما حبتهوش
ولقيت اني بقيت بكتب أقل وبتفرج أكتر 

- ودا مش وحش لو بتفرج ع حاجة مفيدة -

ولقيت نفسي غصب عني بيدخل في دايرة اهتماماتي مواضيع غاية في التفاهة 
ولقيت اني بضيع وقت كتير جداً

- يكفي اني في الفترة اللي بطلت فيها ادخل فيس بوك وهي تقريباً اربع أيام قرأت فيها 6 كتب !!

 ولقيت نفسي بدخل في دايرة نفاق اجتماعي مقززة هربت بسببها قبل كده من عالم المنتديات 

ولقيت نفسي مُجبَرة أتعامل مع ناس مش بحبهم ، وناس  بيضايقني مُجرد إني أشوف اسمها ! 

راجعت نفسي لقيت ان الناس حبت المدونة بمواضيعها الهايفة واللي مش هايفة

ولقيت اني كنت نفسياً مرتاحة جداً وانا ما بتعاملش مع الفيس بوك أو بمعنى أدق .. 

( مرتاحة وانا تعاملاتي من خلال الفيس بوك محدودة نوعاً ما)

ماعرفش اللي انا فيه دا مرض نفسي ولا ايه لكن انا اكتشفت فعلاً 

إني بحب الناس أيوة .. لكن من مسافة معينة .. المسافة دي تكفل لي حريتي وما تقيدنيش بتصرفات أو كلام انا مش حابة  اعمله

وبناءً عليه .. أنا قفلت اكونت الفيس بوك بتاعي بمعنى إني مش بفتحه خالص

مُحتفظة بيه بس علشان عليه ذكريات حلوة وناس حلوة 

بتعامل مع الفيس بوك فقط من خلال صفحتي الرسمية 

وبس .. دا كل الموضوع

أنا مش زعلانة - مش مصدومة 

أنا بس قررت أبطل أكون اراجوز بالنسبة للبعض :D 


عن فنون الاستسهال .. في تربية العيال


بابا .. هو انا جيت الدنيا ازاي ؟؟
- جبناك من السوبر ماركت هع هع هع

هو انتوا ليه بتعملوا معايا كده؟ اشمعنى انا اللي بعمل كل حاجة واخويا الصغير ما بيعملش حاجة  ؟
- اصلنا لقيناك على باب الجامع


ماما المكرونة دي حلوة أوي هي المكرونة بتيجي منين ؟
- م السوبر ماركت يا حبيبي
ايوة يعني قبل السوبر ماركت بتبقى عاملة ازاي
- وانا فايقة لك انت راخر ؟ كُل وانت ساكت 



عن " الاستسهال في تربية العيال أتحدث " ..  عن إن ناس فاكرة إن الطفل دا ما يفرقش كتير عن قطة بتربيها أو فرخة 
دورهم الوحيد في حياته انهم يأكلوه ويشربوه وفي اوبشنات زيادة عن الفرخة للأسف هو انهم بيدخلوه مدارس وبيلبسوه
وينقصه أوبشن إنهم ما ينفعش يدبحوه ويعملوا عليه تسقية - يعني العيل واقف عليهم بخسارة  -  في ناس بتعوض دا بأوبشن الشحاتة بالعيل بس دا مش دايماً لأن في ناس بريستيجها ما بيسمحش
الأم فكرتها عن الأطفال انهم " دوشة ووجع قلب "  لكن هتعمل ايه هم الحل الوحيد علشان " يربطوا الراجل " !!
والأب خلف لأن " كل الناس بتخلف " بما إن " الجواز شر لابد منه " !
طبعاً فكرتهم المثلى عن التربية هي إن العيل ياكل كويس ويشرب كويس ويروح اغلى مدارس علشان هو " ابن فلان "
مش علشان هو المفروض يطلع بني آدم كويس
الأمثلة اللي ضربتها فوق دي أمثلة على الاستسهال في تربية العيال
في أمثلة كتيرة في حياتنا على الاستسهال والاستهبال أحيانا
في ناس بتستمتع بإنها تجاوب على اسئلة ولادها اجابات عبيطة وغلط وهي بتضحك وتهزر ومش متخيلة هي بتعمل ايه في عيالها
وناس بتجاوب اجابات تريحهم هم علشان يستغلوا الولد في حاجة على مزاجهم
( زي فكرة اغسل بقك لحسن الشمامة تشمك وانت نايم )
وغالباً بتحصل أي حاجة صدفة أو عمداً والولد يكتشف ان كلام امه وابوه كدب وتتهز ثقته فيهم تدريجياً ويبدأ ما يصدقش كلامهم اللي بجد كمان
يا إما لما بيكتشف ان أغلب كلامهم غلط بيحس انهم مش بيفهموا في الدنيا وبالتالي ما بيسألهمش على حاجة بعد كده
وناس بتجاوب غلط أي اجابة هبلة لأنها مكسوفة تقول مش عارفة لابنها
ودول مشكلتهم مشكلة تخيلوا انكم مكسوفين من جهلكم قدامه وهو طفل هتعملوا ايه لما يكتشف انكم جهلة وهو كبير !!! 
ناس كتير بتستهل التربية رغم انها مهمة جداً
ومافيش حاجة اسمها انا هربي ابني النهاردة
لأ التربية مواقف .. كل موقف بتعمله مع أو قدام ابنك المفروض يكون فيه تربية ليه
ومش شرط يكون بكلام وشرح ومحاضرات .. ولا يكون بضرب وشخط وزعيق
مهم جداً انك  تعمل حاجات تربي بيها ابنك وانت عامل نفسك مش واخد بالك
علشان يحس بيها عفوية وحقيقية وبالتالي يعملها
أنا مش خبيرة في الموضوع دا .. لكن قرأت فيه حبة 
وناوية ان شاء الله إني أقرأ أكتر في المواضيع دي علشان لما اخلف اربي إبني صح 
علشان يبقى ابني مصدر لفخري مش لكسفتي 
انا جمعت شوية لينكات لكتب حلوة ومفيدة في تربية الأطفال حبيت اشارك فيها كل حد يحب يستفيد ويربي ابنه صح 

واللي عنده كتب أو لينكات تانية ياريت يكتبها في التعليقات وانا هحدث بيها الموضوع


 

 

ممكن كمان قبل الجواز نحضر كورسات في تربية الأطفال وقبل كل حاجة ننوي واحنا بنعمل كل دا اننا بنعمله علشان ربنا يكرمنا ونعرف نربي ابننا كويس ويبقى فخر لينا مش عار علينا

2011-01-06

الحساب الختامي :)

 لما قررت اعمل حساب ختامي لسنة 2010 بالنسبة للجانب العملي من حياتي

ما كنتش حاسة قد إيه انا اشتغلت السنة دي قبل ما امسك الورقة والقلم وأكتب كل اللي عملته ،

علشان كده قررت بيني وبين نفسي أعمل كده كل سنة وأقارن كل سنة بالسنة اللي

قبلها واشوف نفسي بتقدم ولا بتأخر :)

و قررت كمان إرساءاً لقيم الشفافية والنزاهة - حلوة إرساءاً دي - في جوانب مملكتي

اللاسعة الديموقراطية

إني أنشر الحساب الختامي دا :)

( في مجال الصحافة )

    تحقيقات :     

1 - حين يكون الموت هو الأمل الوحيد في التغيير للأفضل


2 - يا بخت من وفق يوزرين في الحلال


الجزء الثاني


3 - هنا يرقد المفكر الإسلامي نصر حامد أبو زيد .. حيث القبر بلا شاهد !


      حوارات :        

1 - حوار مع الروائي عادل عصمت


2 - حوار مع الروائي مراد ماهر



3 - عبد الغفار الصابر لأهالينا : النظام عامل حسابه كويس ومقاطعة الانتخابات لن تحرجه أمام المجتمع الدولي

  
     تقارير :      

1 - "ورشة عمل بناء تحالفات الأمن الانساني"

2 - "الفيس بوك ...الطريق إلى رئاسة المحروسة"

3 - "خالد سعيد "شهيد الداخلية يوقظ ضمير المصريين"

4 - ياولاد ياولااااااد تعالوا معانا علشان نسمع أبلة فضيلة

5 - الجواز بطريقة ودنك منين يا جحا

6 - دار الكتب أصبحت مقبرة للكتب


- اشتغلت رئيس قسم التحقيقات بجريدة الفراعنة الورقية - أي نعم دا كان لمدة شهر واحد

، بس انا مبسوطة إني وصلت للمكان دا ، ورغم انه كان مكان بحلم بيه لكن سيبته علشان

مبادئ مؤمنة بيها .. مبسوطة اني ما ضعفتش قدام حاجة كنت بحلم بيها طول عمري .

- اشتغلت رئيس لقسم مصر اليوم بجريدة أهالينا الإليكترونية ، والحمد لله الشغل حقق صدى حلو .

- أسست موقع ( آخر خبر ) الإخباري ، برعاية شركة I A M Y GROUP بتمنى إنه يحقق صدى ويكون موقع له كلمة ومراسلين في كل مكان ان شاء الله .

( في مجال الأدب )

  كُتب :

1 - مشاعر مُرهَقَة : كتاب اليكتروني ، كان تجربة فردية مني ما اهتمتش بيها أوي وعملتها

على سبيل التجربة وفقط .. لكن حققت صدى أكبر بكتير مما أنا كنت متخيلة .

2 - زوجي مازال حبيبي : كتاب ورقي ، عزيز جداً عليا وقريب أوي لقلبي ، من أصدق ما

كتبت لأنه مافيهوش حرف ما حلمتش بيه وما طلعش من قلبي .. حقق الحمد لله صدى كبير

أرضاني أنا شخصياً ، و ناس كتير استفادت منه رغم اني لحد دلوقتي مش متخيلة دا : D

3 - فزت في مهرجان النشر الجماعي الأول وشاركت في كتاب " دون حذاء أفضل " بقصة  " لماذا يخدعها الرجال " .

4 - حكايا السمراء : كتاب إليكتروني ، لامسني أوي وكئيب أوي وبيعبر عن حالتي النفسية  القاتمة اللي كنت عايشاها وقت ما عملته .
عاجبني فيه انه عمايل ايديا ما استعنتش بأي حد في عمله ورغم كده مستواه لغوياً وشكلياً كان أحلى بكتير من مشاعر مُرهَقَة ، وناس كتير قالت لي ان كتاباتي فيه  أنضج .

5 - مجلة وصلة نشرت لي في العدد التالت قصة ، كانت مفاجأة حلوة ليا :)


6 - مجلة أقلام الثقافية نشرت لي قصتين

شاربه


لا داعِ للقلق

( على المستوى الإعلامي )

1- حوار في مجلة وشوشة : أجراه الصحفي المتميز حسن الحلوجي

2 - حوار في مجلة كلمتنا : اجرته معايا الجميلة عزيزة علي

3 - حوار في موقع جنتك : أجرته الصحفية المتميزة سارة الحلوس

4 - تمت استضافتي في برنامج الثقافية كافية على قناة النيل الثقافية ( الفيديو للأسف بعد

ما اترفع ضاع )

5  - تمت استضافتي في إذاعة الشرق الأوسط في برنامج علشانك بخصوص مدونتي - بنوتة لاسعة .

6 - تمت استضافتي مرة تانية في إذاعة الشرق الأوسط في برنامج كتب نت بخصوص كتبي زوجي مازال حبيبي و مشاعر مُرهَقَة .

7 - نُشر خبر عن كتابي في جريدة الأخبار في صفحة إبداعات أدبية

8 - على موقع محيط كتابي من ضمن الكتب الأكثر مبيعاً في مصر .
(  مؤتمرات وفاعليات )

1 - مؤتمر Building Alliances for Human Security in the WANA Region

في مكتبة الإسكندرية  - من أروع الحاجات اللي حصلت لي في 2010 بجد

2 - مؤتمر المبادرة العربية للإعلام الإليكتروني بعنوان ( الشباب المصري وتحديات العصر )

3 - تلقيت دعوة من اللجنة النسائية بنقابة الأطباء لحضور افطارها السنوي بصفتي شخصية

نسائية مؤثرة - سيبكم من مؤثرة دي ركزوا في نسائية هههههههههههه

وبجد يومها كان جميل أوي وكان مثمر واتعرفت على شخصيات نسائية جميلة أوي ، وبتعمل

حاجة مفيدة بجد في المجتمع .

3 - اليوم العالمي لحقوق الانسان - كان يوم فاكس جداً وندمت اني روحت :D

**************

في 2010 اتخرجت واشتغلت وقبضت  لأول مرة ولأول مرة بردو اشتريت حاجات من فلوسي

أنا :) من مرتبي

كان احساس تحفة جداً بجد ، ثقتي بنفسي زادت ، فهمت الدنيا إلى حد كبير ، تعبت

أوووي وزعلت أووووي وفرحت أوووووووي بردو

كسبت ناس حلوة وخسرت بردو ناس حلوة ومش عارفة ليه ؟

ماعرفش أنا قربت من أهدافي ولا لأ بس اللي متأكدة منه اني ما وقفتش مكاني :) ودي كفاية





2011-01-01

من فضلكم فوقواااااااااا

نِفسي مرة واحدة نتجاوز السيناريو المصري المعتاد كل ما تحصل مصيبة ،

اتهامات باطلة ، شجب وتنديد وشتيمة ، تغيير صور البروفايلات ع الفيس بوك  ،

الكلام ، الكلام ، الكلام .. أرجوكم اتصرفوا بطريقة عملية 

وانقذوا مايمكن انقاذه بعدين اشتموا براحتكم

اللي ممكن نعمله  : اننا نتبرع بدم ، واننا ندعم اهالي المصابين والقتلى مادياً ومعنوياً 

ياريت لو حد عنده اي فكرة تانية يقولنا

هنشر تباعاً إعلانات التبرع بالدم واللي محتاج دم ممكن يروح فين 

ولو عرفت جديد هحطه هنا

كل اللى يعرف حد محتاج دم يقوله انه يجيب من المستشفى ورقة بانه محتاج دم و نوع الفصيلة و الكمية اللى هو محتاجها و يتوجه بالورقة دى لجمعية رسالة و الجمعية عندها بنك دم .. عنوان الجمعية هو 44 ش توت عنخ امون -سموحه بجوار كوبرى كليوباترا ومترو ماركت.. الكلام ده مصدره جمعية رسالة نفسها 

**************

نرجو التوجه بأقصى سرعة للمستشفى الألماني في ٥٦ شارع عبدالسلام عارف 

أو مستشفى شرق المدينة والتبرع بالدم .. 

 
للاتصال هاتفيا بالمستشفيات:


035841806 - 0102709744 -
035841717

*************