لعلمك

لعلمك

إقرأ لي

دخلوا بكليك شمال :D

Blog Archive

السبت، فبراير 19، 2011

postheadericon وكأن جريمة واحدة لا تكفي !!


مع مرور الأيام يتضاعف بغضي  لمبارك وكلابه المنتشرين كالورم في أنحاء مصر ،
نظام فاسد كالأخطبوط له ألف يد ينهش بها الوطن .
بالأمس كنا في زيارة لأهالي ثلاثة من الشهداء من أهالي طنطا ، أُزهِقَت أرواحهم برصاصات الأمن المركزي لمبارك .
أعمارهم مختلفة ، ظروفهم الإجتماعية مختلفة ، اسمائهم مختلفة ولكن .. الجرائم في حقهم واحدة .
لم يكتفي كلاب مبارك بقتلهم بالرصاص الحي ، لم يكتفوا بحصد أرواحهم الطاهرة بلا ذنب ولا جريرة ، بل عملوا أيضاً عن سبق الإصرار والترصد على محو آثار جريمتهم، وحرصوا على أن يضيعوا حقوق الشهداء  المعنوية والمادية .

الشهيد أحمد كمال ، الإبن الوحيد بين ثلاث بنات ، طالب بالفرقة الثالثة في كلية الهندسة جامعة المنصورة 
مهذب جداً ، خجول ، مطيع لوالديه ومحب لهم ، كلما لبت له والدته طلب عادي يقبلها ويقول لها " تسلم ايدك يا حبيبتي " 
كلما دخل على والده قبل جبينه ودعا الله أن يحفظ له والديه واخواته . 
خرج أحمد ليطالب بحق وطنه في الحرية والكرامة ، رغم أنه ميسور الحال ، ورغم أنه لا يعاني من أي مشاكل بسبب النظام 
إلا إنه لم يقل أبداً " أنا مالي " .
حصدته رصاصة من وسط زملائه في أحد جنبيه ، هرع به زملائه على مستشفيات خاصة قريبة من مكان اصابته إلا إن جميع المستشفيات الخاصة رفضت استقباله لأن هذه الحالات يجب أن تُعالج في مستشفى حكومي لإعداد التقارير الجنائية .
هرعوا به إلى مستشفى الجامعة بطنطا ، أجروا له عملية بعد أن بحثوا طويلاً عن المعدات الطبية والأدوية اللازمة بالخارج لأنه كالعادة المستشفى لا تملك الإمكانيات الطبية اللازمة لأي عملية .
تُوفي أحمد في المستشفى بعد إجراء العملية ، و أصر الأطباء على أن تكون خانة سبب الوفاة في شهادة الوفاة فارغة !!
وكأن جريمة قتله لم تكن كافية فأتبعوها بجريمة أخرى !
وعندما أصر الأهل على إدراج السبب الحقيقي للإصابة ومن ثم الوفاة قالوا لهم " مش عاجبكم نشرحه " وبالطبع عليه أن يبقى في ثلاجة الموتى ثلاث أو أربع أيام ، وبالطبع رفض أهله وقالوا إن كنوز الدنيا لا تساوي ألا نكرمه بعد موته وندفنه ولا تساوي تعويضات الدنيا لحظة واحدة يرونه فيها مجدداً .
أم الشهيد أحمد بكت وهي ترينا علم مصر الذي لفه به اصدقائه حين أصيب لمنع النزيف ، رفض صاحب العلم أن يغسله وأهداه لأسرة الشهيد وعليه دمه ، احتضنت العلم وبكت وقالت لنا .. " كل ما يوحشني أحضن العلم اللي فيه دمه واتغطى بيه وأحس كأنه هو اللي بيحضني " 
أم أحمد .. ليست نادمة على خروجه في المظاهرات ، وليست حزينة لأنه استشهد .. هي فقط .. تفتقده 
قالت لنا أنه بعد أن فاضت روحه كان وجهه مطمئن جداً ، وكأنه نائم بعمق .
قالت لنا أنه ذهب فداءً لوطنه وأن هذا شرف له ولكل الأسرة . 

أما أحمد معوض ، فهو شاب عمره سبعة عشر عاماً من اسرة رقيقة الحال ،
يسكنون منطقة شعبية في طنطا هو الولد الأكبر تليه طفلتين . 
أحمد كان أيضاً شاب مهذب بار بوالديه ، يعمل في الأجازة كي يشتري لنفسه ملابس جيدة وليدخل الفرحة على قلب اختيه بما تحتاجه الفتاتان من ملابس أو فاكهة أو أي شيء تعجز ميزانية والده المحدودة عن شرائها .
أمه كانت تخشى عليه من المظاهرات فكلما جاء أحد اصدقاءه ليصطحبه للخروج إدعت انه غير موجود خوفاً عليه 
لكن الحذر لا يمنع القدر ، وناداه أحد اصدقائه ولم تكن موجودة وخرجا سوياً ، كان بصحبة عشرات من زملائه في المدرسة 
يشاهد من بعيد ويصورون المظاهرات ومايحدث عند قسم ثاني طنطا حين اصابته ثلاث رصاصات في منطقة البطن 
دمرت الرصاصات منطقة البطن تماماً من الداخل ، الكبد والطحال والأمعاء وكل شيء ، وفقد الكثير من الدم 
وحاول الاطباء أن يجروا له عملية في مستشفى الجامعة إلا إن النزيف المستمر جعلهم يفشلون
واستشهد أحمد ذو السبعة عشرة ربيعاً برصاص الأمن المركزي ، وسبب الوفاة معروف للجميع ويستطيع أي طفل أن يتبينه 
إلا إن الأطباء كتبوا سبب الوفاة غير معروف ، ورفضوا أن يعطوا والده صور اشاعة السونار وغيرها التي تثبت الإصابات
وكالعادة .. " مش عاجبكم نشرحه " 
ولعبوا على وتر العواطف لدى الأم الملكومة والأب الملتاع حزناً على ولده ، وفضلوا أن يدفنوه لأن إكرام الميت دفنه
وضاع حق أحمد .
أسرة أحمد في أمس الحاجة للمعاش والتعويضات الخاصة بالشهداء ، حالتهم المادية سيئة جداً وحزنهم كبير على الولد الذي يترجونه من الدنيا ، والسند الذي كان سيقيم ظهورهم في المستقبل  .

وتكرر الأمر مع الشهيد محمد فوزي عاشور ، الذي يحكي قصته محمد يسري ..

والد الشهيد (محمد فوزى عاشور) رجل جليل في الستين من عمره حارب في حرب أكتوبر و حرب الاستنزاف وكان  عرضة للموت في أي لحظة دفاعا عن وطنه وكرامته .. وبعد كل ذلك انتهى به المطاف بأن يعيش على جنيهات قليلة في اليوم لا تكفي متطلبات الحياة المتزايدة ينفقها على عائلته المكونة معظمها من إناث وليس له إلا ولد وحيد في  الصف الثاني الإعدادي  .
حتى ابنه الوحيد .. الذي كان قرة عينه في الدنيا.. حرم منه واستشهد برصاص الغدر حين  كانوا في شارع جانبي هربا من الغازات المسيلة للدموع ،  وإذا بسيارة الأمن المركزي وراءهم وتطلق الرصاص الحي بغزارة ووحشية  مركزة إطلاق النار على الرأس والصدر . 
وكالعادة .. تدعي التقارير أن  سبب الوفاة غير معروف !!
******

أعجب حقاً لأمر هؤلاء الكائنات التي يُطلق عليهم أطباء وملائكة رحمة الذين ارتكبوا هذه الجرائم !
ألم يخجلوا من أنفسهم وهم يرون بأعينهم شباباً في عمر الورود قتلوا غدراً وهم يطالبون بحق المجتمع كله في حياة كريمة 
ثم يتصرفون بهذه الدناءة ؟ 
يزورون الوقائع ويطمسون الحقائق ويضيعون الحقوق دون أن يطرف لهم جفن ؟
حتى لو مورس عليهم كافة أشكال الضغط أو التهديد لماذا لا يتحلوا بالشجاعة التي تحلى بها هؤلاء الشباب ؟
لماذا لا يضحون بوظائفهم لو كانت هي الثمن الذي يجب أن يدفعونه من أجل الحقيقة ؟
يجب أن تتم محاسبة هؤلاء المجرمين ، وأن يحرموا للأبد من ممارسة الطب لأنهم لا يؤتمنوا على أرواح الناس .
يجب أن تُسترد حقوق هؤلاء الشهداء كأقل تحية لأرواحهم الطاهرة ، وكأقل اعتذار عن طريقة قتلهم البشعة .
يجب أن تتوقف الجرائم عند هذا الحد .
الأربعاء، فبراير 16، 2011

postheadericon عزاء لأهالي الشهداء في طنطا


يوم الجمعة ان شاء الله بعد صلاة العصر هنروح نعزي أهالي شهداء طنطا  اللي قدرنا نتواصل معاهم
      احمد كامل أنور عماره مطعم ولعتين

      محمد فوزى عاشور 34 ش اسماعيل سليمان خلف مساكن السلخانة

    احمد عوض السيد 12 ش الخولى – السلخانة – خلف نايف عماد

 هنتجمع ان شاء الله كلنا الساعة 3 عصراً قدام مطعم ولعتين

لو اي حد من أهل طنطا يحب يجي يشرفنا وينورنا
ودا لينك الإيفنت على الفيس بوك
    السبت، فبراير 12، 2011

    postheadericon من وعن مصر الجديدة أحدثكم :)

    لازلت متلخبطة ومش مركزة من الفرحة  بس الكلام دا لازم اقوله :)


    مصر الجديدة ما اتولدتش امبارح .. مصر الجديدة اتولدت يوم 25 يناير

    لما نزل ناس عايشة مستورة وكويسة ، مع الناس اللي  حاسة انها مقهورة ومظلومة في بلدها

    علشان يجيبوا حقهم وحق ولادهم
    اتولدت لما بطلنا نخاف وبطلنا نقول وأنا مالي 

    اتولدت لما بطلنا نمشي جنب الحيط وناخد على قفانا ونقول كماااااااان

    الثوار كانوا  بيقولوا على ميدان التحرير " المدينة الفاضلة "
    هناك في ميدان التحرير والميادين الموازية ليه في كل محافظات مصر

    كانت الناس .. " ناس " 

    كانوا بيحبوا بعض ، بيخافوا على بعض 

    بيحموا بعض وبيداووا جروح بعض

    بياكلوا مع بعض وبيضحكوا مع بعض 

    في ميدان التحرير كان اللي ماعاهوش بياكل مع اللي معاه

    كان اللي متعود ياكل من كنتاكي بيقبل عزومة زميله على الفول والطعمية علشان ما يجرحهوش

    كل اللي راحوا التحرير قالوا الناس هناك ناس 

    رغم ان الناس اللي في التحرير هي نفسها اللي كانت يوم 24 بتزق بعضها علشان تركب الأتوبيس 

    وبتفكر في مصلحتها هي وبس

    الناس بقت ناس في ميدان التحرير 

    ومصر رجعت مصر من قلب ميدان التحرير

    واحد في برنامج قال كلمة حلوة أوي 

    قال الناس بقت كده علشان " عندهم هدف قومي ، طول السنين اللي فاتت كان ناقصنا يكون عندنا هدف قومي "

    فعلاً كل الدول المتقدمة اللي شعوبها بتشتغل بجد بيكون عندها هدف قومي علشان كده بتتغاضى عن صغائر الأمور والمصالح علشان تحققه

    لازم نحس اننا بنشارك في نهضة البلد مش مجرد ناس عاييشين فيها وخلاص

    اعتقد احساسنا بإنها مش بلدنا خلاص انتهى بعد الثورة

    علشان كده ارجوكم ما نضيعش دم شهدائنا ومصابينا الثوار هدر ونحافظ على بلدنا

    نفتح عنينا كويس أوي ونقطف كل بذور الفساد من البلد

    الفكرة دي كانت عندي من اول ايام الثورة ولقيت ان ناس كتير عندهم نفس الفكرة

    ناس كتير عملت ايفنتات حلوة اوي 

    زي دا 

    من النهاردة دي بلدك انت،
    ماترميش زبالة،
    ماتكسرش إشارة،
    ماتدفعش رشوة،
    ماتزوّرش ورقة،
    أوعي تقصر في شغلك
    اشتكي أي جهة تقصّر في شغلها..
    متسمحش لظابط يعذب مصري زيك..
    اوعى تصنع "مبارك" تاني..
    استمتع بحياتك..
    اقرا وثقف نفسك..
    حب نفسك وحب الناس اللي حواليك..
    اوعى تعاكس بنات في الشارع.
    اوعى تهين حد..
    اوعى تسخر من حد..
    أوعى تنسى حريتك أبداً..
    خلي بلدك اجمل بيك

    • وفي ناس تانية عايزة تشتغل في محافظاتها ، نصلح الحاجات اللي اتكسرت أيام الفوضى ونجمل البلد وننضفها


    • ناس تانية عايزة تزور أهالي الشهداء وتعزيهم


    • ناس تانية عايزة تزور الجرحي وتشكرهم وتواسيهم وتشجعهم لأن الحالة النفسية بتفرق جداً في الشفاء ولأنهم بجد أبطال




    أرجوكم .. لو عندكم أي فكرة مهما تخيلتوا انها مش مهمة شاركوا بيها

    الثورة دي كلها قامت بــ " فكرة " وحلم ودلوقتي احنا عايشين الحقيقة

    أرجوكم حافظوا على مصر وابنوها من جديد

    ربنا وقف معانا كتيير أوي الأيام اللي فاتت ودبرلنا حاجات كتير كويسة وصلتنا للنصر دا

    خلوا شكركم لربنا هو إنكم تحفظوا نعمته 

    حبوا مصر تاني علشان هي بلدكم مش علشان نيلها واهرامها

    وانا قولت الكلام دا لنفسي ، وحسيت بمسئولية اتحطت على كتافي من يوم ما الثورة قامت

    زي ما اثبتنا للعالم ولنفسنا إننا شعب متحضر بثورتنا تعالوا نثبت لهم اننا  نستحق مصر








    postheadericon خلطبيطة مشاعر

    أولاً أنا مش مجمعة خالص .. جوايا ألف مليون احساس فاستحملوني بقى :D



    امبارح أول ما طلع بيان الجيش اللي كنت سهرانة لحد 2 بالليل استناه وما جاش ،
    جالي احباط رهيب .. قعدت اصبر نفسي وأقول لأ ، دا أنس الفقي هو اللي مألفه ، مش معقولة الجيش يقول كده

    وقعدت احلم انهم هيكذبوا الكلام دا

    بعد نص ساعة تقريباً طلع المتحدث الرسمي بإسم الجيش وقال البيان تاني .. وأنا جالي احباط رهييييييييييب




    بعد ما سمعت البيان من المتحدث الرسمي باسم الجيش حسيت اني لازم اشارك في المظاهرات واحاول تاني

    قولت لبابا تاني عايزة انزل لكن ما رضيش بردو واتنرفز عليا :(

    حسيت بقهر رهيب اني مش عارفة اشارك وحسيت اني مقصرة في حق ولاد بلدي اللي في التحرير

    حسيت اني عايزة اعتذر ليهم كلهم لأن لو كلنا نزلنا كان ماحدش هيقدر يقول " الكام واحد اللي في التحرير دول مش هم اللي بيمثلونا ، دي مصر 80 مليون "

    وحسيت اني عايزة اعتذر لأمهات الشهداء على إن ولادهم ماتوا وأنا قاعدة في بيتنا

    بس قولت يارب انت عالم قد إيه كان نفسي اشارك ومش عارفة .






    قعدت انزل ويندوز وعملت شوية حاجات في البيت وكده ورجعت لقيت حسام بدراوي استقال ، اتفائلت وحسيت انه في أمل وانه بيهرب من السفينة قبل ما تغرق ، في نفس الوقت لقيت وائل غنيم ومصطفى النجار ومجموعة تانية من شباب خمسة وعشرين يناير موافقين على بيان الجيش ومكتفين بكده .

    وناس تانية عمالة تقول امريكا باعتة اسطول بحري وحاجات كده ، وقلقوني رغم اني كنت حاسة ان الأخبار دي كذب لأنهم بقالهم اسبوع بيقولوا الأسطول خرج من 3 أيام




    على العصر كده سمعتهم بيقولوا ان في بيان من رئاسة الجمهورية هيطلع ، قولت وقعة سودا ليقول لنا انا قررت اترشح في الانتخابات تاني ههههههههه


    التليفزيون المصري بدأ يلم نفسه ويتكلم بأمانة ومسكنة عن المتظاهرين ، المتحدث باسم الجيش دخل التليفزيون


    حسيت بأمل من تاني




    بعد المغرب سمعت الكلمتين اللي قالهم عُمر سليمان ماحسيتش بنفسي قعدت اصوت واتنطط واسقف في الشقة حاسة اني عايزة اشق السما وانط فيها




    اول ما شوفت صور الشهداء قلبي اتوجع عليهم واتحسرت بس ما عيطتش

    عيطت بس لما شوفت ام الشهيد أحمد ايهاب بتعيط

    امبارح لما تنحى ولعلعت الأغاني الوطنية وحسيت بلذتها أكتر من أي وقت قبل كده

    ساعتها بس عيطت على الشهداء




    جالي تليفون من قلب ميدان التحرير سمعت فرحتهم ، وسمعتهم وهم مش مصدقين

    الدنيا مش سايعاهم وبيقولوها كل شوية " مبارك تنحى .. تنحى بجد .. احنا خلعنا مبارك "

    حسيت اوي اني نفسي اكون معاهم بجد

    وبعدها جاتلي تليفونات كتير ورسايل بنهني بعض بالنصر الرائع دا




    ماما أخدتني وروحنا نجيب لوازم الاحتفال بالنصر ، نزلت في بلدنا الكئيبة الغريبة دي حسيت ان ماحدش فرحان ولا زعلان

    ماحدش فارق معاه اصلاً

    روحت وسط البلد وشوفت مقر الحزب الوطني المحروق ومليت عيني منه وشوفت العربية الوحيدة اللي رافعة علم مصر وبتزمر



    واحنا واقفين عند الفكهاني واحدة ست لقيتها بتقول ياعيني الجدع " استحملنا " 30 سنة وفي الآخر يعملوا فيه كده ؟؟


    ما حسيتش بنفسي إلا وأنا بقولها ايه ؟ استحملنا ؟ انتي صعبان عليكي


    قالت لي اه والنبي .. قولتلها ليه ما شوفتيش الشهداء والجرحى في التليفزيون ؟ قالت لي شوفتهم بس احنا اللي بنعمل كده في بعض


    دلوقتي الحرامية هيطلعوا علينا يسرقونا والبلد هتخرب


    ذهلت .. ذهلت من مدى شيطانيته ونجاح خطته في انه يقنع الناس بإنه يا أنا يا الفوضى والبلطجة


    قولتلها اتطمني ما تخافيش على مصر طول مافيها الشباب اللي زي الورد دا اللي في التحرير




    روحت البيت وقعدت اتفرج على الاحتفالات والأخبار ولقيت نفسي بترعش

    قعدت اترعش لحد يمكن بعد اتناشر بالليل ومش مصدقة يمكن لحد دلوقتي اننا انتصرنا




    وفيت بندري ورسمت علم مصر وعلقته في البلكونة :) وغنيت بلادي




    لأول مرة احس بطعم الأغاني الوطنية ، لأول مرة من أول يوم 25 لحد النهاردة كل ما اسرح الاقيني بدندن اغنية في حب مصر




    فرحانة اوي حاسة ان ربنا ما خذلنيش ، لما كنت دايماً اتفائل واقول في امل

    لما كانوا يقولوا لي خلاص البلد خربت ومش هتنفع للعيشة وكنت بقول لأ في أمل

    ماكنتش بقولها بناءً على أي منطق غير إنه " مافيش حاجة اسمها مافيش أمل "

    حسيت أوي ان فعلاً لما تثق بربنا وتتوقع منه الخير بيجيك الخير




    " يؤجل الله أمنياتنا ولا ينساها "


    من ساعة ما اتقبض على حبيب العادلي وانا الجملة دي لمحمد حسن علوان مش راضية تروح عن بالي


    ياترى كل اللي ظلمهم وظلم ولادهم وذلهم كانوا متخيلين ان ربنا مش ناسي دعوتهم أبداً ؟

    ياترى كانوا متخلين ان كل ظلم وليه نهاية وانه هيقع وهيجي يوم ويلاقي اللي يلفق له تهم ؟؟


    فرحانة اوي إنه اخيراً داق طعم الظلم والذل اللي دوقه لناس كتير عرفنا بيهم وما عرفناش بيهم

    فرحانة بجد


    فرحانة ان مبارك عرف ان الشعب مش مغفل ومش عبيط




    ناس كتير شتمتني واتهمتني بالخيانة والعمالة واني مش مصرية واني عايزة البلد تولع

    كنت متغاظة منهم اوي قبل امبارح .. اول ما حسيت بطعم النصر حسيت اني مشفقة عليهم ومسامحاهم

    ومش هقول لحد شوفت بقى اننا كنا صح ؟

    مش هحاسب حد .. كفاية اووووووووي طعم النصر

    كفاية انهم عرفوني اني فعلاً بحب بلدي اكتر ما كنت متخيلة لأني اتوجعت اوي لما قالوا عني مش مصرية





    فخورة أوووووووووووووووووووووووووووي إني مصرية وفخورة اوي بولاد بلدي

    ونفسي يكون حد من اللي نزلوا التحرير بيقرأ كلامي دلوقتي

    علشان عايزة اقوله " شكراً .. إنت شاركت في صنع فرحة شعب كامل

    شكراً .. إنت استرديت كرامة أكثر من 80 مليون مصري "




    التحية العسكرية اللي آداها المتحدث الرسمي باسم القوات المسلحة دي فرحتني اوووووووي

    لقيت نفسي من غير ما احس بقول الله

    بسيطة اوي وصادقة اوي ومعناها كبير اوي

    ربنا يرحمهم يارب


    في بوست تاني هكتبه بعد دا .. عن مصر الجديدة بقى :)
    الجمعة، فبراير 11، 2011

    postheadericon خطاب مفتوح إلى الرئيس مبارك


    سيدي الرئيس ،

    تحية عسكرية وبعد ،، 

    هل تعلم يا سيدي .. أن الشعب المصري للمرة الأولى منذ 30 عاماً أصبح ينتظر خطابك ؟؟
     نعم دائماً ما كنا نفر من أمام التليفزيون حين يحاصرنا بخطبك العصماء في مناسبات شتى ، معروفة ومحفوظة 
     عيدي الإفطار والأضحى ، وعيدي رأس السنة الهجرية والميلادية ، وعيد الشرطة ،
     وعيد العمال وغيرها من المناسبات ، ونحمد الله على أنك تحرمنا من طلتك البهية في أعياد الطفولة .

     هل تعرف لماذا أصبحنا ننتظر خطابك ؟؟ لأننا في كل مرة من المرات الثلاث كنا نريده الخطاب الأخير .
     كنا نأمل أن نرى في عيونك .. لا ، لن أتكلم عن أحد سأتكلم عن نفسي ، كنت آمل أن أراك تقولها ، إني راحل 
     إني أعرف هول الكلمة عليك ، أعرف أنها الكابوس الذي يطاردك منذ فعل الأبطال فعلتهم ، 
    أعرف أنك تهرب منها بشتى الطرق حتى لو قتلت في سبيل ذلك أكثر من 300 شاب وأصبت آلاف بعاهات مستديمة وعجز .
     لكنني واثقة من أن الله سيريني إياك يوماً  ما ذليلاً مكسوراً ،
     أعلم أنك كُسِرت بالفعل وأن تلك الابتسامة التي تطالعنا بها من الأذن إلى الأذن ماهي إلا ابتسامة صفراء كاذبة تحاول أن تحفظ بها ما تبقى من ماء وجهك .

     قل لي يا سيدي .. ما قيمة ملاينك وملياراتك أمام كل هذا الذل ؟
     وكل هذه الكراهية التي تطفح بها قلوبنا نحوك ؟
     ماذا يمكن أن تفعل لك أمام دعوة صادقة من أم مقهورة ملكومة ؟؟ 
     هل تنام مثلنا سيدي ؟ هل تنام ملئ جفنيك وأنت تعلم أن هناك أكثر من 80 مليون إنسان يدعو عليك ليل نهار ؟
     هل تستطيع أن تأكل وأنت تعلم أن أكثر من 85 مليون ينتظرون موتك بفارغ الصبر ؟


    *********


    سيدي الرئيس .. سمعتُ خطابك بالأمس ، ورأيتُ كالعادة ابتسامتك الزائفة ، ورأيتك تحاول أن تداري مرارتك 
     ليس من الإهانات التي وجهت إليك فالذي يخشى أن تُهان كرامته يا سيدي يحفظها بآداء واجبه على أكمل وجه ..
     والذي يخاف أن تهان كرامته لا يسرق .
    ورغم أنك قلت فيه - مضطراً -  أنك تحيي الشباب وتعترف بثورتهم وحزنت على شهدائهم ، إلا إنك لم تعِ الدرس بعد 
     لماذا أراك عاجزاً عن استيعاب أنها حقاً النهاية ، وأنك بالفعل اتخذت مقعدك في مزبلة التاريخ مهما حاولت ترقيع هذه الحقيقة ؟
    لماذا تحاول أن تمكث في منصبك حتى نهاية ولايتك حتى لو بشكل صوري ؟ 
    سأعذرك حقاً لو عرفت أنك مثلاً تعاني آرتيكاريا مزمنة من كلمة " رئيس سابق " !
    لماذا تُصر على إهانتنا في كل مرة متخيلاً أننا لم نفعلها طواعية ، وإنما فعلناها لأن آخرون قاموا بإغوائنا ؟؟
    هل تظن حقاً ان ظلمك لم يكن كافياً لإشعال ثورة ؟ 
    إننا شعبٌ أصيل يا سيدي وإلا لما احتملناك فترة واحدة !


    تكلمت في خطابك عن " آخطاء لا يخلو منها أي نظام سياسي " ، أنت محق ، ولكن لمَ لم تذكر الجرائم ؟؟
    ما ارتكبته في حق شهدائنا جرائم وليست أخطاء ! ما ارتكبه وزيرك السابق يوسف والي في حق إخوتنا وآبائنا وأمهاتنا مرضى السرطان كان جريمة وليس خطأ ، ما ارتكبه ممدوح اسماعيل في حق غرقي العبارة لم يكن خطأ .. بل كان جريمة ، وغيرهم وغيرهم وغيرهم .

    تكلمت في خطابك بكل " بجاحة " عن أنك لا تتلقي أوامر من دول أجنبية ، بينما فضائحك ونائبك على ويكليكس " على عينك يا تاجر " ، ودون ويكليكس أصلاً كلنا نعلم أنك لا تملك قرارك ، كيف تملك قرارك وهم يمولون جيشك بـ 1.5 مليار دولار سنوياً ؟ 
    هذا غير المعونات الأخرى ، " من لا يملك لقمته لا يملك كلمته " يا سيدي .
    وللأسف ، كان من الممكن أن نملك لقمتنا لولا جشعك وجشع رجالك ، كان بإمكاننا أن نسدد ديون مصر وننهض بها ونرفع رأسنا وهامتنا عالية بين الدول لولا " توجيهات سيادة الرئيس " !

    أريد حقاً أن اسألك ماذا يمكن أن تفعل بكل ما نهبته من هذا البلد ؟؟ 70 مليار دولار هذا ما نعلمه ، والله أعلم بما تخفيه 
    لماذا لم تكتفي بمليار أو اثنين يا أخي ؟؟ والله إننا شعب طيب وكنا سنسامحك ونتغاضى عن فعلتك وكنا سنعتبرها مكافأة نهاية الخدمة 
    ماذا يمكن أن تفعل أنت وعائلتك بـ 70 مليار دولار إلا إذا كنتم تلتهمون الأوراق النقدية ، كما تأكل الماعز أوراق الجرائد !!


    سيدي الرئيس ، قبل خطابك كنت أتمنى أن أتعاطف معك ، واستجمعت بعض الدموع لأودعك بها 
    لأننا شعب أصيل ، لكنك أبيت إلا أن تخرج ذليلاً ، وإن شاء الله ستخرج ذليلاً ..
    أرجوك .. لا تتكلم مرة أخرى عن خروج مشرف ، فلن تفلح أي قوة في الأرض على محو عارك بعد الآن 

    * ملحوظة : 

    - لست سيدي ، ولا يُشرفني أنك كنت يوماً ما رئيساً لبلدي ، ولكن " القافية حكمت " كما يقولون . 


    الخميس، فبراير 10، 2011

    postheadericon لهذه الأسباب يجب أن تتوقف الثورة فوراً

    كلما تجولت في صفحات الفيس بوك والمدونات فوجئت بأحدهم أو إحداهن تعلن سبباً ضرورياً وهاماً وحيوياً لتوقف ثورة 25 يناير فوراً ، وأن نكتفي بهذا القدر من المكاسب - التي لا أعلم لماذا لا يراها أحد سواهم - وأن نتوقف نحن والشباب الثوار في التحرير عن التفكير في أنفسنا فقط بأنانيتنا المعهودة ، وأن نراعي ظروف الآخرين ، أسبابهم القوية أفحمتني وأخجلتني من جهلي ، لذا قمت بجمعها هنا كي أواجهكم جميعاً بها كإعتذار عن حماقاتي السابقة ، كما فكرت أيضاً - بعد أن أناروا لي عقلي - بالتفكير في أسباب أخرى بمثل قوتها إمعاناً في الإعتذار : 

    1 - " كفاية بقى حرام عليكم أنا زهقت من القعدة في البيت "

    2 - " كفاية بقى الأجازة خلصت وما خرجتش ولا مرة "

    3 - " كفااااااااية بقى منكوا لله .. مش عارفة أشوف البوي فريند بتاعي :D " 

    4 - " كفاية بقى انتوا بوظتوا التحرير خالص انا كنت بحب اتمشى هناك مش عارفة هتمشى فين بعد كده "

    5 - " كفاية بقى انا زهقت كل ما ادخل الفيس بوك ألاقي الناس بتتكلم في السياسة وصور البروفايلات علم مصر حاجة خنيقة خالص " 

    6 - " كفاية بقى لحسن يقطعوا النت تاني وتبقى مصيبة مش هعرف أشيت "

    كفاية بقى .. أسباب تنقط :D  حرصاً على ضغطكم 

    - قد أغفر لك  أن تكون ساذجاً وصدقت وعود مبارك وحكومته ونسيت المثل القائل " قالوا للحرامي احلف " ، وقد أحتمل أن تكون لك وجهة نظر أخرى وأن تفكر في " مصالح الناس " - التي لم يعطلها المتظاهرون بل عطلها مبارك وحكومته للضغط عليهم - قد أحتمل أي شيء وأغفر أي شيء إلا أن تكون وقحاً .

    نعم انظر لصور الشهداء وقل لي أليس من الوقاحة أن تذهب دماء كل هؤلاء وحياتهم وأحلامهم هباءً لأنك " زهقت من القعدة في البيت " !!!
    أليس من الوقاحة أن تضيع مجهود ملايين من الشباب في 17 يوم لأنك مللت صورة علم مصر على الفيس بوك ؟؟ 
    أليس من الوقاحة أن تستسهل الوطنية ؟؟  

    نعم فالوطنية على طريقة مبارك لن تكلفك شيئاً سوى أن تعيش دور الحكمة والعقل ، وتتهم كل هؤلاء الأبطال في ميدان التحرير بالخيانة لأنهم يعملون وفق " أجندة خارجية أو إخوانية " ، أو بالبله لأنهم " مخدوعين " أو بالتفاهة لمجرد أنهم من شباب الفيس بوك - الذي بالمناسبة أنت أيضاً واحد من رواده والكثير من الرؤساء والسياسيين في الغرب من رواده - وأن تقوم بنسخ إحدى العبارات المتكررة التي تظنون أنها قمة في الحكمة والبلاغة وتقوم بلصقها في كل مكان عند معارضي مبارك وعند اصدقائك .. وتنتفخ أوداجك بالوطنية وتذهب لتنام ملئ جفونك بعد أن أحبطت عدداً لا بأس به من الشباب ! 
    أرجوك .. أنظر لصور الشهداء قبل أن تخرج علينا بسبب عبقري وقوي لإنهاء الثورة ..
    أو .. أرجوك .. احتفظ بأسبابك لنفسك فهؤلاء المرابطين في التحرير لن تُفلح قوة في الأرض في إقناعهم بإنهاء ثورتهم بعد أن رأوا الموت حولهم وبينهم آلاف المرات . 

    _______________________________________________


    ملحوظة : بعض هذه الأسباب وردت فعلاً على لسان البعض ورأيتها بعيني . 

    ملحوظة أخرى : لمن يرى أنه يجب أن تتوقف الثورة عند هذا الحد ، من فضلك ادخل هنا





    لو لسة ما اقتنعتش بعد كل دا ولا حتى بدأت تفكر في تقبل وجهة نظرهم يبقى مافيش كلام هيجيب فايدة معاك :D
    الثلاثاء، فبراير 08، 2011

    postheadericon وجع



    انتوا مستوعبين يعني ايه واحد مات ؟؟

    يعني أمه مش هتعرف تفرح تاني إلا وهي بتبكي لأنه مش معاهم

    دا غير انها عمرها ما هتقدر تفرح بجد 

    يعني وجع قلب أبوه ، يعني ضهره وسنده اللي كان بيترجاه من الدنيا وبيتعكز عليه كل ما يكبر ويعجز راح

    يعني وجع لإخواته .. كل ما يفتكروه ، كل ما يشوفوا اوضته ، لبسه ، الحاجات اللي بيحبها ، الحاجات اللي كان بيقولها

    كل ما حد يقول نكتة هو قالها في يوم من الأيام ، كل ما حد يقول كلمة كان متعود يقولها

    يعني حبيبته خطيبته زوجته عرفوا طعم الموت والفقد والوجع في عز شبابهم

    احلامهم سوا ببيت يعيشوا فيه ، اسماء أولادهم ، هزارهم مع بعض

    الحاجات الهايفة اللي كانوا بيتخانقوا عليها

    الطقم اللي كان بيحب يشوفها لابساه 

    الكلام اللي كان بيحب يسمعه منها

    الأماكن اللي شافوها مع بعض .. 

    كل دي حاجات هتوجعهم .. هتفكرهم مهما الزمن حاول ينسيهم

    اصحابه اللي بيحبوه ، زمايله في الشغل لما يلاقوا شغل كان بدأ فيه ولسة ما كملوش

    حاجة كان متميز فيها 

    عارفين موت واحد بس بيوجع كام واحد ؟؟

    عارفين بيغير حياة كام واحد ؟؟

    عارفين بيضيع فرحة كام واحد ؟؟

    عارفين بقى ان مبارك اتسبب في موت أكتر من 300 شهيد ؟؟

    وكان عنده استعداد يموت اكتر منهم لو قدر علشان هو بس .. هو لوحده 

    يفضل محتفظ بالكرسي ... يحتفظ بكرامته اللي بيقول عليها !!!

    عارفين ان فيهم شهيد عنده 14 سنة ؟؟؟ يعني طفل يعني لو ارتكب جريمة ما يتحاسبش عليها لأنه .. طفل !

    عارفين ان فيهم شهيد متجوز من 20 يوم بس ، وساب عروسته علشان مصر 

    متخيلين وجع قلوب أهاليهم والناس بتتهمهم بإنهم خونة وعملاء ؟؟

    الحاجة الوحيدة اللي مصبرة اهاليهم إنهم ماتوا علشان هدف نبيل .. 

    يقوم يطلع واحد بكل بساطة يقول لــ 300 أم ملكومة .. ابنك مات خاين ! تخيلوا ؟؟؟؟؟؟؟؟؟؟؟

    لحد دلوقتي كل ما ابص لصورهم اللي كلها حياة وتفاؤل بجد ببقى مش قادرة استوعب انهم فعلاً ماتوا 

    مش اعتراض على امر ربنا والله .. لكن انا اصلاً بستوعب الموت ببطء 

    حتى لو انسان كبير ومريض .. فتخيلوا لما اشوف شباب زيي وافكر في احلامي

    وافكر قد ايه موتي هيوجع امي ، واهلي وكل اللي بيحبوني

    وافكر فيهم وابدأ استوعب ببطء حقيقة انهم دلوقتي ... " تحت التراب "

    السبت، فبراير 05، 2011

    postheadericon هذا البوست .. من أجلك أنت :P

    * مبدأياً مافيش بيني وبين حسني مبارك تار شخصي علشان ابقى محموقة منه أوي
    الحمد لله ربنا ساترها معايا ومش آذيني شخصياً دوناً عن الناس ..  أنا بالعكس في فترة قبل ما انزل الشارع واشوف الناس عايشين ازاي كنت مقتنعة ان مبارك أحسن الوحشين ، وإنه مش بالبشاعة اللي الناس اللي بتعارضه دي بتتكلم عليه 
    لكن دلوقتي لما نزلت الشوارع وشوفت الناس عايشة / ميتة ازاي بقيت بتكلم بحرقة الناس اللي عيطت قدامي علشان مش لاقيين ياكلوا ومش لاقيين يعالجوا عيالهم والناس اللي مالهاش بيوت بسبب الحكومة والأطفال اللي جالهم سرطان بعد ما اتولدوا بشهور وغيرهم وغيرهم
    تاري مع مبارك تار 88 مليون مصري .. حتى اللي بيقولوا له نعم يا مبارك احنا آسفين يا مبارك .

    * الناس غِلبت فيا مش ملاحقين عليا تُهم .. مش عارفين يتهموني بإيه ولا بإيه .. أقرب حاجة على لسانهم إني عراقية عميلة .. العبيط اللي متخيل كده ، أنا واحدة حفظت الجميل لبلد اتولدت فيها وعاشت فيها سنة واحدة ، ولحد دلوقتي بتحبها وبتتوجع علشانها هبقى خاينة للبلد اللي عشت فيها أكتر من 20 سنة ؟ بأي منطق ؟؟ الله أعلم
    أما احتاسوا خالص قالوا عليا مش مسلمة :D
    وكأن الإسلام حكر على مؤيدي مبارك !!! 

    * اللي بيقولوا يرضيكوا يمشي ويبقى بيسمح للدول الأوروبية انها تتدخل في شئوننا على حد ما انا فاكرة إذا كنتم ناسيين ، مش الدول الأوروبية هي اللي قالت له امشي فاحنا روحنا قولناله اه إمشي ... الشعب قال امشي فأوروبا خافت تخسر الشعب اللي أصبحت متأكدة إنه هينتصر فقالت له إمشي ، وفي أكتر من بيان قالوا له " إمشي زي ما الشعب بيطلب " 
    وبعدين هم أصلاً متدخلين في كل حاجة واحنا عارفين وخلوا الطابق مستور من فضلكم .

    " من لا يملك لقمته لا يملك كلمته " واحنا كلنا عارفين إحنا بناخد مساعدات منهم قد ايه 

    * اللي بيقولوا الدول العربية شمتانة فينا علشان المظاهرات ضد رئيسنا هرد عليهم بسؤال :

    انتوا شمتتوا في شعب تونس لما ثاروا على رئيسهم ؟؟

    انا عن نفسي ما شمتش وقولت عليهم رجالة وجدعان بجد . 

    *  اللي بيقولوا لي هي دي ثقافة الاختلاف انك تشتمي اللي مخالفينك في الرد ، هقولهم خيركم سابق الناس المتحضرة اللي بتلوموني علشان بشتمهم دلوقتي بمجرد ما قولت رأيي قالوا فيا حسبنا الله ونعم الوكيل انتي عايزة تولعيها انتي خاينة وعميلة انتي عراقية ومش مصرية ومش مسلمة !! 
    دول اللي على الفيس بوك أما نظرائهم في الشارع فاتعاملوا مع المختلفين معاهم في الرأي بالسنج والمطاوي والجنازير
    ونعم التحضر ! 

    *  الإخوة الأفاضل اللي بيقولوا لي يطلع متكرم من البلد  وعايزينا نقول له آسفين وحقك علينا وإلخ إلخ 
    بيستشهدوا بحديث سيدنا محمد اللي بيقول فيما معناه ليس منا من لم يوقر كبيرنا ولا يرحم صغيرنا 
    هو ما رحمش الصغير دا أولاً ، ثانياً لما واحد كبير في البلد يسرق ما نعاقبهوش علشان نبقى بنحترمه ؟؟
    بلاش اللعب بالدين من فضلكم 


    * اللي متخيل إن مافيش مخرج قانوني ولا دستوري للأزمة اللي احنا فيها دي غلطان ، دا وهم وحاجز حطوه قدامنا علشان يكعبلونا ، الناس لما فكرت بهدوء لقت مليون مخرج .. وبعدين دستور إيه دا اللي يقف قدام إرادة شعب كامل !!! 
    وماحدش يقول لي إن اللي خرجوا دول مش بيمثلوا الشعب المصري اللي فيه 88 مليون لأ .. كلنا عارفين أوي إنه الرأي دا كان رأينا بالإجماع قبل ما يعمل الفتنة اللي عملها بإعلامه وكلابه وخطابه الأهبل .

    * لاحظت ان معظم اللي مؤيدين لمبارك حججهم واحدة وكلامهم واحد وبياخدوه من بعض كوبي وبيست ، ولاحظت كمان ان معظمهم من الناس اللي هي بتاعة أنشر هذه الرسالة وإلا هيجيلك آرتيكاريا في المنام 

    ناس تفكيرهم نمطي جداً ، بيصدقوا أي حاجة ، مش مستعدين يفكروا خالص ، بيفضلوا الجبن عن التجربة !
    دا انا امبارح بقولهم المخرج خالد يوسف من ضمن الموجودين في ميدان التحرير علشان ينفذ أجندة الإخوان صدقوا !!!! وقعدوا يقولوا لي شوفتي مش قولنالك للأسف فهمتي متأخر أوي هههههههههههه . 

    *  الإخوة اللي بيقولوا البلد بتولع والناس بتموت في بعضيها بسببكم وبسبب كلامكم ، اوك .. انتوا عقلاء ، ماشي 
    انتوا الصح .. تمام .. احنا اغبيا واللي بيصدقنا غبي ويستاهل اللي يجراله بقى .. زعلانين علينا لييييييييييه ؟؟ 
    لو سكتت مش هتخسر لكن احنا لو سكتنا هنخسر


    * ناس متخيلة إني موقفي دا موقف عناد وخلاص وإني ما فكرتش مليون مرة قبل ما أصر عليه ، أقسم بالله إني فكرت مليون مرة وحطيت كل المعطيات قدامي ، لقيت العقل بيقول نستمر ، وأفعال الحكومة بتقول إنها كدابة ، وقرارتهم متضاربة ، ولما استخرت ربنا ودعيته يبين لي الصح من الغلط لقيت ربنا بيفتح عيني على حاجات كتيرة زي الزفت مبارك عملها .. حسيت ربنا بيقول لي دي حقيقته 


    * اللي بيقولوا عايزين الاستقرار دول هو كان فين الاستقرار ؟؟ دا كان ذل مش استقرار بأمارة قانون الطوارئ لو هو شايف ان البلد مستقرة كان ساب قانون الطوارئ ليه ؟ 
    - قولوا لي بقى سايبه افترا ، يا اما قولوا مافيش استقرار هاااااا الاجابة  انهي فيهم ؟؟؟

    * يوم ثورة تونس قولت احنا عندنا المعارضة رغم انها كتير بس مش بتنجح لأنها مش معارضة حقيقية وكنت متوقعة لو حصل ثورة في مصر بالمعارضة مش هتنجح ، وفعلاً .. اللي نجح الثورة دي انها كانت معتمدة على الشباب مش على المعارضة ولما بدأت تنجح المعارضة انضمت لها واتمسحت فيها . 


    * من الغباء إننا نقبل بوضع سيء خوفاً من إن اللي جاي يكون اسوأ خاصة ان في احتمال انه يكون أحسن ، محتاجين شوية إيمان بنفسنا شوية .. بكرة لو حلو حلو بسببنا لو وحش وحش بسببنا ، يبقى نعمل اللي علينا ونتوكل على الله على الأقل علشان ما نحسش اننا قصرنا وكل حاجة نصيب وقدر . 

    * الإخوة اللي بيقولوا دي كلها مؤامرات خارجية عايزة تضرب استقرار مصر 
    على إيه يا حسرة ؟؟ علشان مصر بقت متقدمة جداً على إيد مبارك فخايفين منها ؟
    ولا علشان مصر بقت قوية جداً إقتصادياً وسياسياً ومن كل النواحي في عهد مبارك فهم خايفين منها ؟؟
    ولا علشان مصر عندها نووي وخايفين منه ؟ ولا إيه ؟؟
    قول لي سبب واحد يخليهم يخافوا من مصر بالوضع اللي كانت عليه واللي كانت رايحة ليه ؟


    * اللي خايفين من إن الإخوان يحكموا مصر لو حسني مبارك مشي اتطمنوا .. الإخوان مش هيحكموا مصر لأن مش الإخوان هم اللي عملوا الثورة . 

    * ماحدش هيقدر يستعبدنا تاني ولا يستغفلنا أياً كان ، لو جابوا  يهودي مسك الحكم مش هيعرف يستعبدنا لأننا خلاص رافضين العبودية
    في مقولة بتقول " لا يستطيع أحد أن يمتطي ظهرك إلا إذا كنت منحني " 

    * مبارك مش عايز يقعد الــ 6 شهور دول علشان سواد عنينا .. أي بني آدم عادي مش واحد عمل عمايله دي كلها ولقى حد رفضه عمره ما هيعديهاله وعمره ما هيفكر في حاجة غير انه ينتقم من اللي فضحه ورفضه .. طبيعة بشرية يا جماعة ومبارك مش ملاك !
    مبارك عايز يقعد الـــ 6 شهور دول علشان يطلع عيننا ويسيب لنا واحد مكانه أنيل منه . 

    * اللي حصل دا غير نظرة العالم كله لجيل كامل بجد ، انا قبل 25 يناير كنت بقول ان بلدي مافيهاش رجالة 
    وإننا لو دخلنا حرب  هننهزم ، هم اقنعونا بكده همشونا لدرجة اننا فقدنا الثقة في نفسنا وفي جيلنا 
    قعدوا يقولوا لنا بطلوا تحلموا ، إنسوا ، مش انتوا اللي هتغيروا الكون ، لكن اللي حصل بجد
    إننا غيرنا ، وحلمنا قرب يتحقق ، وثقتنا بنفسنا رجعت 

    انا حسيت بأمان لما شوفت كل الناس دي في التحرير وفي كل مصر ، حسيت ان مافيش حد يقدر يهزمنا في الكون كله 
    لأننا إيد واحدة ..
    وهو كمان فهم دا علشان كده فرقنا وخلانا مش إيد واحدة 

    *  ناس كتير زعلت مني بسبب موقفي ، وناس كتير حطيتني في البلاك ليست لكن أنا مش زعلانة ، أقسم بالله إني ما حسيت إني بعمل حاجة إلا لما الناس بدات تعاديني .. 
    ربنا العالم انا قد إيه كان نفسي أشارك في المظاهرات وما قدرتش ،  بس لما خسرت ناس كتير حسيت اني شاركت ، إني ضحيت في سبيل فكرة مؤمنة بيها ..
    مش مهم غلط ولا صح بس المهم النية إيه 

    * ناس كتير بتقول لي ما تنفخيش في قربة مخرومة وما تحاوليش تقنعي حد برأيك لأنهم مش هيقتنعوا ، ومعاهم حق
    انا مش بكتب الكلام دا علشانهم ، انا بكتب الكلام دا علشان هو جوايا ونفسي أقول وعلشان ما ابقاش في نظر نفسي جبانة خايفة أعلن رأيي لحسن حد يزعل .

    * الــ 11 يوم اللي فاتوا علموني أكتر من الــ 20 سنة اللي فاتت حاجات كتير اوي هقولها بعدين لما الغمة تنزاح 

    * أرجوك لو انت شايف ان حال البلد واقف والبلد بتخسر ادخل هنا وعلى فكرة مصر كانت بتخسر بالبطيء أضعاف أضعاف اللي بتخسره دلوقتي .

    * اللي بيقول كفاية علشان البلد بتخسر دا زي بالظبط اللي يكون في جسمه ورم هيقتله ومش عايز يستأصله علشان العملية الجراحية بتوجع ! 


    الجمعة، فبراير 04، 2011

    postheadericon انجازات زعيم الأمة مبارك

     فوجئت بالناس عمالة تشتغل كوبي وبيست لإنجازات الزعيم والرئيس يزهزه عصره يطول عمره هأ هي مبارك 

    دي انجازاته اللي قالوها وتحتها ردي عليهم :



    تحرير كل شبر من تراب الوطن مع استعادة السيادة الكاملة علي سيناء.

    *  لم يقم وحده بالتحرير ولم يكن هو المخطط ولا المنفذ للحرب ، هو مجرد قائد للقوات الجوية وفقط ، والمفاوضات التالية واسترجاع سيناء وتحريرها تم بناءً على انتصارنا في السادس من أكتوبر وليس من أجل سواد عيون مبارك .

    *******   

    عودة العلاقات مع الدول الإسلامية والعربية، وعودة مقر الجامعة العربية للقاهرة.

     - علاقتنا مع الجزائر منهارة بسبب ماتش كورة ، وفي لبنان تم قتل مصري ظلماً ولم يتحرك أحد من اجل استرداد حقه ولا كرامته ولا دمه المهدور ، تم عقد صفقة مع السعودية لتصدير المصريات اليها كخادمات ، تم احتجاز وتعذيب أكثر من مصري في الكويت وليبيا ... وفي فلسطين اتهمونا بالخيانة واننا متأمرين عليهم مع اليهود لما قفل عليهم المعبر وسابهم يموتوا في الحصار ...  علاقات زي الفل فعلاً . 

    *******   


    إقامة علاقات دولية متميزة، مكنت من إسقاط نصف مديونية مصر الخارجية.


    - بلغت ديون مصر عام 1981 لحظة استلام الرئيس مبارك الحكم : 15 مليار جنيه ( حوالي 21 مليار دولار في ذلك الوقت)

    ديون مصر الآن بعد 30 سنة من حكم مبارك :

    الديون الداخلية : 888 مليار جنيه

    الديون الخارجية : 200 مليار جنيه

    الإجمالي : 1088 مليار جنيه

    - علما بأن هناك حوالي 20 مليار جنيه شطبت عام 1991

    الكلام دا مش من عندي الكلام دا من هنا 

           *******    


    إعادة إحياء القمم العربية بعد انقطاعها منذ الغزو العراقي للكويت بدعوة من مصر عام 1996 وتقنين دورية انعقاد القمة بمبادرة منها.

          - القمم العربية التي شهدت اشتباكات بالأيدي بين ممثلي الدول العربية المحترمة أم ماذا ؟       أم القمم العربية التي تركت شعب غزة يموت دون ان تتحرك وتلقى عليه القنابل ويحاصر غذائياً   ام القمم العربية التي تصدت لمبارك حين باع الغاز لإسرائيل ؟؟  
      
    *******    

    قيادة مصر في دعم القضية الفلسطينية عربيا ودوليا ومساندة الشعب الفلسطيني في مواجهة
           الاحتلال وتأمين حقوقه المشروعة وصولا إلي قيام دولتهم المستقلة، وعاصمتها القدس.
              
    -         الوضع الحالي يشهد دوره المشرف جداً في هذا فعلاً

    *******           

    رعاية اتفاقات أوسلو التي أنشأت السلطة الفلسطينية ومكنت القيادة الفلسطينية برئاسة ياسر عرفات، من العودة إلي الضفة الغربية وغزة، ورسخت مبدأ قيام الدولة الفلسطينية كأساس للتسوية.

    نو كومنت
     
    *******   
          
    التصدي بحسم وبقوة القانون وبتضامن الشعب لقوي الإرهاب لضمان استقرار الوطن وتقدمه.

            

          بأمارة انفجارات الأقصر والحسين وكنيسة القديسين وغيرها وغيرها 


    *******    

      تدعيم العلاقات مع الاتحاد الأوروبي تحقيقا للتوازن في سياسات مصر الخارجية وإبرام اتفاقية الشراكة المصرية- الأوروبية.

         

    -         علاقات قوية فعلاً دعت الاتحاد الأوربي إلى مطالبته بالتنحي 
     :D
    *******   

    تفعيل الإشراف القضائي علي الانتخابات.

        

    -         نكتة ؟؟
    *******   

    إنشاء أول مجلس قومي لحقوق الإنسان.

            

    -         وماذا يفعل ؟ يعتقل الحقوقيين ويترك العادلي وكلابه يقتلون خالد سعيد وغيره كثيرين و يطلقون الرصاص الحي والمطاطي على المتظاهرين ويدهسونهم بالسيارات و يجبرون البلطجية على ترويع الآمنين !!

             *******   

    إلغاء القانون 105 الخاص بمحاكم أمن الدولة.

         

         كان مزاجه ؟؟؟؟؟؟؟ 

    *******    

    إلغاء عقوبة الأشغال الشاقة من التشريع المصري.

     
              
    -         ودي حاجة حلوة للمواطن المصري الشريف مثلا ً ؟؟ 
     
    *******  

     
    إنشاء محاكم الأسرة.


            
     
    -         اه اللي الناس بتطلع روح أهاليها فيها عقبال ما تاخد حكم بالطلاق أو الرؤية ؟ 

    *******  
     

    إلغاء معظم الأوامر العسكرية الصادرة طبقا لقانون الطوارئ.
    -          
    -         قانون الطوارئ الذي استمر 30 عاماً ولازال ؟؟ المفروض أساساً ان يتم إلغاء قانون الطوارئ

    تدعيم تنشيط إطلاق حركة الجمعيات الأهلية.

    ليتم النهب من ورائها ومعظمها جمعيات صورية فقط ، اما الجمعيات الحقيقية ذات النشاط الحقيقي تتم عرقلتها بكل الوسائل .

    إقرار حق الخلع للمرأة المصرية.

    الخلع من صميم حقوق المرأة المصرية وكفله لها الشرع ما اخترعهوش ولا جابه من جيبه
     ودا مش انجاز لمبارك شخصياً !!!!

    ضمان تنفيذ أحكام النفقة، بإنشاء صندوق لتأمين الأسرة.

    تفضل أرجوك بزيارة محاكم الأسرة وستجيب بنفسك على هذا الانجاز

    المساواة بين الأب والأم المصرية في حق منح الجنسية للأبناء.

    ولاد خالتي ابوهم فلسطيني مولود في مصر وهم مولودين في مصر وما طلعوش برة مصر يوم واحد وامهم مصرية ولم يتم منحهم الجنسية !


    التوسع في المناصب القضائية للمرأة.

    حصلت لنا البركة يا شيخ

    تعيين أول قاضية بالمحكمة الدستورية.

    كان بيروح يذاكرلها ويدافع عنها في الاحكام اللي اخدتها والنضال اللي عملته لحد ما وصلت للمنصب دا علشان كده بقى انجاز لمبارك


    حرية التعبير والرأي من خلال 515 صحيفة تعمل في مصر، منها 48 صحيفة حزبية.

    فعلاً واعتقال المدونين والتضييق عليهم ، اختطاف الناشطين السياسيين والحقوقيين كان فعلاً حرية !

    تعديل المادة76 من الدستور؛ ليصبح اختيار رئيس الجمهورية عن طريق الانتخاب الحر المباشر، لأول مرة في تاريخ مصر.

    عدلها علشان تتفصل على ابنه ودلوقتي استجاب لتعديلها تاني بما يدل على انه كان عكها جه يكحلها عماها .
      

    إصدار القانون رقم 174 لسنة 2005 بتنظيم انتخابات الرئاسة، ليحدد القواعد لانتخابات حرة ونزيهة.

    فعلاً بأمارة الــ 99.9 % والميتين اللي بينتخبوا

    تعديل قانون تنظيم مباشرة الحقوق السياسية بما يضمن المزيد من نزاهة العملية الانتخابية.

    فعلاً بأمارة الانتخابات بتاعة السنة دي

    تعديل قانوني مجلسي الشعب والشوري، بما يحقق فاعلية أكبر في أداء البرلمان.

    حقيقي والله مكسوفة ارد

    تعديل قانون الأحزاب السياسية بما يعزز الحياة الحزبية.

    اعملوا احزاب براحتكم وتفوا على تربتي لو نجحتكم في الانتخابات :D


    زادت قيمة الصادرات الزراعية من نحو 0.5 مليار جنيه لتصل لنحو 7 مليارات جنيه.

    وبقينا نستورد كل حاجة من برة القمح والقطن والأكل ، والزراعات بتاعتنا بترجع تاني من المينا علشان دون المستوى زي ما حصل مع البطاطس وفضيحة الكيماويات المسرطنة من ضمن انجازاته فعلاً

    3 ملايين فدان مستصلحة لتصل بالرقعة الزراعية إلي8.3 مليون فدان.


    ادخل هنا و رد على نفسك




    حرية الفلاح المصري في زراعة وتسعير إنتاجه.

    واللي أدى إلى مصايب لأن الفلاحين جريوا ورا المكاسب الأسرع وما بقوش يزرعوا قمح ولا الزراعات المطلوبة ، وزرعوا المحاصيل اللي بتجيب سعر اعلى

    تحرير العلاقة بين المالك والمستأجر.

    كتر ألف خيره

    زيادة قيمة الإنتاج الزراعي بحوالي 16 مرة من نحو 5.8 مليار جنيه إلي ما يقرب من91 مليار جنيه.




    زيادة دعم المعاشات بـ22 ضعفا من 554 مليون جنيه إلى 11 مليار جنيه.

    لأن عدد اللي بياخدوا معاشات اصلاً زادوا لكن لسة في ناس بتاخد معاش خمسين جنيه في ظل ارتفاع جنوني في الأسعار .

    وصل معاش الضمان الاجتماعي ومعاش الطفل إلي نحو مليار جنيه.

    نفس الإجابة السابقة

    زاد عدد المؤمن عليهم من نحو10.3 مليون مواطن إلي19 مليون مواطن.

    مش فاهمة ايه وجه انجازه في دا :D

    زيادة الإنفاق علي الدعم المباشر علي السلع والخدمات من2 مليار جنيه إلي35.4 مليار جنيه.

    مع تدهور في مستوى الخدمات والسلع المدعومة زي رغيف العيش وسكر وزيت التموين

    زيادة دعم السلع التموينية من مليار جنيه إلي10 مليارات جنيه.

    لأن اصلاً الأسعار زادت

    زيادة دعم المنتجات البترولية من100 مليون جنيه إلي أكثر من22 مليار جنيه.

    اه بنبيع الغاز لإسرائيل مدعوم

    40 مليون مواطن يستفيدون من البطاقات التموينية.

    والأربعين مليون الباقيين بيلطموا لأن الأسعار نار والأجور قليلة جداً

    تحول رصيد الميزان الجاري من عجز قدره2.3 مليار دولار إلي فائض بلغ 3.7 مليار دولار.

    في خلال 30 سنة !!!!! انجاز 5 مليار تقريباً فقط ؟؟


    زادت قيمة الصادرات الصناعية( بدون البترول ومنتجاته) من نحو 0.5 مليار دولار إلى نحو 6.6 مليار دولار.

    في 30 سنة !!!!!

    زادت إيرادات قناة السويس من نحو909 ملايين دولار إلى 3.4 مليار دولار.

    على أساس ان مبارك هو اللي حفرها وهو اللي شغال فيها :D


    تضاعفت قيمة الصادرات إلي دول الاتحاد الأوروبي في الست سنوات الأخيرة ووصلت إلى نحو2.7 مليار دولار.

    ادخل هنا ورد على نفسك




    تضاعف إنتاج الغاز الطبيعي منذ بداية التسعينات ليصل 23.6 مليون طن.
     
    تضاعف احتياطي الغاز الطبيعي أكثر من أربع مرات منذ بداية التسعينات ليصل إلى 65 تريليون قدم مكعبة.

    علشان كده احنا زي الشطاطير بنوديه لإسرائيل مدعوم

    توقيع بروتوكول إنشاء المناطق الصناعية المؤهلة لتسهيل نفاذ كافة المنتجات المصنعة بهذه المناطق إلى السوق الأمريكية بدون تعريفة جمركية أو حصص كمية أو غير ذلك من قيود

    اااه وعلشان كده بقينا نستورد حتى الفوانيس من الصين !

    المتابعون

    اعتبرها بيتك ♥

    وِش القفص

    خليك ورايا

    دليفري..