لعلمك

لعلمك

إقرأ لي

دخلوا بكليك شمال :D

Blog Archive

الاثنين، مارس 28، 2011

postheadericon My Officail Site :)




نَظراً لإن ناس كتير بتقول لي إن كتاباتي متنطورة :D
ونظراً لإني أنا نفسي حسيت إنها متنطورة في أماكن كتير
عملت موقع خاص بيا ، يجمع كل كتاباتي وكل أخباري ، وشغلي 
دا مش معناه إني هقفل المدونة ، أو المدونات
لكن .. عملته كـ خطوة نحو مزيد من التنظيم :)
الموقع دا لينكه ، هستنى زياراتكم ، آرائكم 


http://www.saroradarwish.co.cc/
السبت، مارس 19، 2011

postheadericon ما ينفعش


اللي حصل النهاردة  في الاستفتاء وقبله أثبت إنه فعلاً ماينفعش تحصل انتخابات برلمانية دلوقتي ولا رئاسية

التهريج والهبل اللي حصل وتزوير إرادة الشعب باسم الدين دا أثبت اننا محتاجين وقت قبل ما نعمل أي انتخابات لو احنا عايزنها فعلاً نزيهة .

ومش بقول ما ينفعش لأن الشعب مش مستعد للديموقراطية لأ ، الشعب النهاردة  كله لما لبى النداء وراح الاستفتاء اثبت انه جدير بالديموقراطية ، ولكن ماينفعش لأن لسة في فئات فاكرة إنها من حقها تفكر بالنيابة عن الناس وتفرض قرارها عليهم .

لازم نوعي الناس البسيطة ، أهل الريف والمناطق العشوائية ، وحتى أهالي المدن البسطاء 

نروح لهم شغلهم ، نروح لهم بيوتهم ، نروح لهم أي مكان بس لازم نوعيهم

لازم نعلمهم إن ما ينفعش حد ياخد القرار بدالك ، ما ينفعش حد   يخوفك وبعد ما يخوفك يقولك اختار 

لازم نوعيهم علشان لما  يكونوا رايحين اللجنة وبيسألوا ندخل نعمل إيه يقولولوهم في دايرة خضرا علموا عليها واخرجوا يبقوا فاهمين إن دا غلط ومش صح

ما ينفعش 

ماينفعش ندفن راسنا في الرمل ونقول ما حصلش حاجة ، لأ حصل ، النهاردة أثبتوا فعلاً إنه مش بالبلطجية بس بتتزور إرادة الشعب 

ماينفعش حد يقول إن علشان كل علماء ومشايخ الأمة اختاروا اختيار معين في قرار " سياسي " مش ديني يبقى كل اللي يخالف الاختيار دا مش مسلم وكافر

دا حتى في أمور الدين بيبقى في اختلاف وربنا قال إن في اختلافهم رحمة لكن هم عايزين يخلوا الاختلاف جحيم

النهاردة : عايزة أرفع القبعة لشعب مصر كله اللي أثبت إنه يستحق الحرية ، والديموقراطية ، للراجل العجوز اللي ما كانش قادر ينزل السلم ورغم كده راح يقول رأيه .

لكن في نفس الوقت عايزة ارفع إيدي في وش كل واحد فاكر نفسه  وَصي على عقولنا واختياراتنا واقوله ستوب .. احنا خلعنا مبارك علشان عمل كده ، مش هنسمح لحد تاني إنه يعمل كده

الكلام دا ماينفعش
الجمعة، مارس 18، 2011

postheadericon هيييييييه ضحكت عليك وخليتك تصلي :P

استفزك العنوان ؟؟

لو استفزك كمل قراية البوست

لو ما استفزكش ، يبقى إنتَ منهم :P

من كام يوم جالي أولافين على الميل الكلام دا

" اجمد نكتة في العالم محشش شاف برج عالي قال : لا إله إلا الله ومشي شوية شاف كبارية قال : استغفر الله ................................. ومشي شوية شاف مجنون قدامه قال : الحمدلله وبعدين شاف مسجد قدامه قال : الله أكبر و مشى شوية شاف اتنين بيتخانقوا قال : لاحول ولا قوة الا بالله شفت ازاى خليتك تذكر الله و لي حسنات ولك حسنات و انت الى كنت فاكرها نكتة لوكنسلتها يبقا انت مش بتحب ربنا لو بعتها لاى حد عندك يبقا انت الحمد لله مسلم الايميلات اللى موجودة عندك "

دمي اتحرق :@

هو ذكر ربنا باللسان بس ؟ وهي  ايه الفايدة أصلاً لما أذكر ربنا وانا مخدوع أو وانا فاكر نفسي بقرأ نكتة ؟
ليه بنهين ديننا كده ؟
هو ربنا اللي هيستفيد لما نذكره ولا اللي بيذكر ربنا هو اللي بيستفيد  ؟
لو انت شايف ان ربنا هو اللي بيستفيد - وأعوذ بالله من إني افكر كده - يبقى ابعت الكلام دا للناس واتعامل مع ذكر الله بالطريقة دي
ذكر ربنا لو ماكانش بالقلب قبل اللسان يبقى نفاق
بكره جداً الرسايل اللي بنفس الفكرة دي ، وبتستفزني وبتزعلني
ديننا غالي وهم بيرخصوه بالأسلوب الرخيص دا
زي بردو لما تلاقي إيميل عنوانه اتفرج على أحدث فضائح الفنانة دينا وتدخل جوا تلاقي ذِكر ويقولك ها هاهاها ضحكت عليك وشوف انت دخلت علشان تعمل حاجة وحشة خليتك تعمل حاجة حلوة
لا والله ؟
هو راضي  عن إن الذكر أو القرآن أو أي كلام مُحترم يكون دا عنوانه ؟
حاجة مستفزة جداً وبكرهها جداً
وعلى فكرة أكتر من شيخ قالوا ان دا حرام



إذن : عزيزي الناصح اللي فاكر نفسك " ضحكت عليا " وخليتني " آخد ثواب بالعافية " .. مبروك عليك الذنوب اللي انت عمال تاخدها   ، أيوة مبروك وفرحانة فيك علشان انت ما بتفكرش لحظة في اللي بتعمله دا صح ولا غلط وبتنشر أي كلام يجيلك وخلاص







ديني غالي عليا .. أرجوك ما ترخصهوش
الجمعة، مارس 04، 2011

postheadericon مرارتي مجدداً :|

أولاً بعتذر عن الغياب دا كله بس كان غياب لدواعي صحفية وإن شاء الله أما الشغل اللي عملته في فترة الغياب دي ينزل يعجبكم

البوست دا عبارة عن كام نقطة كده هتشل لو ما قولتهمش ، بقالي كتيييييييير من ساعة ما مبارك تنحى عمالة اسمع وما اتكلمش اسمع وما اتكلمش بس امبارح اما اتفرجت على مصر النهاردة ماقدرتش امسك نفسي أكتر من كده .

- أول حاجة خطرت في بالي وانا بتفرج على مصر النهاردة هي إن " ديل الكلب عمره ما يتعدل " نفس الأصوات اللي كانت بتتكلم تشتم على المتظاهرين ، بنفس الأسماء ونفس التون لسة بتتكلم .. امبارح كل المكالمات كانت ضد شباب التحرير لحد ما تامر أمين قال إيه دا هو مافيش حد غير ضد راح بقدرة قااااااااااادر اتصلوا الناس اللي بتأيد التحرير !!! 

- رداً على اللي بيقولوا إن الثوار كانوا بيشتكوا من غياب الديموقراطية ومن ديكتاتورية مبارك ، ودلوقتي هم نفسهم ديكتاتوريين ومش بيسمعوا آراء أي حد مخالفهم في الرأي ، وأي حد يخالفهم بيخونوه  وإلخ إلخ إلخ ..

أولاً :  كل اللي شوفتهم بيختلفوا مع شباب التحرير واترد عليهم وحش او ماحدش اتقبل كلامهم كانوا بادئين كلامهم بقلة أدب 
إما " على الله تهمدوا بقى "  أو " انتوا عيال مش فاهمين حاجة " أو " خربتوها واستريحتوا "  
بالذمة دول يترد عليهم بأدب إزاي أو حتى نسمع باقي كلامهم ازاي ؟؟؟؟؟؟؟؟

ثانياً : هم أصلاً بيبدأوا اتهامهم بتخوين فمستنين إيه من اللي بيسمعهم ؟؟؟؟؟

ثالثاً : ماشوفتش حد بيختلف مع أي حد من شباب التحرير أو مؤيدي الثورة باحترام  و حد رد عليه وحش
إزاي يعني حد يبقى بيكلمك بأدب وتقوم انت تشتمه ! مش منطقية 

- ملحوظة انا قولت ما شوفتش ما قولتش ما حصلش ، انا بتكلم عن اللي حصل قدامي - 

- بيقولوا إن الشرطة غايبة بسبب اللي واقفين في التحرير ، ودا مش صحيح ، الشرطة غايبة بسبب عمايلهم السودا اللي خلت كل الناس مش متقبلاهم ولا عايزاهم ، الشرطة غايبة لأنهم خايفين لأنهم عارفين إن اللي غلط فيهم ما اتحاسبش ، وبالتالي بعض الناس عايزين ينتقموا من أي حد لابس شرطة علشان هم حاسين ان ماحدش بيجيب لهم حقهم .

- اللي بيقولوا احنا نفتح صفحة جديدة مع الشرطة علشان نشجعهم ينزلوا !!!!! ياحلاوة
يعني حد غلط وضربك ، ومستخبي منك علشان غلط وخايف لحسن انت تاخد حقك يقوم الناس بدل ما يجيبوا حقك يقولولك روح اعتذر له وكلمه كويس علشان ينزل ! أي منطق بيقول كده ؟؟؟؟؟؟
وبعدين حلوة دي ، يعني الشرطة ممكن تيجي يوم تقولك لأ انا مش هنزل أصل في حرامية في الشارع وممكن يضربونا !


- اللي بيقولوا اللي واقفين في التحرير معطلين مصالحنا ومش عارفين نروح شغلنا ممكن أفهم ليه ؟؟
هي مصر كلها بقى شغلها في مجمع التحرير مثلاً ؟؟ وبعدين التجمعات الكبيرة بتبقى يوم الجمعة كل مصر بقت تشتغل الجمعة ولا ايه ؟
وبعدين شغل إيه اللي معطلينهم عنه ، معطلينهم عن تقميع البامية في المكاتب ؟ ولا عن الفطار ؟ ولا عن النوم على المكتب ولا عن الرغي ؟
بلاش نضحك على بعض 3/4 موظفين الحكومة ما بيعملوش أكتر من كده خاصة اللي في وظائف إدارية .


- اللي بيقولوا المطالب سقفها بيعلى ومافيش حاجة عاجبة حد من اللي في التحرير ، الكلمة دي بشبه عليها من أيام ما كنا بنقول حسني يمشي :D
الفكرة ان الناس متخيلة إن الناس اللي في التحرير فاضية جداً لدرجة انهم " بيتسلوا " بالتظاهر !
يا جماعة من بعد ما الناس ماتت والمطالب واحدة انتوا اللي ما كنتوش بتركزوا ، كنتوا بتسمعوا كلمة حسني يمشي يغمى عليكوا تقريباً !

والمطالب مش تعجيزية ، المطالب منطقية جداً ماينفعش مثلاً نقول احنا هنعمل بلد ديموقراطي وهنطلق الحريات وجهاز أمن الدولة موجود بكم الناس السادية اللي فيه دي ! ما ينفعش 
لما هي هتبقى ديموقراطية سايبينه ليييييه ؟ علشان نخوف بيه الأطفال اللي ما تغسلش سنانها قبل ما تنام مثلاً ولا إيه ؟
ماينفعش نبقى بنتكلم في فساد مجلس الشعب ونقول هنمسك فتحي سرور مستشفى السرطان !!!!
دا اسمه تهريج 


- واحدة امبارح اتصلت تقول ماحدش بيسمع طلبات حد إلا طلبات بتوع التحرير وزعلانة أوي ، أقولك أنا ليه يا افندم
علشان اللي في التحرير دول ضحوا بأرواحهم وبعنيهم وبمستقبلهم علشان يقولوا رأيهم وعلشان يغيروا البلد في حين انتي كنت قاعدة في البيت متغطية ودفيانة وبتقولي يااااااااااي ازاي يقولوا كده على بابا حسني .

علشان اللي في التحرير دول معاهم حق في طلباتهم مش عايزين البلد تواصل نومها في العسل 


- أنا ذُهلت بجد من كم الناس اللي لسة عندها شك في إن شباب التحرير دول بوظوا البلد 
مش عارفة ازاي بعد كل ملفات الفساد دي ما انكشفت لسة ليهم عين يدافعوا عن مبارك ونظامه !!!!!
بجد حاجة آخر استفزاز
كل يوم بيثبت إن كل يوم كان حسني ونظامه فيه في السلطة كانوا بيطمسوا جرائم بالهبل عملوها وكانوا بيهربوا ناس وفلوس وكانوا بيزرعوا الفتنة والناس لسة بتقول ما استنوش عليه ليه 

- الناس اللي زعلانة على الفريق احمد شفيق وبيقولوا ما اديتوهوش فرصة 
ممكن أفهم عمل ايه في الـ 33 يوم اللي قعدهم ؟؟  جايب وزرا أجاااااااارك الله ومحتفظ بوزراء مستفزين جداً للرأي العام ومش كفء مثلاً علشان نقول في مبرر للمحافظة عليهم
واحد زي احمد ابو الغيط دا اللي كل تصريحاته مافيهاش أدنى قدر من السياسة ولا اللياقة ، و اهماله للمصريين اللي جايين من ليبيا وعالقين على الحدود 
دا كفاية انه لسة معلق صورة حسني مبارك في مكتبه زي ما يكون بيقول لنا بكل وضوح .. غيروا زي ما انتوا عايزين انا مش هتغير !

- الناس مقهورة أوي كأن اللي مسك رئاسة الوزراء واحد حرامي مثلاً !
الراجل شكله محترم جداً ومواقفه معروفة من قبل الثورة وفي عز جبروت مبارك كان بيقول للفساد لأ ، زعلانين ليه ؟
بيفكروني بالظبط بالناس اللي بتزعل لما حد يكنس شارعها وينضفه  !

بيقولوا احمد شفيق محترم بس ما اخدش فرصته ، خلاص ربنا يعوض عليه والأيام أكيد لو هو محترم هتثبت دا
لكن اللي جه مش وحش يعني الدنيا بتتطور للأحسن يبقى ما نزعلش ونكرر نفس الخطأ وهو الارتباط بأشخاص مش بأفعال وتصرفات ! 

- خيرت الشاطر طلع امبارح كنت فرحانة له جداً لحد ما عك في الكلام وقال إن الإخوان دورهم كان كبير في الثورة بس هم ما بيحبوش يتكلموا ويعملوا زي الشباب اللي مالهمش أي لازمة اللي طلعوا قالوا احنا مفجرين الثورة وهم كانوا في بيوتهم وقت ما مبارك تنحى 
بجد نزل من نظري جداً ساعتها  ، موضوع الاخوان دا هتكلم فيه بعدين بس عايزة اقوله يا خيرت بانت لبتك وخسرت كتير بالكلمتين دول
مش علشان وائل غنيم لكن علشان الأسلوب الرخيص دا في الكلام 
وياريت كمال علشان التذكير ندخل اللينك دا

وقال العريان في تصريحات خاصة للدستور الأصلي عدم المشاركة إلي أن الدعوة لتلك المظاهرة دعوة عامة خارجة من الفضاء الإلكتروني وبالتالي فهي مواجهة لكل مواطن في هذا المجتمع وقال أن أفراد الإخوان جزء من الشارع المصري ولهم حق المشاركة من عدمه وفق ما يترأ لهم  و لكن في الوقت ذاته لن تشارك الجماعة كقوي سياسية أو هيئة سياسية لأن المشاركة تحتاج إلي تخطيط واتفاق بين كافة القوي السياسية قبل النزول إلي الشارع.


المتابعون

اعتبرها بيتك ♥

وِش القفص

خليك ورايا

دليفري..