2011-04-11

مِن حَقي


- خواطر على هامش كتاب المرأة في الفكرة العربي الحديث - 

- رأيي في الكتاب ، وعرض سريع للكتاب هنا :

* من حقي إني ما اعلقش كل أحلامي وطموحاتي وحياتي وسعادتي على " زوج " احتمال يجي واحتمال ما يجيش ، علشان ما انتحرش لما ما يجيش بما إن كل فايدتي في الحياة إني أكون " زوجة " 

* من حقي إني استخدم عقلي بما إن ربنا خلقهولي ، ما اعتمدتش على عقل الرجل وألغي عقلي ، لأن الله لا يخلق شيئاً عبثاً ، فلو ربنا ما كانش عايزني استخدم عقلي ماكانش خلقني بعقل .

* من حقي إنك تحترمني وما تقولش عليا " مخلوق درجة تانية " و" أقل من الرجل " لأن لو ربنا خلقني أقل منك ، وعايزك تعاملني كأني " أنثى " مش كـ " بشر " ماكانش سمانا كلنا " بشر "  .

* من حقي إني أشوف الدنيا وأجربها لأن ربنا ما خلقش الدنيا دي كلها لمجرد إني اشوف منها جدران بيتي ! 

* من حقي إني أحافظ بنفسي على نفسي ، وادافع بنفسي عن نفسي ، من حقي أتعلم زيي زيك ، من حقي أتربى زيي زيك  ، من حقي أعتمد على نفسي زيي زيك .


* من حقي إني اتصرف بناءً على إرادتي أنا بما إن ربنا هيحاسبني أنا على تصرفاتي مش إنتَ !

* من حقي أقرر لنفسي ، واختار لنفسي حياتي ، شغلي ، تعليمي ، زوجي .. بما إن أنا اللي هعيش كل الحاجات دي مش إنتَ . 


حاجات كتير من حقي وانتَ واخدها مني ، باسم الدين وباسم المجتمع وباسم الحب وباسم الخوف عليا 

لكن كل دا كذب ، انت بتعمل كل دا لمجرد إنك عايز تسيطر عليا وبس .. ومن النهاردة مش هسمح لك بدا ! 

انا عارفة حقوقي ، ومش هتنازل عنها 


                                                                                                                  

رسالة على لسان أنثى شرقية اكتشفت فجأة إن الأنثى أيضاً بشر ! 


2011-04-07

حقيقة مليونية التحرير 8 إبريل

خدعوك فقالوا .. إنها مليونية التطهير 

خدعوك فقالوا ... إنها مليونية لإنقاذ الثورة مجدداً


خدعوك فقالوا إنها جمعة الثبات 


لكن الحقيقة هي إنها ...


الشعب كله جمع نفسه ورايح التحرير بكرة علشان يقول لي كل سنة وإنتِ طيبة :D

قولتلهم يا جدعان ما تتعبوش نفسكوا 

أبدااااااااااااً

قولتلهم يا جماعة انا عارفة انكم بتحبوني مافيش داعي نتحسد كده

أبداااااااااااً

قالوالي احنا عندنا كام سارة يعني علشان ما نروحلهاش التحرير

هو مبارك أعز منك يعني ؟؟

قولتلهم بصراحة بتشااااااااااائم انا صاحبة كرسي بردو :D

قالوا لأ ما تخافيش .. دا أقل واجب ومش هنتنازل عن كده أبداً 

بس لو ما كنتوش تحلفوا يا جدعان :$

بس جد الجد بقى 

أحلى هدية وصلتني السنة دي هي اللي وصلتني من ميدان التحرير مقدماً :)

شكراً لكل اللي خلوا السنة الجديدة من عمري تبتدي وأنا حاسة إن بلدي حرة

ونضيفة ، وأكدوا لي إن في أمل :)

شكراً يا ثورجية

____________________________

السنة دي مش عارفة أقول حاجة عن عيد ميلادي

يظهر كده إني خلصت كل الكلام في الكام سنة اللي فاتوا !

2010

2009

2008

2011-04-02

في أهمية لَمبة الطُرقَة



علشان أدخل المطبخ لازم أولع لمبة الطُرقَة .. رغم إنها مش بتنورلي المطبخ

لكن بتنور لي الطريق لـ لمبة المطبخ ;)