2011-08-31

يارب أنا نِفسي في عيد

يارب نِفسي في عيد من اللي الناس بتستناه دا وبتفرح بيه 

عيد من اللي الناس  بتعمل فيه لبعضها حاجات تفرحها 

عيد ألبس فيه هدوم جديدة واخرج وماحدش يقول لي ايه شغل العيال دا ؟

عيد ما اكونش خايفة فيه من أي حاجة وانام وانا فرحانة واصحى وانا فرحانة علشان هو " عيد "

أشوف فيه ناس " بحب أشوفهم " مش ناس " مضطرة أشوفهم "

وأكون مبسوطة وعايشة بجد مش " عاملة نفسي عايشة "

يارب لحد دلوقتي ما عشتش ولا عيد زي اللي الناس بتحكي عنه دا

يارب علشان خاطري .. اكتب لي حتى عيد واحد قبل ما اموت :|

2011-08-23

كيف تكسب الأصدقاء وتؤثر في الناس ؟




كتاب ممتع جداً لـ ديل كارنيجي ، مش زي معظم كتب التنمية البشرية ، استفدت جداً منه وكل ما أحس إن تواصلي مع الناس بدأ ياخد شكل سيء برجع لـ الـملاحظات الـ 11 المختصرة اللي ذكرهم الكاتب في نهايته وطلب من القراء انهم يحتفظوا بيهم في ورقة ويقرأوها دايماً .. 



1- لا تتوقع من أحد أن يتقبل منك اللوم  . لذا لا تلم أحد لأن اللوم لا يقدم ولا يؤخر بل على العكس يكسبك عداوة الناس ، بدلاً من لوم الآخرين حاول أن تتفهم موقفهم وأن تلتمس لهم العذر  ، وقبل أن تعيب على تصرفات  أحد أو نواقصه " أتمم نقص نفسك أولاً

إن الله يا سيدي لا يحاسب انساناً إلا بعد أن ينتهي أجله ، فلماذا نعجل أنا وأنت بمحاسبة الناس ؟!!! 

2 - داخل كل انسان رغبة شديدة في أن يكون شيئاً مذكوراً ، وكل انسان له طريقته في تحقيق هذه الرغبة . وكلما نجحت في إرضاء غرور الناس وتقديرهم واظهار احترامك لهم كلما أحبوك ، وكلما صرت أنجح في التعامل معهم . 
تذكر : يجب ألا تخلط بين التقدير والنفاق فالنفاق يعني أن تصف وتمدح في انسان صفات  ليست فيه أما التقدير فهو التقاط ميزة الانسان ومدحها حتى لو كانت غير ملحوظة . 

3 - لا تتكلم دائماً عما تحب أو تريد بل تكلم عما يحب الناس ويريدونه ، انظر للموضوع من موضع الطرف الآخر وفكر بطريقته وتكلم باللغة التي يفهمها تنجح في اقناعه بما تريد وتنجح في إيصال وجهة نظرك له . 

4 - كي تنال اهتمام الناس يجب أن تهتم بهم أولاً . 

5 - ابتسم 

6 - لا تنسى أن تتذكر أسماء من قابلتهم ولو حتى مرة واحدة وخاطبهم باسمهم لأن هذا يشعرهم بأهميتهم .

7 - استمع إلى محدثك باهتمام وشغف وشجع محدثك على الكلام عن نفسه .

8 - اظهر تقديرك للآخر واجعله يشعر بأهميته .

9 - لا تجادل .

10 - احترم آراء الآخر ولا تقل له أبداً أنه مخطئ .

11 - إذا كنت مخطئاً سلم بخطأك . 


2011-08-16

وأخيراً | حوار مع الجميلة رباب كساب :)


أخيراً عملت حوار مع الكاتبة الجميلة جداً رباب كساب ، بنت بلدي اللي مصبراني على القعدة فيها :D 

حوار أتمنى أنه يكون لائق بمستوى جمال كتاباتها 



2011-08-05

فودافون شكراً هع هع هع

امبارح  فودافون عملت على تويتر هاشتاج وانتظرت تغريدات مدح لفودافون 

في محاولة منها للصيد في الماية العكرة بما إن الناس غضبانة على موبينيل بسبب تويتة ساويرس الشهيرة :D
لكن الهاشتاج جه على دماغها وكل الناس قالت فيها العِبَر :

ملحوظة كل الكلام الجاي عبارة عن تجميع لأفضل التويتات على تويتر :



Thanks for claiming you inspired the revolution when in fact you caused the death of martyrs by
cutting off communication.


- أشكر فودافون عشان لما أفرج عني فـ 28 يناير ما عرفتش أوصل لأمي وأبويا ولأهلي"

- مع خدمة متخلونيش اعيط .. فودافون بتترجى تويتر تسحب الهاش تاج و دار ما دخلك شر

- ما انتى لو كنتى شركة فيكى دكر ما كانش ظابط امن دولة بلاسلكى يقفلك باشارة ,,, اه يا شركة رمم

-  شكراً على مساعدتك لأمن الدولة قبل الثورة في تحديد أماكن الناس عن طريق شرايح موبايلاتهم وتسهيل

اعتقالهم

- أحب اشكر فودافون على الاربع أيام اللي قعدتهم مش عارفة حاجة عن أهلي و صحابي أما وافقوا يقطعوا الخطوط

- احنا متشكرين على كل مكالمة تليفون اتصنتوا عليها دخلت واحد المعتقل ومات جوة وأهله دايخين عليه لغاية دلوقتى

- أحب أشكر فودافون على إني يوم جمعة الغضب ما قدرتش أعرف أخويا عايش ولا ميت بعد موقعة قصر النيل وعشت أصعب ساعات في عمري

-
شكرا لتعاونكم معنا طيلة العشرة سنوات الماضية .... امضاء جهاز امن الدولة

- شكرًا أنكم أثبتم ازاي ممكن شركة تساهم في قتل شهداء وتمشي في جنازتهم وتقول ساهمت في الثورة! انتم أحط نوع من السلوك البشري!
- شكرا لأنكم قطعتم عننا الخدمة وانتم اللي اخدتم التعويض
 
- شكرا علي البرايفت نمبر لضباط أمن الدولة عشان يكلمونا منها

- شكرا بجد التاكسي اللي وصلني بعد ما نزلت من عربية الترحيلات يوم 28 ومرضيش يأخذ اجرة.. هو وقف مع ناسه وأنتم وقفتم مع النظام 
- بلغ عني شكراً .. اقتلني شكراً

- شكراً على اسوأ خدمة عملاء في العالم ؟؟

- للهم اني صائم..يا رب الهاشتاج دا يستمر لبعد الفطار عشان اقولكم شكرا بجد

- شكرا على انكم بتدوا فلوسنا لعادل إمام وسمير غانم عشان تعملوا شوية اعلانات تافهة ومبتذلة

- مع مشروع ساعدنى شكرا .. فودافون هتلم قرشين من كل مواطن عشان يجيبو مناديل كلينكس علشان تلم بيها كرامتها المتبعترة  
والمزيد المزيد المزيد

- شكراً انكو ماحسيتوش بأي ذنب بعد الثورة و لسة زبالة زي ما إنتو و بتسرقو عادي ولا أكن حصل حاجة

- شكرا .. انا بجد كنت بدأت اتناسي اللي حصل .. شكرا انكم فكرتوني باللعبة القذرة اللي حصلت 
**********

 و أخيراااااااااً أحب أهدي فودافون أغنية : تترجى فيااااااا تبكي علياااااااا مش ممكن يوم أقدر اسااااااااامح :P

2011-08-01

دلعها



لأن مالكش غيرها في الدنيا لازم تدلعها .
لأن كل الناس اللي حواليك بيروحوا ويجوا .. إلا هي لو راحت مش هترجع تاني لازم تدلعها .
لازم تحبها ، لازم تتقبلها بكل مميزاتها وعيوبها
لازم تعرفها كويس ، تكون حنين عليها ، تكرِمها ما تسمحش لحد يهين كرامتها .
اسمع لها ، واتكلم معاها ، ما تخبيش عنها حاجة .
اعمل لها كل فترة حاجة حلوة انت عارف انها بتحبها .
رَيّحها ، حسسها بالأمان .
اعزمها في مكان بتحبه ، لوحدكم .
ما تجيش دايماً عليها وعلى راحتها علشان خاطر الناس .
احترمها وخلي الناس تحترمها .

أرجوك .. دلع نفسك .

لأن ليها حق عليك ، وعمرك ما هتقدر تكون كويس مع الناس إلا لو كنت كويس معاها .