2012-01-30

أنا


دلوقتي، أنا الحمد لله، كويسة جدًا..
مرتاحة نفسيًا، مبسوطة، واثقة في نفسي، متطمنة على بكرة
متفاءلة، واثقة في ربنا
جميل.. لكن أنا مابقتش عارفة سارة كويس!
مابقتش بلحق أقعد معاها، وأعرف هي عاملة إيه دلوقتي بالظبط؟
حاسة بإيه؟ بتحب إيه؟ بتكره إيه؟
في حاجات بحبها اللي حواليا هم اللي بيفكروني إني بحبها! 
أنا مش مركزة!
في أي حاجة خالص..
كان طبيعي بالنسبة لي إني ما اكونش مركزة أوي في الدنيا حواليا، لأني مركزة جوايا أكتر
دلوقتي أنا مش مركزة في أي حاجة خالص.. لا حواليا ولا جوايا
حاسة إني ريشة في هوا فعلاً!
إحساس لطيف هو، مُريح، 
بس مش مطمنني!
مش طبيعي إني ابقى مش هنا.. ومش هناك.. ومش في أي حتة!
لأن دا بردو معناه إني مش هروح لحتة!
أنا وصلت لمرحلة إني عايزة أمسك ورقة وقلم، واكتب فيهم اللي انا فاكراه عن نفسي!
بس مش لاحقة
طيب بتعملي إيه ياسارة؟
ولا حاجة!
باكل وبشرب وبشتغل وبنام!
عندي أكتر من 12 ساعة فاضيين في اليوم  وحاسة إني مش فاضية!
بقيت بعشق النوم  باستفزاز! لدرجة إني لما اكون بحلم حلم حلو واصحى، بنام تاني متعمدة، وأرجع للحلم تاني كأني مش بحلم
كأني بتفرج على فيلم وبعمل resume
حاسة إني مش بحلم.. حاسة إني بشتغل نفسي أصلاً
بس أنا مش تعبانة.. أنا مش متضايقة، أنا مش زعلانة
أنا بس .. مش حاسة بحاجة أصلاً !

هناك 12 تعليقًا:

  1. و هو في حد حاسس بحاجة الأيام دي أصلاً ؟!

    ردحذف
  2. حاله اللامبالاه وعدم الشعور بأى حاجه دى
    بتكون اسوء بكتير من ان يكون الواحد مضايق اصلاً !!!

    ردحذف
  3. دا اكتئاب على فكرة وممكن يكون النوع المرتبط بفصل الشتاء والله اعلم

    الحالة دى مرت عليا قبل كده ومتستغربيش نفسك قدامك ايام وربما ساعات وتدخلى فى نوبة بكاء بلا سبب وعلى اى سبب فعلا بس يارب بعد الشر عنك وتروقى قوام ولا يجعل لك بكا ابدا يارب

    ردحذف
  4. اول زياره للمدونه
    وشكلنا هنبقى اصحاب
    اصلي بموت في اللسعاااااان
    بصي يا جميل
    اهم حاجه انك مرتاحه
    متحاوليش تفسري اي حاجه
    بس فكري وركزي في انك مرتاحه
    سيبي الامور تمشي زي ما هي
    حاولت تستغلي كل لحظه
    وقللي من النوم بسسسسسسس
    واستمتعي يا جميل
    :):)

    ردحذف
  5. ايه الحالة الغريبة دى يا سرسر ده زهايمر ولا اكتئاب
    عموما ده طبيعى فى المرحلة اللى احنا بنمر بيها دلوقتى
    وحشتينى اوى ووحشنى كلامك

    ردحذف
  6. ساره إزيك ؟
    يا رب تكوني بخير إن شاء الله


    هي دي صورة لولو الصغيرة ؟؟

    كذا مرة ابقى عاوز اسألك وأنسى بصراحة ، ولا أنا سألتك قبل كده ؟؟


    سلام

    ردحذف
  7. اللي احنا فيه اصلا يجيب اكتئاب

    ربنا يفرج عنك ان شاء الله
    تقبلي مروري من اختك ريري المكتئبه الثانيه

    ردحذف
  8. سارة
    على رأيك :(

    بنت من الزمن دا:
    جدًااااااااااا والله

    مامة مازن:
    تفتكري؟ انا مش حاسة اني مكتئبة
    بس قد تكون دي مرحلة جديدة من الاكتئاب

    نور
    منورااااااني حبيبتي
    بصي .. هو انا مش مرتاحة بالظبط.. بس مش تعبانة ! فاهمة قصدي؟
    يعني انا مش حاسة بطمأنينة ورضا مثلاً
    بس مش حاسة اني تعبانة ومخنوقة بردو

    ردحذف
  9. شفشوووووقتي وحشتيييييييييني اوي
    مممممم مش عارفة دا ليه علاقة بشقلبة كيان البلد ولا ايه :(

    شريف باشا :)

    منورني مين لولو ؟

    ريري

    ياااااااااارب يا ريري يااااارب

    ردحذف
  10. أنا أقصد الصورة اللي في البوست ، طب شوفي اللينك ده :

    http://www.youtube.com/watch?v=HiDhB2xyKRY


    :)

    ردحذف
  11. على فكرة الذ حاجة انك تعيشيها كدا زى ما تيجى احيانا التخطيط الكتير بيبوظ احساسنا بتلقائية الحاجة

    ردحذف

Say something...