لعلمك

لعلمك

إقرأ لي

دخلوا بكليك شمال :D

Blog Archive

الخميس، أبريل 19، 2012

postheadericon 2 X 1

ملحوظة: كل الكلام اللي هنا وجهة نظر شخصية بحتة، من مواطنة عادية جدًا، مش محللة سياسية ولا خبيرة استراتيجية، من الآخر.. دي وجهة نظري باختصار في حازم أبو اسماعيل.
مش مطلوب من حد يآمن على كلامي، مش مطلوب من حد يتفق معايا، مش مطلوب من حد يعتبر كلامي دليل على أي حاجة..

- امتى سمعت عن أبو اسماعيل؟؟

* في ليلة من ذات الليالي، سنة 2011 قررت اسمع راديو تاني، من باب استعادة ذكريات المذاكرة، لقيت إذاعة الشباب والرياضة، مستضيفة واحد، بتقول مرشح محتمل للرئاسة.. اسمه "حازم صلاح أبو اسماعيل".
أنا كـ واحدة عايشة في مصر، وأزعم إني متابعة إلى حد ما اللي بيحصل في البلد، كانت أول مرة بالنسبة لي اسمع اسمه.
لكن فوجئت في أول دقيقتين بيه بيقول، إن مافيش حد في مصر ما يعرفنيش !!! 
(عودة إلى مرحلة 99.9 % ) !!!
طبعًا اتريأت عليه! طالما بتقول كده وانا ما اعرفكش، يبقى يا إما أنا (المواطنة سارة) ماحدش! ، يا إما مش في مصر، يا إما انت بتبالغ!

* في نفس الحلقة، أتحفني بعدد رائع من الآراء الأروع في المرأة ! - كعادة معظم المتأسلمين، كل مشاكل الكون في المرأة !! - أتحفني بآراء رائعة عن إن الست مش بتشتغل إلا للحاجة المادية ! (رغم إن امه دكتورة )، وإنه مش هيطلع قانون يمنع عملها، لكن مش هيخليها محتاجة تشتغل، ( ومش عارفة كل الوظائف اللي لازم ست تشتغل فيها دي هيعملوا فيها إيه )، وإن عمل المرأة هو سبب مفسدة البيوت، ( رغم إن امه كانت بتشتغل)، وإن الراجل مش مسؤول عن تربية الولاد، الأم هي المسؤولة الوحيدة عن كده!!
وغيرها كتير من الآراء اللي خليتني أشد في شعري وانا بسمع فعلاً !! 

* سمعت عدد لا نهائي من كلمة "أنا"، ثقة مفرطة بالنفس، واصلة للغرور ! لدرجة إن المذيعة سألته في حاجة قالها انتِ بتكلمي رئيس مصر القادم حاسبي على كلامك !! 

(ملحوظة دورت جاهدة على الحلقة للأسف مش لاقياها ياريت لو حد عنده اللينك بتاعها يبعته، أنشره علشان يكون الكلام موثق)

خلاصة الموضوع، بعد الحلقة انطباعي عن الشخص دا كان يتراوح ما بين (زفت - منيل بنيلة)
ودا يثبت ذكاء سياسي ما حصلش! لما تفقد شريحة مهمة زي المرأة في المجتمع وانت عايز تكون رئيس لدولة، مش للرجالة بس يبقى انت فعلاً عبقري!!!

- ليه رافضة أبو اسماعيل؟؟
السؤال بصيغة آل أبو اسماعيل ( لماذا تخافون من تطبيق شرع الله؟ ماذا رأيتم من الله حتى تكرهون شرعه ؟ )

* والسؤال جواه الإجابة بالظبط ! 

- أولاُ: لأن مافيش حد هيجي هيبقى هو ممثل شرع الله في الأرض
- ثانيًا: اللي خايف مش خايف من شرع الله، خايف من اللي بيقولوا إنه شرع الله !
- ثالثًا: لأن الخلط الرهيب دا، والكلام باسم الدين، هيخلق نظام ديكتاتوري أصيل غير قابل للنقد، ونقده هيعتبروه نقد لـ شرع الله!
(حدث بالفعل إن واحد كاتب على الفيس بوك كلام خالي تمامًا من أي سخرية، ولا شتيمة، ينتقد فيه فقط موقف أبو اسماعيل فكان الرد من أحد "أبناء أبو اسماعيل" "إنت يا إما مش مسلم يا مش مصري(!) حسبي الله ونعم الوكيل فيك "

- رابعًا: أبو اسماعيل نفسه شخصية - زي ما وصلني من انطباعات من خلال اللقاءات اللي شفتها ليه - مغرور جدًا، معتقد تمامًا إنه الحل الوحيد والفظيع لمشاكل مصر.. شخصية بالغرور دا والاعتزاز الرهيب بالنفس وبرأيه هتتقبل نقد إزاي؟؟؟؟؟؟؟؟؟

- خامسًا: بشهادة اللي بيفهموا في الاقتصاد الراجل هيودينا في ستين داهية ! أنا ما بدعيش الفهم في الاقتصاد، لكن لما الناس اللي بتفهم، فندت برنامجه الاقتصادي اكتشفت انه كارثة ! منتهى الرجعية والسطحية.

- سادسًا: التشبث الفظيع، والإصرار الرهيب دا على الكرسي مش مبشر نهائيًا، لا بإنه هيكون في تداول سلطات، ولا بإنه مدرك المسؤولية المقبل عليها!!
أنا لو مكان أي مرشح للرئاسة أبقى مرعوبة من المسؤولية اللي انا مقبلة عليها، ولا هو فاكر نفسه أحسن من سيدنا عمر؟؟؟
اللي فعلاً فاهم معنى المنصب دا صح ما يبقاش منشكح في كل لقاء وفاتح بقه من الودن للودن وهو بيتكلم ويقول "أنا رئيس مصر القادم"!!

- سابعًا: المفترض إنه مرشح إسلامي، إذًا إنت أكيد مؤمن إن الحجاب فرض، في دعايته الانتخابية.. مالقاش أي مانع إنه يستخدم بنت مش محجبة علشان تقول "هنتخب أبو اسماعيل علشان مش هيحجبني غصب عني".. إذن.. إما انت مقتنع إن الحجاب مش فرض، ( على عكس اللي قاله في برنامج تليفزيوني ) إما انت مستعد تعمل حاجة مش مقتنع بيها علشان توصل لغرضك!! 

- ثامنًا: من يوم استفتاء الدستور وأنا أصلاً مش طايقة لا الإخوان ولا السلف، علشان هم السبب في تشتت الميدان لحد النهاردة وكل اللي حصل لنا، لأنهم روجوا لفكرة  "نعم للدين" ! وهم اللي بعدها اتخلوا عن الميدان، ونزلوا مليونيات لدعم المجلس العسكري، وهم اللي فرطوا في دم ولادنا وأعلنوا الولاء للمجلس العسكري، وهم اللي فرطوا في عرض بناتنا بردو إرضاءً للمجلس العسكري..
الناس دي اللي شوهت صورة الثوار والنشطاء فقط لأنهم قالوا "لأ للدستور"
كل دا علشان "مصلحتهم وبس" دلوقتي
بعد استبعاد ابو اسماعيل والشاطر افتكروا ان كان في ثورة في البلد دي، وافتكروا ان نظام مبارك لسة بيحكم، وافتكروا ان التظاهر ضد المجلس العسكري مش حرام شرعًا، وافتكروا كل دا إذا فجأة كده!!!
النقطة دي يفسرها المقال دا باحترافية (أولاد أبو اسماعيل .. للفاشية شروط )  - الرابط هيفتح في نافذة جديدة علشان كارهي هش من هنا يا حرامي D: 
إذن الناس دي بتفضل مصلحتها على مصلحة الوطن! طب ازاي انتخب منهم رئيس؟؟؟؟
إزاي انتخب حد كان رد فعله على منتقديه "موتوا بغيظكم" اللي هو أنيل بكتير من "خليهم يتسلوا"!!!
كتير بعذر الإخوان والسلف على اللي هم فيه، نظرًا لإقصائهم سنين.. لكن دا مش معناه إني اودي البلد في داهية لأنهم محتاجين يتأقلموا نفسيًا مع فكرة إنهم بقم بيتعاملوا مع المجتمع كله مش جوا الجماعة وبس!!
كمان الموضوع مش موضوع دين وشريعة، خاصة بعد ما الإخوان نزلوا بالشاطر، طلع فورًا بوستر "رشحوا الشاطر احنا هنرشح الأشطر)

- تاسعًا: بخصوص جنسية والدته، أولاً موقفي من الشرط دا متذبذب.. ساعات أحسه منطقي، وساعات أحسه ظالم، لكن أيًّا كان رأيي فيه، هو قانون قائم، وموجود ولازم يحترم زي ما بيسري على الجميع.
دا لو عايزين فعلاً نأسس لدولة قانون ونرجع هيبته تاني، مش نعيش زي الأول...
المهم.. بغض النظر عن أي حاجة، وبغض النظر عن إن اللجنة المشرفة على الانتخابات الرئاسية - عفوًا في الكلمة بس هو دا التعبير الوحيد المناسب - ملعوب في أساسها، واضح جدًا إن الأدلة صحيحة! خاصة بعد الجعجعة المطولة، والحشد، والحسبنة، والدعاء على اللي ظلموه، والعياط - حسب كلام السرساوي  - ونظرية المؤامرة، وإلخ إلخ.. كل دا من غير ما يطلع "مايُثبِت" اللي هو بيقول عليه !
إذن كل دي وسائل معروفة جدًا للغلوشة على الحقيقة ! اللي في مستندات رسمية طلعت النهاردة بتقولها.

هنا في كام تعليق:

الأول: محتمل جدًا، إن العسكر يتعاملوا مع مؤيدي أبو اسماعيل، المعتصمين واللي بيعملوا مظاهرات، وبيروحوا التحرير، زي ما عملوا مع معتصمي التحرير، ومجلس الوزراء، ومحمد محمود، وإلخ..
إذن .. لو انت فعلاً معاك ما يثبت، وساكت كل دا، ومعرض الناس دي للخطر، وللموت.. فانت إنسان غير أمين على مؤيديك أصلاً!
ومافيش أي مبرر للوضع دا

الثاني: لو انت فعلاً عايز من الترشح فقط، مصلحة البلد، يبقى تهدا، وتجتمع مع مؤيديك، وتتوافقوا على مرشح آخر، وتدعمه باقتراحاتك ورؤيتك وبوستراتك وكل حاجة علشان ينقذ البلد بناءً على رؤيتك (زي ما انت شايف إنك هتعمل)
خاصة وإن نزولك الانتخابات مش معناه الفوز، لأن دا معناه إنك بردو عايش في نفس نظرية الـ 99.9% !
لكن الإصرار الغريب دا على "شخص واحد" بيؤكد إن الموضوع مش موضوع مصلحة البلد!

تعليق تالت بقى، على جو.. أقسم، وحلف وعيط والكلام دا.. ما يأكلش عيش!
على كده نجيب مبارك يقسم لنا هو كمان إنه ما قتلش حد ونخرجه براءة وهييييييييييييه بقى!!
إذا كنا عايزين دولة محترمة، لازم نتعامل بالمستندات والورق وبس..
لو مظلوم، مافيش داعي للجعجعة اللي لا هتقدم ولا هتأخر، الحكومة مش هتقول انا زورت، علشان حازم عيط! 
لو مظلوم قول أنا مظلوم، وهروح اثبت حقي بس.. لكن لو اللجنة اتراجعت في قرارها علشان المظاهرات يبقى عفوًا بقى مش لاعبين!!
كده الحكاية بالأعلى صوتًا!!
وممكن مبارك يجيب ناس أكتر تتظاهر وياخدها بالأغلبية بقى!!

تعليق رابع:
الإيمان الفظيييييييييييع بإن الكون كله تآمر علشان يمنع حازم أبو اسماعيل من الترشح للرئاسة!
لإن أمريكا وإسرائيل ركبهم بتخبط في بعض علشان هو "اترشح"، لأنه هيقطعهم وهتموووووتي يا سوسو (إسرائيل)
ماشفناش يعني رد من أبو اسماعيل وأتباعه على مقتل الجنود ع الحدود على فكرة!!
إضافة إلى إن أمريكا أصلاً متأكدة إن نظام حكم زي نظام أبو اسماعيل هيودينا في ستين داهية، علشان كده متأكدة إنها بتتمنى له التوفيق من كل قلبها !

* موضوع  أبو اسماعيل دا بقى أظهر إننا سنحيا 2X 1  !

- البرادعي عميل، وهيقلع أمهاتنا الحجاب علشان اشتغل في أميركا، في حين إن أبو اسماعيل مظلوم، وهيطبق الشريعة وأمريكا خايفة منه وامه أصلاً أمريكية واخته عايشة هناك!!!!!!!!!!! 
- ألا صحيح لما هو خِطِر كده على أمريكا سايبين اخته هناك ليه؟؟ - 

- علاء الأسواني كان ابن ستين في سبعين لما قال لأ للتعديلات الدستورية، وكاتب فاسق وفاجر وهيروح جهنم حدف... لكن لما أعلن رأيه بصراحة، وإنه متضامن مع أبو اسماعيل وإن اللجنة مشكوك فيها بقى أخ فاضل وأستاذ وبقوا يستشهدوا بكلامه !!
- ياحلاوة- 

- إنك تنشر صور بنت مش محجبة على النت حرام، لكن لما تنشر صورة بنت مش محجبة بتدعم أبو اسماعيل دا مش حرام !

- إنك تقول كلام من غير ما تتأكد من مصدره عن أبو اسماعيل حرام، لكن لما تدعم أبو اسماعيل بكلام على لسان شخصية ما قالتهوش فمش حرام!!
(أي حد يقول حاجة ضد أبو اسماعيل فهو فاسق ويجب أن نتبين، لكن لو بيقول كلمة حلوة في حقه يبقى ربنا هداه ونور بصيرته)

وغيرها وغيرها مليوووووون موقف ازدواجي ابن تيييييييييييت، بيثبت حاجة واحدة بس.. هم مش شايفين غير اللي هم عايزينه، وعندهم استعداد يعملوا أي حاجة علشانه! 
واللي كده ما يفرقش كتير عن الحزب الوطني، وإن كان أسوأ لأنه كمان بيستغل الدين وبيشوهه


* للأسف دا بعض من كل اللي في قلبي من ناحية الموال دا.. ورغم إن الوضع فاقع مرارتي، لكن أنا مبسوطة.. لأنه كان لازم دا يحصل علشان الناس تعرف الحقيقة.. وحتى لو أبو اسماعيل دخل انتخابات ونجح وحاول يعيش بالمنطق دا واثقة إن الشعب مش هيسكت
مرحلة  ولازم نعدي بيها، للأسف كل ما بنتأخر كل ما الوضع بيتفاقم.. لكن قدر الله وماشاء فعل 

* ميرسي مقدمًا على الشتايم اللي هتوصلني :) الدليل المليون على الازدواجية المتمتعين بيها 

* بالمناسبة : ديننا بيقول، إن المؤمن ليس كذابًا ولا منافقًا ولا شتامًا ولا لعانًا :))

* بالمناسبة بردو: ديننا بيقول إن اللي بيكفر إنسان، هو بيفتري على الله وبيدعي عليه، بالتالي هو اللي بيكفر مش الإنسان اللي بيكفره :)

لينكات ع الهامش : 

5 بوينتس أوف فيو:

farah mohamed يقول...

هاي يالاسعه معاكي بقي فرح ام اللسعان كله علي فكرة انا موافقي جدا لاني بردو مش عارفه ابو سماعين ده بقي عامل زي عفريت العلبه كل ماامشي خطوة الاقيه في وشي انا كنت بردو عامله عنه كلمتين كده بس الخلاصه ........ عموما احلس سلام لاحلي لاسعه واسمع سلام شحط محط تتتتا ترارا اه ترارا رارا اه ههههههه

غير معرف يقول...

السلام عليكم . كيفك سارة
انا اتفق معكي تماماً . والغريبة انه يعمل من انصاره وكأنه المختار ولا حول ولا قوة إلا بالله
وكما قال الشعراوي رحمة الله عليه وان وجدتم رجل دين يستميت علي المنصب فلا تولوه

ربنا يتولانا فأنه نعم المولي ونعم الوكيل
وسعيدة بكتاباتك وبمعرفتك واتمنالك التوفيق

Tarkieb يقول...

انا سمعته من زمان لما حرم البيبسي وفتي بكل ثقة ان اختصار بيبسي هو ادفع كل بنس لاسرئيل...ابو اسماعيل نموذج لشيوخ الموالد اللي كانو بيطلعو يحكو اي حاجة بدون اي مرجع ويقولك ورد في الاثر ودش يا ابا وقول اي حاجة ومحدش حيراجع وراك عشان كدة اتباعه بيحسوبه علامة وهو غلبان وكل كلامه هجس

مامة مازن يقول...

منه لله
ومنهم لله
هؤلاء حسبى الله ونعم الوكيل عليهم
ودولهم فوضت الامر فيهم لله
واياهم ربنا يقتص لنا منهم
واللى هناك ربنا يكفينا شرهم
ودول ربنا يهلك الظالمين بالظالمين ويخرجنا من بينهم سالمين

ودول حموا الثورة ودول ماتوا اثناء الثورة
ودول الثورة نفعتهم وكسبوا من وراها المناصب والجاه
ودول الثورة طحنتهم وغلت عليهم الهوا اللى بيتنفسوه
دول بيتخانقوا ع الدستور ودول عايزنها دينية ودول عايزينها مدنيه
دول عايزينها علمانية وتحيا التجربة التركية
دول بيحلموا بيها غنية ودول عايزنها تفضل غبية
دول نفسهم ترجع بهية ودول هيهربوا لاحدى الدول الشمالية
دول خايفين من دول
ودول كارهين دول
ودول شايفين ان دول ميهمهومش دول ابدا ان شالله يموتوا دول ما احنا كلنا فداء الوطن

الحقيقة بقى ان لا دول ولا دول لاقيين الوطن اللى بيحلموا بيه

دول ودول ودول بيدوروا على وطن
وطن يحتوى كل دول

المشكلة ان الوطن موجود لكن دول ودول بيقطعوا فيه
ونسيوا دول(المواطن المصرى الصابر القانع الراضى الشاكر رغم كل الصعاب)

فادعى معايا ان دول ودولهم يحسوا بالشوية التانيين دول ساعتها بس هنقدر نعمل وطن بيحلم بيه دول ودول وكمان دول


فهمتى حاجة بقى من الكلمتين دول

Serenity :) :) يقول...

بصراحة جامد..لما قرأت البوست التحفة ده جه على بالي بحاجتين:
أولاً:إني مش بفهم أي حاجة ف أي حاجة ف السياسة وصعب عليا أفهم الأدمغة دي!
ثانياً:إني بكتشف إني ساذجة جداً لدرجة إني بصدق بعض الكلام اللي الشخصيات العامة بتقوله ^^

والله يا بنتي اللي هيعمل حاجة تؤذي مصر فالأيام دول وهتترد له..ببساطة; لأني مش بدأت أكتشف الدنيا متأخر أوي ^^

المتابعون

اعتبرها بيتك ♥

وِش القفص

خليك ورايا

دليفري..