لعلمك

لعلمك

إقرأ لي

دخلوا بكليك شمال :D

Blog Archive

الأحد، أبريل 08، 2012

postheadericon # 23



# 1

" بنتولد مش عارفين.. بنتولد مش خايفين"

بحاول أتقبل فكرة إني خلاص.. ما ينفعش أدور على الأمان تاني
لأني مستحيل هلاقيه! 
مستحيل أعرف اتطمن بعد كل العمر دا !
كل يوم بيعدي، بنعرف فيه أكتر، ونخاف أكتر.. كل ما نعرف حاجة نخاف زيادة
يا نخاف منها .. يا نخاف عليها.. يا نستناها تحصل واحنا خايفن تحصل، يا نستناها تيجي واحنا خايفين ما تجيش !

"بنتولد دفيانين.. بنتولد صافيين.. بنتولد صادقين.. كما زرعة خضرا في أرض طين"

# 2 

مش عارفة ليه بتطاردني.. " يا سنيني اللي راح ترجعي لي.. ارجعي لي شي مرة ارجعي لي .. وخديني ع باب الطفولة ..........."
بقالها أكتر من شهر.. رغم إني مش عايزة حاجة ترجع.. بالعكس.. أنا كل ما ابص ورا للسنين اللي فاتت أجري تاني لقدام، علشان أبعد عنها بأقصى سرعة ممكنة...
يمكن أنسى !

# 3 

مش عارفة الحالة اللي انا حاسة بيها من فترة دي هتخلص امتى؟
حالة رهيبة من الـ "مش بجد"
كل حاجة حاسة من جوايا إنها مش بجد !!
فرحة / خوف / وجع / نجاح / أمل / حب / إعجاب / مستحيل ........
كل حاجة.. كل حاجة حاسة إنها مش بجد! 
ومش عارفة أحس بحاجة ناحية أي حاجة بتحصل.. رد فعلي الأول على أي حاجة "دا مش بجد صح؟"
وما بصدقش لما حد يقولي إن دا بجد.. ما بصدقش حتى لما اشوف إن دا بجد
الحاجة الوحيدة اللي جد .. للأسف.. هي البرد !
# 3 - 2
أنا !
 أنا رقم 3 
الفرحة المكررة.. الدهشة المعدومة.. الحاجة اللي مش لازم.. فبتبقى حرة :)
دايمًا في قبلي اختيارين.. وانا الاختيار التالت.. اللي ممكن ما يجيش
واللي غالبًا .. بيكون الاحتمال المستبعد 
# 4 
الرقم اللي ماجاش.. اللي ساعات افرح انه ما جاش.. وساعات أزعل
ساعات أحس انه  كان هيفرق في الحياة، وساعات أحس إنه كان هيزيد الطينة بلّة
وعمري ما هعرف أبدًا أي إحساس فيهم الصح.. لأنه ببساطة.. ما جاش !

# 5 

زرعت بصلة :)
فرحانة جدًا بيها.. رغم إني زرعتها كبيرة.. ورغم إني ما ببذلش أي مجهود في إني أخلي بالي منها.. بس فرحانة بيها
كل ما أشوفها بتخضّر قلبي يخضَّر معاها :)
كل ما تتقسم.. فرحتي تتضاعف.. بقالي كتير ما شفتش ميلاد ! 

# 6 

6 / إبريل عيد ميلاد عبد الرحمن ابن جيراننا :)
مش عارفة عنده كام  سنة.. بس فاكرة كويس أوي إنه اتولد يوم 6 إبريل
عبد الرحمن هو ابن جيراننا اللي جه بعد صبر 14 سنة أو أكتر
لما جه بقى فرحة الشارع كله.. كان بالنسبة لنا تجسيد الصبر، المستحيل، الأمل، الإصرار
والفرحة اللي بجد.. اللي طعمها حلو اوووووووووووي بعد سنين مرارة :)

# 7

نظرية "الحصة الـسابعة"
نظرية اتوصلت لها مؤخرًا D:  بعبقريتي اللي مالهاش حل
نظرية الخطوة الوحيدة اللي فارقة بين التعب والراحة / بين وصولك لأملك، وتعبك في الوصول إليه
الخطوة اللي بيكون فيها بواقي عزيمتك، وفتافيت صبرك..
كنا دايمًا بكره الحصة السابعة.. خلاص بكون اكتفيت من كل حاجة في المدرسة
وتعبت مش قادرة استوعب حاجة تانية.. وحاسة إني قريب جدًا من الراحة / اللعب / الهزار مع اصحابي
كل اللي واقف بيني وبين كل دا .. الحصة السابعة !!
طبيعي جدًا أبقى كارهاها.. وطبيعي أكره المدرس اللي بيدرسها شخصيًا
وطبيعي كل ثانية فيها تعدي كأنها سنة !
إحساسي بامتحان آخر مادة، امتحانات آخر تيرم في الكلية، وآخر ربع ساعة في الشغل، وآخر كل حاجة فارقة في حياتي.. هو إحساسي بالظبط بالحصة السابعة !

# 8

عمري ما شفت كل العلامات عند دكتور العيون !!!
حاجة عبيطة بس فارقة في نفسيتي.. احساسك بإنك عاجز عن إنك تشوف حاجة قدامك، وحد قدامك عارف إنك عاجز عن إنك تشوفها!
ببقى مرتبكة كأني في امتحان.. كأني عاملة عملة.. احيانًا كنت بستعبط وبخمن علامة ولا اتنين  لإنقاذ ماء وجهي بس  :D

# 9

 إيه اللي انا عملته في نفسي وفيكم دا !!!

# 10

2010 هي أحلى سنة عشتها في حياتي... نفسي العمر كله كان يبقى زي أول 2010 وأواخر 2009
بس للأسف مافيش حاجة بتدوم :(

# 11

نفسي أتعلم الخط العربي أوووووووووووووووي

# 12

لسة نفسي في بيت، وباراشوت، وأمان، ودفا

# 13

نفسي أعيش في مدينة البط.. حتى لو هتبقى حياتي موسومة بالرقم 13 زي بطوط

# 14

واحشني رفعت اسماعيل أوي :)
واحشني فتى أحلامي العجوز العصبي اللي بيعرف يحب زي ما انا فاهمة الحب !

# 15

بحب أنتكة لأنه بريء.. ومش فاهماه.. ومش فاهمني.. بس بيحبني
بحب أنتكة لأنه غريب :)
وبحبه لأنه بيحسني.. وواثق في قلبي مهما حاولت أرسم قدامه وشوش :)

# 16
مش عارفة إمتى هبطل آخد الحياة بلهوجة
امتى هروق كده واستمتع بطعمها.. وطعم كل حاجة استعجالي بيخليها تعدي كأنها ما جاتش !!!

# 17

السنة اللي فاتت، حققت كل قائمة أمنياتي ما عدا حاجتين.. هم أهم حاجتين أصلاً، ولو اتحققوا مش هبقى عايزة حاجة تانية
السنة دي مش هحط قائمة.. أنا بس هدعي ربنا بحاجة واحدة.. تحقق الحاجاتين دول :)

# 18
رحت الكلية من كام أسبوع، وحضرت محاضرة لدكتور بحبه وبحترمه جدًا :)
كل ما كنت بطلع سلمة من سلالم الكلية، كنت بحس إني بصغر سنة
لما طلعت الدور الأخير.. اللي فيه القسم بتاعنا.. ولقيت نفسي لوحدي، وحاسة إني غريبة
حسيت كأني أول يوم في الكلية :)
وانا لوحدي.. تايهة ومتلغبطة.. مش عارفة رايحة على فين، ثقتي في اختياري مهزوزة إلى حد ما :)
بس عدت وعشت في الكلية أحلى سنين حياتي :)
دلوقتي.. مفتقدة اصحابي .. مفتقدة عيد ميلادي اللي كان بيتعمل في الكلية :) مفتقدة البلالين والفيشار والهدايا واللعب
والصور
يارب يفرح قلوبهم زي ما فرحوني ياااااااااااااااااااارب ♥

# 19
بصيت لروحي فجأة تعبت م المفاجأة :D
19 سنة أول سنة اتصدم فيها بسنين عمري.. من كتر ما حصلت تغيرات جذرية في شخصيتي وحياتي في سن18
كتير بحس إني واقفة عند السن دا.. وفضلت طول ما اانا عندي 19 فاكرة نفسي وبقول اني 18
لحد ما وصلت عشرين وانصدمت بالحقيقة المرة دي :(
بالنسبة لإحساسي بالحياة.. مش فارقة معايا اي حاجة أصلاً
لسة بحس نفسي صغيرة، لسة بحس نفسي "لسة بدري"
بس لما بشوف مثلاً واحدة صاحبتي بقت أم بتخض! يالهوي .. احنا كبرنا يا جدعان
لما اشوف مثلاً واحدة مواليد 92  وخلاص هتتخرج كمان كام شهر.. بتخض!
بالنسبة لي مواليد تسعين دول أطفال لسة أصلاً !
لما بشوف بنت جيراننا اللي لسة كانت بتلعب عندنا من وقت كأنه امبارح.. بقت في ثانوي
بردو بتخض!
رغم إن حياتي مش واقفة.. بيحصل فيها حاجات كتير
بس انا جوايا حاجة لسة حاسة إنها لسة صغيرة
مش عارفة دا حلو ولا وحش ... بس هو غريب

# 20
فاضل لي 20 دقيقة ويجي ميعاد شغلي :(

# 21 
السن القانوني دا تبليه وتشربي ميته : D

# 22
أكتر سنة في عمري كبرتني، وعجزتني :(

# 23

اصطبحنا واصطبح الملك لله :D
أما نشوف :)


10 بوينتس أوف فيو:

Baskouta يقول...

Happy Birth Day ya gamila
:)

حضرة الظابط يقول...

احم احم
سلامو عليكو

البوست كبير ومتنوع قوي
بس انا بيتعبني الكلام اللي هو جواني ده

بقالي كتير مرغتش مع حد وطلعت اللي جوايا
دي نعمة كبيرة قوي

المهم انتي اخبارك يا سارة
يارب تكوني بخير

سلامو عليكو

P A S H A يقول...

كل سنة وانتي طيبة يا سمو الأميرة
:))

мαησηα يقول...

فاضلك 2 وتبقى كملتى العمر الفضى :)

العمر كله ليكى يا حبيبتى

عاجبنى البوست ومش عارفة اقولك ايه ؟!!

انا كمان يوم 6 ابريل افتكرت انه عيد ميلاد عبد الرحمن بس معرفش ليه ماقولتش :)

ولا جبت سيرة :)

العمر كله ليليكى وليه يارب

بحبك قد مابحب كريم :)))))))

мαησηα يقول...

فاضلك 2 وتبقى كملتى العمر الفضى :)

العمر كله ليكى يا حبيبتى

عاجبنى البوست ومش عارفة اقولك ايه ؟!!

انا كمان يوم 6 ابريل افتكرت انه عيد ميلاد عبد الرحمن بس معرفش ليه ماقولتش :)

ولا جبت سيرة :)

العمر كله ليليكى وليه يارب

بحبك قد مابحب كريم :)))))))

мαησηα يقول...

فاضلك 2 وتبقى كملتى العمر الفضى :)

العمر كله ليكى يا حبيبتى

عاجبنى البوست ومش عارفة اقولك ايه ؟!!

انا كمان يوم 6 ابريل افتكرت انه عيد ميلاد عبد الرحمن بس معرفش ليه ماقولتش :)

ولا جبت سيرة :)

العمر كله ليليكى وليه يارب

بحبك قد مابحب كريم :)))))))

موناليزا يقول...

عقبال110 سنة يا سارة :)
وكل سنة وأنتِ بألف خير

مامة مازن يقول...

ساااااااااااااااااارة
يا كوكى كل سنة وانتى طيبة يا حبى

شوفى بقى اكبر منك بيوم يعرف عنك بسنة طب انا اكبر ب10 سنين احسبى انتى بقى السن له حكمه يا بنتى
هههههههههههه
وحشانى يا سارررووورررتى

http://im24.gulfup.com/2012-04-14/1334419121911.jpg


http://im24.gulfup.com/2012-04-14/1334419121912.jpg

Serenity :) :) يقول...

جميل زي العادة يا سارورة :)
في شوية ملحوظات كده أخدت بالي منها:
أنا شبهك ف حتة اللهوجة دي شوية وإني مش بستمتع بأي حاجة بعملها حتى النخاع
حاجة تانية..جميل أوي إنك تعملي قائمة بأمنياتك كل سنة جديدة :) ...هجربها ^^
العيال اللي معايا ف الكلية عيال ندلة..آخرهم كل سنة وانتِ طيبة ^^
ساعات بحس إني كبرت بسرعة أوي وأقول سها اللي كانت عيلة أول امبارح بقت ف الكلية ^^
مين أنتكة؟
آخر حاجة...الكل بيقولك كل سنة وانتِ طيبة وأنا زي الأطرش ف الزفة...هو عيد ميلادك إمتى بالظبط؟ ^^
سها :)

Serenity :) :) يقول...

جميل زي العادة يا سارورة :)
في شوية ملحوظات كده أخدت بالي منها:
أنا شبهك ف حتة اللهوجة دي شوية وإني مش بستمتع بأي حاجة بعملها حتى النخاع
حاجة تانية..جميل أوي إنك تعملي قائمة بأمنياتك كل سنة جديدة :) ...هجربها ^^
العيال اللي معايا ف الكلية عيال ندلة..آخرهم كل سنة وانتِ طيبة ^^
ساعات بحس إني كبرت بسرعة أوي وأقول سها اللي كانت عيلة أول امبارح بقت ف الكلية ^^
مين أنتكة؟
آخر حاجة...الكل بيقولك كل سنة وانتِ طيبة وأنا زي الأطرش ف الزفة...هو عيد ميلادك إمتى بالظبط؟ ^^
يا ترى هو نفس اليوم اللي كتبتِ فيه البوست؟
سها :)

المتابعون

اعتبرها بيتك ♥

وِش القفص

خليك ورايا

دليفري..