لعلمك

لعلمك

إقرأ لي

دخلوا بكليك شمال :D

Blog Archive

الخميس، أبريل 19، 2012

postheadericon 2 X 1

ملحوظة: كل الكلام اللي هنا وجهة نظر شخصية بحتة، من مواطنة عادية جدًا، مش محللة سياسية ولا خبيرة استراتيجية، من الآخر.. دي وجهة نظري باختصار في حازم أبو اسماعيل.
مش مطلوب من حد يآمن على كلامي، مش مطلوب من حد يتفق معايا، مش مطلوب من حد يعتبر كلامي دليل على أي حاجة..

- امتى سمعت عن أبو اسماعيل؟؟

* في ليلة من ذات الليالي، سنة 2011 قررت اسمع راديو تاني، من باب استعادة ذكريات المذاكرة، لقيت إذاعة الشباب والرياضة، مستضيفة واحد، بتقول مرشح محتمل للرئاسة.. اسمه "حازم صلاح أبو اسماعيل".
أنا كـ واحدة عايشة في مصر، وأزعم إني متابعة إلى حد ما اللي بيحصل في البلد، كانت أول مرة بالنسبة لي اسمع اسمه.
لكن فوجئت في أول دقيقتين بيه بيقول، إن مافيش حد في مصر ما يعرفنيش !!! 
(عودة إلى مرحلة 99.9 % ) !!!
طبعًا اتريأت عليه! طالما بتقول كده وانا ما اعرفكش، يبقى يا إما أنا (المواطنة سارة) ماحدش! ، يا إما مش في مصر، يا إما انت بتبالغ!

* في نفس الحلقة، أتحفني بعدد رائع من الآراء الأروع في المرأة ! - كعادة معظم المتأسلمين، كل مشاكل الكون في المرأة !! - أتحفني بآراء رائعة عن إن الست مش بتشتغل إلا للحاجة المادية ! (رغم إن امه دكتورة )، وإنه مش هيطلع قانون يمنع عملها، لكن مش هيخليها محتاجة تشتغل، ( ومش عارفة كل الوظائف اللي لازم ست تشتغل فيها دي هيعملوا فيها إيه )، وإن عمل المرأة هو سبب مفسدة البيوت، ( رغم إن امه كانت بتشتغل)، وإن الراجل مش مسؤول عن تربية الولاد، الأم هي المسؤولة الوحيدة عن كده!!
وغيرها كتير من الآراء اللي خليتني أشد في شعري وانا بسمع فعلاً !! 

* سمعت عدد لا نهائي من كلمة "أنا"، ثقة مفرطة بالنفس، واصلة للغرور ! لدرجة إن المذيعة سألته في حاجة قالها انتِ بتكلمي رئيس مصر القادم حاسبي على كلامك !! 

(ملحوظة دورت جاهدة على الحلقة للأسف مش لاقياها ياريت لو حد عنده اللينك بتاعها يبعته، أنشره علشان يكون الكلام موثق)

خلاصة الموضوع، بعد الحلقة انطباعي عن الشخص دا كان يتراوح ما بين (زفت - منيل بنيلة)
ودا يثبت ذكاء سياسي ما حصلش! لما تفقد شريحة مهمة زي المرأة في المجتمع وانت عايز تكون رئيس لدولة، مش للرجالة بس يبقى انت فعلاً عبقري!!!

- ليه رافضة أبو اسماعيل؟؟
السؤال بصيغة آل أبو اسماعيل ( لماذا تخافون من تطبيق شرع الله؟ ماذا رأيتم من الله حتى تكرهون شرعه ؟ )

* والسؤال جواه الإجابة بالظبط ! 

- أولاُ: لأن مافيش حد هيجي هيبقى هو ممثل شرع الله في الأرض
- ثانيًا: اللي خايف مش خايف من شرع الله، خايف من اللي بيقولوا إنه شرع الله !
- ثالثًا: لأن الخلط الرهيب دا، والكلام باسم الدين، هيخلق نظام ديكتاتوري أصيل غير قابل للنقد، ونقده هيعتبروه نقد لـ شرع الله!
(حدث بالفعل إن واحد كاتب على الفيس بوك كلام خالي تمامًا من أي سخرية، ولا شتيمة، ينتقد فيه فقط موقف أبو اسماعيل فكان الرد من أحد "أبناء أبو اسماعيل" "إنت يا إما مش مسلم يا مش مصري(!) حسبي الله ونعم الوكيل فيك "

- رابعًا: أبو اسماعيل نفسه شخصية - زي ما وصلني من انطباعات من خلال اللقاءات اللي شفتها ليه - مغرور جدًا، معتقد تمامًا إنه الحل الوحيد والفظيع لمشاكل مصر.. شخصية بالغرور دا والاعتزاز الرهيب بالنفس وبرأيه هتتقبل نقد إزاي؟؟؟؟؟؟؟؟؟

- خامسًا: بشهادة اللي بيفهموا في الاقتصاد الراجل هيودينا في ستين داهية ! أنا ما بدعيش الفهم في الاقتصاد، لكن لما الناس اللي بتفهم، فندت برنامجه الاقتصادي اكتشفت انه كارثة ! منتهى الرجعية والسطحية.

- سادسًا: التشبث الفظيع، والإصرار الرهيب دا على الكرسي مش مبشر نهائيًا، لا بإنه هيكون في تداول سلطات، ولا بإنه مدرك المسؤولية المقبل عليها!!
أنا لو مكان أي مرشح للرئاسة أبقى مرعوبة من المسؤولية اللي انا مقبلة عليها، ولا هو فاكر نفسه أحسن من سيدنا عمر؟؟؟
اللي فعلاً فاهم معنى المنصب دا صح ما يبقاش منشكح في كل لقاء وفاتح بقه من الودن للودن وهو بيتكلم ويقول "أنا رئيس مصر القادم"!!

- سابعًا: المفترض إنه مرشح إسلامي، إذًا إنت أكيد مؤمن إن الحجاب فرض، في دعايته الانتخابية.. مالقاش أي مانع إنه يستخدم بنت مش محجبة علشان تقول "هنتخب أبو اسماعيل علشان مش هيحجبني غصب عني".. إذن.. إما انت مقتنع إن الحجاب مش فرض، ( على عكس اللي قاله في برنامج تليفزيوني ) إما انت مستعد تعمل حاجة مش مقتنع بيها علشان توصل لغرضك!! 

- ثامنًا: من يوم استفتاء الدستور وأنا أصلاً مش طايقة لا الإخوان ولا السلف، علشان هم السبب في تشتت الميدان لحد النهاردة وكل اللي حصل لنا، لأنهم روجوا لفكرة  "نعم للدين" ! وهم اللي بعدها اتخلوا عن الميدان، ونزلوا مليونيات لدعم المجلس العسكري، وهم اللي فرطوا في دم ولادنا وأعلنوا الولاء للمجلس العسكري، وهم اللي فرطوا في عرض بناتنا بردو إرضاءً للمجلس العسكري..
الناس دي اللي شوهت صورة الثوار والنشطاء فقط لأنهم قالوا "لأ للدستور"
كل دا علشان "مصلحتهم وبس" دلوقتي
بعد استبعاد ابو اسماعيل والشاطر افتكروا ان كان في ثورة في البلد دي، وافتكروا ان نظام مبارك لسة بيحكم، وافتكروا ان التظاهر ضد المجلس العسكري مش حرام شرعًا، وافتكروا كل دا إذا فجأة كده!!!
النقطة دي يفسرها المقال دا باحترافية (أولاد أبو اسماعيل .. للفاشية شروط )  - الرابط هيفتح في نافذة جديدة علشان كارهي هش من هنا يا حرامي D: 
إذن الناس دي بتفضل مصلحتها على مصلحة الوطن! طب ازاي انتخب منهم رئيس؟؟؟؟
إزاي انتخب حد كان رد فعله على منتقديه "موتوا بغيظكم" اللي هو أنيل بكتير من "خليهم يتسلوا"!!!
كتير بعذر الإخوان والسلف على اللي هم فيه، نظرًا لإقصائهم سنين.. لكن دا مش معناه إني اودي البلد في داهية لأنهم محتاجين يتأقلموا نفسيًا مع فكرة إنهم بقم بيتعاملوا مع المجتمع كله مش جوا الجماعة وبس!!
كمان الموضوع مش موضوع دين وشريعة، خاصة بعد ما الإخوان نزلوا بالشاطر، طلع فورًا بوستر "رشحوا الشاطر احنا هنرشح الأشطر)

- تاسعًا: بخصوص جنسية والدته، أولاً موقفي من الشرط دا متذبذب.. ساعات أحسه منطقي، وساعات أحسه ظالم، لكن أيًّا كان رأيي فيه، هو قانون قائم، وموجود ولازم يحترم زي ما بيسري على الجميع.
دا لو عايزين فعلاً نأسس لدولة قانون ونرجع هيبته تاني، مش نعيش زي الأول...
المهم.. بغض النظر عن أي حاجة، وبغض النظر عن إن اللجنة المشرفة على الانتخابات الرئاسية - عفوًا في الكلمة بس هو دا التعبير الوحيد المناسب - ملعوب في أساسها، واضح جدًا إن الأدلة صحيحة! خاصة بعد الجعجعة المطولة، والحشد، والحسبنة، والدعاء على اللي ظلموه، والعياط - حسب كلام السرساوي  - ونظرية المؤامرة، وإلخ إلخ.. كل دا من غير ما يطلع "مايُثبِت" اللي هو بيقول عليه !
إذن كل دي وسائل معروفة جدًا للغلوشة على الحقيقة ! اللي في مستندات رسمية طلعت النهاردة بتقولها.

هنا في كام تعليق:

الأول: محتمل جدًا، إن العسكر يتعاملوا مع مؤيدي أبو اسماعيل، المعتصمين واللي بيعملوا مظاهرات، وبيروحوا التحرير، زي ما عملوا مع معتصمي التحرير، ومجلس الوزراء، ومحمد محمود، وإلخ..
إذن .. لو انت فعلاً معاك ما يثبت، وساكت كل دا، ومعرض الناس دي للخطر، وللموت.. فانت إنسان غير أمين على مؤيديك أصلاً!
ومافيش أي مبرر للوضع دا

الثاني: لو انت فعلاً عايز من الترشح فقط، مصلحة البلد، يبقى تهدا، وتجتمع مع مؤيديك، وتتوافقوا على مرشح آخر، وتدعمه باقتراحاتك ورؤيتك وبوستراتك وكل حاجة علشان ينقذ البلد بناءً على رؤيتك (زي ما انت شايف إنك هتعمل)
خاصة وإن نزولك الانتخابات مش معناه الفوز، لأن دا معناه إنك بردو عايش في نفس نظرية الـ 99.9% !
لكن الإصرار الغريب دا على "شخص واحد" بيؤكد إن الموضوع مش موضوع مصلحة البلد!

تعليق تالت بقى، على جو.. أقسم، وحلف وعيط والكلام دا.. ما يأكلش عيش!
على كده نجيب مبارك يقسم لنا هو كمان إنه ما قتلش حد ونخرجه براءة وهييييييييييييه بقى!!
إذا كنا عايزين دولة محترمة، لازم نتعامل بالمستندات والورق وبس..
لو مظلوم، مافيش داعي للجعجعة اللي لا هتقدم ولا هتأخر، الحكومة مش هتقول انا زورت، علشان حازم عيط! 
لو مظلوم قول أنا مظلوم، وهروح اثبت حقي بس.. لكن لو اللجنة اتراجعت في قرارها علشان المظاهرات يبقى عفوًا بقى مش لاعبين!!
كده الحكاية بالأعلى صوتًا!!
وممكن مبارك يجيب ناس أكتر تتظاهر وياخدها بالأغلبية بقى!!

تعليق رابع:
الإيمان الفظيييييييييييع بإن الكون كله تآمر علشان يمنع حازم أبو اسماعيل من الترشح للرئاسة!
لإن أمريكا وإسرائيل ركبهم بتخبط في بعض علشان هو "اترشح"، لأنه هيقطعهم وهتموووووتي يا سوسو (إسرائيل)
ماشفناش يعني رد من أبو اسماعيل وأتباعه على مقتل الجنود ع الحدود على فكرة!!
إضافة إلى إن أمريكا أصلاً متأكدة إن نظام حكم زي نظام أبو اسماعيل هيودينا في ستين داهية، علشان كده متأكدة إنها بتتمنى له التوفيق من كل قلبها !

* موضوع  أبو اسماعيل دا بقى أظهر إننا سنحيا 2X 1  !

- البرادعي عميل، وهيقلع أمهاتنا الحجاب علشان اشتغل في أميركا، في حين إن أبو اسماعيل مظلوم، وهيطبق الشريعة وأمريكا خايفة منه وامه أصلاً أمريكية واخته عايشة هناك!!!!!!!!!!! 
- ألا صحيح لما هو خِطِر كده على أمريكا سايبين اخته هناك ليه؟؟ - 

- علاء الأسواني كان ابن ستين في سبعين لما قال لأ للتعديلات الدستورية، وكاتب فاسق وفاجر وهيروح جهنم حدف... لكن لما أعلن رأيه بصراحة، وإنه متضامن مع أبو اسماعيل وإن اللجنة مشكوك فيها بقى أخ فاضل وأستاذ وبقوا يستشهدوا بكلامه !!
- ياحلاوة- 

- إنك تنشر صور بنت مش محجبة على النت حرام، لكن لما تنشر صورة بنت مش محجبة بتدعم أبو اسماعيل دا مش حرام !

- إنك تقول كلام من غير ما تتأكد من مصدره عن أبو اسماعيل حرام، لكن لما تدعم أبو اسماعيل بكلام على لسان شخصية ما قالتهوش فمش حرام!!
(أي حد يقول حاجة ضد أبو اسماعيل فهو فاسق ويجب أن نتبين، لكن لو بيقول كلمة حلوة في حقه يبقى ربنا هداه ونور بصيرته)

وغيرها وغيرها مليوووووون موقف ازدواجي ابن تيييييييييييت، بيثبت حاجة واحدة بس.. هم مش شايفين غير اللي هم عايزينه، وعندهم استعداد يعملوا أي حاجة علشانه! 
واللي كده ما يفرقش كتير عن الحزب الوطني، وإن كان أسوأ لأنه كمان بيستغل الدين وبيشوهه


* للأسف دا بعض من كل اللي في قلبي من ناحية الموال دا.. ورغم إن الوضع فاقع مرارتي، لكن أنا مبسوطة.. لأنه كان لازم دا يحصل علشان الناس تعرف الحقيقة.. وحتى لو أبو اسماعيل دخل انتخابات ونجح وحاول يعيش بالمنطق دا واثقة إن الشعب مش هيسكت
مرحلة  ولازم نعدي بيها، للأسف كل ما بنتأخر كل ما الوضع بيتفاقم.. لكن قدر الله وماشاء فعل 

* ميرسي مقدمًا على الشتايم اللي هتوصلني :) الدليل المليون على الازدواجية المتمتعين بيها 

* بالمناسبة : ديننا بيقول، إن المؤمن ليس كذابًا ولا منافقًا ولا شتامًا ولا لعانًا :))

* بالمناسبة بردو: ديننا بيقول إن اللي بيكفر إنسان، هو بيفتري على الله وبيدعي عليه، بالتالي هو اللي بيكفر مش الإنسان اللي بيكفره :)

لينكات ع الهامش : 

الأحد، أبريل 08، 2012

postheadericon # 23



# 1

" بنتولد مش عارفين.. بنتولد مش خايفين"

بحاول أتقبل فكرة إني خلاص.. ما ينفعش أدور على الأمان تاني
لأني مستحيل هلاقيه! 
مستحيل أعرف اتطمن بعد كل العمر دا !
كل يوم بيعدي، بنعرف فيه أكتر، ونخاف أكتر.. كل ما نعرف حاجة نخاف زيادة
يا نخاف منها .. يا نخاف عليها.. يا نستناها تحصل واحنا خايفن تحصل، يا نستناها تيجي واحنا خايفين ما تجيش !

"بنتولد دفيانين.. بنتولد صافيين.. بنتولد صادقين.. كما زرعة خضرا في أرض طين"

# 2 

مش عارفة ليه بتطاردني.. " يا سنيني اللي راح ترجعي لي.. ارجعي لي شي مرة ارجعي لي .. وخديني ع باب الطفولة ..........."
بقالها أكتر من شهر.. رغم إني مش عايزة حاجة ترجع.. بالعكس.. أنا كل ما ابص ورا للسنين اللي فاتت أجري تاني لقدام، علشان أبعد عنها بأقصى سرعة ممكنة...
يمكن أنسى !

# 3 

مش عارفة الحالة اللي انا حاسة بيها من فترة دي هتخلص امتى؟
حالة رهيبة من الـ "مش بجد"
كل حاجة حاسة من جوايا إنها مش بجد !!
فرحة / خوف / وجع / نجاح / أمل / حب / إعجاب / مستحيل ........
كل حاجة.. كل حاجة حاسة إنها مش بجد! 
ومش عارفة أحس بحاجة ناحية أي حاجة بتحصل.. رد فعلي الأول على أي حاجة "دا مش بجد صح؟"
وما بصدقش لما حد يقولي إن دا بجد.. ما بصدقش حتى لما اشوف إن دا بجد
الحاجة الوحيدة اللي جد .. للأسف.. هي البرد !
# 3 - 2
أنا !
 أنا رقم 3 
الفرحة المكررة.. الدهشة المعدومة.. الحاجة اللي مش لازم.. فبتبقى حرة :)
دايمًا في قبلي اختيارين.. وانا الاختيار التالت.. اللي ممكن ما يجيش
واللي غالبًا .. بيكون الاحتمال المستبعد 
# 4 
الرقم اللي ماجاش.. اللي ساعات افرح انه ما جاش.. وساعات أزعل
ساعات أحس انه  كان هيفرق في الحياة، وساعات أحس إنه كان هيزيد الطينة بلّة
وعمري ما هعرف أبدًا أي إحساس فيهم الصح.. لأنه ببساطة.. ما جاش !

# 5 

زرعت بصلة :)
فرحانة جدًا بيها.. رغم إني زرعتها كبيرة.. ورغم إني ما ببذلش أي مجهود في إني أخلي بالي منها.. بس فرحانة بيها
كل ما أشوفها بتخضّر قلبي يخضَّر معاها :)
كل ما تتقسم.. فرحتي تتضاعف.. بقالي كتير ما شفتش ميلاد ! 

# 6 

6 / إبريل عيد ميلاد عبد الرحمن ابن جيراننا :)
مش عارفة عنده كام  سنة.. بس فاكرة كويس أوي إنه اتولد يوم 6 إبريل
عبد الرحمن هو ابن جيراننا اللي جه بعد صبر 14 سنة أو أكتر
لما جه بقى فرحة الشارع كله.. كان بالنسبة لنا تجسيد الصبر، المستحيل، الأمل، الإصرار
والفرحة اللي بجد.. اللي طعمها حلو اوووووووووووي بعد سنين مرارة :)

# 7

نظرية "الحصة الـسابعة"
نظرية اتوصلت لها مؤخرًا D:  بعبقريتي اللي مالهاش حل
نظرية الخطوة الوحيدة اللي فارقة بين التعب والراحة / بين وصولك لأملك، وتعبك في الوصول إليه
الخطوة اللي بيكون فيها بواقي عزيمتك، وفتافيت صبرك..
كنا دايمًا بكره الحصة السابعة.. خلاص بكون اكتفيت من كل حاجة في المدرسة
وتعبت مش قادرة استوعب حاجة تانية.. وحاسة إني قريب جدًا من الراحة / اللعب / الهزار مع اصحابي
كل اللي واقف بيني وبين كل دا .. الحصة السابعة !!
طبيعي جدًا أبقى كارهاها.. وطبيعي أكره المدرس اللي بيدرسها شخصيًا
وطبيعي كل ثانية فيها تعدي كأنها سنة !
إحساسي بامتحان آخر مادة، امتحانات آخر تيرم في الكلية، وآخر ربع ساعة في الشغل، وآخر كل حاجة فارقة في حياتي.. هو إحساسي بالظبط بالحصة السابعة !

# 8

عمري ما شفت كل العلامات عند دكتور العيون !!!
حاجة عبيطة بس فارقة في نفسيتي.. احساسك بإنك عاجز عن إنك تشوف حاجة قدامك، وحد قدامك عارف إنك عاجز عن إنك تشوفها!
ببقى مرتبكة كأني في امتحان.. كأني عاملة عملة.. احيانًا كنت بستعبط وبخمن علامة ولا اتنين  لإنقاذ ماء وجهي بس  :D

# 9

 إيه اللي انا عملته في نفسي وفيكم دا !!!

# 10

2010 هي أحلى سنة عشتها في حياتي... نفسي العمر كله كان يبقى زي أول 2010 وأواخر 2009
بس للأسف مافيش حاجة بتدوم :(

# 11

نفسي أتعلم الخط العربي أوووووووووووووووي

# 12

لسة نفسي في بيت، وباراشوت، وأمان، ودفا

# 13

نفسي أعيش في مدينة البط.. حتى لو هتبقى حياتي موسومة بالرقم 13 زي بطوط

# 14

واحشني رفعت اسماعيل أوي :)
واحشني فتى أحلامي العجوز العصبي اللي بيعرف يحب زي ما انا فاهمة الحب !

# 15

بحب أنتكة لأنه بريء.. ومش فاهماه.. ومش فاهمني.. بس بيحبني
بحب أنتكة لأنه غريب :)
وبحبه لأنه بيحسني.. وواثق في قلبي مهما حاولت أرسم قدامه وشوش :)

# 16
مش عارفة إمتى هبطل آخد الحياة بلهوجة
امتى هروق كده واستمتع بطعمها.. وطعم كل حاجة استعجالي بيخليها تعدي كأنها ما جاتش !!!

# 17

السنة اللي فاتت، حققت كل قائمة أمنياتي ما عدا حاجتين.. هم أهم حاجتين أصلاً، ولو اتحققوا مش هبقى عايزة حاجة تانية
السنة دي مش هحط قائمة.. أنا بس هدعي ربنا بحاجة واحدة.. تحقق الحاجاتين دول :)

# 18
رحت الكلية من كام أسبوع، وحضرت محاضرة لدكتور بحبه وبحترمه جدًا :)
كل ما كنت بطلع سلمة من سلالم الكلية، كنت بحس إني بصغر سنة
لما طلعت الدور الأخير.. اللي فيه القسم بتاعنا.. ولقيت نفسي لوحدي، وحاسة إني غريبة
حسيت كأني أول يوم في الكلية :)
وانا لوحدي.. تايهة ومتلغبطة.. مش عارفة رايحة على فين، ثقتي في اختياري مهزوزة إلى حد ما :)
بس عدت وعشت في الكلية أحلى سنين حياتي :)
دلوقتي.. مفتقدة اصحابي .. مفتقدة عيد ميلادي اللي كان بيتعمل في الكلية :) مفتقدة البلالين والفيشار والهدايا واللعب
والصور
يارب يفرح قلوبهم زي ما فرحوني ياااااااااااااااااااارب ♥

# 19
بصيت لروحي فجأة تعبت م المفاجأة :D
19 سنة أول سنة اتصدم فيها بسنين عمري.. من كتر ما حصلت تغيرات جذرية في شخصيتي وحياتي في سن18
كتير بحس إني واقفة عند السن دا.. وفضلت طول ما اانا عندي 19 فاكرة نفسي وبقول اني 18
لحد ما وصلت عشرين وانصدمت بالحقيقة المرة دي :(
بالنسبة لإحساسي بالحياة.. مش فارقة معايا اي حاجة أصلاً
لسة بحس نفسي صغيرة، لسة بحس نفسي "لسة بدري"
بس لما بشوف مثلاً واحدة صاحبتي بقت أم بتخض! يالهوي .. احنا كبرنا يا جدعان
لما اشوف مثلاً واحدة مواليد 92  وخلاص هتتخرج كمان كام شهر.. بتخض!
بالنسبة لي مواليد تسعين دول أطفال لسة أصلاً !
لما بشوف بنت جيراننا اللي لسة كانت بتلعب عندنا من وقت كأنه امبارح.. بقت في ثانوي
بردو بتخض!
رغم إن حياتي مش واقفة.. بيحصل فيها حاجات كتير
بس انا جوايا حاجة لسة حاسة إنها لسة صغيرة
مش عارفة دا حلو ولا وحش ... بس هو غريب

# 20
فاضل لي 20 دقيقة ويجي ميعاد شغلي :(

# 21 
السن القانوني دا تبليه وتشربي ميته : D

# 22
أكتر سنة في عمري كبرتني، وعجزتني :(

# 23

اصطبحنا واصطبح الملك لله :D
أما نشوف :)


المتابعون

اعتبرها بيتك ♥

وِش القفص

خليك ورايا

دليفري..