2008-04-09

عربية خبطت كلب !!!

كنت فاتحة البوست الجديد وناوية اعمل موضوع والله نسيت حتى هو عن ايه من الخضة ..
ناس كتير هتقول عادى ماهو بيحصل كل يوم عربية تخبط كلب ، بس بجد اللى كان يسمع صرخته
واللى يقعد يتخيل كم الالم اللى اكيد دلوقتى بيعانيه قلبه يتوجع عليه
والله الموضوع ماتافه ، ولا الكلب دا حاجة نكرة المفروض ما نهتمش باللى حصله
اولا سيدنا محمد - صلى الله عليه وسلم - امرنا نرفق بالحيوان
ثانيا : اللى خبطه دا بالجنون اللى كان ماشى بيه ممكن اوى لو ماحدش عاقبه يخبط ولادنا بكرة وممكن يخبطنا ويموتنا احنا نفسنا
بجد استهتارنا فى الحاجات الصغيرة هو اللى بيخلى الحاجات الكبيرة تحصل
ولو كان فى عقوبة ولو كان فى ضبط للمرور ماكانش حد اتألم ولا حصله حاجة
العيب فين وعلى مين ماعرفش ..
عارفة ان ناس كتير اوى هتقول طب ما كل يوم فى بنى ادمين بتموت من استهتار الناس دى
وهقولهم عارفة والله ، بس بجد صرخته فوقتنى من الاعتياد على الجمود والاستهتار بموت الروح والكائن الحى
اللى حاصل فى بلدنا ..

هناك 16 تعليقًا:

  1. طبعا انا معاكي في كلامك دة بس تفتكري احنا ممكن نفوق من استهتارنا دة ..... اشك

    ردحذف
  2. احنا مبنفقش غير بالصدمات فعلا
    بس مش صدمه كلب ولا بنى ادم واحد حتى
    احنا بنفوق على كارثه عبراه مثلا,اتوبيس,
    طياره وبنعد نهلل شويه وترجع ريما لعادتها القديمه
    وبجد انا عجبنى فيكى الرفق بالحيوان
    لانى كنت حاسس ان معدش غير انا ورئيس منظمه الرفق بالحيوان الى بيصعب علينا الحيوانات
    وياريت تحاولى تفتكرى البوست الى كنتى عايزه تكتبيه...خساره

    ردحذف
  3. عارفة ياسارة مش بس الحادثة دى اللى بتحصل للحيوانات احنا بقينا نعامل
    الحيوانات على انها حاجة جامدة ملهاش احساس ولا بتتألم واو قات كتير بنعامل البنى ادمين نفس المعاملة قسوة قلوبنا بقية فى كل شىء
    حتى بنكون قاسيين مع نفسنا مش عجيب استهتار السواق اللى خبط الكلب هى دى طبيعته قلبه قاسى

    ردحذف
  4. عارفه فى برامج اجنبيه كدا بتجيب ازاى الناس بتتعاون علشان تنقذ كلب ولا قطه والناس تبلغ البوليس ويعملوا هيصه ويفرحوا اوى اما ينقذوا الحيوان دا
    المفروض ان دا فعلا اللى يحصل فى الواقع بس متجيش فى بلد الانسان بيتقتل ويدهس فيها قبل الحيوان وتيجى تقوليلى نحترم الحيوانات
    الناس اما تلاقى حد بيحترمها الاول بعد كدا هتحترم الكائنات التانيه اللى ربنا خلقها
    بس لو كل واحد بدأ انه يحترم غيره هنبدا نتحسن

    ردحذف
  5. مشاعرك رقيقة جدا بجد
    تنفعي تبقى مذيعه
    بس انصحك بلاش تبقى مذيعه اخبار
    الى الامام دائما وربنا يوفقك

    ردحذف
  6. تخيلى ان صرخه كلب وجعتك
    تخيلى بقى صرخه شعب
    لا تعليق

    ردحذف
  7. الكلاب كتييييييييييييير



    تعال خد التاج ليكى انتى بس

    ردحذف
  8. مصطفى ، على فكرة كل يوم فى انسان بيفوق من الاستهتار دا ، بس بيفوق على كارثة وهى ان ابنه او اخوه او اى انسان عزيز عليه ممكن هو نفسه بتخبطه عربية بسبب استهتار حد .. صدقنى بنفوق بس بعد فوات الاوان

    ردحذف
  9. عمو احمد معاك حق ، بنفوق بس على الصدمات وياريتنا بنفوق فوقان حقيقى دا بيبقى زى صحوة الموت .. بالنسبة للرفق بالحيوان ، صدقنى كنت فاكرة نفسى مابقتش اهتم بس بجد لما بتشوف حيوان بيتعذب قدامك بتعرف انك فعلا لسة قلبك بيحن عليهم ، لأن عمر ما الحننان والرفق يتشالوا من القلب ابدا ..

    بالنسبة للبوست افتكرته الحمد لله بس بجد البرد شنيع فهأجله شوية لحد ما دماغى تشتغل مظبوط حبتين

    ردحذف
  10. صحيح يا سمراء احنا بقينا نتعامل مع الحيوانات كانهم مش بيحسوا ، كان الحيوان دا مش كائن حي .. رغم ان اصلا ربنا بيرحمنا علشان خاطرهم .. ربنا يهدى كل ظالم ويحنن قلب كل قاسى يارب

    ردحذف
  11. لولنلى سميالى : عارفة الفكرة اللى بتتكلمى فيها دى كنت كتباها فى بوست القوقع والقط وبغداد ، لكن فعلا لازم نرحم الحيوان علشان ربنا يرحمنا ، يعنى مش معنى مثلا ان واحد جه اهاننى فى الشغل اروح البيت اهين اهلى واقلهم لما يبقوا فى الشغل يحافظوا على كرامتى ابقى احافظ على كرامتكم فهمتى قصدى ازاى ؟؟

    وفعلا مظبوط جدا اننا لو بدأ كل واحد بنفسه هتتظبط العملية كتير

    ردحذف
  12. TheRiddle : ميرسى جدا ليك ، بس على فكرة اوعى تاخد مقلب ، ساعات كتير بقلب على الوش التانى ههههههههههه بس على البشر مش الحيوانات ، بالنسبة لموضوع مذيعة فانا بصراحة مش ناوية اكمل مذيعة ، باذن الله ناوية اكون فى بلاط صاحبة الجلالة ميرسى جدا ليك

    ردحذف
  13. صوت من مصر : صدقنى صرخة الشعل وجعااااااااانى اوووووووى ومن زماااااااان ، بس بردو الشعب دا هو السبب فى صرخة الكلب ، فممكن يكون دا انتقام الهى .. من اعمالنا صدقنى يا محمد

    ردحذف
  14. على رايك يا كفرواى الكلاب فعلا كتير .. بس كلاب الحيوانات تستحق الرحمة .. بالنسبة للتاج حاضر هوااااااااا هتلاقينى اخدته اصلى بموت فى التاجات ههههههههههه

    ردحذف
  15. بوستن جميل كالعادة، في ناس للأسف بتتريق لما الناس تعامل الحيوانات برفق، لكن الحقيقة إن اللي بيعامل الحيوان كويس أكيد إنسان كويس وزى ما بيبقى خايف على روح الحيوان، حيخاف على روح الإنسان
    تحياتي

    ردحذف
  16. والله معاك حق بجد ، اللى هيعامل الحيوان كويس هيعامل الانسان كويس وهيخاف على روح الانسان بردو .. بجد فعلا كلام مظبوط ، والرحمة ما بتتجزأش يعنى عممر ما هيكون فى انسان قاسى على الحيوانات وحنون مع الانسان بجد تسلم ايدك

    ردحذف

Say something...