2008-09-23

عمرك شميت ريحة كئيبة ؟؟

أغلب الناس الذكريات في دماغها مرتبطة بالصورة ..

بصورة معينة يعنى .. لكن انا العكس ..

أنا ذكرياتي مرتبطة بالريحة اوى وبالصوت ..

علشان كده ممكن أو في عز فرحتى اسمع صوت معين اكتئب ..

او اشم ريحة معينة - مش شرط تكون ريحة وحشة - اكتئب والعكس بيحصل ممكن صوت يفرحنى أوي ويطلعنى من حالة اكتئاب ..

يعني مثلاً بحس براحة غريبة أوى وانا بسمع برنامج ( بريد الاسلام ) اللي بيجي ع اذاعة القرآن الكريم

لأنه دايماً بيفكرني بأيام المدرسة لما كنت ببقى بلبس وبحضر شنتطى الصبح

ويبقى شغال وبفتكر دايماً لما كان القط بيقعد يلعب معايا ويعاكسنى وانا بحضر الشنطة ويخطف مني حاجاتى

و يقعد يجري ورا رباط الشوز علشان بيتحرك

و ياخد منى قلم او استيكة ويقعد يلعب بيهم واقعد انا بقى محتاسة جنبه بس مبسوطة اوووى

وريحة المطرة ساعة العصاري بردو بترفع معنوياتى اووووى ..

لما تكون الدنيا مغمية كده ياااااااه متعة .. انا ع فكرة من الناس اللي بتكره الشمس اوووووى ..

بعنى بكره جداً اشوف ضوء الشمس كده .. بحب الدنيا تبقى مغيمة كأنها ساعة المغربية أو تبقى ليل ..

فتخيلوا بقى الدنيا مغيمة كده والبرد بيلسع لسعة خفيفة كده وانا قاعدة اتفرج ع المطرة او قاعدة اشرب شاي واقرا في البلكونة والمطرة شغالة ..

متـــــــــــعة بجد ..

لأن الجو دا بيفكرني بأيام حلوة أوي وانا صغيرة ..

ايام اجازة نص السنة وقاعدة اقرا مجلة ماجد في البلكونة وبشرب حاجة سخنة

من الاصوات بردو اللي بتفكرني بذكريات حلوة ..

صوت ابتهالات الفجر اللي هي بتيجي في اذاعة القرآن بعد الفجر دي ..

يااااااااااه بعشقها بجد ..

يي بحب أوي اسمعها لأنها بتفكرني بزماااااااااااان لما كنا نسافر آخر ايام في رمضان كده ساعة الفجرية علشان نحضر العيد مع العيلة .. فتخيلوا بقى انا مش بحس بفرحة العيد لو ما سمعتهاش !!

اما بقى الحاجات اللي بتجيبلى اكتئاب فكتير اوى ..

صوت مثلاً برنامج (( براعم الايمان )) اللى بيجي ع اذاعة القرآن الكريم

ساعة الضهرية رغم انه مش برنامج وحش ولا حاجة

بس بحس بكآبة منقطعة النظير لما بسمعه - مهما كنت مبسوطة - ومش عارفة ايه السبب ؟!!

وكمان لو شميت ريحة صابونة تواليت مع ريحة سجاير .. بحس ان في مصيبة هتحصل ولو شميت ريحة ورق بيتحرق .. تخيلوا بقى نفسيتى ايام حرق قش الرز !!

ولما بسمع صوت دقات الساعة لأن دايماً لما بيكون في نكد والكل ساكت ..

ولا في حد مات والكل ساكت او قلقانين كلنا وخايفين ومستنين مصيبة

وساكتين مش بسمع الا صوت دقات الساعة فارتبطت في عقلي بالنكد والزعل

فلما بسمعها بكتئب وبخاف اووووووووووووووى

انا عارفة اني طولت عليكم بس الموضوع مش مجرد فضفضة وبس ..

الحكاية وما فيها انى عايزاكوا تركزوا شوية كده في اللى حواليكوا وتاخدوا

بالكم من الحاجات اللي بتأثر في نفسيتكم بالسلب او بالايجاب علشان تقدروا

تسعدوا نفسكوا او تتجنبوا الحاجات اللي بتضايقكم زيادة

يعني أنا مثلاً عارفة اني بنبسط أوي لما اسمع ابتهالات الفجر لما بلاقي نفسي

مكتئبة بحاول اظبط نفسيتى واسمع الابتهالات ولما اكون عارفة انى قلقانة

ومتوترة المفروض اتجنب الحاجات اللي بتزود توتري زي مثلاً صوت دقات

الساعة او ريحة الصابونة مع السجاير او برنامج براعم الايمان ..

وبكده نقدر نستغل نقاط ضعفنا ونحولها لنقاط قوة

هناك 25 تعليقًا:

  1. حلو قوى البوست
    و فكرتينى بحاجات جميلة .. نفسى ترجع تانى
    انا كمان من الناس اللى مش بتحب الشمس
    لدرجة ان واحد صاحبى فى مرة قالى : (( يا حلاوتك .. محسسنى انى مصاحب مصاص دماء )) .. ما علينا
    اللى فهمته بقى من موضوع ريحة السجاير و الصابونة ... ان فى حد عندكوا بيشرب سجاير فى الحمام
    ولا ايه ؟
    هههههههههههههه
    تحياتى

    ردحذف
  2. اة والله معظم الحاجات دى انا متفق فيكى معاها لانى بكرة ضوء الشمس جدا ولانى كمان ابيض فعينى بتدمع ووشى بيحمر وبمشى موطى راسى لتحت احسنلك متشوفنيش احسن وبحب زمان ساعة المغربية والدنيا مغيمة كدة اركب عجلة واعد الف مع النسيم البارد دة حاجة جميلة اوى


    وانا بقى بحب روائح غريبة يعنى بحب ريحة السجاير مع الصابون والسبرتو والدهانات والكولكتور وحاجات غريبة وومبطيقش صوت الساعة برضة هو وتكتكة عقارب الساعة والحنفية وهى بتنقط بس متهيألى دة من فيلم اجنبى قديم ومبطيقش برضة الدباديب والعرايس بحس انهم دايما بيبصوا عليا ومبنمش اطلاقا وهى فى دباديب فى الاودة بفضى الاودة منها تماما وانا جى انام واذاكر

    اية الرغى دة كلة انتى المفروض تعملى بوست اللى بيحبة واللى ميحبوش فاروق

    ردحذف
  3. يعنى انا فى حجات دائما بتحسسنى بالسعادة واهمها طبعا الدعوتين بتوع الحجة و انا خارج فى اى وقت وكمان ابتسمتها
    انا نفس الحكاية بعشق الشتاء والمطر والغيوم بس مش لدرجة مقت الشمس يعنى
    موضوع تجنب مسببات التوتر دى مش حيجيب نتيجة معاية لانى على طول متوتر

    ردحذف
  4. مش عارف اقولك ايه بس رجعتيني لزماااااااان اوي
    ايام ما كنت بروح ازور جدتي وانا اشم ريحة ياميش رمضان قبل ما رمضان يجي وازاي كنت بتفائل
    وريحة محلات العطارين المنطقة دي بتفكرني بزكريات جميلة اوي ويا جدتي الله يرحمها
    حاسس انها كانت موجودة بس وهي عايشة دلوقتي مش بقيت احس بيها بعد ما ماتت الله يرحمها
    ميرسي على البوست اللي رجعني لايام عمري ما نسيتها
    حسام

    ردحذف
  5. قشطة عليكي يا سارة .. طلعتي سمعية زيي .. دي حاجة جميلة جدا .. جزاكي الله خير على الموضوع الجميل والفكرة اللي كنتي عاوزة توصليها ..
    معذرة على كلمة قشطة .. أنا سمعتها النهاردة من واحد زميلي .. عجبتني قوي وقررت أجربها .. بس طلعت حلوة ..
    هي هي هي هي ...

    ردحذف
  6. السلام عليكم

    ازيك يا سمو الاميرة يارب تكوني بخير

    انا كمان من الشخصيات اللي الموود بتاعها بيتغير بتغير الاصوات والروايح

    يعني اضافة للايجابيات اللي قلتيها
    مثلا اشم ريحة هوا الريف
    اسمع قرأن بصوت حد رقيق
    اشم ريحة البارفان بتاعي ههه


    ومن السلبييات بقي
    مبحبش صوت الغراب بجد بيكئبني
    وكمان مبحبش صوت الميوزك بتاعت الاوبرا والصوات اللي فيها ومكن يكون ليه مدمنين بس انا الصوت العالي بيجنني

    وريحة الحجات المسلوقة بتدايقني

    يارب اكون كنت ضيف خفيف


    وكل سنة وانتي طيبة وعقبال مليون سنة وانتي بألف صحة وسلامة


    برقش

    ردحذف
  7. ازيك ياثوثه

    انا زيك مش بفتكر ذكرياتى بصور

    بفتكرها بصوت او ريحه زيك بالظبط

    وده على فكره بيختلف من شخص للتانى

    لأن فيه شخص بصرى وشخص سمعى وشخص حسى

    الحاجات دى كلها فى التنميه البشريه

    أما بقى بالنسبه للشمس فأنا عكسك تماماً

    الشمس دى ممكن تقلب يومى وتخليه اكتئاب

    لمجرد انى مااشوفهاش وعشان كده بكره الشتا

    ضوء الشمس عندى مرتبط بالتفاؤل

    واليوم اللى ماتطلعش الشمس فيه اعرفى انه هيبقى غم واكتئاب عندى

    بس موضوعك فعلاً جميل

    ردحذف
  8. البوست راااااااااااااائع ياقمر

    بس قبل أى حاجة .... أحب أقولك أنى بكره الغيوم جدا و بحس بخنقة غير طبيعية لما بشوفها
    و بعشق ضوء الشمس لانى بحس إن فى حياة و حركة

    عارفة أنا برضه الموضوع عندى بيكون بالريحة و الجو

    يعنى مثلا لما أشم ريحة الشاى بالبن اللى بالفانليا أفتكر الفصل التامن فى التاريخ
    ههههههههههههه
    لأنى كنت دايما بشربه مع الفصل ده مش عارفة ليه

    ريحة المناديل بتاعة فاين.بتفكرى بأحلى أيام حياتى لما كنت فى تالتة إعدادى

    و كمان ريحة المطرة بيتفكرنى بأيام الإمتحانات

    و حجاااااااات كتير من نفس العينة كدة

    بس اللى بيفكرنى أكتر بتكون الأغانى فلما بسمع أغانى مرتبطة بحاجة كويسة او وحشة جسمى كدة بيقشعر و بحس انى عايزة أعيط

    ردحذف
  9. حلو البوست دا
    فيه اختيارت جميله
    برامج بريد الاسلام
    براعم الايمان
    انا على فكره بحب البرامج دى قوى
    بس لما كنت بحب اقرا مجلات اطفال كنت بقرا مجله علاء الدين
    بشكرك ع البوست الرائع

    ردحذف
  10. كل سنة وانتى طيبة
    بجد عندك حق انا كمان ساعات بربط الذكريات بالروائح او بحاجات مميزة
    وكل ما الواحد يشمها او يسمعها بيفتكر الشخص او الذكرى
    بوست جميل احييكى عليه

    ردحذف
  11. انا برضه مش بحب الشمس

    و بمووووووووت فى ريحه و لون و طعم القهوه و الشوكولاته

    بجد تحفه

    وريحه الخمس خمسات

    و حاجات غريبه كده

    حلو البوست يا ساره

    ردحذف
  12. حيث انك بتحبي الراديو ارشحلك قال الفيلسوف الساعة 2 بعد نص الليل و لغتنا الجميلة

    الفكرة ان الحاجات اللي بتقولي عليها اكتر ما هي فيها راحة نقسية في حنين جميل ليها

    ردحذف
  13. مهيج الجماهير .. ارووووووووووب بجد عرفت منين موضوع حد بيدخن في الحمام دي ؟؟ اوعى تكون من المدخنين في الارض ههههههه .. بالنسبة للشمس .. انا بقى ناس كتير بتفتكرني مش بحب الصراحة علشان كده مش بحب الشمس .. بس مافيش اى علااااااااااقة بوتاتاً هههههههه نورتنى بجد

    ردحذف
  14. فااااروق ... بصررررررة انا كمان بحب ريحة الكروكتور والدهانات والسبرتو وريحة الماية لما تنزل ع التراب .. حاجات عبيطة كتيرة اوووووى هههههههههه

    بالنسبة للدباديب انا عكسك انا بحبهم اوى وبحس بأمان وسطيهم اكتر من البشر
    وبحب انام وهم جنبى ع السرير .. دا طبعاً في حالة انى تجيلى الجرأة وانام ع سريرى مش جنب اختى ههههههههه

    نوووووووورتنى يافاروق

    ردحذف
  15. رئيس جمهورية نفسى .. الله عليك بجد .. فعلاً انا لو خرجت من غير ما ماما تشوفنى ولا تدعيلى ولا تستودعنى عند ربنا بحس انى خايفة اخرج .. نووووووورتنى بجد وحاول تهدي اعصابك ماتاخدش كل حاجة عليها علشان بجد دا بيدمر الصحة ..

    ردحذف
  16. حسام .. الله .. الله بجد .. تصدق انا حاسة انى فاتنى نص عمرى علشان ما لحقتش اشوف جدتى والدة مامتى .. هى اللى كانت ست عسل كده وبتعمل كحك ولمة والبيت ريحته اكيييييييد كانت بتبقى خير .. مش عارفة اقول يابختك عشت ايام حلوة ولا الله يكون في عونك من وجع الذكرى .. ربنا يرحمها ويسكنها فسيح جناته .. كل سنة وانت طيب

    ردحذف
  17. الاء الشيخ ههههههههههههه اشطة عليكى يا الاء اشطة طالعة منك زي العسل ههههههههه .. منوووووووورانى ياقمراية بجد

    ردحذف
  18. برقش .. فعلاً صوت الغراب بيجيب اكتئاب والبوووووووومة .. تصدق عذرتهم لما كانوا بيتشائموا منهم .. نووووورتنى يا برقش وشرفتنى بجد

    ردحذف
  19. بسكوووووووووتتى وحشاااااااااانى

    انا سمعت عن موضوع سمعى وبصرى دا قبل كده فعلاً .. بالنسبة للشمس .. الحمد لله الشتا جاية وانا هتظبط بقى .. كفاية عليكى شمس لحد كده يا دودو ههههههههههههه

    ردحذف
  20. انا ودماغى .. ههههههههههههههه غريبة اوى على فكرة موضوع الفصل التامن تاريخ دا هههههههههههههه ماتفكرنيش والنبى بالمادة دى لحسن عندى منها حساسية ههههههههههه سبحان الله كارهي الغيوم جم ورا بعض .. انتوا اتفقتوا عليا ولا ايه ههههههههه

    ردحذف
  21. رومانسى .. انا كنت بحب ماجد وميكي جيب وسوبر مان وكده لكن علاء الدين كنت بتخنق منها اوى ههههههههههههههههههه نورتنى يا باشا

    ردحذف
  22. اهو دا عيبه .. وانتى طيبة حبيبتى منوووووورانى بجد .. ع فكرة ان احايانا بفتكر في الامتحان حاجات بالريحة تخيلى هههههههههه

    ردحذف
  23. ماجنوليا ههههههههههههههههه حلوة الخمس خمسات جديدة دى هههههههههههه

    وانا كمان بموت في ريحة القهوة بحب اشمها مش اشربها ههههههه نورتينى يا احلى بنوتة

    ردحذف
  24. محمد الكومى .. الساعة اتنين بيبقى شغال ع الشرق الاوسط برنامج اسمه شعر وموسيقى رووووووووووعة بجد وللاسف اذاعة مصر مش بتيجى عندنا :((

    نووووووووووورتنى بجد

    ردحذف
  25. كل سنه وانتى طيبه
    عيد سعيد عليكى وعلى المسلمين جميعا
    باليمن والخير والبركات

    ردحذف

Say something...