2008-10-24

رب " ضرة " نافعة

الموضوع دا للبنات بس .. أي جاسوس هقفشه هنا هخرب بيته
تعالوا يابنات اتلموا حواليا كده علشان ما اعليش صوتي ومافيش حد يسمعنا
دي اسرار حربية هي حاجة سهلة كده ..
كله تومام ؟؟
اوك نتوكل ع المولى بقى
بصي يا بنتى انتى وهي وهي .. طبعاً مافيش بني آدماية فينا بتحب الضرة ولا بتحب سيرتها اصلاً
لكن نعمل ايه في الرجالة وهم الندالة بتجري في دمهم
ممكن اذ فجأة كدة تلاقى نفسك ياعينى معاكي نص زوج علشان الافندي بتاعك راح اتجوز عليك
(( قفشششششششششششتك انت ياللى رامي ودنك هناك وبتقول ما هى اكيد قصرت .. حتى لو قصرت يا خويا دا مش مبرر ..
سمعاااااااااااااااااااك ياللي بتقول بتحرمي اللي ربنا حلله .. استغفر الله العظيم من اني افكر مجرد التفكير في انى اعمل كده .. بس شرع ربنا بيقول انك تقولها قبل ما تتجوز وليها مطلق الحرية في انها تكمل معاك او تطلق ))
نرجع لكلامنا يا بنات
فبما انه عمل كده من وراكى وممكن ما يرضاش يطلقك .. وانا بصراحة مش بشجع انك تطلقى وتسيبي جوزك كده لضرتك
حتى لو انتى كرهتيه خلاص عيشي معاهم علشان تقرفيهم ههههههههه او لو لسة عندك امل ان جوزك ربنا يهديه
عيشى معاه علشان تسترديه تاني
وبما ان الضرة خلاص في الحالة دى بتبقى امر واقع فلازم تستغلي الوضع الجديد وتخليه حاجة ايجابية ولصالحك
خدي عندك يا ستى
1 / قوليلها رغم انك اخدتى مني جوزى وحياتى بس خلاص دا بقى امر واقع ولازم نتقبله ولو حاربنا بعض احنا الخسرانين وهيروح هو يتجوز واحدة تالتة ونبقى زي حريم الحاجة متولي ,, فانا هعتبرك اختى وحبيبتى (( اكيد الكلام دا هيطلع منك بطلوع الروح بس عادى عادى اتقلي علشان ننفذ باقي الخطة )) ويومين كده وبما انك اختها لما يكون جوزك جايلك ابعتيلها العيال يقرفوها وانتى ظبطى بيتك وخلي شقتك 100 فل وعشرة واخر رومانسية وهداوة
2 / اطلبي كل اللي نفسك فيه ولو قالك ما اقدرش قوليله اومال بس قادر تتجوز عليا ؟؟ ماهو لو كان بيت واحد كنت قدرت عليه (( ذليه بمعنى اصح )) فلما تعوزى حاجة بعد كده زي الشطور هيجيبها وهو ساكت تجنبا ً للمحاضرة دي
3 / استغلي انه هو وهي بيبقوا اتنين وبس .. لكن انتى معاكي الاولاد وممكن تدخلي روح من المرح في حياتكم تخليه مش عايز يسيب البيت .. يعنى مثلا علمي ولادك لعبة لذيذة جدا تغمي عين حد منكم و تجيبي فاكهة مثلا عنب او تجيبي مثلا شيكولاتة وحد منكم يأكلها للي عينيه متغمية وهو يحاول يعرف مين اكله لو عرفه تغموا اللي اكله وهكذا .. طبعاً هم لسة اتنين بس مش هيعرف يلعبها معاها فهيحس بملل
4 / يوم تكوني عارفة انه عندها وتروحي متصلة بيها وانتى اختها وحبيبتها بقى .. تقوليلها انا مكسوفة منك اوي بس ماما تعبانة ولازم اروحلها والعيال لاخمنني ممكن تاخديهم عندك ؟؟ طبعا مش هتقدر تقولك لأ .. فبكده تضربي عصفورين بحجر واحد .. تخليها قاعدة زهقانة وقرفانة وهو مش هيلاقيها زى ما اتعود هادية وبتضحك .. وتخليه هو زهقان من العيال بردو لأنه سايبهم عندك يلاقيهم هناك .. ويستحسن يبقى الكلام دا مفجأة ليه علشان الاحساس بالاحباط بيعمل احلى شغل
5 / بما انه هيكون عندك يوم اه ويوم لأ ففرصتك انك تروقي شقتك برواقة وتشيكى نفسك برواقة وتعملي كل اللي نفسك فيه .. وتزوري الناس اللي كنتي مقصرة في زيارتهم وكمان فرصة لو كان قعدك من الشغل انك ترجعى للشغل تانى وتثبتى نفسك فيه .. هو هيلاقى نفسه بقى حد مشتت .. فجأة هيلاقيكي انجح منه و الناس بتحبك اكتر منه طبعاً لانك قايمة مع كل حد منهم بالواجب و فوق كل دا مش هتبقى تعبانة بالعكس هتبقى بتعملي كل حاجة من غير ضغط على اعصابك .. وهو في الاخر هيطلع خسران
6 / انتى طبعا مش ملاك والبادي اظلم .. في يوم تبقى عارفة ومتأكدة انها مشغولة وملخومة ومتضايقة وحالتها بلا وجوزك يجيلك ع بيتك في يومك قوليله لأ يا حبيبى انا حاسة انى لما وديت الولاد عندها كده ظلمتها والاحسن علشان ابقى مرتاحة وانت تبقى عدلت بيننا تروحلها النهاردة .. وخليه يروووووح بقى هع هع هع
7 / بما انها اختك وحبيبتك يعنى فانتى جيبيها عندك البيت وهو ع سنجة عشرة .. واقعدى ارغي معاها بقى اكنكم مافيش بينكم حاجة .. قوليلها على كام حاجة جوزك بيحبها وخليها تعملهم وطبعا هو هيبقى مبسوط وانتى كده اخدتى الامان .. بعد كده ابتكري بقى خليها تحسسه انه بقى في مورستان .. ولو جه يحكيلك قوليله دى غلبانة اعذرها اصلها ماتعرفكش زي ما اعرفك هو احنا بيننا اي كلام دي عشررررررة
احم احم كفاية كده لحسن انا حاسة ان في حد هيغتالني قريب
بقولك ايه النصايح الشريرة دي مش مضمونة لأن اغلبها مترتب على ان ضرتك تصدقك ودا رابع المستحيلات
بس اللي مضمون بجد انك تحاولي تحافظي على جوزك وتعيشيه كويس علشان مايلعبش بديله
لو لعب بديله بقى وانتى عاملة كل اللي عليكي يبقى يستاهل انك تتطلقى منه لأنك ساعتها تبقى خسارة فيه

هناك 22 تعليقًا:

  1. ايه الإفترى ده... حرام عليكى..
    ماكنتش أعرف انك جواكى ميول عدوانيه كده يا سمو الأميره...
    بدل الآعيب الشيطانيه دى.. خليكى انصح من كده وعامليه كويس عشان تحسسيه انه غلط وساعتها هيرجعلك لوحده من غير تعب..
    ماشى يا سمو الأميره المفتريه!!

    ردحذف
  2. هههههههه

    أحب أقولك إن الطريقة اللي إنتي إخترعتيها دي هتخلي الراجل يطلق الإتنين ويتجوز إتنين غيرهم خالص

    هتخربي بيوت ناس كتير كده .. خليكي محضر خير

    ردحذف
  3. هههههههه

    أحب أقولك إن الطريقة اللي إنتي إخترعتيها دي هتخلي الراجل يطلق الإتنين ويتجوز إتنين غيرهم خالص

    هتخربي بيوت ناس كتير كده .. خليكي محضر خير

    ردحذف
  4. هههههههههههه هنفتح جمعية حبوب المراءة

    والله نصايح جامدة بس المجروحة بجد مش هيبقي ليها نفس تبص حتي ف وشة

    والرجالة ياوختي ميملاش عنيهم الا التراب

    مني
    ماي هوبس

    ردحذف
  5. هههههههههه .. جدعة يا سمو الأكيرة .. مصيبة بقى لو ضرتي قرت البوست دا .. هتبقى هيصة .. تخيلي بقى يا سوسو اللي هيصحصل
    بس بجد ... أفكارك أكتر من رااااااااائعة ...
    تحياتي ليكي يا قمر ..

    ردحذف
  6. هالو ساره

    احنا جايين نعزمك على يعد ميلاد سمكه

    الحفله قريب

    متنسيش الهديه بقه

    باااااى

    ردحذف
  7. يا نهاااااااار أبيض ..

    بصي أنا أعمل كده في حاله واحده بس .. حاله أني أقرر الإنتقام ..
    أعمل كده وأجننه وبعدين أخلعه ..
    لكن أتقبل الأمر وأستحمله وهو متجوز عليا علشان مخسروش .. ده من رابع المستحيلات ..
    أصل بعيد عنك الحياه عندي .. أبيض أو أسود فقط .. بفتقد المرونه في التعامل في حاجات كتير ..
    ومبحبش حد يشاركني في حاجتي أقطعه
    وأكره للي يكدب عليا .. أبهدله ..
    بث يا ستي

    *** نبض الحياه ***

    ردحذف
  8. اما يجيبلك ضرة ابقى اتكلمى
    ههههههههههههه

    بلا وكسه

    ردحذف
  9. هههههههههههه والله ياقمرى انا شايفة انه مدام اجوز عليها يبقى فى ستين داهية معاية عيال اه بس مش مستعدة انى اعيش مع واحد خانى واجوز غيرى يبقى هو كده مبقاش يحبنى مدام انا مش مخلياه محتاج حاجة وسبنى واجوز غيرى يبقى هو مش يستاهل انى اعيش معاه اكيد هطلق واسيبة والولاد كده احسنلهم من ان باباهم وماماتهم يعيشو مع بعض وهما بينهم مشاكل ومش مستريحين لتصرفات بعض
    تسلم ايدك ياقمر

    ردحذف
  10. هههههههههههه والله ياقمرى انا شايفة انه مدام اجوز عليها يبقى فى ستين داهية معاية عيال اه بس مش مستعدة انى اعيش مع واحد خانى واجوز غيرى يبقى هو كده مبقاش يحبنى مدام انا مش مخلياه محتاج حاجة وسبنى واجوز غيرى يبقى هو مش يستاهل انى اعيش معاه اكيد هطلق واسيبة والولاد كده احسنلهم من ان باباهم وماماتهم يعيشو مع بعض وهما بينهم مشاكل ومش مستريحين لتصرفات بعض
    تسلم ايدك ياقمر

    ردحذف
  11. اسف يا سمو الاميره انا كنت معدى بالصدفه وسمعت طرطيش كلام
    بس اللى بتعميله دا حزب على الراجل الغلبان
    هيحرم اكيد يتجوز تالت بس براحه عليه شويه ممكن تكون مراته الاولنيه مطلعه روحه
    علشان كده بيروح يدور عن حب تانى وحنان تانى
    يعنى بزمتك هيروح يتجوز ليه مدام مراته الاولنيه محققه له كل حاجه

    ردحذف
  12. يخرب مخك . ااااااااهه .... تصوري كدة لو جوزي المستقبلي يتجوز عليا ... معتقدش اساسا ان دة ممكن يحصل !!! و لا ايه رايك

    ردحذف
  13. واحد من الناس : هههههههههه انا سمو الأميرة أه لكن دا ما يخلينيش ابقى غلبانة ومستكينة كده واسكت هههههههههه وبعدين على فكرة في رجالة ستاتهم بيبقوا مهنينهم وبردو بيروحوا يتجوزوا يبقى دا يستاهل خططي الجهنمية ولا ما يستاهلهااااااش بقى ؟؟

    ردحذف
  14. يامراكبي : ههههههههههههههههههههههه عادي بقى ماهو لما هيتجوز اتنين غيرهم هيلاقيهم بينفذوا نفس النصايح فمش هيلاقى حد تاني يتجوزه ههههههههههه

    ردحذف
  15. منمن ماي هوبس .. هههههههههههههههههه حلوة جمعية حبوب المرأة دي .. معاكى حق بجد في نقطة انها لو مجروحة مش هتطيق تبص في وشه .. دا انا لو جوزي بس عرفت ان في واحدة غيري عجبته واتمنى مجرد التمنى انه يتجوزها هحس ان في حاجز اتبني بيني وبينه

    ردحذف
  16. الاء الشيخ .. ازييييييييييك يا لؤلؤتي .. معاااااااكي حق تصدقي في موضوع ضرتك دا .. بس اقولك متهيألي لو اي واحدة قرت البوست دا هتخاف تبقى ضرتي هههههههههههههههه

    ردحذف
  17. اهالينا زهقوا يربونا (( مش عارفة انا اشمعنى اهلي لسة ما زهقوش ههههههههه )) كل سنة واحلى سمكة طيبة انا مش عارفة اتاخرت ولا ايه بس كنت مسافرة ويادوب بدخل احط الكومنتات .. بس اكييييييييييد هديتى (( اللي ليا عندها يعنى )) هههههههههه موجودة ولا ايه ؟؟

    ردحذف
  18. نبض الحياة منووووووووووووورة يا بنوتة .. تصدقي وقعت من الخطة حكاية اخلعه دي .. الله ينور عليكي يابنتى ههههههههههه .. معاكى حق في انك ممكن ما تقبليش بس كونك عايشة في الحياة يا ابيض يا اسود مافيش مرونة دا هيتعبك جدا في حياتك

    ردحذف
  19. كفرااوى وانا ليه استنى لما تجيلى ضرة يا خويا انا بقدم السبت هههههههههههههه

    ردحذف
  20. موني : كلامك في الجون والله فعلاً دا احسن للأولاد من حياة مليانة حروب اهلية وخطط وحوارات غريبة كده

    ردحذف
  21. رومانسي : ماتتأسفش يعنى هي جات عليك انت يا عيني .. مش شايف كام راجل دخلوا قبلك ولا كأني قولت حاجة هههههههههههههههه .. صدقني يا رومانسى صدقني بجد افتقاد الحب والحنان مش مبرر الا اذا نبهها وهي ما اتغيرتش دا اولا ً ثانيا صدقني في رجالة بتتجوز فراغة عين مش اكتر

    ردحذف
  22. صانعة الاحلام : يا مأمنة للرجال يا مأمنة للماية في الغربال اوعى تطمنى اوى كده يا كوكو لحسن دول صنف مالوش امان ههههههههههه حلو دور ستو الحاجة دا لايق عليا ههههههههههههههههههه

    ردحذف

Say something...