2010-01-19

ما تقَاوحِش



لما تحس انك زهقان .. تعبان .. مخنوق .. متضايق


بسبب أو من غير سبب


ما تقَاوحِش .. ما تحاولش تقول انا كويس


أنا تمام ..


ما تحاولش تغصب على نفسك وتضحك


إستسلم ..

إدي لنفسك فرصة تحس إنك اديتها حقها من الزعل


علشان لو حاولت تقنع نفسك انك كويس وانت بجد من جواك مش كويس


هتتفتفت من جواك .. وتنهار مرة واحدة


وإنهيارك هيبقى بجد صعب أوي .. وعلى اهون سبب

 - تجربة حياة

"إن الإستسلام للحزن احيانًا أشجع من مقاومته، بعض الأحزان لم تأتِ لتقاتلنا ، بل لتعتصم حول جراحنا أمام الأقدار . "

محمد حسن علوان

هناك 28 تعليقًا:

  1. جميل

    بس المشكله ان الواحد بيمر بالحاله دى كتير

    يعنى كده هقعد طول الوقت مكتئب

    ردحذف
  2. ياالله ... تسلمي يا ساره
    كلامك في الجون ...
    لكن مش معنا كده الزعل يخلينا محبطين لازم يفضل عندنا أمل وثقة في نفسنا وفي بكره وقبل ده كله توكلنا على ربنا.
    تدوينه جامده يا اميرتنا ساره.

    ردحذف
  3. طب لو الاحزان دي غلسة وتلمة ومعندهاش دم... والواحد مستسلملها بقالوو كتير... وهي (((برضك))).. مش عاوزة تغوور...

    يكون ايه العمل بقي؟؟؟؟؟

    ردحذف
  4. مش عارفة حضرتك كنت مستخبية فين من و قت ما بديت التدوين اصل المدونة جميلة و المحتوى اجمل و حاجات كدة كدة كلها على بعضها جميلة
    المهم اننا وصلتلك و مش حسيبك متابعة متابعة للمدونة و ملسوعة معك و لو اني مش فاهمة الكلمة اوي

    المهم نجي للبوست انا معك فعلا في اننا ندي للزعل الوقت الكافي عشان منسيبش حاجة في قلبنا ممكن تكون سبب في انفجار البركان
    و كمان لما بندي الزعل حقه لما بيجي الفرح بنحس بيه اوي

    و بس خلاص

    و سلالالام

    ردحذف
  5. عندك حق في كل اللي قولتيه
    فعلاً كتير الواحد يضغط على نفسه عشان يضحك
    و في الآخر ينفجر
    و يبقى مش فاهم نفسه
    " هو انا انفجرت ليه ؟؟؟ "

    فعلاً بنحتاج كتير مساحة نفهم فيها نفسنا
    نتفاهم معانا و نفهمنا
    و مساحة حرية لينا بعيد عن كل اللي حوالينا

    فعلاً
    بوست جميل جداً
    تسلم إيديكي
    ^ـ^

    ردحذف
  6. حلوه قوى المقوله الى فى الأخر دى يا سمو الاميره

    المشكله ان الأيام دى الحزن والغكتئاب بقوا فرض عين علينا بسبب ومن غير سبب رحم الله زمانا كان فيه الحزن والمسئوليه على أمراء المسلمين

    تحياتى

    ردحذف
  7. السلام عليكم
    قرأت التدوينة ، ولكن ما أريد وضع تعليق عليه هو قالب المدونة وليس التدوينة

    برجاء غيري القالب لقالب أخف لأنه يستهلك وقتنا حتى يكتمل تحميله

    دمتِ بود

    ردحذف
  8. مادري بس احس اني اخالفك الراي

    احس ان الاستسلام يخلي الحاله تزيد!

    ويخليها تقوى وتملك قدره اكبر

    على التمكن منا!

    ردحذف
  9. بس علي فكره
    حتي لوزعلان او مضايق او طهقان
    مجرد ضحكه او كمله ممكن تخرج الواحد من الى هو فيه
    و كفايه ان الضحكه ده حتي لو مجرد شكلا فقط امام نفسه
    هتحسسه بس ان لسه فيه امل

    ردحذف
  10. انا اول مرة ادخل المدونة
    بس بجد جميييلة
    و انا بحب الكلام الصغير و الل بيقدر يعبر بدل ال الرغي
    شكرا ليكي و تقبلي مروري

    ردحذف
  11. مبروك الإستايل الجديد ده
    ^_^
    حلوه قوي صوره البنت الصغيره الى تحت خالص
    الى عماله تقف و تقع ده
    هههههههههههه

    ردحذف
  12. انا اول مرة ازورك في مدونتك الجميله دي بجد بس كنت متابعه ليكي عالفيس بوك و بجد بتعجبنى افكارك جدا

    بوست جميل اوي اوي اوي
    و بجد افدتيني جدا لاني في موضوع الاحزان ده بذات كتومه جدا و بداري بالضحك علشان ما ازعلش حد و لما يجي عليا يوم و انهار مابلقيش حد يساعدني ولا يقف جنبي الا قليل اوي اوي

    بوست رائع من انسانه رائعه
    تحياتي

    ردحذف
  13. قبلاوي .. عارف يا قبلاوي بتمر بيها كتير علشان بتقاوحها .. لكن لما تيجي مرة تدي الأحزان والاكتئاب حقهم
    هتلاقي مرات تكرار الحالة دي قلت اوي

    ردحذف
  14. احمد فارس
    ربنا يكرمك ، ومعاك حق مش لازم نكون محبطين ولا ثقتنا في نفسنا تقل
    احنا بس هنزعل شوية ونبطل نمثل اننا مبسوطين
    ع الأقل نخفف عبء التمثيل من ع نفسيتنا اللي هي اصلاً تعبانة

    ردحذف
  15. أبو علي .. يبقى لازم بقى تقطع الهدنة وتقرر تغير في حياتك وتعمل حاجة مش روتينية
    :)

    ردحذف
  16. همسة حب
    حضرتي مين بس انا عيلة ع فكرة :)

    تسلمي لي يا جميلة كلامك دا شرف ليا والله

    وانتي جبتي نقطة ف الجون بجد
    لما بندي الزعل حقه هنعرف طعم الفرحة ع حق
    بجد نورتيني ياقمر :)

    ردحذف
  17. بنوتة بالظبط كده يا بنوتة بيكون انفجارنا غير مبرر لا لنفسنا ولا للي حوالينا
    والناس هتحس اننا بنتلكك او عايزين نتخانق وخلاص
    نورتيني بجد ياقمر

    ردحذف
  18. ابو كريم .. صدقني لو احنا عايزين نفرح هنتلكك علشان نفرح ونفرح ع اي حاجة عبيطة
    بس المهم نكون عايزين

    ردحذف
  19. ميرام زحلانة ليه بث يا جميل ؟

    ردحذف
  20. احمد شريف انا حاولت اغير القالب كل الدنيا اتقلبت والله وما كانش خفيف بردو
    فقللت عدد المواضيع اللي تظهر في الصفحة الواحدة
    لعل وعسى تكون خفيفة معاك
    :)
    وميرسي ليك

    ردحذف
  21. اقصوصة

    عارفة يا جميل .. هو ساعات ساعات
    بصي زي الامراض كده
    في امراض تكون عايزاكي تستريحي ف البيت وما تقوميش من ع سريرك علشان تقدري تخفي
    وفي امراض لو نمتي ف السرير هتتمكن منك

    ردحذف
  22. سبيدر مان : عارف امتى يا سبيدر مان ؟ لما تكون ضحكة من القلب مش لما تكون بتتكلف الضحكة او بتمثل انك بتضحك

    ردحذف
  23. حصان المرجيحة :
    ربنا يكرمك يارب دا كله من ذوقك
    بالنسبة للكلام المختصر فعلشان ماتتصدمش فيا انا احياناً برغي بصراحة :)

    ردحذف
  24. سبيدر مان :)
    الله يبارك فيك يارب كان عاجبني اوي وعجباني البنوتة دي بس لم يلاقي اقبال جماهيري عاااااااااااااااا :(

    ردحذف
  25. دودو نورتيني ياقمر وليكي واحد ميراندا من اللي من كتر اللمون بتلسع علشان اول مرة تنوريني :)

    عارفة يا دودو لو مش بتحبي تشتكي للناس حاولي تشتكي لربنا او حتى لدبدوب لعبة او لحيوان اليف انتي مربياه
    المهم تفضفضي علشان ماتنفجريش مرة واحدة

    ردحذف

Say something...