2011-07-22

أنا عندي ,, انت عندك؟


أكيد كلنا متفقين إن ربنا سبحانه وتعالى لم يخلق شيئاً عبثاً .. يعني كل حاجة ربنا خلقها ليها فايدة ، حتى لو احنا مش قادرين ندرك فايدتها

تمام ؟؟

متفقين .. 

طيب .. كلنا بردو متفقين ان كل انسان عنده راس .. مهما كان الانسان عنده اعاقة واتحرم من عضو من أعضاء جسمه ما بينفعش يتحرم من الرأس وإلا يموت .

تمام ؟؟

متفقين 

كل راس جواها " مخ "  اللي من ضمن محتوياته العقل .. بتتفاوت قدرات العقل  دا وآداؤه لكن هو موجود 

إذن .. بما إن كل واحد له عقله الخاص بيه يبقى دا معناه ان ربنا عايز كل انسان يفكر بعقله الخاص بيه ، وإلا كان ربنا اصطفى ناس معينة ورزقها لوحدها بمخ علشان تفكر بيه لنفسها ولغيرها .. وبما ان الناس التانية مش مطلوب منهم يفكروا يبقى مش لازم يبقى عندهم مخ !!


طيب ليه بقى في ناس معتقدة كده ؟؟؟؟ ليه في ناس متخيلة انها هي لوحدها اللي عندها عقل  ومن حقها تفكر لنفسها ولغيرها وتفرض اللي تتوصل له على غيرها ؟؟

ليه في ناس تانية متخيلة انها ما ينفعش تفكر بعقلها ولازم تعتمد على عقول ناس تانية وتعيش بناءً على ما توصلوا إليه ؟؟

ليه في المدرسة بيعملوا فينا كده دايماً ما ينفعش نطلع بالألوان برة  الحدود اللي حددوها هم ؟؟ 

ليه بعد كل درس يطلعوا هم الدروس المستفادة رغم ان دا من حقنا احنا .. من حقنا اننا اللي نحدد استفدنا ايه وفكرنا في ايه ؟

ليه دايماً السؤال بتاع ما رأيك ليه اجابة نموذجية واللي يطلع برة حدودها ما ياخدش درجة ؟؟

ليه  في بعض رجال السياسة   بيفترضوا ان مالكش مخ وبيفرضوا عليك اختيارات معينة ؟
ليه الأهالي هم اللي بيملوا استمارة التنسيق بتاعة ولادهم ؟؟

ليه رغم إن القرآن الكريم فيه 16 آية تحمل أمر صريح بالتفكير ، وآيات كتيرة أخرى بتتكلم عن العقل والتفكير والتدبر .. معظم رجال الدين بيعتبروا ان التفكير حرام ؟؟

ليه كل أولي الأمر مش بيقولوا لنا الحقائق بأمانة ويسيبوا لنا احنا حق التفكير في القرار وتنفيذه !!

ليه وليه وليه وليه .. مليون مظهر لانتهاك حق الانسان في " التفكير " 

أرجوك .. ارفض كل المظاهر دي .. واستخدم عقلك

هناك 12 تعليقًا:

  1. معاكِ حق يا لاسعة :D
    ليه الناس بتحجر دايمًا على أفكارنا؟
    ليه بيحسسونا انه معندناش مخ و لازم نمشي على خطواتهم ؟
    ليه دايمًا الأسئلة بتكون ليها إجابات و اللي يفكر يبقى غلطان ؟
    ليه و ليه و ليه ؟
    أسئلة كثيرة بلا إجابات !
    أشكرك على الطرح الجميل =)
    و في انتظار أمل التفكير ،،

    ردحذف
  2. انا مش لاسع لكن هقول رأيي .. استمري

    ردحذف
  3. ما هوا الناس اتعودت ع التبعية من صغرها

    زى ما انت قلتى كدة من المدرسة و من الأهل فخلاص

    الجزء المعروف بالمخ

    قاعد على جنب

    (:

    ردحذف
  4. جامد يااجمل بنوته لاسعه ومعاكى حق فى كل كلمة مش عارفه مش مديين الكل حق التعبير عن الافكار لا بالعكس بقى فى انتهالك للحقوق دى
    منتظرين جديدك يالاسعه:D

    ردحذف
  5. أسئلة كتيرة أووى و كلها للأسف مبنية على عدم التفكير
    التفكير ده أبسط حاجة بتميزنا كبشر .. ليه تبقى حرام ؟
    عجبنى طرحك للموضوع أوووى =)

    ردحذف
  6. مش عارفة والله ياسارة !
    كأنهم هما اللى من حقهم فعلاً يفكروا بس
    وكأن تفكيرهم هما بس اللى صح
    وأي حد تاني تفكيره غلط !
    مع إن كل واحد زي ما انتي بتقولي عنده مخ
    يعني كل واحد أفكاره مختلفة عن التانية ساعات بنبقى محتاجين أفكار
    وساعات هما بيبقى عندهم أفكار بتقهمنا الصح من الغلط فعلاً ..
    بس في ناس بتجبرك مش بتخيرك للأسف !
    ونتيجة لأن في ناس كتير أوي نسيت
    إنها من حفها تفكر بيسمعوا الكلام وخلاص !
    وده أسبابه كتيره أوي برضو :)

    ربنا يحميكي (f)

    ردحذف
  7. علمونا من صغرنا اننا نسمع الكلام وخلاص

    بجد انتى لمستى جرح كل المصريين

    عندى كلام كتير اوى تصديق على كلامك ده

    بس كنت مستنى منك الحل

    تحياتى

    ردحذف
  8. كل الناس عندها مُخ و المُخ واحد عند الكل .
    لكن مُش كل الناس عندها عقل ...ولو كان فيه عقل مُش كل العقول عاقله .
    لازم يكون هناك حدود لا نخرج عنها لكن ماهي هذه الحدود ؟
    ( وكُلا منها رَغداً حيثُ شئتُما ولا تَقربا هذه الشَجَرَهَ فتكونا من الظالمين )

    ردحذف
  9. سمو الاميرة سارة وحشاااانى جدا
    ازيك عاملة ايه فى الدنيا الغريبة العجيبة اللى احنا عايشين فيها دى

    حبيبة قلبى التفكير والفكر محتاجين وعى محتاجين قلب
    الوعى هيخلى على سبيل المثال المدرس يدرك ان تعبير التلميذ عن رايه اول خطوة على طريق الابتكار والتخيل والابداع هيخليه يدرك انه هيشغل مخ الطفل ده وهينمى مداركه ويمكن اكيد يطلع منه حاجة كويسه ممكن يبقى عالم واللا اديب واللا فنان
    القلب بقى هو مختصر مفيد للحب والاخلاص وووو
    الحب انه يحب التلميذ ده يحب الجوهرة اللى جواه اللى هى الانسانية اللى جواه التميز اللى ربنا خلقه جوه كل واحد فينا اوعى تفتكرى اننا كلنا زى بعض او اننا نتصنف واحد عبقرى وواحد عادى
    لا ابدا كل واحد فينا جواه حته منورة بتاعته هو بس
    والاخلاص مثلا اللى هو الاخلاص للفكرة نفسها انك تبنى انسان تنورله سكة توهب له فكره الاخلاص فى انك تعمل فرق فى حياته

    للاسف يا حبيبتى الحته دى وحتت تانية كتيييييييييييييييييييييييييير قوى غايبة عن التعليم فى بلدنا اللى المفروض يكون بيشجعك على التفكير والابداع واللى هى الفكرة الاساسية للتدوينة دى

    مريوم بنتى بتقولى كل ده رد
    معلش طولت عليكى بس فى ناس معينة بحب اسيب ندهم حتة من افكارى
    لكى منى كل تحية وكل عام انت بخير
    ورمضان سعيد وكريم عليكى يارب

    ردحذف
  10. مسز لاسعه...سلامو عليكو الاول

    كلامك فعلا تحسى انه نور منطقه كدا فى تفكيرنا مضلمه او مبندخلهاش من كتر التراب والعنكبوت اللى عشش جواها

    انما فى حاجه بئه...استخدام المخ فى المطلق كدا موش صح ميه فى الميه فى فترات كدا بيبقى لازم حد يفكرلنا...نتيجة خبرات عند الناس مش موجوده عندى...لان فى نفس الوقت انا عندى خبرات مش موجوده عند ناس تانيه فبيبقى لازم افكرلهم...يعنى حاجه كدا بالمعنى دا

    وضيفى على كدا ان فى حاجات مطلقه مش مطلوب استخدام العقل فيها اصلا زى ما حد قبلى ضرب مثل بالشجره...لو العقل اشتغل فى الوقت دا هيقول اشمعنا يعنى مهى شجره زى اى شجره ودا تفاح زى اى تفاح

    خلاص كفايه كدا مش هطول عليكى

    ردحذف
  11. ليه؟
    لإن نظام التعليم هنا بايظ
    ليه؟
    لإن الكبار دايما شايفين اننا لسة صغيرين
    ليه؟
    لانهم اتربوا كده
    وورثوا تقريبا الحاجات دى وبيطبعوها فينا عشان نكون كده
    ..
    استخدم عقلك
    حاضر..:)
    ^_^
    بوست جميل
    دمتِ مفكرة

    ردحذف
  12. اوبااااا
    تصدقى فعلا
    وجعتنى دى :|
    بس سلامتك يا دماغى :D

    ردحذف

Say something...