لعلمك

لعلمك

إقرأ لي

دخلوا بكليك شمال :D

Blog Archive

الأربعاء، أكتوبر 22، 2008

postheadericon كنت هموت من شوية







من شوية كنت راجعة من الكلية وراكبة ميكروباص


قدام في الكرسي اللى جنب السواق دا


وماشيين ع الطريق السريع


راح واحد ذكي ومتألق مزاجه هفه انه يقف فجأة


راحت الملاكي اللي وراه حودت شمال علشان ما تخبطش في الميكروباص اللى وراها


رحنا لقيناها قدامنا فجأة


راح الميكروباص بتاعنا


طاااااااااااااااااااااخ بوووووووووووم خبطها


واحنا اتنترنا لقدام


صاحبتي ياعينى اتعورت ورجليها اتخبطت بس الحمد لله انا تمام


انا وقتها - ويمكن لحد دلوقتى - مش متخيلة اللى كان هيحصل


لما شوفت اللى حصل في العربية اللى قدامنا بجد استغربت انى الحمد لله لسة سليمة


في لحظة ماكنش هيكون في سارة


في لحظة كنت هبقى ذكرى و حد ياتفتكروه يا متفتكروهوش


مش عارفة كنتوا هتزعلوا عليا ولا كنتوا هترتاحوا مني


بس متأكدة من انى كان هيبقى نفسى احقق ولو حلم واحد من احلامى قبل ما موت


وانى اعمل حاجة الناس تفتكرني بيها


الغريب بجد انى لسة امبارح كنت بقول لماما


احتمال عربية تخبطني قريب أو اتشل او يحصلي حاجة


ربنا يسترررررررررررررررر


كام حاجة كده ع الماشي :


طريق السنطة طنطا من أول السنطة لحد الطريق السريع بتاع طنطا


مافيش عليه ولا لجنة ولا أي حاجة


طبعا الراجل اللى كان السبب في كل دا طلع يجرى ولا حد عرف يعمل له أي حاجة


مافيش حتى نقطة مرور ع السكة



تانى حاجة .. لو لا قدر الله كان في اصابات كبيرة او كانت الحادثة اكبر من كده


كان اكيد الناس دى هتموت لأن مافيش ولا نقطة اسعاف وطوارئ قريبة مننا


تالت حاجة .. واضح فعلاً ان قانون المرور الجديد شايف شغله اوى

رابع حاجة .. ياريت كلنا ندعي لسواق الميكروباص ربنا يخلف عليه
لأنه ياعينى بجد هيتحمل تكاليف تصليح العربية الملاكى وهيتحمل تكاليف تصليح الميكروباص
دا غير انه اتعطل باقي اليوم وكمان ممكن صاحب الميكروباص يمشيه من الشغل
وهي بجد مش غلطته




23 بوينتس أوف فيو:

romansy يقول...

حمد الله على سلامتك
السرعه الجنونيه اللى بيمشى بيها السوائقين
وكمان عدم الالتزام بالمرور والاشارات
والاخطاء البشريه
دى كلها كانتهتضيع مننا اميرتنا ساره
فيه حاجات كتيره عاوزه تتظبط
بس نعمل ايه بس
اهم حاجه عودتك البيت بالسلامه
ومش تتدعى على نفسك تانى

واحد من الناس يقول...

اولاً: حمداً لله على سلامتك... والحمد لله انها عدت على خير...
ثانياً: هو الطبيعى بتاع جميع الطرق فى مصر..
لا وجود لنقط الاسعاف على معظمها...
يعنى لو حصل حاجه لا قدر الله زى ما انتى قولتى وفيه اصابات محتاج الاسعافات بسرعه للأسف مش هيلاقوا وحيكون المصاب مات وشبع موت..
للأسف الانسان عندنا مالوش تمن..
ومابنفقش الا بعد وقوع الكوارث ده اذا فوقنا..

~*§¦§ Appy §¦§*~ يقول...

اولا حمد لله على سلامتك يا حبيبتى
ثانيا العيب مش فى القانون العيب فى اللى بينفذوه
بصي من قوانين المرور العالميه انك لازم يكون فيه مسافه بينك وبين العربيه اللى قدامك كبيره كافيه على قد سرعتك وتكون كفايه لو اللى قدامك فرمل فجاه لاي ظرف فبما اننا غير العالم واكبر شعب يتحدي القانون فسوري بنمشى لازقين فى قفا بعض حفاظا على قفانا ومشيها قفانا هههههه
فالاتنين قانوني غلطنين اللى عدي وسواق الميكروباص واللى عربيته باظت على فكره طالما خبطه من ورا يبقى غلطان ومش بعيد اطلع انا كمان غلطانه والطريق وانتى وصحبتك اللى اتعورت هههههههههههه
الف سلامه عليها وعليكي

كأنني أنا يقول...

الحمد لله على سلامتك يا حبيبتي..
والله اتخضيت عليكِ جدا :( :(

ربنا يحفظك يا سارة ..

My Hope$ يقول...

الحمدلله الحمدلله الحمدلله
انها جت علي اد كدا
وخلي بالك من نفسك
ودايما قبل ماتنزلي من البيت
تقري دعاء الخروج
ولما تركبي موصلات
تقري
دعاء الركوب

ودايما في الطريق
اذكري ربنا علشان يحفظك

ومتقعديش ادام تاني
ماشي

وكفايياكي تبشري علي نفسك

وكفاياكي اللي بتعملية ماشي متنرفزنيش
ولما تفتحي النت كلميني
يلا
سلام

Dexter! يقول...

يانهار اسوح

حمدالله عـ السلامه يا سمو الاميره

اولا احمدي ربنا

ثانيا احمدي ربنا انهاجت علي اد تعويره لصاحبتك

والحمد لله انك سليمه



الحمد لله

MaGn0liA... يقول...

حمدلله على السلامه

الحمدلله انها جت على حاجه بسيطه كده

ربنا يحفظك

مـحـمـد مـفـيـد يقول...

حمدلله علي سلامتك

حاتم عرفه يقول...

يا ساتر يا رب.. خضتيني يا بنوتة..
أنا لسه حصلالى حاجة زيها في رمضان على كورنيش البحر.. والواحد بطل يخاف قوي زي زمان.. بس لأ.. لو حد عزيز عليه هايخاف طبعا..
ابقى خدى بالك بعد كدة.. وحرصي في السواقة.. يعني مايبقاش انتى والسواق..

يلا جت سليمة.. وألف سلامة على صاحبتك..
وحسبنا الله ونعم الوكيل في كل مقصر..

شفقة هانم واحسان بك يقول...

الف حمدالله على سلامتك يا قمر ....وبعد الشر عنك
انا عن نفسى ما اقدرش اعيش ومفيش الاميرة سرسورة
امال مين اللى يقرفنا ويرخم علينا ويخلينا نلسع؟؟
معلش وتعيشى وما تاخديش غيرها

أحمد منتصر يقول...

ألف سلامة يا سارة

أحلى حاجة ف تجربة الموت القريب إننا بنعرف قيمة الحياة :)

سمو الأميرة سارة يقول...

رومانسي .. فعلاً في حاجات كتييييير عايزة تتظبط بس ياترى مين يقدر يظبطها ؟؟ هنقول ايه
ابعت يااااااارب .. ميرسى جدا لذوقك يا رومانسي ربنا يكرمك يارب

سمو الأميرة سارة يقول...

واحد من الناس معاك حق فعلاً .. للأسف الانسان في مصر مالوش قيمة .. شكراً جداً لذوقك ربنا يكرمك يارب

سمو الأميرة سارة يقول...

آبي .. الله يسلمك يا حبيبة قلبي .. كانت هتوحشني المعارك بتاعتك يا آبي هههههههه .. بالنسبة للقانون فأنا فعلاً قصدي كده .. قصدي انهم مش بيعملوا بيه فهو عامل احلى شغل .. بينى وبينك اول مرة اعرف النقطة بتاعة المسافة بين العربيات .. بجد كل ما بتعلقي عندى بتفيدينى بجد يا آبي ..
و ايووووووون انا غلطانة لأني قعدت قدام واتهزأت في البيت تهزيئ للركب هههههههههه

سمو الأميرة سارة يقول...

كأنني أنا .. سلامتك حبيبتى من الخضة ما تقلقيش عمر الشقي بقي يا قمر ههههههه

سمو الأميرة سارة يقول...

حبيبتى منمن .. وحشتييييييييينى اخيرا نورتيني من تانى .. فعلاً معاكى حق لازم اقول الادعية دي ولازم اقول الشهادتين لأن ماحدش ضامن حاجة .. دا لولا ان ربنا ستر وان ماما بتستودعنى عند ربنا كل ما اجي خارجة كان زمان جرالي حاجة .. الحمد لله الحمد لله بجد .. من عونيا يا حبيبتى هفتح الميل علشان خاطرك ياقمر

سمو الأميرة سارة يقول...

دكستررررر .. كنت هترتاح من لماضتي وعنادي ههههههه يلا بقى ليك نصيب انى ازهقك ههههههههه ..

الحمد لله فعلاً مافيش كلام يوصف شكري لربنا بجد

سمو الأميرة سارة يقول...

مجنوليا .. فعلاً الحمد لله .. رب ضارة نافعة .. الحمد لله

سمو الأميرة سارة يقول...

محمد مفيد .. الله يسلمك يا ابو العبدين يارب

سمو الأميرة سارة يقول...

حاتم عرفة .. الحمد لله ان ربنا كتبلك النجاة كنت هفتري على مين في التاجات بس لو لاقدر الله بعد الشر يعنى حصلك حاجة هههههههه .. ربنا يكرمك يارب ومن عونيا اول لما اتعلم السواقة هبقى اخلي بالي هههههههه

سمو الأميرة سارة يقول...

شفقة هانم واحسان بك .. شوفتوا بقى قعدتوا تقولى السعى بيعد عننا السعي بعيد عننا لما كنت هلسع في عالم آخر ههههههههه .. ربنا يكرمكم يارب وما يحرمنى من طلتكم الحلوة

سمو الأميرة سارة يقول...

أحمد منتصر .. معاك حق بجد اول مرة احس بقيمة انى اوصل بيتنا

سمو الأميرة سارة يقول...

تعليق توضيحي بس .. رومانسي ومنمن ماي هوبس .. حسيتكم افتكرتونى وانا بقول لماما عربية هتخبطنى اني بدعي على نفسي .. لأ والله ابداً دا في حاجة حلوة أوى هتحصل ان شاء الله قريب فبقول لماما ممكن من الحسد يجرالي حاجة

المتابعون

اعتبرها بيتك ♥

وِش القفص

خليك ورايا

دليفري..